Jehova, Molimo ea ‘Lulang a Loketse ho Tšoarela’

“Uena, Jehova, u molemo ’me u lula u loketse ho tšoarela.”—PESALEME EA 86:5, NW.

 1. Morena Davida o ile a jara moroalo ofe o boima, ’me o ile a fumanela pelo ea hae e tšoenyehileng matšeliso hokae?

MORENA DAVIDA oa Iseraele ea boholo-holo o ne a tseba hore na letsoalo le molato e ka ba moroalo o boima hakae. O ile a ngola: “Makhopo a ka a phahamile ho feta hlooho ea ka, a nkimela ka boima ba ’ona joalo ka phahlo e thata. Ke feletsoe ke matla, ke robehile hampe, ke lumaela ka baka la ho hlora ha pelo ea ka.” (Pesaleme ea 38:4, 8) Leha ho le joalo, Davida o ile a fumanela pelo ea hae e tšoenyehileng matšeliso. O ne a tseba hore le hoja Jehova a hloile sebe, ha a hloee moetsalibe—haeba a bakile e le kannete ’me a furalla tsela ea hae ea boetsalibe. (Pesaleme ea 32:5; 103:3) Ka tumelo e feletseng boikemisetsong ba Jehova ba ho hauhela ba bakileng, Davida o itse: “Uena, Jehova, u molemo ’me u lula u loketse ho tšoarela.”—Pesaleme ea 86:5, NW.

 2, 3. (a) Ha re etsa sebe, phello e ka ba ho jara moroalo ofe, ’me ke hobane’ng ha ho le molemo? (b) Ho “metsoa” ke ho ikutloa u le molato ho na le kotsi efe? (c) Bibele e re tiisetsa eng ka boikemisetso ba Jehova ba ho tšoarela?

² Le rōna ha re etsa sebe, phello e ka ’na ea e-ba ho jara moroalo o boima oa ho tšoenngoa ke letsoalo. Boikutlo bona ba ho ikoahlaea ke ba tlhaho, ebile bo molemo. Bo ka re susumelletsa ho nka mehato e nepahetseng ea ho lokisa liphoso tsa rōna. Leha ho le joalo, Bakreste ba bang ba sithabelitsoe ke ho ikutloa ba le molato. Lipelo tsa bona tse ikahlolang li ka ’na tsa phehella hore Molimo a ke ke a ba tšoarela ka ho feletseng, ho sa tsotellehe hore na ba bakile hakae. Morali e mong oabo rōna ha a nahana ka phoso eo a ileng a e etsa, o ile a re: “Ho nahana hore ho ka ’na ha etsahala hore Jehova a se ke a hlola a u rata, ke boikutlo bo tšosang.” Esita le ka mor’a hore a bake ’me a amohele keletso e molemo e tsoang ho baholo ba phutheho, o ile a tsoela pele ho ikutloa a sa tšoanelehe bakeng sa hore Molimo a mo tšoarele. Oa hlalosa: “Ha ho letsatsi le fetang ke sa kōpe tšoarelo ho Jehova.” Haeba re “metsoa” ke ho ikutloa re le molato, Satane a ka ’na a leka ho etsa hore re tele, re ikutloe hore ha re tšoanelehe bakeng sa ho sebeletsa Jehova.—2 Bakorinthe 2:5-7, 11.

³ Empa ho hang eo hase tsela eo Jehova a talimang litaba ka eona! Lentsoe la hae le re tiisetsa hore ha re baka e le kannete ho tloha pelong, Jehova o ikemiselitse, o bile o loketse ho tšoarela. (Liproverbia 28:13) Ka hona haeba u kile ua bona eka Molimo a ke ke a u tšoarela, mohlomong ho hlokahala hore u utloisise hantle hore na ke hobane’ng ha a tšoarela le hore na o tšoarela joang.

Ke Hobane’ng ha Jehova a ‘Lula a Loketse ho Tšoarela’?

 4. Jehova o hopola eng ka sebōpeho sa rōna, ’me see se ama tsela eo a re tšoarang ka eona joang?

⁴ Rea bala: “Joalo ka ha bochabela bo le hole le bophirimela, o lahlela makhopo a rōna joalo hole le rōna. Joalo ka ha ntat’a motho a hauhela bana ba hae, Jehova o hauhela joalo ba mo tšabang.” Ke hobane’ng ha Jehova a lula a loketse ho hauhela? Temana e latelang ea araba: “Hobane o tsebisisa ho bōpjoa ha rōna, o elelloa hoba re lerōle feela.” (Pesaleme ea 103:12-14) E, Jehova ha a lebale hore re bōpiloe ka lerōle, re na le bofokoli kapa mefokolo, ka lebaka la ho se phethahale. Polelo e reng o tseba “ho bōpjoa ha rōna” e re hopotsa hore Bibele e tšoantša Jehova le sebōpi sa lipitsa tsa letsopa ’me rōna e re tšoantša le lipitsa tseo a li bōpang.a (Jeremia 18:2-6) Sebōpi sa lipitsa tsa letsopa se tiisa lipitsa tsa sona tsa letsopa ha se li tšoere ka letsoho empa se li tšoara ka hloko e khōlō, ka linako tsohle se hopola sebōpeho sa tsona. Ka hona, le Jehova, Sebōpi se Seholo sa Lipitsa tsa Letsopa, o nolofatsa litšebelisano tsa hae le rōna ho latela bofokoli ba sebōpeho sa rōna sa boetsalibe.—Bapisa le 2 Bakorinthe 4:7.

 5. Buka ea Baroma e hlalosa ho khomarela ka matla ha sebe nameng ea rōna ea boetsalibe joang?

⁵ Jehova o utloisisa hore na sebe se matla hakae. Mangolo a hlalosa sebe e le matla a susumetsang a khomaretseng motho ka tsela e bolaeang. Sebe se khomarela ka matla hakae? Bukeng ea Baroma, moapostola Pauluse ea bululetsoeng o hlalosa sena ka tsela e hlakileng: Re “tlas’a sebe,” joalokaha masole a le tlas’a molaoli oa ’ona (Baroma 3:9); se “ile sa busa” moloko oa batho joaloka morena (Baroma 5:21); se ‘lula’ ka ho rōna (Baroma 7:17, 20); “molao” oa sona o sebetsa o sa khaotse ka ho rōna, ha e le hantle o leka ho laola liketso tsa rōna. (Baroma 7:23, 25) Ke ntoa e boima hakaakang eo re lokelang ho e loana ho hanela sebe ho khomarela ka matla sebōpehong sa rōna sa ho se phethahale!—Baroma 7:21, 24.

 6. Jehova o talima ba batlang mohau oa hae ka pelo e soabileng joang?

⁶ Kahoo, Molimo oa rōna ea mohau oa tseba hore ha re khone ho mo mamela ka ho phethahetseng, ho sa tsotellehe hore na lipelo tsa rōna li rata ho mo mamela hakae. (1 Marena 8:46) Ka lerato o re tiisetsa hore ha re batla mohau oa hae o kang oa ntate ka pelo e soabileng, o tla re tšoarela. Mopesaleme Davida o itse: “Sehlabelo se ratoang ke Molimo, ke moea o robehileng. Molimo, ha u khese pelo e robehileng, e hlomohileng.” (Pesaleme ea 51:17) Le ka mohla Jehova a ke ke a hana kapa a furalla pelo e robehileng le e hlomohileng ka lebaka la moroalo oa ho ikutloa molato. Seo se hlalosa ho lula ha Jehova a loketse ho tšoarela hantle hakaakang!

 7. Ke hobane’ng ha re sa lokela ho nka mohau oa Molimo habobebe?

⁷ Leha ho le joalo, na see se bolela hore re ka nka mohau oa Molimo habobebe, re sebelisa sebōpeho sa rōna sa boetsalibe e le phephi ea ho etsa sebe? Le hanyenyane! Jehova ha a tataisoe ke boikutlo feela tjee. Mohau oa hae o na le meeli. Ho hang a ke ke a tšoarela bao ka lipelo tse thata ba etsang sebe sa ka boomo se kotsi ba sa bake. (Baheberu 10:26-31) Ka lehlakoreng le leng, ha a bona pelo e “robehileng, e hlomohileng,” o ‘lula a loketse ho tšoarela.’ (Liproverbia 17:3) A re nahaneng ka puo e ’ngoe e hlalosang e sebelisitsoeng ka Bibeleng ho hlalosa ho phetheha ha tšoarelo ea bomolimo.

Jehova o Tšoarela ka ho Phethahetseng Hakae?

 8. Ha e le hantle Jehova o etsa’ng ha a tšoarela libe tsa rōna, ’me see se lokela ho ba le phello efe ho rōna?

⁸ Morena Davida ea bakileng o itse: “Ka ba ka u bolella sebe sa ka, ’me ha kea ka ka pata bokhopo ba ka, ka re: Ke tla bolela ho tlōla ha ka ho Jehova; ’me ua [tšoarela, NW] bokhopo ba sebe sa ka.” (Pesaleme ea 32:5) Polelo “ua tšoarela” e fetolela lentsoe la Seheberu leo ha e le hantle le bolelang ho “phahamisa,” “jara, kakasa.” Tšebeliso ea lona mona e bolela ‘ho tlosa boikutlo ba ho ba molato, sebe, tlōlo.’ Ka hona, ka puo ea tšoantšetso Jehova o ile a phahamisa libe tsa Davida le ho li tlosa. (Bapisa le Levitike 16:20-22.) Ha ho pelaelo hore sena se ile sa lokolla Davida boikutlong ba ho ba molato boo a neng a bo jere. (Bapisa le Pesaleme ea 32:3.) Le rōna re ka tšepa ka ho feletseng Molimo ea tšoarelang libe tsa ba batlang hore a ba tšoarele motheong oa tumelo ea bona sehlabelong sa thekollo sa Jesu Kreste. (Matheu 20:28; bapisa le Esaia 53:12.) Ha ho hlokahale hore bao Jehova a phahamisang libe tsa bona ka tsela eo, a bile a li tlosa, ba tsoele pele ho jara moroalo oa boikutlo ba ho ba molato bakeng sa libe tse fetileng.

 9. Mantsoe a Jesu: “U re tšoarele melato ea rōna,” a bolela’ng?

⁹ Jesu o ile a sebelisa kamano ea ba kolotoang le ba nang le molato ho bontša kamoo Jehova a tšoarelang kateng. Ka mohlala, Jesu o ile a re phehella ho rapela: “U re tšoarele melato ea rōna.” (Matheu 6:12) Kahoo Jesu o ile a tšoantša “libe” le “melato.” (Luka 11:4) Ha re etsa libe, re ba “ba nang le melato” ho Jehova. Leetsi la Segerike le fetoletsoeng e le ho “tšoarela” le ka bolela “ho lesa, ho tela, molato, ka ho se o batle.” Ho isa bohōleng bo itseng, ha Jehova a tšoarela, o hlakola molato oo ho seng joalo re ka beng re tla o balloa. Ka tsela ena baetsalibe ba bakileng ba ka tšeliseha. Le ka mohla Jehova a ke ke a batla tefo bakeng sa molato oo a o hlakotseng!—Pesaleme ea 32:1, 2; bapisa le Matheu 18:23-35.

10, 11. (a) Ke mohopolo ofe o hlalosoang ke polelo “li hlakoloe,” e fumanoang ho Liketso 3:19? (b) Ho phethahala ha tšoarelo ea Jehova ho bontšoa joang?

¹⁰ Ho Liketso 3:19, Bibele e sebelisa mokhabo-puo o mong o hlakileng ho hlalosa tšoarelo ea Molimo: “Bakang, ’me le sokolohe e le hore libe tsa lōna li hlakoloe.” Polelo “li hlakoloe” e fetolela leetsi la Segerike leo, ha le sebelisoa ka tsela ea tšoantšetso le ka bolelang “ho hlakola ka ho feletseng, ho tlosa ka ho feletseng, ho etsa lefeela kapa ho timetsa.” Ho latela litsebi tse ling, mohopolo o bontšitsoeng ke oa ho hlakola mongolo. See se ne se ka khoneha joang? Enke eo ka tloaelo e neng e sebelisoa mehleng ea boholo-holo e ne e entsoe ka motsoako o neng o e-na le carbon, boka le metsi. Kapele ka mor’a ho ngola ka enke e joalo, motho o ne a ka nka seponche se metsi ’me a hlakola mongolo oo.

¹¹ Tabeng ena ho na le setšoantšo se setle sa hore tšoarelo ea Jehova e phethahetse. Ha a re tšoarela libe, ho tšoana le ha a nka seponche ’me a li hlakola. Ha ho hlokahale hore re tšabe hore o tla re ahlolela libe tse joalo nakong e tlang, hobane Bibele e senola ntho e ’ngoe hape e babatsehang e le kannete mabapi le mohau oa Jehova: Ha a tšoarela, oa lebala!

“Ha ke sa Tla Hopola Libe Tsa Bona”

12. Ha Bibele e re Jehova o lebala libe tsa rōna, na e bolela hore ha a khone ho li hopola, ’me ke hobane’ng ha u araba joalo?

¹² Ka moprofeta Jeremia, Jehova o ile a etsa tšepiso ena mabapi le ba leng selekaneng se secha: “Ke tla ba lesella bokhopo ba bona, ’me ha ke sa tla hopola libe tsa bona.” (Jeremia 31:34) Na see se bolela hore ha Jehova a tšoarela ha a sa khona ho hopola libe? Ho hang seo se ke ke sa etsahala. Bibele e re bolella ka batho ba bangata bao Jehova a ileng a ba tšoarela libe, ho akarelletsa le Davida. (2 Samuele 11:1-17; 12:1-13) Ho totobetse hore Jehova o ntse a tseba liphoso tseo ba ileng ba li etsa, ’me le rōna e lokela hore ebe rea li tseba. Tlaleho ea libe tsa bona, esita le ea pako ea bona le ho tšoareloa ke Molimo, e bolokiloe molemong oa rōna. (Baroma 15:4) Joale, Bibele e bolela’ng ha e re Jehova ha a ‘hopole’ libe tsa bao a ba tšoarelang?

13. (a) Ho kenyelelitsoe eng moelelong oa leetsi la Seheberu le fetoletsoeng e le ‘ke tla hopola’? (b) Ha Jehova a re, “Ha ke sa tla hopola libe tsa bona,” o re tiisetsa eng?

¹³ Leetsi la Seheberu le fetoletsoeng e le ‘ke tla hopola’ le bolela ho fetang feela ho hopola lintho tse etsahetseng nakong e fetileng. Ho latela Theological Wordbook of the Old Testament, le akarelletsa “moelelo o mong hape oa ho nka bohato bo loketseng.” Ka hona ho latela kutloisiso ena, ho “hopola” sebe ho akarelletsa ho nka bohato khahlanong le baetsalibe. Ha moprofeta Hosea a ne a re mabapi le Baiseraele ba tsoileng tseleng, “[Jehova] o tla hopola makhopo a bona,” moprofeta enoa o ne a bolela hore Jehova o ne a tla nka bohato khahlanong le bona hobane ba sa bake. Kahoo, karolo e setseng ea temana ena ea eketsa: “O khalemele libe tsa bona.” (Hosea 9:9) Ka lehlakoreng le leng, ha Jehova a re: “Ha ke sa tla hopola libe tsa bona,” o re tiisetsa hore hang ha a tšoaretse moetsalibe ea bakileng, a ke ke a nka bohato khahlanong le eena bakeng sa libe tseo nakong e itseng e tlang. (Ezekiele 18:21, 22) Kahoo o lebala ka kutloisiso ea hore ha a re hopotse libe tsa rōna khafetsa e le hore a ka re qosa kapa a re otla khafetsa. Kahoo, Jehova o re behela mohlala o motle haholo hore re o etsise litšebelisanong tsa rōna le ba bang. Ha ho hlaha liphapang, ho molemo ho se tsoele pele ho hopola litšito tseo pele u ileng ua lumela ho li tšoarela.

Ho Thoe’ng ka Liphello?

14. Ke hobane’ng ha tšoarelo e sa bolele hore moetsalibe ea bakileng o lokolotsoe liphellong tsohle tsa liketso tsa hae tse fosahetseng?

¹⁴ Na ho lula ha Jehova a loketse ho tšoarela ho bolela hore moetsalibe ea bakileng o lokolotsoe liphellong tsohle tsa liketso tsa hae tse fosahetseng? Le hanyenyane. Re ke ke ra etsa sebe ’me ra lokoloha kotlong. Pauluse o ile a ngola: “Leha e le sefe seo motho a se jalang, sena ka ho tšoanang o tla se kotula.” (Bagalata 6:7) Re ka ’na ra talimana le liphello tse itseng tsa liketso tsa rōna kapa mathata, empa ha Jehova a se a re tšoaretse, ha a etse hore re oeloe ke mahlomola. Ha ho hlaha mathata, Mokreste ha aa lokela ho ikutloa tjena, ‘Mohlomong Jehova o nkotlela libe tsa nakong e fetileng.’ (Bapisa le Jakobo 1:13.) Ka lehlakoreng le leng, Jehova ha a re lokolle liphellong tsohle tsa liketso tsa rōna tse fosahetseng. Tlhalo, ho ima ho sa batleheng, mafu a tšoaetsanoang ka likamano tsa botona le botšehali, ho se tšeptjoe le ho se hlomphuoe—lintho tsena kaofela e ka ’na ea e-ba liphello tse bohloko tsa sebe, ’me Jehova a ke ke a re sireletsa ho tsona. Hopola hore le hoja Jehova a ile a tšoarela Davida libe tsa hae mabapi le Bathe-Sheba le Uria, ha aa ka a sireletsa Davida liphellong tse bohloko tse ileng tsa latela.—2 Samuele 12:9-14.

15, 16. Molao o tlalehiloeng ho Levitike 6:1-7 o tsoela motho ea utsoelitsoeng le ea sitiloeng molemo joang?

¹⁵ Libe tsa rōna li ka ’na tsa e-ba le liphello tse ling hape. Ka mohlala, nahana ka tlaleho e ho Levitike khaolo ea 6. Molao oa Moshe mona o sebetsana le boemo bona boo ho bona motho a etsang phoso e tebileng ka ho nka thepa ea Moiseraele oa habo ka bosholu ba likhoka, ho qhekella kapa bolotsana. Joale moetsalibe o hana molato oa hae, a bile a le sebete hoo a hlapanyang ka bohata. Ke taba ea khang ea monna e khaoloa ke letlaka. Leha ho le joalo, hamorao ea sitiloeng o tšoenngoa ke letsoalo ’me o bolela sebe sa hae. Ho fumana tšoarelo ea Molimo, o lokela ho etsa lintho tse ling tse tharo: a busetse seo a neng a se nkile, a lefe motho ea utsoelitsoeng karolo ea 20 lekholong, ’me a nyehele pheleu e le sehlabelo sa molato. Joale, molao o re: “Moprista o tla mo etsetsa pheko pel’a Jehova, ’me o tla tšoareloa.”—Levitike 6:1-7; bapisa le Matheu 5:23, 24.

¹⁶ Molao ona e ne e le tokisetso e mohau ea Molimo. O ne o tsoela motho ea utsoelitsoeng molemo, eo thepa ea hae e neng e khutlisoa le eo ntle ho pelaelo a neng a ikutloa a imolohile ha ea sitiloeng a qeteletse a lumetse sebe sa hae. Ka nako e tšoanang, motho eo letsoalo la hae le qeteletseng le mo susumelelitse ho lumela molato oa hae le ho lokisa phoso ea hae, molao o ne o mo tsoela molemo. Ka sebele, haeba a ne a ile a hana ho etsa joalo, Molimo o ne a ke ke a mo tšoarela.

17. Ha ba bang ba khopisitsoe ke libe tsa rōna, Jehova o lebeletse hore re etse eng?

¹⁷ Le hoja re se tlas’a Molao oa Moshe, o re fa temohisiso ea bohlokoa mabapi le kelello ea Jehova, ho akarelletsa le pono ea hae mabapi le tšoarelo. (Bakolose 2:13, 14) Ha ba bang ba khopisitsoe ke libe tsa rōna kapa ba qhekeletsoe ka lebaka la tsona, Jehova oa thaba ha re etsa sohle seo re ka se khonang ho ‘lokisa phoso.’ (2 Bakorinthe 7:11) Sena se akarelletsa ho lumela sebe sa rōna, ho lumela molato oa rōna, esita le ho kōpa tšoarelo ho motho eo re mo entseng hampe. Joale re ka ipiletsa ho Jehova motheong oa sehlabelo sa Jesu ’me re latsoe ho imoloha ha letsoalo le hloekileng le tiisetso ea hore Molimo o re tšoaretse.—Baheberu 10:21, 22.

18. Ke taeo efe e ka ’nang ea tsamaea le tšoarelo ea Jehova?

¹⁸ Joaloka motsoali ofe kapa ofe ea lerato, Jehova a ka ’na a tšoarela a ba a laea ka tekanyo e itseng. (Liproverbia 3:11, 12) Mokreste ea bakileng a ka ’na a tlameha ho tela tokelo ea hae ea ho sebeletsa e le moholo, mohlanka ea sebeletsang kapa pula-maliboho. Ho ka ’na ha e-ba bohloko ho eena hore ebe ka nakoana o lahleheloa ke litokelo tseo e neng e le tsa bohlokoa ho eena. Leha ho le joalo, taeo e joalo ha e bolele hore Jehova ha a sa mo rata kapa hore Jehova ha a mo tšoarele. Ho phaella moo, re lokela ho hopola hore taeo e tsoang ho Jehova ke bopaki ba hore oa re rata. Ho e amohela le ho e sebelisa ho molemong oa rōna ’me ho ka lebisa bophelong bo sa feleng.—Baheberu 12:5-11.

19, 20. (a) Haeba u entse liphoso, ke hobane’ng ha u sa lokela ho ikutloa hore Jehova a ke ke a u hauhela? (b) Ho tla tšohloa eng sehloohong se latelang?

¹⁹ Ho khatholla hakaakang ho tseba hore re sebeletsa Molimo ea ‘lulang a loketse ho tšoarela’! Jehova o bona se fetang libe tsa rōna le liphoso. (Pesaleme ea 130:3, 4) O tseba se ka lipelong tsa rōna. Haeba u ikutloa hore pelo ea hao e robehile ebile e hlomohile ka lebaka la liphoso tsa nakong e fetileng, u se ke ua etsa qeto ea hore Jehova a ke ke a u hauhela. Ho sa tsotellehe hore na u entse liphoso life, haeba ka sebele u bakile, u nkile mehato ea ho lokisa phoso, ’me ka tieo u rapetse Jehova hore a u tšoarele motheong oa mali a Jesu a tšolotsoeng, u ka kholiseha ka ho feletseng hore mantsoe a 1 Johanne 1:9 aa sebetsa ho uena: “Haeba re bolela libe tsa rōna, oa tšepahala hape o lokile hore a re tšoarele libe tsa rōna le ho re hloekisa ho se lokeng hohle.”

²⁰ Bibele e re khothalletsa ho etsisa ho tšoarela ha Jehova litšebelisanong tsa rōna. Leha ho le joalo, re ka lebelloa ho tšoarela le ho lebala ho isa kae ha ba bang ba re siteloa? Ho tla tšohloa sena sehloohong se latelang.

[Mongolo o botlaaseng ba leqephe]

U ne U Tla Araba Joang?

◻ Ke hobane’ng ha Jehova a ‘lula a loketse ho tšoarela’?

◻ Bibele e hlalosa joang hore tšoarelo ea Jehova e phethahetse?

◻ Ha Jehova a tšoarela, ke ka kutloisiso efe a lebalang?

◻ Jehova o lebeletse hore re etse eng ha ba bang ba khopisitsoe ke libe tsa rōna?

[Setšoantšo se leqepheng la 12]

Ha ba bang ba khopisitsoe ke libe tsa rōna, Jehova o lebeletse hore re lokise liphoso