Lerato la Lōna la Bara ba Motho a le Tsoele Pele!

“Lerato la lōna la bara ba motho a le tsoele pele.”—BAHEBERU 13:1.

 1. U ne u tla etsa joang ho boloka mollo o ntse o tuka mantsiboeeng a batang, ’me ke boikarabelo bofe bo tšoanang boo rōna kaofela re nang le bona?

NTJA e ingoaile ka leoto la pele, ’me serame se ntse se ipha matla. Mohloli o le mong feela oa mofuthu ka tlung ea hao ke mollo o ntseng o tloatloatsa ka leifong. Bophelo bo itšetlehile ka ho etsa hore mollo ona o se ke oa tima. Na u ne u tla lula feela ’me u shebelle ha malakabe a fela ’me mashala a hlenneng a fifala, e e-ba molora? Che u ne u ke ke. U beseletsa u sa khathale hore o ’ne o tuke. Ho isa bohōleng bo itseng, e mong le e mong ho rōna o na le mosebetsi o tšoanang mabapi le “mollo” oa bohlokoa ka ho fetisisa—o lokelang ho tuka ka lipelong tsa rōna—lerato.

 2. (a) Ke hobane’ng ha ho ka boleloa hore lerato le folile matsatsing aa a ho qetela? (b) Lerato ke la bohlokoa hakae ho Bakreste ba ’nete?

² Joalokaha Jesu a boletse khale esale pele, re phela nakong ea ha lerato le fola har’a ba ipolelang hore ke Bakreste ho pota lefatše. (Matheu 24:12) Jesu o ne a bua ka mofuta oa bohlokoa ka ho fetisisa oa lerato, lerato la ho rata Jehova Molimo le Lentsoe la hae, Bibele. Mefuta e meng ea lerato le eona ea fokotseha. Bibele e boletse esale pele hore “matsatsing a ho qetela,” ba bangata e ne e tla ba “ba se nang boikutlo bo mofuthu ba tlhaho.” (2 Timothea 3:1-5) Sena ke ’nete hakaakang! Lelapa e lokela ho ba sebaka se sireletsehileng sa boikutlo bo mofuthu ba tlhaho, empa esita le hona teng, pefo le tlhekefetso—ka linako tse ling e le tse sehlōhō ka mokhoa o tšosang—li se li atile. Empa, tikolohong ea lefatše lena e se nang botsoalle, Bakreste ba laeloa hore ba se ke ba ratana feela tjee empa ba be le lerato la boitelo, ba etelletse ba bang ka pel’a bona. Re lokela ho bontša lerato lena ka tsela e totobetseng hoo le bonahalang ho bohle, e be letšoao le khethollang la phutheho ea Bokreste ea ’nete.—Johanne 13:34, 35.

 3. Lerato la bara ba motho ke eng, ’me ho etsa hore le tsoele pele ho bolela’ng?

³ Moapostola Pauluse o ile a bululeloa hore a laele: “Lerato la lōna la bara ba motho a le tsoele pele.” (Baheberu 13:1) Ho latela buka e ’ngoe ea botsebi, lentsoe la Segerike leo mona le fetoletsoeng e le “lerato . . . la bara ba motho” (phi·la·del·phiʹa) “le bolela lerato le bontšang kameho e mofuthu, le bontšang mosa, qenehelo, le ithaopelang ho thusa.” ’Me Pauluse o ne a bolela’ng ha a ne a re re lokela ho etsa hore lerato le joalo le tsoele pele? Buka eona eo e re: “Le ka mohla ha lea lokela ho fola.” Ka hona ha hoa lekana ho ba le boikutlo bo mofuthu bakeng sa barab’abo rōna; re tlameha ho etsa hore bo bonahale. Ho feta moo, re tlameha ho etsa hore lerato lena le tšoarelle, le ka mohla re se le lumelle hore le fole. Na ke ho phephetsang? E, empa moea oa Jehova o ka re thusa ho hlaolela boikutlo bo mofuthu ba bara ba motho le ho bo boloka. A re hlahlobeng litsela tse tharo tsa ho rotetsa lerato lena ka lipelong tsa rōna.

Utloelanang Bohloko

 4. Ho utloelana bohloko ke eng?

⁴ Haeba u batla ho ba le lerato le eketsehileng bakeng sa bara le barali beno ba Bakreste, ho ka ’na ha hlokahala hore u qale ka ho ba utloela bohloko haholo, ho ipeha boemong ba bona litekong le liphephetsong tseo ba talimanang le tsona bophelong. Moapostola Petrose o ile a etsa tlhahiso ena ha a ne a ngola: “Kaofela ha lōna le be le kelello e joalo, le bontša ho utloelana bohloko, le e-na le boikutlo bo mofuthu ba bara ba motho, le e-na le qenehelo e bonolo, le ikokobelitse kelellong.” (1 Petrose 3:8) Lentsoe la Segerike le sebelisitsoeng mona bakeng sa “ho utloelana bohloko” le bolela “ho utloa bohloko le.” Mohloli o mong oa boitsebiso mabapi le Segerike sa Bibele o re ka polelo ena: “E hlalosa boemo ba kelello bo leng teng ha re kopanela maikutlong a ba bang joalokaha eka ke a rōna.” Kahoo, ho ipeha boemong ba motho e mong hoa hlokahala. Mohlanka e mong oa Jehova ea hōlileng, ea tšepahalang o kile a re: “Ho ipeha boemong ba motho e mong ke ho utloa bohloko ba hae ka pelong ea ka.”

 5. Re tseba joang hore Jehova o na le kutloelo-bohloko?

⁵ Na Jehova o na le kutloelo-bohloko e joalo? Ka sebele ho joalo. Ka mohlala, re bala sena mabapi le bohloko bo ileng ba utluoa ke sechaba sa hae sa Iseraele: “Litsietsing tsohle tsa bona a ba tsietsing le bona.” (Esaia 63:9) Jehova ha aa ka a bona mathata a bona feela; o ile a utloela sechaba seo bohloko. Hore na o na le boikutlo bo matla hakae ho bontšoa ke mantsoe a Jehova ka boeena ho sechaba sa hae, a tlalehiloeng ho Zakaria 2:8: “Ea le amang o ama thaka ea leihlo la [ka, NW].”a Mabapi le temana ena mohlalosi e mong o re: “Leihlo ke se seng sa litho tse rarahaneng le tse tetemang ka ho fetisisa ’meleng oa motho; ’me thaka ea leihlo—lesoba leo khanya ea leholimo e kenang ka lona ho etsa hore motho a bone—ke karolo ea leihlo e boi ka ho fetisisa, ebile e le ea bohlokoa ka ho fetisisa. Ha ho letho le ka fetisang khopolo ea tlhokomelo e bonolo ea Jehova bakeng sa lintho tseo a li ratang hamolemo ho feta sena.”

 6. Jesu Kreste o bontšitse kutloelo-bohloko joang?

⁶ Jesu le eena o ’nile a bontša kutloelo-bohloko e matla kamehla. Ka makhetlo-khetlo o ile a “susumetsoa ke khauho” mabapi le boemo bo sa thabiseng ba batho ba habo ba neng ba kula kapa ba le matšoenyehong. (Mareka 1:41; 6:34) O ile a bontša hore ha mang kapa mang a hlōleha ho tšoara balateli ba hae ba tlotsitsoeng ka mosa, o ikutloa joalokaha eka ke eena ea neng a amohela tšoaro e joalo. (Matheu 25:41-46) ’Me kajeno e le “moprista ea phahameng” oa rōna oa leholimo, ke eena ea ka ‘utloelang mefokolo ea rōna bohloko.’—Baheberu 4:15.

 7. Kutloelo-bohloko e ka re thusa joang ha mora kapa morali oabo rōna a re khopisa?

⁷ Ho “utloela mefokolo ea rōna bohloko”—na oo hase mohopolo o tšelisang? Joale ka sebele re batla ho etsetsana se tšoanang. Ha e le hantle, ho bonolo haholo ho batla mefokolo ea e mong. (Matheu 7:3-5) Empa nakong e tlang ha mora kapa morali oabo rōna a u khopisa, ke hobane’ng ha u sa leke see? Inahane u le boemong ba motho eo, u e-na le semelo seo, botho boo, mefokolo eo ea botho eo u lokelang ho e loantša. Na u ka kholiseha hore u ne u ke ke ua etsa liphoso tse tšoanang—kapa mohlomong tse bileng li leng mpe le ho feta? Ho e-na le ho lebella ho hongata ka ho fetisisa ho ba bang, re lokela ho bontša kutloelo-bohloko e tla re thusa ho nahanela maemo joaloka Jehova, ea ‘elelloang hoba re lerōle feela.’ (Pesaleme ea 103:14; Jakobo 3:17) O tseba mefokolo ea rōna. Le ka mohla ha a lebelle se fetang seo ka ho utloahalang re ka khonang ho se etsa. (Bapisa le 1 Marena 19:5-7.) Kaofela a re atolosetseng kutloelo-bohloko e joalo ho ba bang.

 8. Re lokela ho itšoara joang ha mora kapa morali oabo rōna a e-na le bothata bo itseng?

⁸ Pauluse o ile a ngola hore phutheho e tšoana le ’mele o nang le litho tse sa tšoaneng tse lokelang ho sebetsa hammoho bonngoeng. O ile a phaella: “Haeba setho se seng se utloa bohloko, litho tse ling tsohle li utloa bohloko le sona.” (1 Bakorinthe 12:12-26) Ho hlokahala hore re utloe bohloko hammoho le ba hlahetsoeng ke teko e itseng e bohloko kapa re ipehe boemong ba bona. Baholo ba etella pele ho etseng joalo. Pauluse o ile a boela a ngola: “Ke mang ea fokolang, ’me ’na ke sa fokole? Ke mang ea khoptjoang, ’me ’na ke sa tuke ke bohale?” (2 Bakorinthe 11:29) Baholo le balebeli ba tsamaeang ba etsisa Pauluse tabeng ena. Lipuong tsa bona, mosebetsing oa bona oa bolisa esita le ha ba sebetsana le litaba tsa boahloli, ba leka ka matla ho bontša kutloelo-bohloko. Pauluse o ile a eletsa: “Llang le batho ba llang.” (Baroma 12:15) Ha linku li e-na le boikutlo ba hore balisa ba hlile ba ipehile boemong ba tsona, ba utloisisa mefokolo ea tsona le ho li utloela bohloko mathateng ao li tobaneng le ’ona, hangata li ikemisetsa haholoanyane ho amohela keletso, tataiso le taeo. Li kopanela libokeng ka cheseho, li kholisehile hore li tla fumanela ‘lisoule tsa tsona khatholoho.’—Matheu 11:29.

Ho Bontša Kananelo

 9. Jehova o bontša joang hore o ananela se molemo ho rōna?

⁹ Tsela ea bobeli ea ho rotetsa lerato la bara ba motho ke ka kananelo. E le hore re ananele ba bang, re tlameha ho lebisa tlhokomelo litšoanelehong tsa bona tse molemo le boitekong ba bona ’me re li nke e le tsa bohlokoa. Ha re etsa joalo, re etsisa Jehova ka boeena. (Baefese 5:1) Kamehla o re tšoarela libe tse ngata tse nyenyane. O bile o re tšoarela libe tse tebileng hafeela re baka kannete. Joale hang ha a re tšoaretse libe, ha a lule a nahana ka tsona. (Ezekiele 33:14-16) Mopesaleme o ile a botsa: “Ha u ka lotolotsa makhopo, ke mang ea ka emang pel’a hao, Morena?” (Pesaleme ea 130:3) Seo Jehova a lebisang tlhokomelo ho sona ke lintho tse molemo tseo re li etsang ha re mo sebeletsa.—Baheberu 6:10.

10. (a) Ke hobane’ng ha ho le kotsi hore balekane ba lenyalo ba felloe ke kananelo e mong ho e mong? (b) Motho ea felloang ke kananelo bakeng sa molekane oa hae o lokela ho etsa joang?

¹⁰ Ke habohlokoa ka ho khethehileng ho latela mohlala ona ka lapeng. Ha batsoali ba bontša hore baa ananelana, ba behela lelapa mohlala. Mehleng ena ea manyalo a nakoana, ho bonolo haholoanyane ho tšoara molekane ka ho se tsotelle le ho hōlisa liphoso le ho nyenyefatsa litšobotsi tse molemo. Monahano o joalo o fosahetseng o senya lenyalo, o le etsa moroalo o se nang thabo. Haeba kananelo ea hao bakeng sa molekane oa hao e fokotseha, ipotse, ‘Na molekane oa ka ha a hlile ha a na litšoaneleho tse molemo?’ Hopola mabaka ao ka ’ona u ileng ua mo rata le ho nyalana le eena. Na mabaka ao kaofela a ho rata motho eo ea khethehileng a hlile a nyametse? Ka sebele ha ho joalo; ka hona sebetsa ka thata hore u ananele botle bo leng ho molekane oa hao, ’me u bolele kananelo ea hao.—Liproverbia 31:28.

11. Hore lerato lenyalong le hloke boikaketsi, ke mekhoa efe e lokelang ho qojoa?

¹¹ Kananelo e boetse e thusa balekane ba lenyalo ho etsa hore lerato la bona le hloke boikaketsi. (Bapisa le 2 Bakorinthe 6:6; 1 Petrose 1:22.) Lerato le joalo, le rotetsoang ke kananelo e tlohang pelong, le ke ke la fana ka monyetla oa bokhopo ba lekunutung, oa mantsoe a khopisang le a nyelisang, oa hore balekane ba hlokomolohane hoo matsatsi a ka fetang ho sa buuoe lentsoe le bontšang mosa kapa ho nahanela, ’me ka sebele ha le fane ka monyetla oa ho otla. (Baefese 5:28, 29) Monna le mosali ba hlileng ba ananelanang baa hlomphana. Ha ba etse sena feela ha ba le ka har’a batho empa ba se etsa neng le neng ha Jehova a ba bona—ka mantsoe a mang, ba se etsa ka linako tsohle.—Liproverbia 5:21.

12. Ke hobane’ng ha batsoali ba lokela ho bontša kananelo bakeng sa lintho tse molemo tse ho bana ba bona?

¹² Bana le bona ho hlokahala hore ba ikutloe ba ananeloa. Eseng hore batsoali ba lokela ho ba bokotsa, empa ba lokela ho babatsa litšoaneleho tsa bana ba bona tse tšoaneloang ke thoriso le lintho tseo ba li etsang tseo ka sebele li leng molemo. Hopola mohlala oa Jehova ha a bontša hore o amohela Jesu. (Mareka 1:11) Hape hopola mohlala oa Jesu joaloka “monghali” papisong e ’ngoe. O ile a babatsa ‘makhoba a mabeli a molemo le a tšepahalang’ ka ho lekana, le hoja ho ne ho e-na le phapang ho seo le leng le le leng le ileng la se fuoa, le phapang e lekanang ho seo le leng le le leng le ileng la se hlahisa. (Matheu 25:20-23; bapisa le Matheu 13:23.) Ka ho tšoanang batsoali ba bohlale ba fumana litsela tsa ho bontša kananelo bakeng sa litšoaneleho, matla le lintho tse ikhethang tse finyelloang ke ngoana ka mong. Ka nako e tšoanang, ba leka ho se behe khatiso e khōlō linthong tseo bana ba bona ba li finyellang hoo bana ba bona ba lulang ba ikutloa ba susumelletseha ho hlōlisana. Ha ba batle hore bana ba bona ba hōle ba khenne kapa ba nyahame.—Baefese 6:4; Bakolose 3:21.

13. Ke mang ea etellang pele ho bontšeng kananelo bakeng sa setho ka seng sa phutheho?

¹³ Ka phuthehong ea Bokreste, baholo le balebeli ba tsamaeang ba etella pele ho bontšeng setho ka seng sa mohlape oa Molimo kananelo. Boemo ba bona ke bo thata, kaha ba boetse ba na le boikarabelo bo boima ba ho laea ka ho loka, ho khutlisetsa ba fosang tseleng ka moea o bonolo, le ho fana ka keletso e matla ho ba e hlokang. Ba leka-lekanya boikarabelo boo bo sa tšoaneng joang?—Bagalata 6:1; 2 Timothea 3:16.

14, 15. (a) Pauluse o ile a bontša ho leka-lekana joang tabeng ea ho fana ka keletso e matla? (b) Balebeli ba Bakreste ba ka leka-lekanya tlhoko ea ho lokisa liphoso le tlhoko ea ho babatsa joang? Bontša.

¹⁴ Mohlala oa Pauluse ke thuso e khōlō. E ne e le mosuoe, moholo le molisa ea hlaheletseng. O ne a tlameha ho sebetsana le liphutheho tse neng li e-na le mathata a tebileng, ’me tšabo ha ea ka ea etsa hore a tlohele ho fana ka keletso e matla ha e ne e hlokahala. (2 Bakorinthe 7:8-11) Tlhahlobo e akaretsang ea tšebeletso ea Pauluse e bontša hore e ne e le ka seoelo a neng a khalemela ka matla—e ne e e-ba feela ha boemo bo ne bo ho hloka kapa ho le molemo. Ho sena o ne a bontša bohlale ba bomolimo.

¹⁵ Haeba tšebeletso ea moholo ka pel’a phutheho e ne e tšoantšoa le ’mino o hlophisitsoeng, joale khalemelo e matla le nyatso li ne li tla tšoana le noto e le ’ngoe e lumellanang le mokhoa oo pina eohle e binoang ka oona. Noto eo e loketse sebakeng sa eona. (Luka 17:3; 2 Timothea 4:2) Nahana ka pina eo ho eona ho pheta-phetoang noto eo e le ’ngoe feela. E ne e tla re tena kapele. Ka ho tšoanang, baholo ba Bakreste ba leka ho phethahatsa thuto ea bona le ho e matlafatsa ka lintho tse sa tšoaneng. Ha ba e lekanyetse tabeng ea ho lokisa mathata. Ho e-na le hoo, ka kakaretso mokhoa oa bona oa ho ruta ke o hahang. Joaloka Jesu Kreste, baholo ba lerato ba qala ka ho batla se molemo seo ba ka se babatsang, eseng liphoso tseo ba ka li tšoaeang. Ba ananela mosebetsi o thata oo Bakreste-’moho le bona ba o etsang. Ba kholisehile hore ka kakaretso, e mong le e mong o etsa se molemohali ho sebeletsa Jehova. ’Me baholo ha ba tsilatsile ho bolela boikutlo boo.—Bapisa le 2 Bathesalonika 3:4.

16. Boikutlo ba Pauluse bo bontšang kananelo le ho ipeha boemong ba motho e mong bo bile le phello efe ho Bakreste-’moho le eena?

¹⁶ Ha ho pelaelo hore Bakreste ba bangata bao Pauluse a neng a ba sebeletsa ba ne ba hlokomela hore oa ba ananela le ho ba utloela bohloko. Re tseba see joang? Bona kamoo ba neng ba ikutloa kateng ka Pauluse. Ba ne ba sa mo tšabe, le hoja a ne a e-na le matla a ho laela a maholo. Che, o ne a rateha a bile a atameleha. Ka sebele, ha a ne a tloha sebakeng se seng, baholo ba ile ba ‘itihela molaleng oa hae ’me ba mo aka ka bonolo’! (Liketso 20:17, 37) Baholo hammoho le rōna kaofela re lokela ho leboha hakaakang hore ebe re na le mohlala oa Pauluse oo re ka o etsisang! E, a re ananelaneng.

Liketso Tse Bontšang Mosa o Lerato

17. Liphello tse ling tse molemo tsa liketso tse bontšang mosa ke life ka phuthehong?

¹⁷ Tse ling tsa libeso tse atlehang ka ho fetisisa tsa lerato la bara ba motho ke ketso e itekanetseng e bontšang mosa. Joalokaha Jesu a boletse, “ho na le thabo e eketsehileng ho faneng ho feta e teng ho amoheleng.” (Liketso 20:35) Ebang re fana ka lintho tsa moea, tse bonahalang, kapa ka nako ea rōna le matla a rōna, hase feela hore re thabisa ba bang empa le rōna rea ithabisa. Ka phuthehong, mosa oa tšoaetsanoa. Ketso e le ’ngoe ea mosa e susumetsa letoto la liketso tse tšoanang. Ka nako e khutšoanyane feela, boikutlo bo mofuthu ba bara ba motho boa hōla!—Luka 6:38.

18. Moelelo oa “mosa” oo ho buuoang ka oona ho Mikea 6:8 ke ofe?

¹⁸ Jehova o ile a phehella batho ba hae Baiseraele ho bontša mosa. Ho Mikea 6:8, rea bala: “Uena motho, u tsebisitsoe se leng molemo, le seo Jehova a se batlang ho uena, ke hore u etse se lokileng, u rate [mosa, NW], le ho tsamaea ka boikokobetso le Molimo oa hao.” Ho ‘rata mosa’ ho bolela’ng? Lentsoe la Seheberu le sebelisitsoeng mona bakeng sa “mosa” (cheʹsedh) le boetse le fetoletsoe Senyesemaneng e le “mercy” (mohau). Ho latela The Soncino Books of the Bible, lentsoe lena le “bolela ntho e ’ngoe e etsang ho hong ho bonahalang haholoanyane ho e-na le lentsoe la Senyesemane mercy, le bolelang ntho e sa bonahaleng. Le bolela ‘mohau o bontšoang ka liketso,’ ho etsoa ha liketso tsa botho tse bontšang mosa o lerato, eseng feela ho mafutsana le bahloki, empa ho batho bohle.” Kahoo setsebi se seng se re cheʹsedh e bolela “lerato le bontšoang ka liketso.”

19. (a) Ke ka litsela life re ka nkang bohato ba pele ba ho bontša ba bang ba ka phuthehong mosa? (b) Fana ka mohlala oa kamoo u ’nileng ua bontšoa lerato la bara ba motho.

¹⁹ Lerato la rōna la bara ba motho hase taba ea molomo kapa e sa bonahaleng. Ke taba ea sebele. Kahoo, batla litsela tsa ho etsetsa bara le barali beno lintho tse bontšang mosa. E-ba joaloka Jesu, eo e neng e se kamehla a neng a letela hore batho ba mo atamele ho kōpa thuso empa eo ka boeena hangata a neng a nka bohato ba pele. (Luka 7:12-16) Nahana ka ho khethehileng ka ba hlokang ka ho fetisisa. Na motho ea hōlileng kapa ea fokolloang ke bophelo o hloka ho eteloa kapa mohlomong o hloka thuso e itseng ea ho eloa libakeng tse sa tšoaneng? Na “khutsana” e itseng e hloka nako le tlhokomelo? Na motho ea itseng ea tepeletseng maikutlo o hloka ho mameloa kapa ho tšelisoa ka tsela e itseng? Ha re khona, a re ipheng nako ea ho etsa liketso tse joalo tse bontšang mosa. (Jobo 29:12; 1 Bathesalonika 5:14; Jakobo 1:27) Le ka mohla u se ke ua lebala hore ka phuthehong e tletseng batho ba sa phethahalang, e ’ngoe ea liketso tsa bohlokoahali tsa mosa ke ho tšoarela—hore ka bolokolohi re khaotse ho halefa, esita leha ho e-na le lebaka le utloahalang la ho belaela. (Bakolose 3:13) Ho ikemisetsa ho tšoarela ho thusa ho boloka phutheho e se na likarohano, likhopiso le likhohlano, tse kang lintho tse metsi tse timang mollo oa lerato la bara ba motho.

20. Kaofela ha rōna re lokela ho tsoela pele ho itlhahloba joang?

²⁰ Kaofela a re ikemisetseng ho boloka mollo ona oa bohlokoa oa lerato o tuka ka lipelong tsa rōna. A re tsoeleng pele ho itlhahloba. Na re utloela ba bang bohloko? Na re ananela ba bang? Na re etsetsa ba bang liketso tse bontšang mosa? Hafeela re ntse re etsa joalo, mollo oa lerato o tla futhumatsa kutloano ea rōna ea bara ba motho ho sa tsotellehe hore na lefatše lena le fetoha le batang habohloko hakae le le sehlōhō hakae. Joale, ka hohle-hohle “lerato la lōna la bara ba motho a le tsoele pele”—hona joale le ka ho sa feleng!—Baheberu 13:1.

[Mongolo o botlaaseng ba leqephe]

U Nahana Joang?

◻ Lerato la bara ba motho ke eng, ’me ke hobane’ng ha re lokela ho etsa hore le tsoele pele?

◻ Ho utloelana bohloko ho re thusa joang ho boloka lerato la rōna la bara ba motho?

◻ Kananelo e phetha karolo efe leratong la bara ba motho?

◻ Ke joang liketso tse bontšang mosa li etsang hore lerato la bara ba motho le hōle ka phuthehong ea Bokreste?

[Lebokose le leqepheng la 16]

Lerato le Bontšoang ka Liketso

Lilemong tse itseng tse fetileng, monna ea neng a ithutile Bibele le Lipaki tsa Jehova ka nako e itseng o ne a ntse a belaella lerato la bara ba motho. O ne a tseba hore Jesu o ile a re: “Ka sena bohle ba tla tseba hore le barutuoa ba ka, haeba le e-na le lerato har’a lōna.” (Johanne 13:35) Empa o ile a fumana ho le thata ho lumela sena. Ka letsatsi le leng o ile a bona lerato la Bokreste le bontšoang ka liketso.

Le hoja a lula setulong sa likooa ka linako tsohle, monna enoa o ne a etela libaka tse hōle le hae. Ha a le Bethlehema, Iseraele, o ile a ba teng sebokeng sa phutheho. Ha a le moo, Paki ea Moarabe e ile ea phehella hore Paki e ’ngoe ea moeti e robaletse ha eona, ’me seithuti sena sa Bibele se ile sa akarelletsoa memong ena. Pele se il’o robala, seithuti sena se ile sa kōpa tumello ea ho tsoela ka ntle foranteng hoseng ho ea shebella letsatsi ha le chaba, ho mong’a ntlo. Ka tieo mong’a ntlo o ile a mo hlokomelisa hore a se ke a etsa joalo. Letsatsing le latelang mora enoa oabo rōna oa Moarabe o ile a hlalosa lebaka. A bua le eena ka mofetoleli, o ile a bolela hore haeba baahisani ba hae ba ne ba ka tseba hore o na le baeti ba semelo sa Bojuda—joalokaha ho ne ho le joalo ka seithuti sena sa Bibele—ba ne ba tla cheselletsa eena mong’a ntlo le lelapa la hae ka tlung. Se tsielehile, seithuti sa Bibele se ile sa mo botsa, “Joale, ke hobane’ng ha u ile ua ipeha kotsing e joalo?” A bua le eena ntle ho mofetoleli, mor’abo rōna oa Moarabe o ile a mo talima ka har’a thaka ea leihlo ’me a re, “Johanne 13:35.”

Seithuti sena sa Bibele se ile sa khahloa ka ho tebileng ke bonnete ba hore lerato la bara ba motho ke ntho ea sebele. Se ile sa kolobetsoa kapele ka mor’a moo.

[Setšoantšo se leqepheng la 18]

Botho ba moapostola Pauluse ba ho ba le botsoalle le kananelo bo ile ba etsa hore a atamelehe