Tšepa Jehova!

“U tšepe Jehova ka pelo ea hao eohle.”—LIPROVERBIA 3:5.

 1. Liproverbia 3:5 e ile ea khahla moshemane e mong joang, ’me e le ka liphello life tsa nako e telele?

EO E bileng moromuoa ka nako e telele oa ngola: “‘U TŠEPE MORENA KA PELO EA HAO EOHLE; ’ME U SE KE UA TŠEPA KUTLOISISO EA HAO.’ Mantsoe ao a tsoang Bibeleng, a kentsoeng foreiming eaba a fanyehoa leboteng lelapeng leo ke neng ke le etetse, a ile a hapa tlhokomelo ea ka. Ka nahana ka ’ona letsatsi leo lohle. Ka ipotsa, na nka tšepa Molimo ka pelo ea ka eohle?” Ka nako eo motho enoa o ne a le lilemo li 21. Hona joale o lilemo li 90 ’me o ntse a sebeletsa ka botšepehi joaloka moholo Perth, Australia, a ka sheba morao bophelong bo entšitsoeng ke tholoana ea ho tšepa Jehova ka pelo eohle, ho akareletsa le lilemo tse 26 tsa tšebetso e matla ea ho bula maliboho masimong a boromuoa a macha Ceylon (eo hona joale e leng Sri Lanka), Burma (eo hona joale e leng Myanmar), Malaya, Thailand, India le Pakistan.a

 2. Liproverbia 3:5 e eketsa kholiseho efe ka ho rōna?

² “U tšepe Jehova ka pelo ea hao eohle”—mantsoe ana a Liproverbia 3:5 a lokela ho re susumeletsa bohle ho tsoela pele re nehela bophelo ba rōna ho Jehova ka pelo eohle, re kholisehile hore a ka matlafatsa tumelo ea rōna, esita le ho isa bohōleng ba ho hlōla litšitiso tse kang lithaba. (Mattheu 17:20) Hona joale a re ke re hlahlobeng Liproverbia 3:5 mantsoeng a e potolohileng.

Taeo ea Bontate

 3. (a) Ke khothatso efe e fumanoang likhaolong tsa pele tse robong tsa Liproverbia? (b) Ke hobane’ng ha re lokela ho lebisa tlhokomelo e haufi-ufi ho Liproverbia 3:1, 2?

³ Likhaolo tsa pele tse robong tsa buka ea Bibele ea Liproverbia li tletse taeo ea bontate, taeo e bohlale e tsoang ho Jehova bakeng sa bohle ba lebeletseng ho thabela ho ba bara leholimong kapa ‘tokoloho e khanyang ea bana ba Molimo’ lefatšeng la paradeise. (Ba-Roma 8:18-21, 23, NW) Keletso e bohlale ke ena e ka sebelisoang ke batsoali ha ba hōlisa bara le barali. Se ikhethang ke keletso ea Liproverbia khaolo 3, e qalang ka tlhokomeliso: “Mora oa ka, u se ke ua lebala thuto tsa ka, pelo ea hao e ke e boloke likeletso tsa me.” Ha mehla ea qetello ea lefatše le khopo la Satane e ea qetellong, e se eka re ka lebisa tlhokomelo ea rōna likhopotsong tsa Jehova haholoanyane. Ho ka ’na ha bonahala ho fetile nako e telele, empa tšepiso e etsetsoang bohle ba mamellang ke ho “ekelletsoa ke tsona litšiu, le lilemo, le ho phela, le khotso”—bophelo bo sa feleng tsamaisong e ncha ea Jehova.—Liproverbia 3:1, 2.

 4, 5. (a) Ke kamano efe e thabileng e hlalositsoeng ho Johanne 5:19, 20? (b) Keletso e ho Deuteronoma 11:18-21 e sebetsa joang ho fihlela nakong ea rōna?

⁴ Kamano e thabileng pakeng tsa ntate le mora e ka ba ea bohlokoa ka ho fetisisa. ’Mōpi oa rōna, Jehova Molimo, o lokiselitse hore ho be joalo. Kreste Jesu ha a bua ka kamano ea hae e haufi-ufi le Jehova o itse: “Mora o sitoa ho etsa letho a ’notši, ha a sa ka a le bona le etsoa ke Ntat’ae; hobane tsohle tse etsoang ke Ntate, Mora o li etsa joalo le eena. Hobane Ntate o rata Mora, ’me o ’montša tsohle tsee eena a li etsang; o tla ’montša le mesebetsi e meholo ho ena, le tle le makale.” (Johanne 5:19, 20) Jehova o rerile hore kamano e haufi-ufi joalo e be teng pakeng tsa hae le lelapa lohle la hae le lefatšeng, esita le pakeng tsa bo-ntate ba batho le bana ba bona.

⁵ Kamano ea lelapa e bonahatsang ho tšepana e ile ea khothaletsoa Iseraeleng ea boholo-holo. Jehova o ile a laea bo-ntate ba moo: “Kenyang ke hona mantsoe ana ao ke le bolellang ’ona ka lipelong tsa lōna, le meeeng ea lōna, ’me le a tlame ho ba pontšo matsohong a lōna, ’me a be joalo ka meqhaka pakeng tsa mahlo a lōna. Le a rute bana ba lōna, u bue ka ’ona ha u lutse tlung ea hao, leha u tsamaea tseleng, leha u robala, leha u tsoha borokong. A ngole le lifateng tsa menyako ea ntlo ea hao, le mamating a hao; hore matsatsi a lōna, le matsatsi a bana ba lōna, a tle a ngatafale lefatšeng leo Jehova a anetseng bontat’a lōna hore o tla ba nea lona, a be ka ka matsatsi a maholimo a okametseng lefatše.” (Deuteronoma 11:18-21) Lentsoe le bululetsoeng la Morupeli oa rōna e Moholo, Jehova Molimo, ka sebele le ka sebeletsa ho mo atametsa haufi-ufi le batsoali le bana ba bona, esita le ba bang bohle ba mo sebeletsang phuthehong ea Bokreste.—Esaia 30:20, 21, NW.

 6. Re ka fumana kamohelo ea Molimo le batho joang?

⁶ Keletso e bohlale ea botsoali bakeng sa batho ba Molimo, ba hōlileng le ba bacha, e tsoela pele litemaneng tsa 3 le 4 tsa Liproverbia khaolo 3 (NW): “E se eka mosa o lerato le ’nete li ka se u tlohele. U li tlamelle molaleng oa hao. U li ngole letlapeng la pelo ea hao, ’me u fumane kamohelo le temoho e molemo mahlong a Molimo le batho.” Jehova Molimo ka boeena oa ikhetha tabeng ea ho bontša mosa o lerato le ’nete. Joalokaha Pesaleme ea 25:10 (NW) e bolela, “litsela tsa Jehova kaofela ke mosa o lerato le ’nete.” Ha re etsisa Jehova, re lokela ho nka litšoaneleho tsena le matla a tsona a sireletsang e le tsa bohlokoa joaloka sefaha se theko e phahameng ’me re li ngole ka tsela eo li ke keng tsa hlakoha lipelong tsa rōna. Kahoo, re ka rapela ka tieo: “Uena Jehova, . . . etsa hore mosa oa hao o lerato le ’nete ka botsona li ntšireletse ka ho sa feleng.”—Pesaleme ea 40:11, NW.

Tšepo eo re ka Itšetlehang ka Eona

 7. Jehova o bonahalitse botšepehi ba hae ka litsela life?

⁷ Tšepo e hlalosoa ke Webster’s Ninth New Collegiate Dictionary e le “ho itšetleha ho tiileng ka sebōpeho, ho khona, matla kapa bonnete ba motho ea itseng kapa ntho e itseng.” Botho ba Jehova bo tlameletsoe ho mosa oa hae o lerato. ’Me re ka ba le kholiseho e feletseng matleng a hae a ho etsa seo a se tšepisitseng, hobane lebitso la hae, Jehova, le mo khetholla e le Moreri e moholo. (Exoda 3:14; 6:2-8) Joaloka ’Mōpi, ke Seliba sa matla a maholo. (Esaia 40:26, 29) Ke mohlala o phethahetseng oa ’nete, hobane ‘Molimo a ke ke a bua leshano.’ (Ba-Heberu 6:18) Kahoo, re khothaletsoa ho beha tšepo e feletseng ho Jehova, Molimo oa rōna, Mohloli o moholo oa ’nete eohle, ea nang le matla ’ohle a ho sireletsa ba mo tšepang le ho atlehisa merero ea hae ka tsela e khanyang.—Pesaleme ea 91:1, 2; Esaia 55:8-11.

 8, 9. Ke hobane’ng ha tšepo e haella ka ho soabisang lefatšeng, ’me batho ba Jehova ba fapane joang?

⁸ Lefatšeng le hlephileng boitšoarong le re potolohileng, tšepo e haella ka ho soabisang. Ho e-na le hoo, re fumana meharo le tšenyeho hohle. Sekoahelong sa tokollo ea May 1993 ea makasine oa World Press Review ho ne ho na le molaetsa: “HO PHAHAMA HA TŠENYEHO—Chelete e Silafetseng Taolong ea Lefatše le Lecha. Batho ba etsang liketso tse bonahatsang tšenyeho ba atile ho tloha Brazil ho ea Jeremane, ho tloha United States ho ea Argentina, ho tloha Spain ho ea Peru, ho tloha Italy ho ea Mexico, ho tloha Vatican ho ea Russia.” Joalokaha e theiloe lehloeong, meharong le ho se tšepane, seo ho thoeng ke taolo ea lefatše le lecha ea batho ha se kotule letho haese masoabi a ntseng a phaellana molokong oa motho.

⁹ Ho fapana le lichaba tsa lipolotiki, Lipaki tsa Jehova li thabela ho ba “sechaba seo Jehova e leng Molimo oa sona.” Ke bona feela bao ka tšepo ba ka reng, “Re behile tšepo ea rōna ho Molimo.” E mong le e mong oa bona a ka hoa ka thabo: “Ke tla rorisa Molimo kamanong le lentsoe la hae. . . . Ke behile tšepo ea ka ho Molimo. Nke ke ka tšaba.”—Pesaleme ea 33:12; 56:4, 11, NW.

10. Bakreste ba bangata ba bacha ba matlafalitsoe ke eng hore ba boloke botšepehi?

¹⁰ Naheng e ’ngoe ea Asia moo bacha ba Lipaki ba likete ba ileng ba utloisoa bohloko ke ho shapuoa ho mabifi le ho kenngoa teronkong, ho tšepa Jehova ho ile ha nolofaletsa ba bangata hore ba mamelle. Bosiung bo bong teronkong, mocha e mong oa Paki ea neng a fetile tlas’a ho hlokofatsoa ho hobe o ile a ikutloa hore a ke ke a hlola a mamella ho ea pele. Empa mocha e mong a nyonyoba lefifing a tla ho eena. A hoeshetsa: “U se ke ua tela; ke sekiselitse ’me ha kea ba le khotso ea kelello le e nyenyane ho tloha ka nako eo.” Mocha eo o ile a nchafatsa boikemisetso ba hae ba ho ema a tiile. Re ka ba le tšepo e feletseng ho Jehova hore o tla re thusa ho hlōla boiteko leha e le bofe ba Satane ba ho senya botšepehi ba rōna.—Jeremia 7:3-7; 17:1-8; 38:6-13, 15-17.

11. Ho tšepa Jehova ho re susumelitse joang?

¹¹ Karolo e ’ngoe ea molao oa pele e baleha tjena: “U rate Morena, Molimo oa hao, ka pelo ea hao eohle.” (Mareka 12:30) Ha re ntse re thuisa ka Lentsoe la Molimo, linnete tsa bohlokoa tseo re ithutang tsona li theohela botebong ba lipelo tsa rōna e le hore re ka susumeletseha ho sebelisa sohle seo re nang le sona tšebeletsong ea Molimo oa rōna ea babatsehang, Morena ea Phahameng Jehova. Ke ka lipelo tse tletseng kananelo bakeng sa hae—bakeng sa sohle seo a re rutileng sona, a re etselitseng sona, le seo a sa ntseng a tla re etsetsa sona—re susumeletsehang ho tšepa poloko ea hae ka ho feletseng.—Esaia 12:2.

12. Ho theosa le lilemo, Bakreste ba bangata ba bontšitse joang hore ba tšepa Jehova?

¹² Tšepo ena e ka hlaoleloa ho theosa le lilemo. Paki ea Jehova e ikokobelitseng e sebelelitseng ka botšepehi ka lilemo tse 50 ntlo-khōlō ea Mokhatlo oa Watch Tower Brooklyn, ho tloha ka April 1927, e ngotse: “Qetellong ea khoeli eo ke ile ka fumana $5.00 [R16] e leng puseletso ea litšenyehelo tsa ka li kentsoe ka enfelopong e e-na le karete e ntle e nang le temana ea Bibele ea Liproverbia 3:5, 6 . . . Ho ne ho e-na le mabaka ’ohle a ho tšepa Jehova, hobane ha ke le ntlo-khōlō kapele ke ile ka utloisisa hore Jehova o na le ‘lekhoba le tšepahalang le le masene’ leo ka botšepehi le hlokomelang lithahasello tsohle tsa ’Muso mona lefatšeng.—Mattheu 24:45-47, NW.”b Pelo ea Mokreste enoa e ne e sa behoa leratong la chelete, empa e ne e behiloe tabeng ea ho fumana “letlotlo le sa feleng maholimong.” Ka ho tšoanang mehleng ena, batho ba likete ba sebeletsang mahaeng a Bethele a Mokhatlo oa Watch Tower ho pota lefatše ba etsa seo ka tlas’a mofuta o itseng oa kano ea molao ea bofutsana. Ba tšepa hore Jehova o tla hlokomela litlhoko tsa bona tsa letsatsi le letsatsi.—Luka 12:29-31, 33, 34.

Tšepa Jehova

13, 14. (a) Ke hokae feela moo keletso e bonahatsang ho hōla tsebong e ka fumanehang? (b) Ke’ng seo re lokelang ho se qoba e le hore re ka pholoha mahloriso?

¹³ Ntate oa rōna oa leholimo oa re eletsa: “U se ke ua itšepa hlalefo ea hao.” (Liproverbia 3:5) Baeletsi ba lefatše le litsebi tsa kelello le ka mohla ba ke ke ba tšepa hore bohlale ba bona le kutloisiso li ka atamela tseo Jehova a li bonahatsang. “Kutloisiso ea hae ha e na ho lekanngoa.” (Pesaleme ea 147:5) Ho e-na le ho tšepa bohlale ba batho ba tummeng ba lefatše kapa maikutlo a rōna a sa tšehetsoeng ke tsebo, a re talimeng ho Jehova, Lentsoe la hae le baholo ka phuthehong ea Bokreste bakeng sa keletso e bonahatsang ho hōla tsebong.—Pesaleme ea 55:22; 1 Ba-Korinthe 2:5.

¹⁴ Bohlale ba batho kapa ho ikhohomosa ka lebaka la boemo bo phahameng li ke ke tsa re thusa ka letho letsatsing la teko e matla le atamelang ka potlako. (Esaia 29:14; 1 Ba-Korinthe 2:14) Japane Ntoeng ea II ea Lefatše, molisa oa Molimo ea tšoanelehang empa e le ea ikhohomosang o ile a khetha ho tšepa kutloisiso ea hae. Ha a le tlas’a khatello e ile ea ba mokoenehi, ’me boholo ba mohlape le bona bo ile ba khaotsa ho sebetsa ka tlas’a mahloriso. Khaitseli oa Japane ea tšepahalang, eo ka sebete a ileng a feta tlas’a tšoaro e mpe haholo liseleng tse litšila tsa teronko, o ile a hlalosa: “Ba ileng ba lula ba tšepahala ba ne ba se matla ka ho khethehileng ’me e ne e se ba hlaheletseng. Ka sebele kaofela ha rōna re tlameha ho tšepa Jehova ka mehla ka lipelo tsa rōna tsohle.”c

15. Ke tšoaneleho efe ea bomolimo e hlokahalang e le hore re ka thabisa Jehova?

¹⁵ Ho tšepa Jehova, ho e-na le ho tšepa kutloisiso ea rōna, ho kopanyeletsa boikokobetso. Tšoaneleho ena ke ea bohlokoa hakaakang ho bohle ba batlang ho thabisa Jehova! Esita le Molimo oa rōna, le hoja e le ’Musi Morena oa bokahohle bohle, o bonahatsa boikokobetso litšebelisanong tsa hae le pōpo ea hae e bohlale. Re ka leboha seo. “Oa inyenyefatsa hore a shebe maholimong le lefatšeng, o phahamisa ba ikokobelitseng lerōleng.” (Pesaleme ea 113:6, 7, NW) Ka lebaka la mohau oa hae o moholo, o re tšoarela mefokolo ea rōna motheong oa mpho ea hae e khōlō ka ho fetisisa ho moloko oa batho, thekollo ea bohlokoa ea sehlabelo sa Mora oa hae ea ratoang, Kreste Jesu. Re lokela ho leboha hakaakang bakeng sa mosa ona o sa tšoanelang!

16. Ke joang baena ba ka hahamallang litokelo ka har’a phutheho?

¹⁶ Jesu ka boeena oa re hopotsa: “E mong le e mong ea iphahamisang, o tla kokobetsoa, ’me e mong le e mong ea ikokobetsang, o tla phahamisoa.” (Mattheu 23:12) Ka boikokobetso, baena ba kolobelitsoeng ba lokela ho hahamalla boikarabelo ka phuthehong ea Bokreste. Empa, balebeli ha baa lokela ho nka ho khethoa ha bona e le letšoao la boemo bo itseng, empa ba ho nke e le monyetla oa ho etsa mosebetsi, ka boikokobetso, ka kananelo, le ka taba-tabelo, joalokaha ho entse Jesu, ea ileng a re: “Ntate o sa sebetsa le joale, le ’na kea sebetsa.”—Johanne 5:17; 1 Petrose 5:2, 3.

17. Ke’ng seo kaofela ha rōna re lokelang ho se utloisisa, ’me se lebisa mosebetsing ofe?

¹⁷ E se eka ka mehla ka boikokobetso le ka thapelo re ka utloisisa hore re lerōle feela mahlong a Jehova. Joale re ka thaba hakaakang hore ebe “mohau oa Jehova o hlola o le teng ka mehla le mehla ho ba mo tšabang, le ho loka ha hae ho bana ba bana ba bona”! (Pesaleme ea 103:14, 17) Kahoo kaofela ha rōna re tlameha ho ba liithuti tse chesehang tsa Lentsoe la Molimo. Nako eo re e sebelisang thutong ea botho le ea lelapa, le libokeng tsa phutheho, e lokela ho ba nako ea bohlokoa ka ho fetisisa beke e ’ngoe le e ’ngoe. Ka tsela ena re eketsa “tsebo ea Ea Halalelang ka ho Fetisisa.” Ke sona “seo kutloisiso e leng sona.”—Liproverbia 9:10, NW.

“Litseleng Tsohle tsa Hao . . .”

18, 19. Re ka sebelisa Liproverbia 3:6 joang bophelong ba rōna, ’me e le ka liphello life?

¹⁸ Ha e re lebisa ho Jehova, Mohloli oa bomolimo oa kutloisiso, Liproverbia 3:6 (NW) e tsoela pele ho re: “Litseleng tsohle tsa hao lebisa tlhokomelo ho eena, ’me eena ka boeena o tla otlolla litselana tsa hao.” Ho lebisa tlhokomelo ho Jehova ho akareletsa ho ba haufi le eena ka thapelo. Hohle moo re leng teng ’me ho sa tsotellehe hore na ho ka hlaha boemo bofe, re na le bolokolohi bo feletseng ha re ea ho eena ka thapelo. Ha re etsa mesebetsi ea rōna ea letsatsi le letsatsi, ha re lokisetsa tšebeletso ea tšimo, ha re ea ka ntlo le ntlo re bolela ka ’Muso oa hae, thapelo ea rōna e sa khaotseng e ka ba hore a hlohonolofatse mosebetsi oa rōna. Kahoo, re ka ba le tokelo e ke keng ea lekanngoa le thabo ea ho ‘tsamaea le Molimo,’ re kholisehile hore o tla ‘otlolla litsela tsa rōna,’ joalokaha a ile a etsa ho Henoke le Noe ba tšabang Molimo le Baiseraele ba tšepahalang, ba kang Joshua le Daniele.—Genese 5:22; 6:9; Deuteronoma 8:6; Joshua 22:5; Daniele 6:23; bona le Jakobo 4:8, 10.

¹⁹ Ha re tsebisa Jehova likōpo tsa rōna tse matla, re ka kholiseha hore ‘khotso ea Molimo, e fetisang kutloisiso eohle, e tla boloka lipelo tsa rōna le mehopolo ea rōna ho Jesu Kreste.’ (Ba-Filippi 4:7) Khotso ena ea Molimo, e bonahatsoang ke sefahleho se thabileng, e ka buella molaetsa oa rōna ho beng ba matlo bao re kopanang le bona mosebetsing oa rōna oa ho bolela. (Ba-Kolosse 4:5, 6) Hape e ka khothatsa ba hlasetsoeng ke likhatello kapa ho hloka tōka ho atileng hakana lefatšeng la kajeno, joalokaha tlaleho e latelang e bontša.d

20, 21. (a) Nakong ea puso ea Bonazi e susumetsang tšabo, botšepehi ba Lipaki tsa Jehova bo ile ba khothatsa ba bang joang? (b) Lentsoe la Jehova le lokela ho tsosolosa qeto efe ka ho rōna?

²⁰ Max Liebster, Mojode oa tlhaho eo ka ho neng ho bonahala eka ke mohlolo a ileng a pholoha Koluoa, o ile a hlalosa leeto la hae le eang kampong ea Bonazi eo batlōli ba molao ba bolaeloang ho eona ka mantsoe ana: “Re ne re notleletsoe ka makarecheng a neng a entsoe lisele tse ngata tse nyenyane tsa batho ba babeli. Ka sutumeletsoa ka ho le leng la ’ona, ka shebana le motšoaruoa eo mahlo a hae a neng a bonahatsa khutso. O ne a le moo ka lebaka la ho hlompha molao oa Molimo, a ikhethela teronko le lefu le ka ’nang la mo hlahela ho e-na le ho tšolla mali a batho ba bang. E ne e le e mong oa Lipaki tsa Jehova. Bana ba hae ba ne ba tlositsoe ho eena, ’me mosali oa hae o ne a bolailoe. Le eena o ne a lebeletse ho bolaoa. Leeto la matsatsi a 14 le ile la tlisa karabo lithapelong tsa ka, hobane e bile leetong lena la ho ea bolaoa moo ke ileng ka fumana tšepo ea bophelo bo sa feleng.”

²¹ Ka mor’a hore a be Auschwitz eo a ileng a e bitsa “lemena la litau,” le hore a kolobetsoe, moena enoa o ile a nyala e mong oa Lipaki tsa Jehova eo le eena a neng a kentsoe teronkong, eo ntate oa hae a ileng a hlokofatsoa kampong ea mahloriso Dachau. Ha ntate oa hae a ntse a le moo, o ile a utloa hore mosali oa hae le morali e monyenyane le bona ba tšoeroe. O ile a hlalosa tsela eo a ileng a itšoara ka eona: “Ke ne ke tšoenyehile ka ho tebileng. Joale ka letsatsi le leng ha ke ne ke eme moleng oa ho ea hlapa, ka utloa lentsoe le qotsang Liproverbia 3:5, 6 . . . Le ile la utloahala joaloka lentsoe le theohang leholimong. Ke sona seo ke neng ke se hloka e le hore nka boela ka tsitsa.” Ha e le hantle, lentsoe leo e ne e le la motšoaruoa e mong a qotsa temana ena, empa ketsahalo ena e hatisa matla ao Lentsoe la Molimo le re fang ’ona. (Ba-Heberu 4:12) E se eka lentsoe la Jehova le ka bua ka matla mantsoe a temana ea selemo ea 1994: “U tšepe Jehova ka pelo ea hao eohle”!

[Mongolo o botlaaseng ba leqephe]

Kakaretso

◻ Ke taeo ea mofuta ofe e fanoang ho Liproverbia?

◻ Ho tšepa Jehova ho re tsoela molemo ka tsela efe?

◻ Ke’ng se akareletsoang tabeng ea ho tšepa Jehova?

◻ Ke hobane’ng ha re lokela ho lebisa tlhokomelo ho Jehova litseleng tsa rōna tsohle?

◻ Jehova o otlolla litsela tsa rōna joang?

[Litšoantšo tse leqepheng la 15]

Molaetsa oa ’Muso o thabisang o ipiletsa ho batho ba lipelo li tšepahalang