Ithute Kutlo ka ho Amohela Taeo
AK’U nahane u eme holima lefika le phahameng u le thabeng u e-na le boikutlo ba hore ka sebele u ka holimo ho lefatše. Ke boikutlo bo thabisang hakaakang ba tokoloho!
Empa tokoloho ea hao e lekanyelitsoe e le ka ’nete. Molao oa tlhaho oa khoheli o lekanyetsa mohato o mong le o mong oa hao haholo; mohato o le mong o fosahetseng o ka fella ka tlokotsi. Ka lehlakoreng le leng, ho thabisa hakaakang ho tseba hore oona molao oa tlhaho oa khoheli o u thibela ho fefohela ka ho se nang thuso sebakeng. Kahoo, ka ho hlakileng molao ona o molemong oa hao. Ho amohela meeli eo o e behang mohatong o mong le o mong oa hao ha u le tsullung ea thaba ho molemo, ebile ke ho pholosang bophelo.
E, ka linako tse ling melao le ho e utloa ho ka beha meeli tokolohong ea rōna, empa na see se etsa hore kutlo e be e sa lakatseheng?
Kamoo Molimo a Talimang Kutlo
Joaloka “’Mōpi e Moholo,” Jehova ke “seliba sa bophelo.” Ka lebaka lena ho loketse hore libōpuoa tsohle tsa hae li mo utloe. A bontša boikutlo bo nepahetseng, mopesaleme o ile a ngola: “Tlong, re khumameng, re inameng, re oe ka mangole pel’a Jehova, ’Mōpi oa rōna! Hobane ke Molimo oa rōna, re sechaba seo e leng molisa oa sona, mohlape o tsamaisoang ke letsoho la hae.”—Moeklesia 12:1, NW; Pesaleme ea 36:9; 95:6, 7.
Ho tloha tšimolohong Jehova o ’nile a batla kutlo ho libōpuoa tsa hae. Hore Adama le Eva ba tsoele pele ba le Paradeiseng ho ne ho itšetlehile ka kutlo. (Genese 2:16, 17) Ka ho tšoanang kutlo e ne e lebelletsoe ho mangeloi, le hoja a e-na le mofuta o phahameng oa bophelo ho feta batho. Ka lebaka la hore tse ling tsa libōpuoa tsena tsa moea li ile tsa “bontša ho hloka kutlo ha Molimo o sa ntsane o mamelletse ka tieo mehleng ea Noe,” li ile tsa fuoa kotlo ka ho akheloa “malumeleng a lefifi, moo a bōlōketsoeng letsatsi la kahlōlo.”—1 Petrose 3:19, 20, NW; 2 Petrose 2:4, BPN.
Ka ho totobetseng, Molimo o talima kutlo e le tlhokahalo ea ho fumana kamohelo ea hae. Rea bala: “Hleka Jehova o khahloa ke licheso le ke mahlabelo, joale ka ha a khahloa ha ho utluoa lentsoe la Jehova na? Bona kutlo e fetisa sehlabelo, ’me mamelo e fetisa mafura a lipheleu.”—1 Samuele 15:22.
E Tlameha ho Ithutoa—Hobane’ng Hona Joang
Kutlo e lebisa boemong bo lokileng le Molimo, kahoo ho potlakile hakaakang hore re ithute eona! Joaloka ho ithuta puo esele, mokhoa oa ho bontša kutlo o ka ithutoa ha re sa le banyenyane. Ke kahoo Bibele e hatellang hore bana ba rutoe e sa le masea.—Joshua 8:35.
Batho ba bang ba mehleng ena ba hanyetsa pono ea Bibele, ba bolela hore ho lebella kutlo ho bana ho tšoana le peto e etsoang maikutlong. Ba bolela hore bana ba lokela hore ba tlohelloe hore ba hōlise lithahasello tsa bona tsa botho le litekanyetso tsa ho phela ntle le ho kenella ha batsoali.
Empa lilemong tsa bo-1960 ha batsoali ba bangata ba ne ba e-na le pono ena, Wilhelm Hansen, tichere, mongoli, le moprofesa oa thuto ea kelello ha aa ka a lumellana le pono ena. O ile a ngola: “Ngoana ea lilemong tsa hae tsa pele tsa khōlo, nakong eo kamano ea hae le batsoali ba hae e sa ntsaneng e le eona e laolang, ‘se fosahetseng’ ke seo batsoali ba sa se rateng ’me ‘se nepahetseng’ ke seo batsoali ba se khothalletsang kapa ba se rorisang. Kahoo, kutlo ka boeona, e tataisa ngoana tseleng ea boitšoaro bo botle le ea litšoaneleho tse khabane tseo kamano ea hae le taolo ea boitšoaro li itšetlehileng ka boteng ba tsona.”—Bapisa le Liproverbia 22:15.
Lentsoe la Molimo le hatella tlhokahalo ea ho ithuta kutlo. Rea bala: “Kea tseba, MORENA, hore litsela tsa motho ha li khethong ea hae; leha e le hore ho ho motho hore a ikhethele tsela ea hae ea bophelo.” (Jeremia 10:23, The New English Bible) Histori e tletse ka mehlala ea batho ba ileng ba ipetlela tsela ea bona ea bophelo ho latela litekanyetso tsa botho ’me ba ileng ba kena mathateng a tebileng ka baka la ho etsa seo. Ke hobane’ng ha see se etsahala hangata hakaale? Ke hobane batho ba haelloa ke tsebo, bohlale, le kutloisiso ea ho ipetlela tsela ea bophelo ba sa thusoe. Ho hobe ho feta hoo, ba na le tšekamelo eo ba e futsitseng ea ho etsa liqeto tse fosahetseng. Hang-hang ka mor’a Moroallo, Jehova o ile a bolella motho: ‘Mehopolo ea motho e mebe le bocheng ba hae.’—Genese 8:21.
Ka hona, ha ho motho ea futsitseng tšekamelo ea ho utloa Jehova. Re tlameha ho e kenya baneng ba rōna ’me re tsoele pele ho ithuta eona bophelong bohle ba rōna. Ho hlokahala hore e mong le e mong oa rōna a hlaolele boikutlo ba pelo ba Morena Davida, ea ileng a ngola: “Jehova, mpontše litsela tsa hao, u nthute mekhoa ea hao. U ntsamaise ’neteng ea hao, u nthute, hobane ke uena Molimo oa poloko ea ka; ka mehla ke ntse ke beha tšepo ea ka ho uena.”—Pesaleme ea 25:4, 5.
Ruta Kutlo ka ho Bontša Kutlo
’Mè oa Jesu le ntate oa hae oa mohōlisi ba ne ba tseba hantle maemo a likolohileng tsoalo ea Jesu. Kahoo ba ile ba hlokomela hore o tla phetha karolo ea bohlokoa phethahatsong ea merero ea Jehova. (Bapisa le Luka 1:35, 46, 47.) Boemong ba bona mantsoe a reng “Bonang, bara ke lefa la Jehova” a ile a ba le moelelo o ikhethang. (Pesaleme ea 127:3) Ba ile ba hlokomela ka ho felletseng boikarabelo ba bona bo boholo ka hona ba ile ba potlakela ho utloa litaelo tsa Molimo, tse joaloka ha ba ne ba bolelloa hore ba balehele Egepeta kapa hamorao ba bolelloa hore ba ee Galilea.—Mattheu 2:1-23.
Batsoali ba Jesu ba ne ba boetse ba hlokomela boikarabelo ba bona mabapi le taeo. Ke ’nete hore, pele ho bophelo ba hae e le motho, ka nako tsohle Jesu o ne a bontša kutlo. Empa ha a le lefatšeng, o ile a ithuta ho bontša kutlo tlas’a maemo a fapaneng ka ho felletseng. Tabeng ea pele, o ne a tšoanela ho utloa batsoali ba sa phethahalang hobane esita le ngoana ea phethahetseng o hloka taeo ka mokhoa oa litaelo le thuto. Batsoali ba hae ba ile ba fana ka sena. Ka lehlakoreng le leng, taeo ka mokhoa oa kotlo e ne e sa hlokahale. Jesu o ne a utloa ka linako tsohle; ho hang ho ne ho sa hlokahale hore a bolelloe ntho habeli. Rea bala: “Eaba o ea hae Nazaretha le bona [batsoali ba hae] ’me o ne a ba utloa.”—Luka 2:51, Phillips.
Josefa le Maria ba ne ba boetse ba tseba ho ruta Jesu ka mohlala oa bona. Ka mohlala, rea bala hore “baholo ba hae ba ne ba e-ea Jerusalema ka lilemo tsohle, moketeng oa Paseka.” (Luka 2:41) Ka ho hlophisetsa hore a tsamaee le lelapa la hae, Josefa o ile a bontša hore o thahasella boiketlo ba lona ba moea le hore o nka borapeli ba Jehova ka ho teba. Ka litsela tse tšoanang, ka ho ba le kutlo litabeng tsa borapeli, batsoali ba ka ruta bana ba bona kutlo kajeno.
Ka baka la ho laea ho hotle ha Josefa le Maria ka ho loka, Jesu o ile “a ’na a hola hlalefong, le boemong, le molemong, pel’a Molimo le batho.” Ke mohlala o motle hakaakang oo batsoali ba Bakreste ba ka o latelang kajeno!—Luka 2:52.
“Utloang . . . Nthong Tsohle”
“Bana, utloang batsoali ba lōna nthong tsohle; hobane ke taba e khahlisang Morena.” (Ba-Kolosse 3:20) Jesu o ne a ka utloa batsoali ba hae nthong tsohle hobane kutlo ea bona ho Jehova e ne e ba sitisa ho lebella hore Jesu—kapa banab’abo ka ’m’ae—a etse ntho e itseng e khahlanong le thato ea Jehova.
Batsoali ba bangata kajeno le bona ba ruta bana ba bona ka katleho ho ba le kutlo linthong tsohle. Mamela bo-ntate ba bararo, bao, kaha matsatsi a bona a ho hōlisa bana a se a fetile, joale ba sebeletsang lekaleng la Mokhatlo oa Watch Tower.
Theo o bolela kamoo eena le mosali oa hae ba ileng ba hōlisa bara ba bahlano. O re: “Ke habohlokoa ho tsebisa bana ho tloha qalong hore le rōna batsoali re ntse re etsa liphoso. Ka masoabi, re bile rea li pheta ’me khafetsa ho hlokahale hore re kōpe tšoarelo le thuso ho Ntate oa rōna oa leholimo. Ka morero re ile ra lumella hore bana ba rōna ba bone hore joalokaha ba ne ba loana le matšoenyeho a bocha, le rōna re ne re loana le matšoenyeho a batho ba baholo.”
Hore ngoana a tle a ithute kutlo, kamano e lerato pakeng tsa hae le batsoali ba hae ke ea bohlokoa. Hermann o re ka mosali oa hae: “E ne e se feela ’mè ho bashanyana ba rōna empa e ne e boetse e le motsoalle oa bona. Ba ne ba ananela sena, kahoo ho ne ho se thata ho bona hore ba bontše kutlo.” Joale ha a phaella ka keletso ea bohlokoa ea ho ntlafatsa kamano ea motsoali le ngoana, o re: “Re ile ra etsa ka boomo hore re hloke mochini o hlatsoang lijana lilemo li se kae, e le hore lijana li tle li hlatsuoe le ho hlakoloa ka matsoho. Bara ba rōna ba ne ba fuoa kabelo ea ho li hlakola, ba ho etsa ka ho arolelana. Ho ne ho se nako e molemo ho feta eo bakeng sa ho qoqa.”
Kamano e lerato ea motsoali le ngoana e sebeletsa e le mohlala oa kamano eo Mokreste a tlamehang ho ba le eona le Jehova. Rudolf o hlalosa kamoo eena le mosali oa hae ba ileng ba etsa ka teng ho thusa bashanyana ba bona ba babeli hore ba thehe kamano e joalo: “Motheo oa rōna e ne e le thuto ea ka mehla ea lelapa. Re ne re abela bana lihlooho tse ’maloa tse loketseng hore ba etse lipatlisiso ho tsona. Re ne re boetse re etsa ’malo oa rōna oa Bibele hammoho ebe re tšohla boitsebiso boo re bo balileng. Bara ba rōna ba ne ba bona hore Jehova o lebelletse kutlo ho batsoali, eseng feela ho bana.”
Batsoali ba Bakreste ba hlokomela hore taba e ngotsoeng e bululetsoeng “Likhalemelo tsa taeo ke tsela ea bophelo” e sebetsa ho bona joalokaha e sebetsa ho bana ba bona. Kahoo joalokaha bana ba tlameha ho utloa batsoali ba bona linthong tsohle, batsoali le bona ba tlameha ho bontša kutlo linthong tsohle tseo Jehova a li lebelletseng ho bona. Ka ntle le ho matlafatsa kamano ea motsoali le ngoana, batsoali le bana ba tla batla ho matlafatsa kamano ea bona le Molimo.—Liproverbia 6:23.
Eba le Pono e Kholisehileng ea Kutlo
Re ka thaba hakaakang hore ebe Lentsoe la Molimo le fana ka keletso e sebetsang joalo ea ho hōlisa bana! (Bona lebokose.) Bana ba ithutang kutlo ho batsoali ba ba laeang ka ho loka ke mohloli oa sebele oa thabo bakeng sa boena bohle ba Bokreste.
Kaha phello ea ho utloa Molimo ke bophelo, re tlameha ho qoba le ho nahana feela ka ho behella ka thōko lithibelo tseo Molimo a li behang tokolohong ea rōna ea botho—esita le ka nakoana. Ka mohlala, ak’u nahane ha re ne re ka khona ho behella ka thōko ka nakoana molao oa tlhaho oa khoheli. Re ne re ka thabela hakaakang monyaka oa ho fofa ho tloha tsullung ea thaba ho ea marung ho se na letho le sitisang tokoloho ea rōna! Empa ho ne ho ka ha etsahala joang hang ha lintho li ne li ka boela malulong? Nahana ka ho oa ho neng ho tla be ho re emetse!
Ho ithuta kutlo ka ho amohela taeo ho ekelletsa khōlong ea botho bo leka-lekaneng ’me ho re thusa ho tseba meeli ea rōna. Ho re thusa ho qoba ho ba ba laelang le ba sa tsotelleng litokelo le litlhoko tsa ba bang. Ho re thusa ho qoba linako tsa ho se kholisehe. Ka bokhutšoanyane, phello ea hona ke thabo.
Kahoo hore na u motho e moholo kapa u ngoana, ithute kutlo ka ho amohela taeo “u tle u be lehlohonolo” le hore u tle “u phele halelele lefatšeng.” (Ba-Efese 6:1-3) Ke mang ea batlang ho beha tebello ea hae ea ho phela ka ho sa feleng kotsing ka ho hlōleha ho ithuta kutlo ka ho se amohele taeo?—Johanne 11:26.
[Lebokose le leqepheng la 29]
BATSOALI, RUTANG KUTLO KA HO LAEA KA HO LOKA
1. Fanang ka taeo motheong oa melao le melao-motheo ea Mangolo.
2. Le se ke la fana ka taeo feela ka ho batla kutlo empa le hlalose hore na ke hobane’ng ha kutlo e le tsela e bohlale.—Mattheu 11:19b.
3. Le se ke la fana ka taeo le halefile kapa le omana.—Ba-Efese 4:31, 32.
4. Fanang ka taeo moo ho nang le mofuthu oa kamano e lerato le e tsotellang.—Ba-Kolosse 3:21; 1 Ba-Thessalonika 2:7, 8; Ba-Heberu 12:5-8.
5. Laeang bana ho tloha boseeng.—2 Timothea 3:14, 15.
6. Fanang ka taeo khafetsa le sa thekesele.—Deuteronoma 6:6-9; 1 Ba-Thessalonika 2:11, 12.
7. Itaeeng pele ebe le ruta ka mohlala.—Johanne 13:15; bapisa le Mattheu 23:2, 3.
8. Fanang ka taeo le itšetlehile ka ho felletseng ka Jehova, le kōpa thuso ea hae ka thapelo.—Baahloli 13:8-10.
[Setšoantšo se leqepheng la 28]
“Likhalemelo tsa taeo ke tsela ea bophelo”