Ke Hokae Moo ho ka Fumanoang Thabo ea Sebele?

BATHO ba bangata ba nahana hore thabo e ka fumanoa ka ho ba le matlotlo a bonahalang. Uena u nahana joang? Le hoja ka sebele lintho tse bonahalang li ka tlatsetsa thabong ea rōna, ha li e tiise; kapa hona hore mabothobotho a nama a haha tumelo kapa ho kholisa litlhoko tsa moea.

Thutong ea hae ea Thabeng, Jesu Kreste o ile a re: “Ho thaba ba elang hloko tlhoko ea bona ea moea, kaha ’muso oa maholimo ke oa bona.” (Matheu 5:3) Jesu o ile a boela a re: “Itebele khahlanong le mofuta o mong le o mong oa ho chacheha ka mohono, hobane esita le ha motho a e-na le ho hongata haholo bophelo ba hae ha bo hlahe linthong tseo a nang le tsona.”—Luka 12:15.

Ba bangata ba batla thabo ka ho kopanela boitšoarong bo bobe ba likamano tsa botona le botšehali le ‘mesebetsing e meng ea nama.’ (Bagalata 5:19-21) Leha ho le joalo, ho inehela menyakeng ea nama ha ho tlise thabo ea ’nete le e tšoarellang. Ha e le hantle, ba etsang lintho tse joalo ba ke ke ba rua ’Muso oa Molimo.—1 Bakorinthe 6:9, 10.

Ba bang ba icheba bobona ha ba batla thabo ka ho leka ho hōlisa ho itlhompha ka bobona. Lilaebrari le mabenkele a libuka a tletse ka libuka tse ka tataisang motho, empa libuka tse joalo ha lia tlisetsa batho thabo e tšoarellang. Ka hona, ke hokae moo re ka fumanang thabo ea sebele?

Bakeng sa ho thaba ka ho feletseng, re lokela ho hlokomela tlhoko ea rōna ea moea eo re tsoetsoeng le eona. Jesu o ile a re: “Ho thaba ba elang hloko tlhoko ea bona ea moea.” Ka sebele, ho ke ke ha re tsoela molemo ho utloisisa tlhoko ena ebe joale re hlōleha ho etsa letho ka eona. Ka mohlala: Ho ne ho ka etsahala eng ka semathi sa lebelo la mokoka seo ka mor’a ho matha se hlōlehang ho khotsofatsa ’mele oa sona o nyoretsoeng metsi? Na ka potlako se ne se ke ke sa thulana le bothata ba ho felloa ke metsi ’meleng le liphello tse ling tse tebileng? Ka mokhoa o tšoanang, haeba re hlōleha ho khotsofatsa tlhoko ea rōna ea lijo tsa moea, qetellong re tla pona moeeng. Sena se tla lebisa ho lahleheloeng ke nyakallo le thabo.

Jesu o ile a hlokomela tlhoko ea hae ea moea ka ho feletseng, kamehla a ithuta Lentsoe la Molimo le ho thuisa ka lona. O ne a ka fumana le ho bala likarolo tsa Mangolo a Halalelang ka bobebe, ’me o ile a ruta ba bang ho etsa se tšoanang. (Luka 4:16-21; bapisa le Baefese 4:20, 21.) Jesu o ile a boela a tšoantša ho etsa thato ea Ntate oa hae oa leholimong le lijo. Ho etsa thato ea Molimo ho ile ha mo tlisetsa thabo e khōlō.—Johanne 4:34.

E, thabo ea ’nete e ke ke ea fumanoa ka ho ba le lintho tse bonahalang; leha e le hona hore ho fepa nama ea boetsalibe ho ka fella ka thabo. Thabo ea ’nete e tsoa pelong, e thehiloe tumelong ea ’nete le kamanong e ntle le Jehova Molimo. Ka hona, ka ho loketseng mopesaleme Davida o ile a bina: “Ho thaba batho bao Molimo oa bona e leng Jehova.”—Pesaleme ea 144:15b, NW.

[Setšoantšo se leqepheng la 23]

Tumelo le kamano e ntle le Molimo li tla u tlisetsa thabo ea sebele