Ke Leboha Tšehetso e sa Hlōleheng ea Jehova
JOALOKAHA HO BOLETSE SHARON GASKINS
PARADEISE lefatšeng! Ke ile ka ipona ke tlōlaka moo ho nang le joang bo bongata bo metseng mongobong, ke lelekisa lirurubele, ke bapala le litaoana. Ho ne ho utloahala hamonate! Empa ho ne ho e-na le lipelaelo. Ke hangata hakaakang tšepo ea ka e neng e fella ka ho nyahama!
Ho ea kamoo ke hopolang ka teng, setulo sa liqhoala e bile molekane oa ka oa ka mehla. Ho tloha ha ke hlaha, kholofalo e itseng bokong e etsahalang pele ho tsoalo kapa nakong ea eona e ile ea nkamoha menyaka ea bongoana. Bana ba bang ba ne ba ithabisa ka lieta tse nang le mabili le ka libaesekele, empa ke ne ke lutse ke ’notši, ke sitoa le ho tsamaea. Kahoo ha ’mè a ntse a nkisa ho batho ba folisang ka tumelo e mong ka mor’a e mong, ka tieo re ne re tšepile ho etsetsoa mohlolo. Leha ho le joalo, ka mor’a lekhetlo le leng le le leng re ne re khutla ho se phekolo ea letho e entsoeng. E ne e e-ba ntho e ’nyahamisang empa ho ’mè e ne e e-ba masisa-pelo a makaakang!
’Mè a laba-labela tšepo ea ’nete, a qala ho ithuta Bibele le Lipaki tsa Jehova qalong ea 1964. Ka nako eo ke ne nka ba lilemo tse tšeletseng le halofo.
E ne e le ho babatsehang ho ithuta hore ho kile ha e-ba le paradeise e ntle lefatšeng lena. Ka masoabi, motho oa pele, Adama, o ile a e lahla, empa ke ne ke lakatsa kamano e haufi-ufi le Molimo eo a kileng a e thabela. Ebe ho ne ho le joang ho thabela kamano le Molimo? Kapa ho phela ha Mora oa hae a ne a tsamaea lefatšeng? Metouto ea ka e ile ea boela ea nkisa Paradeiseng e tlang. Esita le lilemong tseo tse tlaase, ke ne ke hlaketsoe hore re fumane ’nete.
’Mè o ile a qala ho isa lelapa Holong ea ’Muso ea Lipaki tsa Jehova. Liboka tsa tsona li ne li fapane haholo ho seo re neng re ile ra se bona likerekeng! Batho le tikoloho li ile tsa nkama ka ho tebileng.
Ho re isa Holong ea ’Muso e ne e le phihlelo e boima ho ’mè. Ntle ho ’na, ho ne ho e-na le bana ba bararo ba banyenyane ho ’na, ’me re ne re se na koloi. Re ne re palama tekesi ha a ne a e khona. Ke sa ntse ke hopola kamoo a kileng a sokola ka teng ka Sontaha se seng. Ho ne ho sa bonahale tekesi ho hang. Joale, ka tšohanyetso re bile re sa lebella, ho ile ha bitoha monna ea khannang teraka ’me a re palamisa. Re ile ra ba morao bakeng sa liboka, empa re ile ra ea honyella teng. Re ile ra leboha Jehova hakaakang!
Kapele baena ba rōna ba ratehang ba moea le bo-khaitseli ba nang le makoloi ka lerato ba ne ba fapanyetsana ka ho re isa libokeng le ho re khutlisa. Khothatso ea ’mè ea hore le ka mohla re se fosoe ke liboka ntle le haeba re hlile re kula e le kannete e ile ea hatisa kelellong ea ka e nyenyane bohlokoa ba ho ‘bokana hammoho.’ (Ba-Heberu 10:24, 25, NW) A susumelitsoe ke seo a ithutang sona, ’mè o ile a nehela bophelo ba hae ho Jehova ’me a kolobetsoa ka 1965.
Ka nako eo ke ne ke se ke hōlile ka ho lekaneng hore nka ananela liboka ka botlalo. Phuthehong ea Cypress Hills e Brooklyn, New York, ho ne ho e-na le Maeurope, ba batšo, Mahispanic, le ba bang ba neng ba rapela ’moho. Ho ne ho bonahala ho nepahetse haholo hore batho ba tšabang Molimo ba ne ba loketse ho phela ka boena bo joalo ba ’nete.—Pesaleme ea 133:1.
’Mè o ile a nthuta hore na ke lokisetse liboka joang. Sena e ne e se bothata kelellong, empa e ne e le bothata ’meleng. Kholofalo e itseng bokong e fetola mesebetsi e bobebe mesebetsi e meholohali. Ho ne ho sa khonehe ho ’na, ebile ho ntse ho sa khonehe, hore ke thale mola o otlolohileng ha ke tšoaea likarabo libukeng tsa rōna tsa Bibele. Leha ho le joalo, ka ho ikoetlisa, ho thalla ha ka mela tlas’a likarabo ho ile ha ntlafala.
Kelello ea ka e ne e phophoma ka lintho tseo nka li buang. Empa ha li tsoa molomong oa ka, mantsoe a ne a lobokana. Ho khatholoha ho ne ho hlokahala e le hore mesifa ea ka e se satalle. Hape ke ne ke lokela ho nahanisisa mokhoa oa ho bitsa lentsoe ka leng ka tsela e hlakileng kamoo nka khonang. Ke ne ke ee ke ferekane ha tlhaloso e sa ba ka tsela eo e neng e lokela ho ba ka eona kapa ha ke ne ke tseba hore batho ha baa utloisisa mantsoe a ka. Leha ho le joalo, hang ha ba se ba ntseba, baena le bo-khaitseli ka phuthehong ba ile ba khona ho utloisisa puo ea ka hamolemonyana. Leha ho le joalo, ke ntse ke e-ba le matsatsi a monate le a mabe ka bothata bona.
Likhoeli tse Tšeletseng tse Utloisang Bohloko
Ha ke le lilemo li robeli, ke ile ka ba le phihlelo ea likhoeli tse tšeletseng e ileng ea nkama ho tla fihlela kajeno lena. Ho sa tsotellehe liphekolo tseo ke neng ke se ke li filoe ’meleng, le tse thusang ho boloka ’mele o le mafolo-folo, le tsa ho nthusa ho bua hantle, lingaka li ile tsa nthomella sepetleleng se sebetsanang le ho busetsa bophelo bo botle malulong West Haverstraw, New York. ’Na le ’Mè re ne re le mahlomoleng. Lilemo pejana, ha ka phoso lingaka li ne li fihlela qeto ea hore ke na le mathata a kelello, o ne a ile a li bolella hore ho hang o ne a ke ke a nkenya sepetleleng sa kelello. Kahoo esita le karohano ea nakoana feela e ne e le thata ho eena. Leha ho le joalo, o ile a bona hore ho phela ha ka bophelo bo molemo ka ntle ho eena le ntate ho ne ho bolela hore ke lokela ho ba le bokhoni ba ho ithusa ka hohle kamoo ho ka etsahalang.
Sepetlele ho ne ho le hotle, empa ke ne ke ikutloa ke lahliloe. Ho lla ka ho ithaburanya le ho bopa ho ile ha hlakisa boikutlo ba ka ka sebaka seo. Batsoali ba ka ba ne ba tšoha ba nkile leeto la lihora tse tharo ka bese ho nketela, haholo-holo kaha ’mè e ne e le mokhachane oa ngoana oa bohlano. Ha ba ne ba lokela ho tsamaea, ho ile ha ntlhonamisa haholo hoo ngaka e ileng ea re ba se ke ba hlola ba nketela khafetsa. Ke ile ka lumelloa ho ea hae habeli feela.
Batho bao ba koetlisang likōoa hore li tsebe ho sebelisa litho tsa ’mele ba ile ba nthuta ho tsamaea ka thuso ea litšehetso tsa maoto le ka mare a thusang likōoa bakeng sa ho tsamaea a kentsoeng rekere e boima ka fatše. A ne a le boima ka ho tlōtseng. Leha ho le joalo, boima bo ile ba nthusa ho boloka botsitso le ho nthiba hore ke se ke ka oela. Ona e bile mohato oa pele o lebisang ho itsamaiseng ha ka ka ntle ho thuso ea litšehetso maotong.
Ho ngoatha lijo, ho qhoaela makonopo—mesebetsi leha e le efe e hlokang ho etsuoa ka menoana—e ’nile ea e-ba e thata kapa eo ke sa e khoneng. Empa ho isa bohōleng bo itseng ke ile ka ithuta ho itjesa le ho ikapesa. Hamorao sena se ile sa nthusa tšebeletsong ea ka ho Molimo.
Ha koetliso ea ka e se e felile, ke ile ka khutlela hae hape. ’Mè o ile a ntšebelisa hore ke sebelise litsebo tsa ka tse ncha. Ho etsa seo e ne e le ntoa ea maikutlo, hobane le hoja ke ne ke batla ho iketsetsa lintho, ho li finyella e ne e le ho ferekanyang, ho jang nako, le ho khathatsang ’meleng. Ho ikapesa bakeng sa ho ea libokeng e ne e le mosebetsi o moholohali o nkang lihora tse peli!
Ha re ne re tšela seterata ka ho toba re tloha Holong ea ’Muso, ke ne ke hlile ke itsamaisa ka bonna. Seo e ne e le tlhōlo e khōlō!
Letsatsi le Thabisang ka ho Fetisisa Bophelong ba ka
’Mè o ile a etsa bonnete ba hore lelapa le fumana lijo tse enneng tsa moea. O ne a ithuta le ’na ’me o ne a lebelletse hore ke bale tokollo e ’ngoe le e ’ngoe ea likhatiso tsa rōna, Molula-Qhooa le Tsoha! Re ne re lokela ho lokisetsa liboka le ho ba teng ho tsona. Le hoja kelello ea ka le pelo ea ka li ne li laba-labela ho monya tsebo ena, ho nahana ka ho tebileng ka ho nehela bophelo ba ka ho Jehova le ho tšoantšetsa sena ka kolobetso ea metsing ho ne ho le hōjana le ’na. ’Mè o ile a nthusa hore ke bone hore ho sa tsotellehe bokōoa ba ka, Molimo o ntalima ke ikarabella ka bonna litabeng tsa moea. Ho pholohela ha ka lefatšeng le lecha ho hang ho ne ho sa itšetleha ka ’mè.
Ke ne ke rata Molimo, empa boemo ba ka bo ile ba nkhethela ka thōko ke le ea fapaneng ho ba bang—e leng phihlelo e bohloko ho mocha ea lilemo tse ka tlaase ho 20. Ho ne ho le thata hore ke amohele mefokolo ea ka. Hangata ke ne ke hlōloa ke bohale, ’me sena se ne se lokela o laoloa pele ho kolobetso. (Ba-Galata 5:19, 20) Empa ho thoe’ng haeba ke ne nke ke ka phethahatsa boinehelo ba ka ho Jehova?
’Mè o ile a kōpa moholo phuthehong hore a bue le ’na. O ile a phahamisa potso ea moprofeta Elia ho Baiseraele: “Le tla tenyetsehela ho le hokae ka ’nģa tse peli?” (1 Marena 18:21) Ka ho hlakileng, Jehova o ne a sa thabisoe ke ho tsila-tsila ha ka.
Ke ile ka hlasimoloha moeeng ’me ka rapela ka tieo ho kōpa thuso ea Jehova le bakeng sa boikemisetso ba hore ke nehele bophelo ba ka ho eena. Khaitseli e mong ka phuthehong o ile a ithuta le ’na. O ne a le monyenyane ho ’na ’me o ne a ile a hlokahalloa ke ’mè oa hae a sa le monyenyane. Leha ho le joalo, o ne a ile a etsa boinehelo ho Molimo a sa le monyenyane haholo.
Ha ke le lilemo li 17, ke ile ka tsitsisa mohopolo oa ka. Ke ne ke batla ho sebeletsa Jehova ka hohle kamoo nka khonang. Ka August 9, 1974—ha ke ne ke kolobetsoa—e ne e le letsatsi le thabisang ka ho fetisisa bophelong ba ka.
Thabo Tšebeletsong
Ho kopanela tšebeletsong ho ile ha hlahisa litšitiso tseo e kang ke lithaba. Phephetso e khōlō e ne e le ho etsa hore ke utloisisoe. Ke ne ke ee ke bue ka ho hlakileng kamoo nka khonang. Joale, neng le neng ha ho ne ho hlokahala, motho eo ke sebetsang le eena tšebeletsong ea tšimo o ne a ee a phete lintlha tsa ka ho mong’a ntlo. Ba bang ba ne ba sa arabele hantle, ba ne ba ntalima ke le phofu eo Lipaki li e qhekeletseng. Empa ho bolela ke tokelo ea ka le takatso ea ka e tlohang botebong ba pelo.
Ho tloha monyakong o mong ho ea ho o mong e ka ba ho khathatsang ka ho fetisisa ’meleng esita le haeba e le mohahong o le mong feela. Matlo a mangata tšimong ea rōna eo re pakang ho eona a na le litepisi, tseo ke sa khoneng ho li nyoloha. Mariha, litsela tse lalang qhoqhoane li etsa hore mosebetsi oa ho ea ka ntlo le ntlo e be oo nke keng ka o etsa ka ho feletseng. (Liketso 20:20, NW) Leha ho le joalo, baena ba moea ba thusitse haholohali, ’me hona joale Jehova o ntlhohonolofalitse ka ho ba le setulo se itsamaisang sa liqhoala, se nolofalitseng tšebeletso haholoanyane.
Ka mor’a nako ke ile ka qala ho paka ka ho ngola mangolo. Ho ngola mangolo ka letsoho ke ne nke ke ka ho etsa ka lebaka la mongolo oa ka o sa baleheng ho batho ba bangata. Kahoo ke ile ka ngola ka mochine o hatisang oa motlakase. Mokhoa oa ka oa ho hatisa o lieha haholo ka lebaka la khokahano e fokolang ea boko le letsoho. Ho nkuka nako hore ke otle tlhaku e le ’ngoe mochineng o hatisang ebe kea fosa ke otla e ’ngoe. Ho ka ’na ha nkuka hora kapa ho feta hore ke hatise leqephe le le leng feela.
Ho sa tsotellehe ho haelloa ke matla, nako le nako ke sebeletsa joaloka pula-maliboho ea thusang, ke nehelana ka lihora tse 60 kapa ho feta tšebeletsong ka khoeli. Sena se hloka kemiso e ntle, boiteko bo eketsehileng, le tšehetso ea balumeli-’moho. Moea oa bona oa bopula-maliboho oa nkhothatsa. ’Mè le eena o behile mohlala o motle ka ho sebeletsa e le pula-maliboho ea ka mehla kapa ea thusang ha a ntse a talimane le mathata, bophelo bo fokolang, le phephetso ea ho hōlisa bana ba supileng lelapeng le arohaneng bolumeling.
Ho Lula ke le Mong
Ha ke le lilemo li 24, ke ile ka etsa qeto ea ho ea lula ke le mong. Ho fallela ha ka Bensonhurst karolong ea Brooklyn ho ile ha ipaka e le tlhohonolofatso. Phutheho ea Marlboro e ne e tšoana le lelapa le momahaneng. E bile ho matlafatsang tumelo hakaakang ho ba le bona! Esita le hoja ho ne ho e-na le likoloi tse peli kapa tse tharo phuthehong, baena ba moea ba ne ba nkisa libokeng tsohle. Leha ho le joalo ha kea ka ka lula moo halelele.
Ke ikutloa joaloka ea hlōlehileng ka ho feletseng, ke ile ka khutlela ho lelapa leso ’me ka qoela ka har’a khatello e tebileng ea maikutlo ka nako ea lilemo tse tharo. Maqhubu a khalefo a nkaparela hape. Joale ha tla menahano ea ho ipolaea le liteko tse ’maloa tsa ho ho etsa. Lefu e ne e le tebello ea ka mehla le e tšosang. Empa ke ile ka itšetleha ka Molimo ’me ka tšepisa hore ke tla bontša kananelo mphong ea hae ea bophelo. Baholo ba ile ba mpha khothatso le keletso. Sena, hammoho le thapelo, thuto ea botho, mamello ea lelapa leso, le thuso e itseng ea litsebi, li ile tsa lokisa monahano oa ka.
Ka Molula-Qhooa, ka lerato Jehova o ile a fana ka temoho khatellong e tebileng ea maikutlo. E, o tsotella batho ba hae ’me o utloisisa kamoo re ikutloang ka teng. (1 Petrose 5:6, 7) Ka mor’a nako khatello e tebileng maikutlong e ile ea kokobela. Lilemo tse leshome hamorao, Jehova o ntse a nthusa ho sebetsana le ho ferekana le khatello ea maikutlo. Ka linako tse ling boikutlo ba ho ba ea se nang thuso bo ee bo nkimele. Leha ho le joalo, thapelo, ho ithuta Bibele, le lelapa leso la moea ke lithuso tse babatsehang.
Ka mor’a ho se atlehe ho batleng ha ka ntlo e ’ngoe bakeng sa bolulo, ka lekhonono ke ile ka etsa qeto ea ho phela le lelapa leso bophelo bohle ba ka. Eaba joale Jehova o arabela lithapelo tsa ka. Sebaka se ile sa fumaneha Bedford-Stuyvesant karolong ea Brooklyn. Qetellong ea lehlabula la 1984, ke ile ka fallela moo, ’me ke sa ntse ke le moo haesale ho tloha ka nako eo.
Litho tsa Phutheho e lerato ea Lafayette ka mosa li ne li mpalamisa lipalangoang ho ea libokeng. Ho ntseng ho hopoleha ka ho hlakileng kelellong ea ka ke Thuto ea Buka ea Phutheho ea pele eo ke bileng ho eona. E ne e tšoaretsoe mokatong oa bone—’me ho ne ho se na lift! E bile feela ka thuso ea Jehova ke ileng ka khona ho nyoloha le ho theoha litepising tseo. Ka nako e loketseng ke ile ka fuoa sebaka seo nka khonang ho fihla ho sona habonolo. ’Me hona joale Jehova o ntlhohonolofalitse ka tokelo ea hore Thuto ea Buka ea Phutheho e tšoareloe ha ka.
Moea oa bopula-maliboho o babatsehang o phunyeletsa phutheho ena. Ha ke ne ke fihla ho ne ho e-na le bo-pula-maliboho ba ka bang 30, ’me ba bang ba ile ba nkhoaela ka lehafing. Moea oa cheseho o ile oa ntšusumetsa hore ke be pula-maliboho ea thusang khafetsa.
Ka April 1989 Liphutheho tsa Lafayette le Pratt li ile tsa haha Holo ea ’Muso e ncha hona seterateng seo ntlo eo ke lulang ho eona e leng ho sona. Sena se etsahetse hantle ka nako e hlokahalang, kaha ka lebaka la ’mele o ntseng o soahlamana ho ea pele, ho tsamaea e boetse ke bothata. Leha ho le joalo, ka sethuthu sa ka le ka tšehetso ea baena le bo-khaitseli ba moea, maeto a ho ea le ho khutla libokeng ke a thabisang. Ke ananela ka ho tebileng hakaakang thuso e joalo e lerato!
Ke Leboha Tšehetso ea Molimo
Le hoja maoto a ka a sa tsitsa, pelo ea ka eona e tsitsitse. Thuto e ntle e etsa hore bophelo bo be bonojoana, leha ho le joalo Molimo o ntšehelitse. Ka linako tse ling ke ne ke sa tsebe hore na lijo tsa letsatsi ka leng ke tla li fumana joang, empa Jehova o ile a ntšehetsa ’me e bile eena Motšehetsi ea tšepahalang. Se ratehang ho ’na, ruri, ke mantsoe ana a Davida: “Nkile ka ba mocha, ’me joale ke tsofetse; empa ha ke e-s’o bone ea lokileng a tloheloa, leha e le litloholo tsa hae li sikila bohobe.”—Pesaleme ea 37:23-25.
Ka makhetlo Jehova o ile a nketsa hore ke khone ho boloka boemo ba ka ba Mangolo ka ho nthusa ho hana ho amohela mali ha ke buuoa. (Liketso 15:28, 29) Haufinyane, ntate o ile a shoa. Ho lahleheloa ke e mong ea haufi-ufi ruri e bile ho ntšithabetsang. Ke ka matla a Jehova feela ke ileng ka ntšoa ho sena le litekong tse ling.
Bophelo ba ka bo ka ’na ba tsoela pele ho fokola, empa tšepo ea ka ho Molimo le kamano ea ka le eena ke mehloli ea ka ea bophelo. Ke thabile hakaakang ho ba har’a batho ba Jehova le ho ba le tšehetso e sa hlōleheng ea hae!