Na Bibele e Ruta ho Lumela Khopolong ea ho Hlolloa Bokamoso?

TŠENYO EA LEBITSO! KETSELLETSO! Ha setho se hlomphehang sechabeng se lumela hore lebitso la sona kapa botumo ba sona bo botle bo sentsoe ke tlaleho ea bohata, se ikutloa se tlameha ho lokisa litaba. Mohlomong se ka ba sa nka bohato ba molao khahlanong le bao ba ikarabellang bakeng sa tšenyo ea lebitso.

Ha e le hantle, khopolo ea ho hlolloa bokamoso e hlile e etselletsa Molimo ea Matla ’Ohle. Khopolo eo e tšehetsa hore Molimo ke eena ea ikarabellang bakeng sa litlokotsi le litsietsi tsohle tse utloisang moloko oa batho bohloko. Haeba u lumela hore bokamoso boa hloloa, mohlomong u nahana hore ’Musi oa Bokahohleng o ralile lethathamo la liketsahalo le kang le balehang tjena: ‘Kajeno, John o tla lemala kotsing ea koloi, Fatou o tla hlaseloa ke malaria, ntlo ea Mamadou e tla senngoa ke sefefo’! Na ka sebele u ka susumelletseha ho sebeletsa Molimo ea joalo?

Ba lumelang hore bokamoso boa hloloa baa botsa: ‘Empa haeba hase Molimo ea ikarabellang bakeng sa bomalimabe ba rōna, joale ke mang ea ikarabellang?’ Ousmane, mohlankana ea boletsoeng sehloohong se etellang sena pele, o ile a ipotsa eona potso ena. Empa ha aa ka a tlameha ho noha kapa ho hakanya hore a fumane ’nete. O ile a ithuta hore Molimo o itokolotse molatong oa ketselletso ena ka lithuto tse fumanoang ka Lentsoeng la Hae le bululetsoeng, Bibele. (2 Timothea 3:16) Joale, a re hlahlobeng seo Bibele e se buang ka taba ena.

Ke Mang ea Behoang Molato?

Likhohola, lifefo, litšisinyeho tsa lefatše—hangata likoluoa tse joalo li bitsoa liketso tsa Molimo. Empa Bibele ha e bontše hore Molimo o baka likoluoa tse joalo. Nahana ka tlokotsi e ileng ea etsahala Bochabela bo Hare lilemong tse makholo-kholo tse fetileng. Bibele e re bolella hore motho e mong ea ileng a phonyoha tlokotsi ena o ile a tlaleha: “Mollo oa Molimo [polelo ea Seheberu eo hangata e bolelang letōlō] o oele leholimong, o chesitse linku le balisa, ’me o ba qetile.”—Jobo 1:16.

Le hoja motho enoa ea tšohileng mohlomong a ne a nahana hore ke Molimo ea neng a ikarabella bakeng sa mollo, Bibele e bontša hore O ne a sa lokela ho behoa molato. Ipalle Jobo 1:7-12, ’me u tla hlokomela hore letōlō le ne le sa bakoa ke Molimo empa le ne le bakiloe ke Mohanyetsi oa hae—Satane Diabolose! Hase litsietsi tsohle tseo e leng mosebetsi o tobileng oa Satane. Empa ka ho hlakileng, ha ho na lebaka la ho beha Molimo molato.

Bonneteng, hangata batho ba lokela ho behoa molato ha lintho li sa tsamaee hantle. Ho hlōleha sekolong, mosebetsing kapa likamanong tsa bophelo ho ka ’na ha tlisoa ke ho haella ha boiteko le koetliso e molemo kapa mohlomong ho se nahanele ba bang. Ka ho tšoanang, ho kula, likotsi le mafu li ka ’na tsa bakoa ke ho se tsotelle. Ke kahoo ho fasa lebanta la koloi nakong eo motho a khannang ho fokotsang haholo menyetla ea hore a shoe kotsing ea koloi. Lebanta la koloi le ne le ke ke la etsa phapang ea letho haeba “khopolo ea ho hlolloa bokamoso” e ke keng ea fetoloa e ne e sebetsa. Tlhokomelo e nepahetseng ea meriana le bohloeki le tsona li fokotsa ka tsela e makatsang palo ea mafu a etsahalang pele ho nako. Esita le likoluoa tseo ka tloaelo ho thoeng ke “liketso tsa Molimo,” ha e le hantle, ke liketso tsa motho—lefa le bosula ho motho ka lebaka la tšebeliso e mpe ea lefatše.—Bapisa le Tšenolo 11:18.

“Nako le Ketsahalo e sa Lebelloang”

Ke ’nete hore ho na le liketsahalo tse ngata tse bohloko tseo lisosa tsa tsona li sa totobalang. Leha ho le joalo, hlokomela seo Bibele e se bolelang ho Moeklesia 9:11 (NW): “Ka boela ka bona tlas’a letsatsi hore hase ba mathang ka sekhahla ba sieang peisong‚ kapa hona hore ntoa ke ea liqhenqha‚ kapa hona hore lijo ke tsa ba bohlale‚ leha e le hona hore leruo ke la ba nang le kutloisiso‚ le hona ho ratoa hase ha ba nang le tsebo; hobane nako le ketsahalo e sa lebelloang li ba oela bohle.” Kahoo, ha ho lebaka la ho lumela hore ’Mōpi o baka likotsi kapa hore o otla mahlatsipa a likotsi ka tsela e itseng.

Jesu Kreste ka boeena o ile a hanyetsa monahano oa hore bokamoso boa hloloa. Ha a bua ka tlokotsi e neng e tsebahala haholo ho bamameli ba hae, Jesu o ile a botsa: “Kapa ba leshome le metso e robeli bao tora ea Siloame e ileng ea ba oela holimo, ka tsela eo e ba bolaea, na le nahana hore ba ile ba pakoa e le ba nang le molato haholo ho feta batho ba bang kaofela ba ahileng Jerusalema? Che, ka sebele, kea le bolella.” (Luka 13:4, 5) Ho totobetse hore Jesu ha aa ka a supa ho kenella ha Molimo litabeng e le lona lebaka la koluoa eo, empa o bontšitse hore ke “nako le ketsahalo e sa lebelloang.”

Liphello Tse Senyang Tsa ho se Phethahale

Leha ho le joalo, ho thoe’ng ka mafu le ho kula tse sa hlaloseheng? Bibele e fana ka tlhaloso ena e tobileng ka boemo ba batho: ‘Ka Adama bohle baa shoa.’ (1 Bakorinthe 15:22) Lefu le ’nile la hlokofatsa moloko oa batho ho tloha ha moholo-holo oa rōna Adama a kena tseleng ea ho se mamele. Feela joalokaha Molimo a ne a ile a lemosa, Adama o ile a siela litloholo tsa hae lefa la lefu. (Genese 2:17; Baroma 5:12) Kahoo, pale ea ho kula hohle e ka qalisoa ho moholo-holo oa rōna Adama. Bofokoli boo re bo futsitseng le bona bo tlatselletsa haholo masoabing le ho hlōleheng ho re amang bophelong.—Pesaleme ea 51:5.

Nahana ka qaka ea bofutsana. Ho lumela khopolong ea ho hlolloa bokamoso ho atisa ho khothalletsa bafutsana ho inehela boemong ba bona bo thata. Ba lumela hore: ‘Ke qetello ea rōna.’ Leha ho le joalo, Bibele e bontša hore ke ho se phethahale ha batho ho lokelang ho behoa molato, e seng ho hlolloa bokamoso. Ba bang ba futsanehisoa ke ho ‘kotula seo ba se jetseng’ ka lebaka la botsoa kapa ho sebelisa chelete hampe. (Bagalata 6:7; Liproverbia 6:10, 11) Limilione tse se nang palo li phela bofutsaneng ka lebaka la ho qhekelloa ke batho ba meharo pusong. (Bapisa le Jakobo 2:6.) Bibele e re: ‘Batho ba rena holim’a ba bang, ho ba etsa hampe.’ (Moeklesia 8:9) Ha ho bopaki bo supang hore bofutsana bohle bo teng ka lebaka la Molimo kapa ho hlolloa bokamoso.

Tumelo ea Hore Bokomoso Boa Hloloa—Liphello Tsa Teng Tse Senyang

Khang e ’ngoe hape e susumelletsang ho se lumele khopolo ea ho hlolloa bokamoso ke liphello tseo thuto ea ho hlolloa bokamoso e nang le tsona ho ba e lumelang. Jesu Kreste o ile a re: “Sefate se seng le se seng se setle se hlahisa litholoana tse ntle, empa sefate se seng le se seng se bolileng se hlahisa litholoana tse se nang thuso.” (Matheu 7:17) A re ke re hlahlobeng e ’ngoe ea “litholoana” tsa khopolo ea ho hlolloa bokamoso—tsela eo ka eona e susumetsang boikutlo ba batho ba ho jara boikarabelo.

Boikutlo bo nepahetseng ka boikarabelo ba botho ke ba bohlokoa. Ke e ’ngoe ea lintho tse susumelletsang batsoali ho hlokomela malapa a bona, basebetsi ho ba seli ho phetha mesebetsi ea bona le baetsi ba thepa ho hlahisa lihlahisoa tsa boleng. Ho lumela khopolo ea ho hlolloa bokamoso ho ka ’na ha reba boikutlo boo. Ka mohlala, nka hore koloi ea motho ea itseng e na le phoso litšepeng tse e tsamaisang. Haeba a le hlokolosi ka boikarabelo ba hae, oa e lokisa ka lebaka la kameho ea hae ka bophelo ba hae le ba batho bao a tsamaeang le bona. Ka lehlakoreng le leng, motho ea lumelang khopolo ea ho hlolloa bokamoso, a ka ’na a hlokomoloha monyetla oa hore kotsi e ka etsahala, a nahana hore e tla robeha feela haeba e le ‘thato ea Molimo’!

E, tumelo ea hore bokamoso boa hloloa e ka khothalletsa habonolo ho se tsotelle, botsoa, hore motho a hlōlehe ho amohela boikarabelo bakeng sa liketso tsa hae, le ho lumella litšobotsi tse ling tse ngata tse fosahetseng.

Na ke Lerako Pakeng Tsa Kamano ea Rōna le Molimo?

Ho kotsi le ho feta ke hore ho lumela khopolo ea ho hlolloa bokamoso ho ka sitisa motho ho jara boikarabelo kapa tlamo ea hae, ho Molimo. (Moeklesia 12:13) Mopesaleme o khothalletsa moloko oohle oa batho ho ‘latsoa le ho bona hoba Jehova o molemo.’ (Pesaleme ea 34:8) Molimo o beha litlhokahalo tse itseng bakeng sa ba tlang ho thabela molemo oa hae.—Pesaleme ea 15:1-5.

Tlhokahalo e ’ngoe e joalo ke pako. (Liketso 3:19; 17:30) Hoo ho akarelletsa ho lumela liphoso tsa rōna le ho etsa liphetoho tse hlokahalang. Joaloka batho ba sa phethahalang, kaofela re etsa liphoso tseo re lokelang ho li bakela. Empa haeba motho a lumela hore ke mohlaseluoa ea se nang thuso ea hloletsoeng bokamoso, ho ba thata hore a utloe tlhokahalo ea ho baka kapa ho jara boikarabelo ba liphoso tsa hae.

Mopesaleme o ile a re ka Molimo: “Mosa oa hao o lerato o molemo ho feta bophelo.” (Pesaleme ea 63:3, NW) Leha ho le joalo, ho lumela khopolo ea ho hlolloa bokamoso ho entse hore ba limilione ba kholoe hore Molimo ke eena mohloli oa mesarelo ea bona. Ka ho utloahalang, hona ho entse hore ba bangata ba mo hloee, ha koala monyako oa hore ba be le kamano e haufi e le kannete le ’Mōpi. Etsoe, ke joang u ka ratang motho eo u nkang hore o u bakela mathata le liteko? Khopolo ea ho hlolloa bokamoso e hahile lerako lipakeng tsa Molimo le motho.

Ho Lokoloha Khatellong ea Khopolo ea ho Hlolloa Bokamoso

Ousmane e mocha, ea boletsoeng sethathong, o kile a etsoa lekhoba ke ho lumela khopolo ea ho hlolloa bokamoso. Leha ho le joalo, eitse ha Lipaki tsa Jehova li mo thusa ho leka-lekanya monahano oa hae leseling la Bibele, Ousmane o ile a susumelletseha ho khaotsa ho lumela khopolong eo ea ho hlolloa bokamoso. Liphello e bile boikutlo ba tokoloho le pono e ncha ka ho feletseng le e nepahetseng ka bophelo. Habohlokoa le ho feta, a tseba Jehova e le Molimo “o mohau, o lereko, o liehang ho halefa, o tletseng mohau le ’nete.”—Exoda 34:6.

Ousmane o boetse a hlokomela hore Molimo, le hoja a sa rere makolopetso ’ohle a bophelo ba rōna, o na le morero bakeng sa nako e tlang.a Petrose oa Bobeli 3:13 e re: “Ho na le maholimo a macha le lefatše le lecha tseo re li letetseng ho ea ka tšepiso ea hae, ’me ho tsena ho loka ho tla aha.” Lipaki tsa Jehova li thusitse ba limilione ho hlaolela tšepo ea ho phela ka ho sa feleng e le karolo ea ‘lefatše lena le lecha’ le tšepisitsoeng. Li ka rata ho u thusa le uena.

Ha u ntse u hōla tsebong e nepahetseng ea Bibele, u tla utloisisa ka ho feletseng hore bokamoso ba hao ha boa itšetleha ka ho rereloa ho itseng esale pele hoo u ke keng oa ho laola. Mantsoe a Moshe ho Baiseraele ba boholo-holo a hlile aa sebetsa: “Ke beile pel’a hao bophelo le lefu, lehlohonolo le thohako. Ikhethele bophelo, u tle u phele, uena, le litloholo tsa hao; u tle u rate Jehova, Molimo oa hao, u utloe lentsoe la hae, ’me u mo khomarele.” (Deuteronoma 30:19, 20) E, u na le khetho bokamosong ba hao. Ha bo laoloe ke khopolo ea ho hlolloa bokamoso.

[Mongolo o botlaaseng ba leqephe]

[Litšoantšo tse leqepheng la 6, 7]

Likoluoa tsena e ne e se ‘liketso tsa Molimo’

[Litlhaloso Tsa Moo Litšoantšo li Nkiloeng Teng]

U.S. Coast Guard photo

WHO

UN PHOTO 186208 /M. Grafman