Letsatsi la ho Qetela la Bophelo ba Jesu e le Motho oa Nama

Ke Labohlano thapama, la 14 Nisane, 33 C.E. Sehlopha sa banna le basali se mothating oa ho pata motsoalle oa sona ea ratehang. Monna e mong ke Nikodemase, o tlile le linōko ho tla nōka setopo pele se patoa. Monna e mong ea bitsoang Josefa o fane ka line e hloekileng bakeng sa ho phuthela setopo se matetetso le se maqeba.

BATHO bana ke bo-mang? Ba pata mang? Na see sohle sea u ama? Ho araba lipotso tsena, a re khutleleng morao qalong ea letsatsi leo la bohlokoa.

Labone Mantsiboea, la 14 Nisane

Khoeli e tolokileng e-ea e ela Jerusalema. Motse o phetheselang oa khutsa ka mor’a letsatsi le maphatha-phathe. Mantsiboeeng ana moea o tletse monko oa konyana e besitsoeng. E, batho ba likete ba itokisetsa ketsahalo e khethehileng—mokete oa selemo le selemo oa Paseka.

Ka kamoreng e khōlō ea baeti, re fumana Jesu Kreste le baapostola ba hae ba 12 ba le tafoleng e tekiloeng. Mamela! Jesu oa bua. O re: “Ke lakalitse haholo ho ja paseka ena le lōna pele ke utloa bohloko.” (Luka 22:15) Jesu oa tseba hore lira tsa hae tsa bolumeli li rera ho mo bolaea. Empa pele seo se etsahala, ho tla etsahala ntho e ’ngoe ea bohlokoa mantsiboeeng ana.

Ka mor’a ho keteka Paseka, Jesu oa phatlalatsa: “E mong oa lōna o tla nkeka.” (Matheu 26:21) Sena se tšoenya baapostola. Ebe ke mang? Ka mor’a ho ba le puisano e itseng, Jesu o bolella Judase Iskariota: “Seo u se etsang se etse kapele haholoanyane.” (Johanne 13:27) Le hoja ba bang ba sa hlokomele, Judase ke moeki. Oa tsoa ho ea etsa mosebetsi oa hae o lonya oa ho rerela Jesu bobe.

Mokete o Khethehileng

Joale Jesu o theha mokete o mocha ka ho feletseng—oo e tla ba oa sehopotso sa lefu la hae. Jesu o nka bohobe, o etsa thapelo ea teboho ’me oa bo qhetsola. Oa laela: “Nkang, le je.” “Sena se bolela ’mele oa ka oo ka sebele o tla fanoa molemong oa lōna.” Ha bohle ba se ba jele bohobe, o nka senoelo sa veine e khubelu ’me oa leboha. Jesu o re ho bona: “Noang ho sona, kaofela ha lōna,” ’me oa hlalosa: “Senoelo sena se bolela selekane se secha motheong oa mali a ka, ao ka sebele a tla tšolloa molemong oa lōna.” O laela baapostola ba 11 ba setseng ba tšepahala: “Le ’ne le etse sena ho nkhopola.”—Matheu 26:26-28; Luka 22:19, 20; 1 Bakorinthe 11:24, 25.

Mantsiboeeng ao, ka mosa Jesu o lokisetsa baapostola ba hae ba tšepahalang se larileng ka pele ’me o ba tiisetsa lerato le tebileng leo a ba ratang ka lona. Oa hlalosa: “Ha ho le ea mong ea nang le lerato le leholo ho feta lena, hore motho a nehelane ka soule ea hae molemong oa metsoalle ea hae. Le metsoalle ea ka haeba le etsa seo ke le laelang sona.” (Johanne 15:13-15) E, baapostola ba 11 ba ipakile hore ke metsoalle ea sebele ka ho khomarela Jesu litekong tsa hae.

Ha bosiu bo ntse bo roalellana—mohlomong ka mor’a khitla—Jesu o etsa thapelo e hopolehang, eo ka mor’a eona ba binelang Jehova lithoriso. Joale, ka khanya ea khoeli e tolokileng, ba tsoa motseng ’me ba tšela Phula ea Kidrone.—Johanne 17:1–18:1.

Serapeng sa Gethsemane

Ho se hokae, Jesu le baapostola ba hae ba fihla serapeng sa Gethsemane. Jesu o siea baapostola ba robeli hekeng ea serapa, ’me o nka Petrose, Jakobo le Johanne o kenella le bona har’a lifate tsa mohloaare. O bolella bana ba bararo: “Soule ea ka e saretsoe ka ho tebileng, esita le ho isa lefung. Salang mona ’me le lule le lebetse.”—Mareka 14:33, 34.

Baapostola bana ba bararo baa leta ha Jesu a kenella hare-hare serapeng ho ea rapela. Ka mehoo e matla le meokho, o kōpa ka tieo: “Ntate, haeba u lakatsa, tlosa senoelo sena ho ’na.” Jesu o jere boikarabelo bo boholohali. Ke ho nyahamisang hakaakang ha a nahana ka seo lira tsa Jehova li tla se bua ha Mora oa Hae ea tsoetsoeng a ’notši a khokhotheloa thupeng joalokaha eka ke senokoane! Ho utloisang Jesu bohloko le ho feta ke ho nahana ka thohako e tla tlisoa ho Ntate oa hae ea ratehang oa leholimo haeba a ka hlōleha ho tobana le teko ena ea makhaola-khang. Jesu o rapela ka tieo ’me o sareloa hoo mofufutso oa hae o bang joaloka marotholi a mali a rothelang fatše.—Luka 22:42, 44.

Jesu o sa tsoa qeta ho rapela ka lekhetlo la boraro. Banna ba nkileng lirumula le mabone joale baa atamela. Ea ba eteletseng pele ke mang haese Judase Iskariota, ea lebang ka ho toba ho Jesu. O aka Jesu ka mofuthu o moholo, ’me o re: “Lumela, Rabi!” Jesu oa arabela: “Judase, na u eka Mora oa motho ka kako?”—Matheu 26:49; Luka 22:47, 48; Johanne 18:3.

Hang-hang, baapostola ba hlokomela se etsahalang. Morena oa bona le motsoalle oa bona ea ratehang o mothating oa ho tšoaroa! Kahoo, Petrose o tsomula sabole ’me o hlatha tsebe ea lekhoba la moprista ea phahameng. Ka potlako, Jesu oa laela: “Tlohelang ho felle mona.” Oa atamela, o folisa lekhoba leo ’me o laela Petrose: “Khutlisetsa sabole ea hao sebakeng sa eona, kaha bohle ba nkang sabole ba tla timela ka sabole.” (Luka 22:50, 51; Matheu 26:52) Balaoli le masole ba tšoara Jesu ’me baa mo tlama. Ka lebaka la tšabo le pherekano, baapostola ba siea Jesu ’me ba balehela lefifing.—Matheu 26:56; Johanne 18:12.

Labohlano Hoseng, la 14 Nisane

Ke ka mor’a khitla ho elella lihoreng tsa hoseng ha Labohlano. Qalong Jesu o isoa lapeng la eo e neng e le Moprista ea Phahameng Anase, ea ntseng a e-na le tšusumetso e matla le taolo. Anase o mo hloma lipotso ’me o laela hore a isoe lapeng la Moprista ea Phahameng Kaifase moo Sanhedrine e phuthehileng teng.

Joale baeta-pele ba bolumeli ba leka ho fumana lipaki tsa bohata hore ba tsebe ho qosa Jesu. Empa le tsona lipaki tsena tsa bohata li sitoa ho lumellana bopaking boo li fanang ka bona. Nakong ena eohle, Jesu o khutsitse. Kaifase ha a fetola maoa oa laela: “Ke u antša ka Molimo ea phelang hore u re bolelle hore na u Kreste Mora oa Molimo!” Ena ke ’nete e ke keng ea qojoa, kahoo Jesu o araba ka sebete: “Ke eena; ’me lōna le tla bona Mora oa motho a lutse ka letsohong le letona la matla ’me a tla ka maru a leholimo.”—Matheu 26:63; Mareka 14:60-62.

Kaifase oa tleroha: “O nyefotse! Re sa na le tlhokahalo efe e eketsehileng ea lipaki?” Joale ba bang ba jabela Jesu sefahlehong le ho mo tšoela ka mathe. Ba bang ba mo otla ka litebele le ho mo rohaka. (Matheu 26:65-68; Mareka 14:63-65) Hoseng ha Labohlano ha mafube a qala ho hlaha, Sanhedrine e boetse ea kopana, mohlomong ho etsa sa mokana eka nyeoe eo ea bosiu e ne e le molaong. Le mona hape Jesu o bontša ka sebete hore ke eena Kreste, Mor’a Molimo.—Luka 22:66-71.

Ka mor’a moo, baprista ba ka sehloohong le banna ba baholo ba hulanyetsa Jesu ho ea qosoa ho Ponse Pilato, ’musisi oa Moroma oa Judea. Ba qosa Jesu ka ho khelosa sechaba, ho se hanela ho lefa makhetho a Sesare le hore o “re eena ka boeena ke Kreste morena.” (Luka 23:2; bapisa le Mareka 12:17.) Ka mor’a ho hloma Jesu lipotso, Pilato oa phatlalatsa: “Ha ke fumane molato ho monna enoa.” (Luka 23:4) Ha Pilato a utloa hore Jesu ke Mogalilea, o laela hore a romeloe ho Heroda Antipase, ’musi oa Galilea, ea tlileng Jerusalema ho tla keteka Paseka. Heroda ha aa ikemisetsa ho bona toka e phethoa. O mpa a ipatlela ho bona Jesu a etsa mohlolo. Kaha Jesu ha a khotsofatse bohelehele ba hae ’me o khutsitse, Heroda le masole a hae ba mo fetola litšeho ’me ba mo khutlisetsa ho Pilato.

Pilato o boetse oa botsa: “Ke ntho efe e mpe eo monna enoa a ileng a e etsa? Ha kea ka ka fumana letho le tšoaneloang ke lefu ho eena; ka hona ka sebele ke tla mo shapa ’me ke mo lokolle.” (Luka 23:22) Kahoo, o laela hore Jesu a shapuoe ka sephali se litjobo se mo tabolang habohloko ka mokokotlong. Joale masole a hatella moqhaka oa meutloa hloohong ea hae. Aa mo soma le ho mo otla ka leqala, e leng ho pekerelang moqhaka oa meutloa hloohong ea hae. Le har’a bohloko bona bo sa hlaloseheng le tšoaro e mpe joalo, Jesu o sala a hlaheletse ka seriti le matla.

Mohlomong e le ka tšepo ea hore ho shapuoa ha Jesu ho tla baka kutloelo-bohloko e itseng, Pilato o boela a mo hlahisa ka pele ho letšoele. Pilato oa hooa: “Bonang! Ke mo tlisa ho lōna ka ntle e le hore le tsebe hore ha ke fumane molato ho eena.” Empa baprista ba ka sehloohong ba hooa: “Mo khokhothele thupeng! Mo khokhothele thupeng!” (Johanne 19:4-6) Ha letšoele le ntse le phehella ho ea pele, Pilato oa inehela ’me o lokolla Jesu hore a khokhotheloe thupeng.

Lefu le Bohloko

Joale ke motšehare, mohlomong ke ho elella har’a mp’a motšehare. Jesu o ntšetsoa ka ntle ho Jerusalema sebakeng se bitsoang Golgotha. Matsoho le maoto a Jesu a khokhothelloa thupeng ea tlhokofatso ka lipekere tse khōlō. Mantsoe a sitoa ho hlalosa bohloko boo a bo utloang ha boima ba hae ba ’mele bo tabola maqeba a lipekere ha thupa e phahamisoa. Letšoele lea khobokana ho tla bona ha Jesu le linokoane tse peli ba khokhotheloa thupeng. Ba bangata ba nyefola Jesu. Baprista ba ka sehloohong le ba bang baa soma: “Ba bang o ile a ba pholosa; eena o sitoa ho ipholosa!” Masole le linokoane tse peli tse khokhothetsoeng thupeng le bona ba soma Jesu.—Matheu 27:41-44.

Ka tšohanyetso har’a mp’a motšehare, ka mor’a hoba Jesu a be thupeng nakoana, lefifi le tšosang le tsoang ho Molimo le aparela sebaka seo ka lihora tse tharo.a Mohlomong ke lona le susumelletsang sesenyi se seng ho khalemela se seng. Joale, ha se retelehela ho Jesu, se kōpa ka tieo: “U nkhopole ha u kena ’musong oa hao.” Ke tumelo e hlollang hakaakang ho motho ea tjametsoeng ke lefu! Jesu oa arabela: “Kannete kea u bolella kajeno, U tla ba le ’na Paradeiseng.”—Luka 23:39-43.

Hoo e ka bang ka hora ea boraro thapama, Jesu oa utloa hore o makhatheng a lefu. O re: “Ke nyoriloe.” Eaba ka lentsoe le phahameng, oa hooa: “Molimo oa ka, Molimo oa ka, ke hobane’ng ha u ntlohetse?” Kamoo ho neng ho le kateng, Jesu o ile a hlokomela hore Ntate oa hae o hutse tšireletso ea hae ho eena ho lumella hore botšepehi ba hae bo lekoe ka ho feletseng, ’me a qotsa mantsoe a Davida. Motho e mong o beha seponche se inetsoeng ka veineng e bolila molomong oa Jesu. Hoba a latsoe veine, Jesu o phefumoloha habohloko ’me o re: “Ho phethehile!” Eaba o hooa a re, “Ntate, ke beha moea oa ka matsohong a hao,” ’me a kebisa hlooho, a shoa.—Johanne 19:28-30; Matheu 27:46; Luka 23:46; Pesaleme ea 22:1.

Kaha e se e batla e le thapama, ho etsoa lephehlophehlo la ho pata Jesu pele Sabatha (ea la 15 Nisane) e qala ha letsatsi le likela. Josefa oa Arimathea, setho se tsebahalang sa Sanhedrine eo e ’nileng ea e-ba morutuoa oa Jesu oa sekhukhu, o fumana tumello ea hore a mo pate. Nikodemase, eo le eena e leng setho sa Sanhedrine ea ileng a ipolela sekhukhung hore o lumela ho Jesu, o phallela ka lik’hilograma tse 33 tsa myra le makhala. Ba beha setopo sa Jesu ka hloko lebitleng le lecha le haufinyane.

O Boetse oa Phela!

E sa le ka matjeke ka Sontaha ha Maria Magdalena le basali ba bang ba atamela lebitleng la Jesu. Empa bona! Lejoe le ka pel’a lebitla le phikoloselitsoe ka thōko. Le lona lebitla ha le na letho! Maria Magdalena o potlakela ho ea bolella Petrose le Johanne. (Johanne 20:1, 2) Hoba a tlohe, lengeloi le itlhahisa ho basali bana ba bang. Le re: “Lōna le se ke la tlala tšabo.” Hape lea phehella: “E-eang kapele ’me le bolelle barutuoa ba hae hore o tsositsoe bafung.”—Matheu 28:2-7.

Ha ba ntse ba itlhahanetse, ba kopana le Jesu ka seqo! Oa ba bolella: “E-eang, le tlalehele barab’eso.” (Matheu 28:8-10) Hamorao, Maria Magdalena o ntse a lla lebitleng ha Jesu a itlhahisa ho eena. O sitoa ho pata thabo ea hae ’me o mathela ho ea bolella barutuoa ba bang litaba tseo tse thabisang. (Johanne 20:11-18) Ha e le hantle, ka makhetlo a mahlano Sontaheng seo se sa lebaleheng, Jesu ea tsositsoeng bafung o itlhahisa ho barutuoa ba hae ba fapaneng, o tlosa khoao eohle ka hore o fela a phela hape!

Kamoo U Amehang Kateng

Ke joang liketsahalo tse etsahetseng lilemong tse 1 966 tse fetileng li ka u amang hona joale lintšing tsa lekholo la bo21 la lilemo? Paki e boneng liketsahalo tseo ka mahlo ea hlalosa: “Ka sena lerato la Molimo le ile la bonahatsoa tabeng ea rōna, hobane Molimo o ile a romela Mora oa hae ea tsoetsoeng a ’notši lefatšeng e le hore re ka fumana bophelo ka eena. Lerato le ka tsela ena, eseng hore re ratile Molimo, empa hore o ile a re rata ’me a romela Mora oa hae e le sehlabelo sa poelano bakeng sa libe tsa rōna.”—1 Johanne 4:9, 10.

Ke ka tsela efe lefu la Kreste e leng “sehlabelo sa poelano”? Ke sa poelano hobane se bula tsela ea ho ba le kamano e molemo le Molimo. Motho oa pele, Adama, o ile a fetohela Molimo ’me kahoo a fetisetsa lefa la sebe le lefu ho bana ba hae. Ka lehlakoreng le leng, Jesu o ile a tela bophelo ba hae ho ba thekollo ho lefa theko ea sebe le lefu molemong oa moloko oa batho, kahoo a fana ka motheo oa hore Molimo a atolose lereko le mohau. (1 Timothea 2:5, 6) Ka ho sebelisa tumelo sehlabelong sa Jesu se koahelang sebe, u ka lokolloa kahlolong eo u e futsitseng ho Adama oa moetsalibe. (Baroma 5:12; 6:23) Sena hape se u bulela monyetla o babatsehang oa hore u be le kamano le Ntate oa hao ea lerato oa leholimo, Jehova Molimo. Ka bokhutšoanyane, sehlabelo sa Jesu se phahameng ka ho fetisisa se ka bolela bophelo bo ke keng ba fela le ka mohla ho uena.—Johanne 3:16; 17:3.

Lintlha tsena le tse ling tse amanang le tsona li tla tšohloa ka phirimana ea Labone la la 1 April, libakeng tse likete tse mashome lefatšeng ho pota, ha batho ba limilione ba tla be ba bokane ’moho ho ikhopotsa lefu la Jesu Kreste. U mengoa hore u be teng. Lipaki tsa Jehova sebakeng sa heno li tla thabela ho u bolella sebaka seo u ka eang ho sona le nako eo u ka fihlang ka eona. Ha ho pelaelo hore ho ba teng ha hao ho tla tebisa kananelo ea hao ka seo Molimo oa rōna ea lerato le Mor’a hae ea ratoang ba se entseng letsatsing la ho qetela la bophelo ba Jesu e le motho oa nama.

[Mongolo o botlaaseng ba leqephe]

[Chate/Litšoantšo tse leqepheng la 7]

LEFU LE TSOHO EA JESU

[Mongolo o botlaaseng ba leqephe]