“Tempele” le “Morena” Kajeno

“Ha ba kena, morena o tla kena le bona, ha ba e-tsoa, ba tle ba tsoe hammoho.”—EZEKIELE 46:10.

1, 2. Ke ’nete efe ea motheo e re thusang ho utloisisa boholo ba se boleloang ke pono ea Ezekiele ea tempele?

BARUTI ba bang ba boholo-holo ba ne ba sa khotsofala ka ho feletseng ka buka ea Ezekiele. Ho ea ka Talmud, ba bang ba bona ba bile ba nahana ho e ntša letotong la Mangolo a Halalelang. Ba ile ba thatafalloa haholo ke pono ea tempele ’me ba bolela hore motho a ke ke a e utloisisa. Liithuti tse ling tsa Bibele le tsona li ’nile tsa tsietsoa ke pono ea Ezekiele ea tempele ea Jehova. Ho thoe’ng ka rōna?

² Ho tloha ha borapeli bo hloekileng bo tsosolosoa, Jehova o ’nile a hlohonolofatsa batho ba hae ka mahlaseli a mangata a temohisiso ea moea, ho akarelletsa ho lemoha hore na tempele ea Molimo ea moea ke eng—tokisetso ea Jehova ea borapeli bo hloekileng e kang tempele.a ’Nete ena ea motheo e re thusa ho utloisisa boholo ba se boleloang ke pono ea Ezekiele ea tempele. A re hlahlobeng ka hloko likarolo tse ’nè tsa pono ena—tempele, baprista, morena le naha. Lintho tsee li bolela eng kajeno?

Tempele le Uena

 3. Ke eng seo re ithutang sona ka marulelo a phahameng le litšoantšo tse leboteng la tsela e kenang tempeleng?

³ Nka hore re etetse ho ea bona tempele ena ea ponong. Rea atamela ’me re hloa methati e supileng ho ea ho o mong oa menyako e meholo. Ha re le tseleng ena e kenang, rea hlolloa ha re talima holimo. Marulelo a ka hare a re phahametse ka limithara tse fetang 30! Kahoo re hopotsoa hore litekanyetso tsa ho kena tokisetsong ea Jehova ea borapeli li phahame. Mahlaseli a khanya a kenang ka lifensetere a khantšitse litšoantšo tse leboteng tsa lifate tsa palema, tse sebelisoang ka Mangolong ho tšoantšetsa ho loka. (Pesaleme ea 92:12; Ezekiele 40:14, 16, 22) Sebaka sena se halalelang ke sa ba lokileng boitšoarong le moeeng. Tumellanong le seo, re batla ho lula re lokile e le hore borapeli ba rōna e be bo amohelehang ho Jehova.—Pesaleme ea 11:7.

 4. Ke bo-mang ba haneloang ho kena ka tempeleng, hona see se re ruta eng?

⁴ Ka mahlakoreng a mabeli a tsela ena, ho na le likamore tse tharo tsa balebeli. Na balebeli baa ba tla re lumella ho kena ka tempeleng? Jehova o bolella Ezekiele hore ha ho molichaba eo e leng “leqai pelong” ea tla kena. (Ezekiele 40:10; 44:9) Seo se bolela eng? Molimo o amohela feela ba ratang melao ea hae le ba phelang ka eona hore e be barapeli ba hae. (Jeremia 4:4; Baroma 2:29) Ba joalo o ba amohela ka tenteng ea hae ea moea, e leng ntlo ea hae ea borapeli. (Pesaleme ea 15:1-5) Haesale ho tloha ha borapeli bo hloekileng bo tsosolosoa ka 1919, mokhatlo o hlophisitsoeng oa Jehova oa lefatšeng o ’nile oa khomarela melao ea hae ea boitšoaro ’me oa e hlakisa ho tsoela pele. Ba hanang ka boomo ho e mamela ha ba sa amoheleha ka mokhatlong oa batho ba hae. Kajeno, mokhoa o thehiloeng Bibeleng oa ho khaola bafosi ba sa bakeng o sebelelitse ho boloka borapeli ba rōna bo hloekile ’me bo sa silafala.—1 Bakorinthe 5:13.

5. (a) Ke ho tšoana hofe ho teng pakeng tsa pono ea Ezekiele le pono ea Johanne e tlalehiloeng ho Tšenolo 7:9-15? (b) Ponong ea Ezekiele, ke bo-mang ba tšoantšetsoang ke meloko e 12 e rapelang lebaleng le ka ntle?

⁵ Tsela ena e kena lebaleng le ka ntle moo batho ba rapelang le ho rorisa Jehova teng. Sena se re hopotsa pono ea moapostola Johanne ea “bongata bo boholo” bo rapelang Jehova “motšehare le bosiu ka tempeleng ea hae.” Ho na le lifate tsa palema liponong tsena ka bobeli. Ponong ea Ezekiele li khabisitse mabota a moo ho kenoang le teng. Ponong ea Johanne, barapeli ba tšoere makala a palema matsohong a bona, ho tšoantšetsang thabo ea bona ha ba rorisa Jehova ’me ba amohela Jesu e le Morena oa bona. (Tšenolo 7:9-15) Tabeng ea pono ea Ezekiele, meloko e 12 ea Iseraele e tšoantšetsa “linku tse ling.” (Johanne 10:16; bapisa le Luka 22:28-30.) Na le uena u e mong oa ba thabelang ho rorisa Jehova ka ho phatlalatsa ’Muso oa hae?

 6. Morero oa likamore tsa ho jela tse lebaleng le ka ntle e ne e le ofe, hona see se hopotsa linku tse ling tokelo efe?

⁶ Ha re ntse re tsamaea re bona lebala le ka ntle, re bona likamore tse 30 tsa ho jela moo batho ba jellang linyehelo tsa bona tsa boithatelo. (Ezekiele 40:17) Kajeno, linku tse ling ha li etse mahlabelo a liphoofolo, empa le teng ha li kene tempeleng ea moea li sa tšoara letho. (Bapisa le Exoda 23:15.) Moapostola Pauluse o ile a ngola: “Ka [Jesu] a re nyeheleng ka mehla ho Molimo sehlabelo sa thoriso, ke hore, litholoana tsa melomo e etsetsang lebitso la hae polelo ea phatlalatsa. Ho feta moo, le se ke la lebala ho etsa se molemo le ho arolelana lintho le ba bang, kaha ka mahlabelo a joalo Molimo o khahlisoa haholo.” (Baheberu 13:15, 16; Hosea 14:2) Ke tokelo e khōlō ho etsetsa Jehova mahlabelo a joalo.—Liproverbia 3:9, 27.

 7. Ho lekanngoa ha tempele ho re tiisetsa eng?

⁷ Ezekiele o shebella ha lengeloi le lekanya tempele ena ea ponong. (Ezekiele 40:3) Ka ho tšoanang, moapostola Johanne o ile a bolelloa: “Ema ’me u lekanye sehalalelo sa tempele sa Molimo le aletare le ba rapelang ka ho eona.” (Tšenolo 11:1) Ho lekanya hoo ho bolela eng? Liketsahalong tsena ka bobeli ka ho hlakileng sena se ile sa sebeletsa e le tiiso, pontšo ea hore ha ho letho le ka thibelang Jehova ho phethahatsa merero ea hae mabapi le borapeli bo hloekileng. Ka tsela e tšoanang, le kajeno, re ka kholiseha hore ha ho letho—esita le khanyetso e mabifi ea mebuso e matla—le ka thibelang ho tsosolosoa ha borapeli bo hloekileng.

 8. Ke bo-mang ba kenang ka menyako ea lebala le ka hare, hona menyako ee e re hopotsa eng?

⁸ Ha re ntse re tsamaea lebaleng le ka ntle, re bona hore ho na le menyako e meraro e kenang lebaleng le ka hare; menyako ena e ka hare e tobane le menyako e ka ntle ’me ea lekana ka boholo. (Ezekiele 40:6, 20, 23, 24, 27) Ke baprista feela ba ka kenang lebaleng le ka hare. Menyako e ka hare e re hopotsa hore batlotsuoa ba lokela ho finyella litekanyetso le melao ea bomolimo, empa Bakreste bohle ba ’nete ba tataisoa ke litekanyetso le melao e tšoanang. Empa mosebetsi oa baprista ke ofe, ’me o na le moelelo ofe kajeno?

Baprista ba Tšepahalang

9, 10. “Boprista ba borena,” bo tšoantšetsoang ke sehlopha sa baprista ponong ea Ezekiele, bo fane ka lijo tsa moea joang?

⁹ Mehleng ea pele ho Bokreste, baprista ba ne ba sebetsa ka thata tempeleng. Ho hlaba liphoofolo tsa mahlabelo, ho li nyehela aletareng le ho sebeletsa baprista-’moho le bona le sechaba e ne e le mosebetsi o boima. Empa ba ne ba e-na le mosebetsi o mong oa bohlokoa. Jehova o ile a laela mabapi le baprista: “Ba tla ruta sechaba sa ka ho [khetholla] se halalelang le se sa halalelang, ba se lemosa ho khetha se sa hloekang ho se hloekileng.”—Ezekiele 44:23; Malakia 2:7.

¹⁰ Na u ananela mosebetsi o boima le tšebeletso ea boikokobetso eo batlotsuoa e le sehlopha sa “boprista ba borena,” ba e etsang molemong oa borapeli bo hloekileng? (1 Petrose 2:9) Joaloka baprista ba boholo-holo ba leloko la Balevi, ba nkile ketello-pele ho faneng ka thuto ea moea, ba thusa batho ho utloisisa se hloekileng le se amohelehang mahlong a Molimo le se sa amoheleheng. (Matheu 24:45) Thuto ena, e tlang ka likhatiso tsa Bibele le liboka le likopano tsa Bokreste, e thusitse ba limilione hore ba boelane le Molimo.—2 Bakorinthe 5:20.

11.(a) Pono ea Ezekiele e totobalitse joang bohlokoa ba bohloeki ka lehlakoreng la baprista? (b) Batlotsuoa ba hloekisitsoe joang ka kutloisiso ea moea, mehleng ee ea bofelo?

¹¹ Leha ho le joalo, baprista ba tlameha ho etsa ho fetang feela ho ruta ba bang hore ba hloeke; ba tlameha ho hloeka ka bobona. Kahoo, Ezekiele o ile a bona esale pele mosebetsi oa tlhoekiso bakeng sa baprista ba Iseraele. (Ezekiele 44:10-16) Ka ho tšoanang, histori e bontša hore ka 1918, Jehova o ile a lula e le “mohloekisi” ka tempeleng ea hae ea moea, a hlahloba sehlopha sa baprista ba tlotsitsoeng. (Malakia 3:1-5) Ba ileng ba nkoa ba hloekile moeeng kapa ba baketse borapeli ba litšoantšo ba nakong e fetileng ba ile ba lumelloa ho tsoela pele tokelong ea tšebeletso ka tempeleng ea hae ea moea. Ho ntse ho le joalo, joaloka e mong le e mong, batlotsuoa ka bomong ba ka silafala—moeeng le boitšoarong. (Ezekiele 44:22, 25-27) Ba ’nile ba tlameha ho sebetsa ka thata hore ba ipoloke ba “se na letheba lefatšeng.”—Jakobo 1:27; bapisa le Mareka 7:20-23.

12. Ke hobane’ng ha re lokela ho ananela mosebetsi oa batlotsuoa?

¹² E mong le e mong oa rōna a ka botsa, ‘Na ke ananela mohlala o behoang ke batlotsuoa ka lilemo tsa bona tse ngata tsa tšebeletso e tšepahalang? Na ke etsisa tumelo ea bona?’ Ke ntho e ntle hore ba bongata bo boholo ba hopole hore batlotsuoa ba ke ke ba e-ba le bona kamehla lefatšeng mona. Ka baprista ba ponong ea Ezekiele, Jehova o ile a re: “Lefa la bona ke ’na; le se ke la ba nea leruo la naha Iseraeleng; leruo la bona ke ’na.” (Ezekiele 44:28) Ka ho tšoanang, batlotsuoa ha ba na sebaka sa ka ho sa feleng lefatšeng. Lefa la bona ke la leholimo, ’me ba bongata bo boholo ba ho nka e le tokelo ho ba tšehetsa le ho ba khothatsa ha ba ntse ba le mona lefatšeng.—Matheu 25:34-40; 1 Petrose 1:3, 4.

Morena—Ke Mang?

13, 14. (a) Ke hobane’ng ha morena e tlameha ho ba oa linku tse ling? (b) Morena o tšoantšetsa bo-mang?

¹³ Joale ho phahama potso e thahasellisang. Ebe, morena o emela mang? Kaha ho buuoa ka eena e le motho a le mong hape e le sehlopha, re ka ’na ra etsa qeto ea hore o emela sehlopha se itseng sa batho. (Ezekiele 44:3; 45:8, 9) Empa bafe? Ka sebele hase batlotsuoa. Ponong, o sebetsa haufi le baprista, empa hase e mong oa bona. Ho fapana le sehlopha sa baprista, o fuoa lefa ka hare ho naha ’me kahoo bokamoso ba hae bo mona lefatšeng, eseng leholimong. (Ezekiele 48:21) Ho feta moo, Ezekiele 46:10 e re: “Ha [ba meloko eo e seng ea boprista] ba kena [lebaleng le ka ntle la tempele], morena o tla kena le bona, ha ba e-tsoa, ba tle ba tsoe hammoho.” Ha a kene lebaleng le ka hare empa o rapela lebaleng le ka ntle, o kena le ho tsoa ka tempeleng le sechaba. Ntle ho pelaelo lintlha tsena li beha morena har’a bongata bo boholo ba linku tse ling.

¹⁴ Ho hlakile hore morena o na le boikarabelo bo itseng ka har’a batho ba Molimo. Lebaleng le ka ntle, o lula mathuleng a Monyako o ka Bochabela. (Ezekiele 44:2, 3) Sena se ne se tla bontša boemo ba bolebeli, bo tšoanang le ba banna ba baholo Iseraeleng ba neng ba lula khorong ea motse ’me ba fana ka kahlolo. (Ruthe 4:1-12; Liproverbia 22:22) Ke bo-mang har’a linku tse ling ba etsang mosebetsi oa bolebeli kajeno? Baholo ba nang le tšepo ea lefatšeng ba khethiloeng ke moea o halalelang. (Liketso 20:28) Kahoo, hona joale sehlopha sa morena se ntse se hlophisoa ka tebello ea hore hamorao se sebeletse boemong ba tsamaiso lefatšeng le lecha.

15. (a) Pono ea Ezekiele e fana ka leseli joang mabapi le kamano e teng pakeng tsa baholo ba bongata bo boholo le sehlopha sa baprista ba tlotsitsoeng? (b) Baholo ba tlotsitsoeng ba nkile ketello-pele efe ka mokhatlong o hlophisitsoeng oa Molimo oa lefatšeng?

¹⁵ Leha ho le joalo, ho na le kamano efe pakeng tsa sehlopha sa baprista ba tlotsitsoeng le banna ba joalo ba baholo ba sebeletsang maemong a bolebeli, e le karolo ea bongata bo boholo? Pono ea Ezekiele e fana ka maikutlo a hore baholo bao e leng litho tsa bongata bo boholo ba fana ka tšehetso le ho ikokobetsa, ha batlotsuoa ba nka ketello-pele moeeng. Joang? Hopola hore ponong, baprista ba fuoe boikarabelo ba ho ruta sechaba litaba tsa moea. Hape ba ile ba bolelloa hore e be baahloli linyeoeng. Ho feta moo, Balevi ba ne ba abetsoe ho ba “balebeli” ba menyako ea tempele. (Ezekiele 44:11, 23, 24) Ka ho hlakileng, morena o ne a lokela ho ikokobelletsa tšebeletso le tataiso ea moea ea baprista. Ka hona, ho loketse hore ebe mehleng ea kajeno batlotsuoa ba nkile ketello-pele borapeling bo hloekileng. Ka mohlala, litho tsa Sehlopha se Busang sa Lipaki tsa Jehova li khethiloe har’a bona. Baholo ba joalo ba tlotsitsoeng ba tšepahalang ba ’nile ba koetlisa sehlopha se ntseng se hōla sa morena ka lilemo tse mashome, ba lokisetsa bao e tla ba litho tsa sehlopha sena letsatsi la ha ba fuoa matla a bona a feletseng a ho laela lefatšeng le lecha la Molimo le tlang.

16. Ho ea ka Esaia 32:1, 2, baholo bohle ba lokela ho itšoara joang?

¹⁶ Baa bao e tla ba litho, ba mocheng oa boikarabelo bo eketsehileng e le ba sehlopha sa morena, ke balebeli ba mofuta ofe? Boprofeta bo fumanoang ho Esaia 32:1, 2 bo re: “Bonang, morena o tla busa ka ho lōka mahosana le ’ona a lise ka ho loka. E mong le e mong oa bona o tla ba joalo ka tšireletso ha moea o foka, joalo ka lehaha ha sefefo se e-tla, joalo ka molatsoana oa metsi naheng e omileng, le joalo ka moriti oa lefika le phahameng naheng e nyoriloeng.” Boprofeta bona boa phethahala kajeno kaha baholo ba Bakreste—ba batlotsuoa le ba linku tse ling—ba sebeletsa ho sireletsa mohlape ‘lifefong’ tse kang mahloriso le ho nyahama.

17. Balisa ba Bakreste ba lokela ho italima joang, ’me mohlape oona o lokela ho ba talima joang?

¹⁷ Mantsoe ‘khosana’ le “morena,” a nang le moelelo o tšoanang ka Seheberu, ha a sebelisoe e le litlotla tse etselitsoeng ho phahamisa batho. Ho e-na le hoo, a hlalosa boikarabelo boo banna bana ba bo jereng ba ho hlokomela linku tsa Molimo. Jehova o lemosa ka matla: “Oho, marena a Iseraele, ho lekane! Tlosang bothata le tšenyo, etsang ka taelo le ka ho loka.” (Ezekiele 45:9) Ke ntho e ntle hore baholo bohle kajeno ba ele hloko keletso e joalo. (1 Petrose 5:2, 3) Mohlape le oona oa hlokomela hore Jesu o fane ka balisa e le “limpho tseo e leng banna.” (Baefese 4:8) Litšoaneleho tsa bona li ngotsoe Lentsoeng la Molimo le bululetsoeng. (1 Timothea 3:1-7; Tite 1:5-9) Ka hona, Bakreste ba latela tataiso ea baholo.—Baheberu 13:7.

18. Bo bong ba boikarabelo ba bao e tla ba litho tsa sehlopha sa morena ke bofe hona joale, hona se tla ba le boikarabelo bofe nakong e tlang?

¹⁸ Mehleng ea Bibele marena a mang a ne a e-na le matla a maholo a ho laela, a mang a se na a makaalo. Kajeno, baholo ba bongata bo boholo ba na le boikarabelo bo fapa-fapaneng haholo. Ba bang ba sebeletsa phutheho e le ’ngoe; ba bang ba sebeletsa liphutheho tse ngata e le balebeli ba tsamaeang; ba bang ba sebeletsa linaha e le litho tsa Komiti ea Lekala; ba bang ba thusa ka ho toba likomiting tse fapa-fapaneng tsa Sehlopha se Busang. Lefatšeng le lecha, Jesu o tla khetha “mahosana” a tla nka ketello-pele “lefatšeng lohle” har’a barapeli ba Jehova ba lefatšeng. (Pesaleme ea 45:16) Ha ho pelaelo hore o tla khetha a mangata a ’ona har’a baholo ba tšepahalang kajeno. Kaha banna bana ba se ba ntse ba paka seo ba leng sona hona joale, o tla khetha ho tšepela ba bangata litokelo tse khōlōanyane nakong e tlang ha a senola karolo e phethoang ke sehlopha sa morena lefatšeng le lecha.

Naha ea Batho ba Molimo Kajeno

19. Ponong ea Ezekiele, naha e emela eng?

¹⁹ Pono ea Ezekiele e boetse e bontša naha ea Iseraele e tsosolositsoeng. See se emela eng ponong? Boprofeta bo bong ba tsosoloso bo boletse esale pele hore naha ea Iseraele, e ne e tla ba paradeise e kang ea Edene. (Ezekiele 36:34, 35) Kajeno, re thabela “naha” e tsosolositsoeng, eo le eona ka kutloisiso e itseng e kang Edene. Ka tsela e tšoanang, re atisa ho bua ka paradeise ea rōna ea moea. Molula-Qhooa o ile oa hlalosa “naha” ea rōna e le “sebaka sa mosebetsi” sa batho ba khethiloeng ba Molimo.b Hohle moo mohlanka oa Jehova a ka bang teng, o naheng eo e tsosolositsoeng hafeela a ntse a leka ho khomarela borapeling ba ’nete ka ho tsamaea mehlaleng ea Kreste Jesu.—1 Petrose 2:21.

20. Ke molao-motheo ofe oo re ithutang oona ka “monehelo o halalelang” oa ponong ea Ezekiele, hona re ka o sebelisa joang?

²⁰ Ho thoe’ng ka karolo ea naha e bitsoang “monehelo o halalelang”? E ne e le monehelo oa sechaba bakeng sa ho tšehetsa baprista le motse. Ka ho tšoanang, ‘sechaba sohle sa naha’ se ne se lokela ho nehelana ka karolo e itseng ea naha ho morena. See se bolela eng kajeno? Ha e le hantle, ha se bolele hore batho ba Molimo ba lokela ho imetsoa ka sehlopha se lefuoang sa baruti. (2 Bathesalonika 3:8) Ho fapana le seo, tšehetso e ka sehloohong eo baholo ba e fuoang ke ea moea. E akarelletsa ho ba thusa mosebetsing o etsoang hona joale le ho bontša moea oa tšebelisano-’moho le oa boikokobetso. Leha ho le joalo, joaloka mehleng ea Ezekiele, monehelo ona o nehoa “Jehova,” eseng motho leha e le ofe. (Mongolo o tšekaletseng ke oa rōna.)—Ezekiele 45:1, 7, 16.

21. Re ka ithuta eng ka ho aroloa ha naha ponong ea Ezekiele?

²¹ Hase morena le baprista feela ba abetsoeng libaka naheng ena e tsosolositsoeng. Ho aroloa ha naha ho bontša hore o mong le o mong oa meloko e 12 o abetsoe lefa la oona leo o ke keng oa le amohuoa. (Ezekiele 47:13, 22, 23) Kahoo, ba bongata bo boholo hase feela hore ba na le sebaka paradeiseng ea moea kajeno empa hape ba tla abeloa naha ha ba rua sebaka lefatšeng ’Musong oa Molimo.

22. (a) Ponong ea Ezekiele motse o emela eng? (b) Re ka ithuta eng ka hore motse o na le menyako ka mahlakoreng ’ohle?

²² Qetellong, motse o ponong o emela eng? Hase motse oa leholimong, kaha o naheng e “silafetseng” (e sa halaleleng). (Ezekiele 48:15-17, NW) Kahoo, e tlameha ebe ke ntho ea lefatšeng. Ha e le hantle, motse ke eng? Na ha o fane ka maikutlo a batho ba ikopantseng ho ba sehlopha ’me ba theha mokhatlo o itseng? Ho joalo. Kahoo, ho bonahala motse o tšoantšetsa tsamaiso ea lefatšeng e ruisang bohle bao e tla ba mokhatlo o lokileng oa lefatše molemo. O tla sebetsa ka botlalo “lefatšeng le lecha” le tlang. (2 Petrose 3:13) Menyako ea motse e ka mahlakoreng ’ohle, o le mong bakeng sa moloko ka mong, e bontša hantle hore o bulehetse bohle. Kajeno, batho ba Molimo ha ba tlas’a tsamaiso e itseng ea sekhukhu le ea sephiri. Barab’abo rōna ba ikarabellang ba lokela hore e be ba atamelehang; melao-motheo e ba tataisang e tsejoa ke bohle. Hore ebe batho ba meloko eohle ba lema naha e tšehetsang motse ona ho re hopotsa hore linku tse ling li tšehetsa litokisetso tsa tsamaiso tse etsetsoang batho ba Molimo lefatšeng ka bophara, esita le ka tsela e bonahalang.—Ezekiele 48:19, 30-34.

23.Re tla tšohla eng sehloohong se latelang?

²³ Empa ho thoe’ng ka nōka e phallang e e-tsoa sehalalelong sa tempele? Seo e se emelang kajeno le nakong e tlang se tla tšohloa sehloohong sa boraro ebile e le sa ho qetela letotong lena.

[Mongolo o botlaaseng ba leqephe]

Lintlha Tsa Tlhahlobo

◻ Ponong ea Ezekiele tempele e tšoantšetsa eng?

◻ Baprista ba sebeletsang tempeleng ba tšoantšetsa bo-mang?

◻ Sehlopha sa morena ke eng, ’me bo bong ba boikarabelo ba sona ke bofe?

◻ Ponong ea Ezekiele naha ke eng, ’me e abeloa meloko e 12 ka kutloisiso efe?

◻ Motse o tšoantšetsa eng?

[Setšoantšo se Qanollang/’Mapa o leqepheng la 15]

(Ha u batla ho bona boitsebiso bo hlophisitsoeng hantle, sheba sengoliloeng)

Kabo ea naha joalokaha e hlalositsoe ponong ea Ezekiele

MELOKO E LESHOME LE METSO E ’MELI

Leoatle le Leholo

Leoatle la Galilea

Nōka ea Jordane

Leoatle la Letsoai

DANE

ASHERE

NAFTHALI

MANASSE

EFRAIME

RUBENE

JUDA

MORENA

BENJAMINE

SIMEONE

ISAKARE

ZEBULUNE

GADE

[Setšoantšo]

KATOLOSO EA MONEHELO O HALALELANG

A. “Jehova o Teng Moo” (Jehova- Shamma); B. masimo a motse a behang litholoana

Karolo ea Balevi

Sehalalelo sa Jehova

Karolo ea Baprista

B A B