Ho Alosa le ’Mōpi oa Rōna e Moholo

“Jehova ke Molisa oa ka. Nke ke ka hloka letho. O khatholla sephefumolohi sa ka. O ntataisetsa litseleng tsa ho loka ka baka la lebitso la hae.”—PESALEME EA 23:1, 3, NW.

 1. Jehova o fana ka khatholoho efe e lerato?

PESALEME ea 23, “pesaleme ea Davida,” e ile ea khatholla liphefumolohi tse ngata tse khathetseng. E ile ea li khothaletsa ho ba le kholiseho e boletsoeng ho temana ea 6: “Ruri molemo le mosa o lerato li tla ntšusumetsa ka matsatsi ’ohle a bophelo ba ka; ’me ke tla lula ka tlung ea Jehova ho isa boholong ba matsatsi.” Na eo ke takatso ea hao, ho lula tlung ea Jehova ea borapeli ka mehla, u kopane le batho ba hae bao hona joale ba bokelloang ho tsoa lichabeng tsohle tsa lefatše? “Molisa le molebeli oa liphefumolohi tsa rōna,” ’Mōpi oa rōna e Moholo, Jehova Molimo, o tla u thusa ho finyella pakane eo.—1 Petrose 2:25, NW.

 2, 3. (a) Jehova o alosa batho ba hae joang ka lerato? (b) “Mohlape” oa Jehova o eketsehile haholo ka tsela efe?

² ’Mōpi oa “maholimo a macha le lefatše le lecha” e boetse ke Mohlophisi le Molebeli ea Phahameng oa phutheho ea Bokreste, “ntlo ea Molimo.” (2 Petrose 3:13; 1 Timothea 3:15) O thahasella ka ho tebileng ho alosa batho ba hae, joalokaha Esaia 40:10, 11 ka ho hlakileng e re: “Bonang, Morena Jehova o tla ka matla; letsoho la hae lea busa; bonang, o ea tla le moputso oa hae, le eona phetetso ea hae e mo eteletse pele. O tla alosa mohlape oa hae ka mokhoa oa molisa, o tla bokella likonyana matsohong a hae, a li jare sefubeng sa hae; le tse anyesang, a li sotetse butle.”

³ Ka kutloisiso e ’ngoe, “mohlape” ona o kopanyeletsa batho bao ka nako e telele ba ileng ba tsamaea ’neteng ea Bokreste le “likonyana” tse sa tsoa bokelloa morao tjena—joaloka palo e khōlō ea batho eo hona joale e kolobetsoang Afrika le Europe Bochabela. Letsoho la Jehova le matla le le sireletsang le ba bokella sefubeng sa hae. Le hoja ba ne ba tšoana le linku tse lahlehileng, hona joale ba na le kamano e haufi le Molimo oa bona ea ratehang le Molisa.

Molisa-’moho le Jehova

 4, 5. (a) “Molisa ea molemo” ke mang, hona boprofeta bo supa ho eena joang? (b) Jesu o hlokometse mosebetsi ofe oa ho arola, hona e le ka phello efe e ikhethang?

⁴ “Molisa ea molemo,” Jesu Kreste, a sebeletsa a le letsohong le letona la Ntate oa hae leholimong, o boetse o fana ka tlhokomelo e mosa ho “linku.” O ile a tela bophelo ba hae pele molemong oa “mohlatsoana” oa ba tlotsitsoeng ’me, kajeno, molemong oa bongata bo boholo ba “linku tse ling” tsa hae. (Luka 12:32; Johanne 10:14, 16) Molisa e Moholo, Jehova Molimo, o bua le linku tsena kaofela o re: “Ke tla etsa kahlolo mahareng a nku le nku e ’ngoe. Ke tla li hlahisetsa molisa a le mong, ’me o tla li lisa; e tla ba mohlanka oa ka Davida; ke eena ea tla li lisa, eo e tla ba molisa oa tsona. ’Na, ke le Jehova, ke tla ba Molimo oa tsona, ’me mohlanka oa ka Davida e tla ba morena har’a tsona. Ke ’na Jehova ke boletseng tseo.”—Ezekiele 34:20-24.

⁵ Polelo e reng “mohlanka oa ka Davida” e supa ka boprofeta ho Kreste Jesu, “peō” ea tla ja lefa teroneng ea Davida. (Pesaleme ea 89:35, 36) Letsatsing lena la kahlolo ea lichaba, Molisa-’moho ’me hape e le Morena hammoho le Jehova, Kreste Jesu, Mora oa Davida, o tsoela pele ho arola “linku” tsa batho ho ba ipolelang hore ke “linku” empa ha e le hantle e le “lipoli.” (Mattheu 25:31-33) ‘Molisa enoa a le mong’ o boetse o bile teng bakeng sa ho fepa linku. Kajeno re bona phethahatso e khōlō hakaakang ea boprofeta boo! Le hoja bo-ralipolotiki ba bua ka ho kopanya batho ka taolo ea lefatše le lecha, ha e le hantle Molisa a le mong o kopanya linku tsa lichaba tsohle ka letšolo la bopaki bo nehelanoang ka lipuo tse ngata leo e leng mokhatlo o hlophisitsoeng oa Molimo feela o ka le finyellang.

 6, 7. “Mohlanka ea khabane, ea bohlale” o hlokometse joang hore linku li fumana “lijo nakong ea teng”?

⁶ Ha molaetsa oa ’Muso o ntse o namela libakeng tse ncha, “mohlanka ea khabane, ea bohlale” ea entsoeng ka Bakreste ba tlotsitsoeng, joalokaha a laetsoe ke Molisa a le mong, o hlokometse hore ho etsoa litokisetso tsohle ho hlokomela hore ho fanoa ka “lijo nakong ea teng.” (Mattheu 24:45) Makala a mangata ho a 33 a khatiso a Mokhatlo oa Watch Tower lefatšeng lohle a eketsa mosebetsi ho khahlanyetsa tlhoko e ntseng e hola ea libuka le limakasine tsa Bibele tse eketsehileng le tse molemonyana.

⁷ Sehlopha se Busang sa Lipaki tsa Jehova se leka ka matla ho ntlafatsa boleng ba phetolelo ea lipuo tse ka bang 200 le ho qalisa phetolelo ka lipuo tse eketsehileng tse hlokahalang ho koahela tšimo ea lefatše lohle. Sena se tšehetsa thomo eo Jesu a ileng a e fa barutuoa ba hae ho Liketso 1:8: “Le tla fuoa matla mohla moea o halalelang o tlang ho lōna, ’me le tla ba lipaki tsa ka . . . ho isa pheletsong ea lefatše.” Ho feta moo, New World Translation of the Holy Scriptures, e seng e ntse e hatisoa e feletse kapa e sa fella ka lipuo tse 14, hona joale e fetoleloa ka lipuo tse ling tse 16 tsa Europe, Afrika, le tsa Bochabela.

Ho Thabela ‘Khotso ea Molimo’

 8. Linku li hlohonolofalitsoe ka ho enneng joang ke selekane sa khotso seo Jehova a se thehileng le tsona?

⁸ Ka Molisa oa hae a le mong, Kreste Jesu, Jehova o theha ‘selekane sa khotso’ le linku tsa Hae tse nonneng. (Esaia 54:10) Kaha linku li bontša tumelo maling a tšolotsoeng a Jesu, li nolofaletsoa hore li tsamaee leseling. (1 Johanne 1:7) Li thabela ‘khotso ea Molimo e fetisang khopolo eohle le e lebelang lipelo tsa tsona le matla a tsona a kelello ka Kreste Jesu.’ (Ba-Filippi 4:7, NW) Joalokaha Ezekiele 34:25-28 e tsoela pele ho hlalosa, Jehova o alosa linku tsa hae paradeising ea moea, e leng boemo bo thabisang ba tšireletseho, katleho e khathollang, le e behang litholoana. Molisa enoa ea lerato o bua tjena ka linku tsa hae: “Ba tla tseba hoba ke ’na Jehova, mohla ke robang lifate tsa joko ea bona, ke ba namolelang matsohong a ba ba sebelisang. Ha ba sa tla rusolloa ke lichaba; . . . ba tla aha ka boiketlo, ho se e mong ea ba tšosang.”

 9. Batho ba Molimo ba bulehetsoe ke menyetla efe ha ho ‘robjoa joko’?

⁹ Hona joale, lilemong tsa morao tjena, Lipaki tsa Jehova linaheng tse ngata li bile le phihlelo ea ho bona ho robjoa “lifate tsa joko ea bona.” Li lokolohile ho etsa boboleli ho feta leha e le neng pele. ’Me e se eka kaofela ha rōna, naheng tsohle, re ka sebelisa hamolemo tšireletseho eo Jehova a fanang ka eona ha re ntse re hahamalla ho phetha mosebetsi. Jehova o fana ka tiisetso e kaakang ha re atamela nako ea mahlomola a maholo ka ho fetisisa ao batho ba kileng ba ba le ’ona!—Daniele 12:1; Mattheu 24:21, 22.

10. Jehova o fane ka bo-mang bakeng sa ho thusa Molisa ea Molemo, Kreste Jesu, hona moapostola Pauluse o ile a re’ng ho ba bang ba bona?

¹⁰ E le ha Jehova a lokisetsa letsatsi leo la phetetso ho ba khopo, o fane ka balisa ba tlaasana ho thusa Molisa e Molemo, Kreste Jesu, ho hlokomela mohlape. Bana ba hlalosoa ho Tšenolo 1:16 e le palo e feletseng ea “linaleli tse supileng” tse letsohong le letona la Jesu. Lekholong la pele la lilemo, moapostola Pauluse o ile a buisana le sehlopha se emetseng balisa bana ba tlaasana, a re: “Le itise, le lise le mohlape kaofela, oo moea o halalelang o le beileng balebeli ba oona, ho alosa kereke [“phutheho,” NW] ea Molimo eo o ithuetseng eona ka mali ao e leng a oona ka sebele.” (Liketso 20:28) Kajeno, ho na le balisa ba tlaasana ba ka bang mashome a likete ba sebeletsang liphuthehong tse 69 558 lefatšeng lohle.

Balisa ba Tlaasana ba Etella Pele!

11. Balisa ba bang ba atlehile joang ho etella pele libakeng tse koaheloang khafetsa?

¹¹ Libakeng tse ngata balisa bana ba tlameha ho etella pele libakeng tse ’nileng tsa koaheloa khafetsa mehleng ena ea bofelo. Ba ka boloka cheseho ea mohlape hore e lule e ntse e phahame joang? Balisa ba ’nile ba etsa hantle ka mokhoa o babatsehang, ’me e ’ngoe ea litsela tseo ba atlehileng ka tsona ke ka ho tsosa thahasello mosebetsing oa bopula-maliboho bo thusang le ba ka mehla. Balisa ba bangata ba bile le karolo tšebeletsong ena, ’me esita le bahoeletsi ba hlolehang ho etsa joalo ba bontšitse moea oa bopula-maliboho, ba sebeletsa ka thabo e ba thusang ho hlōla ho iphapanya tšimong ea bona. (Pesaleme ea 100:2; 104:33, 34; Ba-Filippi 4:4, 5) Ka hona, ha bokhopo le ho hloka taolo ho koahela lefatše, batho ba bangata ba kang linku ba tsebisoa ka tšepo ea ’Muso.—Mattheu 12:18, 21; Ba-Roma 15:12.

12. Ke bothata bofe bo tebileng bo leng teng masimong a holang ka potlako, hona bo rarolloa joang ka linako tse ling?

¹² Bothata bo bong ke hore hangata ha ho na balisa ba lekaneng ba tšoanelehang ho hlokomela mohlape. Moo ho nang le khōlo e potlakileng, joaloka Europe Bochabela, ho na le liphutheho tse ngata tse ncha tseo ho hang li se nang baholo ba khethiloeng. Linku tse ratang li jara moroalo, empa ha li na phihlelo, ’me ho hlokahala thuso ho koetlisa linku tse kenang ka bongata ka liphuthehong. Linaheng tse kang Brazil, Mexico, le Zaire, moo khōlo e potlakileng, ho sebelisoa Lipaki tse nyenyane ho hlophisa tšebeletso le ho koetlisa ba bang ba bacha. Bo-pula-maliboho ba fana ka thuso e khōlō, ’me mona ke moo bo-khaitseli ba khonang ho koetlisa bo-khaitseli ba bacha. Jehova ka moea oa hae o hlohonolofatsa litholoana tsa sena. Keketseho e lula e le teng.—Esaia 54:2, 3.

13. (a) Kaha kotulo e khōlō hakana, Lipaki tsohle li lokela ho rapella eng? (b) Lithapelo tsa batho ba Molimo li ile tsa arabeloa joang pele le nakong ea ntoa ea bobeli ea lefatše?

¹³ Linaheng tseo ho tsona mosebetsi oa boboleli o thehiloeng hantle, linaheng tseo ho tsona ho sa tsoa tlosoa lithibelo, le libakeng tse sa tsoa buloa bocha, mantsoe a Jesu ho Mattheu 9:37, 38 aa sebetsa: “Kotulo e kholo ruri, empa basebetsi ha ba bakae. Rapelang ke hona Morena oa kotulo, hore a romele basebetsi kotulong ea hae.” Ho boetse ho hlokahala hore re rapelle hore Jehova a hlahise balisa ba eketsehileng. O bontšitse hore a ka etsa sena. Pele le ka mor’a Ntoa ea II ea Lefatše, bahatelli ba khopo ba joaloka Baassyria ba ile ba leka ho felisa Lipaki tsa Jehova. Empa e le ha Jehova a arabela lithapelo tsa bona, o ile a hloekisa mokhatlo oa bona o hlophisitsoeng, a o etsa oa puso ea Molimo ka sebele, ’me a fana ka “balisa” ba hlokahalang.a Sena se ne se le tumellanong le boprofeta: “Ha e le Moassyria, ha a tla naheng ea rōna ’me a hata litoreng tseo re lulang ho tsona, re tla lokela ho tsosa balisa ba supileng khahlanong le eena, e, marena a robeli a batho”—esita le ho feta lenane le lekaneng la baholo ba inehetseng ho etella pele.—Mikea 5:5, NW.

14. Ho na le tlhokahalo efe e khōlō ka har’a mokhatlo o hlophisitsoeng, hona ke khothatso efe e fuoang baena?

¹⁴ Ho na le tlhokahalo e khethehileng ea hore Lipaki tsohle tse kolobelitsoeng tsa banna li hahamalle litokelo tse eketsehileng. (1 Timothea 3:1) Boemo bo potlakile. Bofelo ba tsamaiso ena bo atamela ka potlako. Habakuke 2:3 e re: “Tšenolo eo e sa luletse nako ea teng, empa e tla itlhahanela qetellong, e ke ke ea thetsa. . . . E tla etsahala ruri, e ke ke ea fela.” Baena, na le ka hahamalla hore le tšoanelehe bakeng sa litokelo tse eketsehileng mosebetsing oo oa bolisa—pele bofelo bo fihla?—Tite 1:6-9.

Bolisa bo Etsoang ka Puso ea Molimo

15. Batho ba Jehova ba busoa ke Molimo ka tsela efe?

¹⁵ E le hore re ka kopanela ka botlalo keketsehong ea mokhatlo o hlophisitsoeng oa Jehova, batho ba hae ho hlokahala hore ba be le pono ea puso ea Molimo. Ba ka finyella see joang? Ha e le hantle, lentsoe “puso ea Molimo” le bolela eng? Webster’s New Twentieth Century Dictionary e hlalosa “puso ea Molimo” e le “puso ea naha ke Molimo.” Ke ka kutloisiso ena “sechaba se halalelang” sa batho ba Jehova e leng se busoang ke Molimo. (1 Petrose 2:9, NW; Esaia 33:22) Joaloka litho kapa metsoalle ea sechaba seo se busoang ke Molimo, Bakreste ba ’nete ba tlameha ho phela le ho sebeletsa ba bontša kutlo Lentsoeng la Molimo le melao-motheong ea lona.

16. Ha e le hantle, re ka ipontša joang hore re busoa ke Molimo?

¹⁶ Ka ho hlakileng moapostola Pauluse o hlalosa kamoo Bakreste ba lokelang ho busoa ke Molimo. Pele, o bolela hore ba lokela “ho apara motho e mocha, ea bōpiloeng ka setšoantšo sa Molimo, ho lokeng le khalalelong ea ’nete.” Botho ba Mokreste bo lokela ho etsoa ho latela melao-motheo ea Molimo e lokileng e boletsoeng ka Lentsoeng la hae. O tlameha ho tšepahala ho Jehova le ho melao ea Hae. Ka mor’a ho bontša hore na sena se ka etsoa joang, Pauluse oa khothatsa: “Le be baetsisi ba Molimo, ka ha le le bana ba ratoang.” (Ba-Efese 4:24–5:1) Joaloka bana ba bontšang kutlo, re tlameha ho etsisa Molimo. Sena ke ho bontša hore ka sebele re busoa ke Molimo!—Bona hape Ba-Kolosse 3:10, 12-14.

17, 18. (a) Ke tšoaneleho efe ea Molimo eo Bakreste ba busoang ke Molimo ba tlamehang ho e etsisa? (b) Mantsoeng a hae a eang ho Moshe, Jehova o ile a hatisa tšobotsi ea Hae ea sehlooho joang, empa O ile a phaella ka temoso efe?

¹⁷ Tšoaneleho ea Molimo e ka sehloohong eo re lokelang ho e etsisa ke efe? Ho 1 Johanne 4:8 (NW) moapostola Johanne o arabela ka ho re: “Molimo ke lerato.” Ka mor’a litemana tse robeli tse latelang, ho temana 16, o pheta molao-motheo ona oa bohlokoa: “Molimo ke lerato, ’me ea lulang leratong o lula bonngoeng le Molimo ’me Molimo o lula bonngoeng le eena.” Molisa e Moholo, Jehova, ke mothofatso ea lerato. Balisa ba puso ea Molimo baa mo etsisa ha ba bontša lerato le tebileng ho linku tsa Jehova.—Bapisa le 1 Johanne 3:16, 18; 4:7-11.

¹⁸ Molimo ’Musi e Moholo o ile a itšenola ho Moshe ka hore ke “Jehova, Jehova, Molimo o mohau le o lereko, o liehang ho halefa le o tletseng mosa o lerato le ’nete, o bolokelang ba likete mosa o lerato, o tšoarelang phoso le litšito le sebe, empa leha ha ho le joalo a ke ke a lesa ho fana ka kotlo, o fanang ka kotlo ho bara le litloholo bakeng sa phoso ea bo-ntat’a bona, le ho moloko oa boraro le oa bone.” (Exoda 34:6, 7, NW) Ka hona Jehova o hatisa litšobotsi tse fapa-fapaneng tsa tšoaneleho ea hae ea puso ea Molimo, lerato, ha ka nako e tšoanang a lemosa hore o tla fana ka kotlo ea phoso ha e hlokahala.

19. Ho fapana le Bafarisi, balisa ba Bakreste ba lokela ho etsa lintho joang ka tsela ea puso ea Molimo?

¹⁹ Ho ba nang le boemo ba boikarabelo ka mokhatlong o hlophisitsoeng, ho bolela eng ho busoa ke Molimo? Jesu o buile tjena ka bangoli le Bafarisi mehleng ea hae: “Ba bofa liphahlo tse boima, tse imelang, ’me ba li jarisa batho mahetleng, athe bona ha ba rate ho li sisinya le ka monoana.” (Mattheu 23:4) Ke ho hatella le ho hloka lerato ho hakaakang! Puso ea ’nete ea Molimo, e hloka hore ho alosoe mohlape oa Molimo ka ho sebelisa melao-motheo e lerato ea Bibele, eseng ka ho imetsa linku ka melao e sa feleng e entsoeng ke batho. (Bapisa le Mattheu 15:1-9.) Ka nako e tšoanang, balisa ba puso ea Molimo ba tlameha ho etsisa Molimo ka ho ekeletsa leratong la bona ho tiea bakeng sa ho boloka bohloeki ba phutheho.—Bapisa le Ba-Roma 2:11; 1 Petrose 1:17.

20. Balisa ba puso ea Molimo ba hlokomela litokisetso life tsa mokhatlo o hlophisitsoeng?

²⁰ Balisa ba ’nete baa hlokomela hore mehleng ena ea bofelo, Jesu o khethile mohlanka ea khabane ea bohlale ho hlokomela phahlo eohle ea hae ’me moea o halalelang o laetse mohlanka enoa ho khetha baholo bakeng sa ho alosa linku. (Mattheu 24:3, 47; Liketso 20:28) Ka hona, ho busoa ke Molimo ho kopanyeletsa ho ba le tlhompho e tebileng bakeng sa mohlanka enoa, bakeng sa litokisetso tsa mokhatlo tseo mohlanka a li entseng, le bakeng sa tokisetso ea baholo e ka phuthehong.—Ba-Heberu 13:7, 17.

21. Jesu o behile mohlala ofe o motle bakeng sa balisa ba tlaasana?

²¹ Jesu ka boeena o ile a beha mohlala o motle, a tšepa Jehova le Lentsoe la Hae ka mehla bakeng sa ho fumana tataiso. O ile a re: “Ke sitoa ho etsa letho ke ’notši; ke ahlola kamoo ke utloang kateng, ’me kahlolo ea ka e lokile, kahobane ha ke batle ho ratoang ke ’na, ke mpa ke batla ho ratoang ke Ntate ea nthomileng.” (Johanne 5:30) Balisa ba tlaasana ba Morena Jesu Kreste ba lokela ho hlaolela boikutlo bo tšoanang ba boikokobetso. Haeba ka linako tsohle moholo a ntse a ea Lentsoeng la Molimo bakeng sa tataiso joalokaha Jesu a ile a etsa, ka sebele e tla ba o busoa ke Molimo.—Mattheu 4:1-11; Johanne 6:38.

22. (a) Bohle ba lokela ho loanela ho busoa ke Molimo ka tsela efe? (b) Ke memo efe e mosa eo Jesu a e fang linku?

²² Banna ba kolobelitsoeng, hahamallang ho tšoaneleha bakeng sa litokelo ka phuthehong! Lōna kaofela linku tse ratehang, ebang le sepheo sa ho busoa ke Molimo, le etsise Molimo le Kreste ka ho bontša lerato! E se eka balisa le mohlape ka ho tšoanang ba ka thaba hobane ba arabetse memong ea Jesu: “Tloong ho ’na, lōna bohle ba sebetsang ka thata le ba imetsoeng, ’me ke tla le khatholla. Jarang joko ea ka ’me le ithute ho ’na, hobane ke na le botho bo bonolo le pelo e ikokobelitseng, ’me le tla fumana khatholoho bakeng sa liphefumolohi tsa lōna. Hobane joko ea ka e mosa ’me mojaro oa ka o bobebe.”—Mattheu 11:28-30, NW.

[Mongolo o botlaaseng ba leqephe]

Na U ka Hlalosa?

◻ “Mohlape” oa Jehova ke eng, hona o kopanyeletsa bo-mang?

◻ Jesu o ile a sebetsa joaloka “molisa ea molemo” joang lekholong la pele la lilemo, le kajeno?

◻ Balisa ba tlaasana ba phetha karolo efe ea sehlooho tabeng ea ho hlokomela mohlape?

◻ Moelelo oa motheo oa lentsoe “puso ea Molimo” ke ofe?

◻ Mokreste—haholo-holo molisa ea tlaasana—a ka etsa joang hore a busoe ke Molimo?

[Setšoantšo se leqepheng la 20]

Joaloka molisa ea itetseng, Jehova o hlokomela mohlape oa hae

[Setšoantšo se leqepheng la 23]

Ho etsisa tšoaneleho ea Jehova Molimo ea lerato ke ho bontša ho busoa ke Molimo