Lipotso Tse Tsoang ho Babali
Ho Baroma 12:19, na moapostola Pauluse o ne a bontša hore Bakreste ha baa lokela ho halefa ha a ne a re: “Le se ke la ipheteletsa, baratuoa, empa le fe khalefo sebaka”?
Ha e le hantle, ha ho joalo. Mona moapostola Pauluse o ne a bua ka khalefo ea Molimo. Ka sebele sena ha se bolele hore ha ho na taba ha Mokreste a inehela khalefong. Ho hlakile hore Bibele e re eletsa hore re se ke ra halefa. Nahana ka mehlala ea keletso ea bomolimo.
“U kokobetse bohale ba hao, u tele khalefo, u se ke ua hlora; ebe etlaba u etsa bobe.” (Pesaleme ea 37:8) “E mong le e mong ea tsoelang pele a halefetse mor’abo o tla ikarabella lekhotleng la toka.” (Matheu 5:22) “Mesebetsi ea nama ea bonahala, ’me ke bohlola, ho se hloeke, boitšoaro bo hlephileng, borapeli ba litšoantšo, tloaelo ea tumelo ea ho sebelisana le meea ea bafu, bora, ho qabana, poulelo, ho tlakoloha ka bohale.” (Bagalata 5:19, 20) “Lehloeo le nang le lonya le bohale le khalefo le ho tleroha le puo e nyefolang a li tlosoe tsohle ho lōna.” (Baefese 4:31) “Motho e mong le e mong o lokela ho potlaka mabapi le ho utloa, e be ea liehang mabapi le ho bua, e be ea liehang mabapi le khalefo.” (Jakobo 1:19) Ho feta moo, khafetsa buka ea Liproverbia e re eletsa hore re se ke ra inehela khalefong kapa ra tloaela ho halefa ka lebaka la litšito tse nyenyane le liphoso tsa botho.—Liproverbia 12:16; 14:17, 29; 15:1; 16:32; 17:14; 19:11, 19; 22:24; 25:28; 29:22.
Litemana tse potolohileng Baroma 12:19 li lumellana le keletso e joalo. Pauluse o ile a fana ka keletso e reng lerato la rōna le hloke boikaketsi, re hlohonolofatse ba re hlorisang, re leke ho nahana hantle ka ba bang, re se ke ra busetsa bobe ka bobe, le hore re leke ka matla ho ba le khotso le batho bohle. Eaba oa phehella: “Le se ke la ipheteletsa, baratuoa, empa le fe khalefo sebaka; kaha ho ngoliloe: ‘Phetetso ke ea ka; ka sebele ke tla buseletsa, ho bolela Jehova.’”—Baroma 12:9, 14, 16-19.
E, ha rea lokela ho lumella khalefo ho re susumelletsa ho iphetetsa. Tsebo ea rōna ea maemo le kutloisiso ea rōna ea toka ha lia phethahala. Haeba re lumella khalefo ho re susumelletsa ho iphetetsa, re tla etsa liphoso khafetsa. Seo se ne se tla sebeletsa lipakane tsa Sera sa Molimo, Diabolose. Lengolong le leng Pauluse o ile a ngola: “Halefang, ’me leha ho le joalo le se ke la etsa sebe; letsatsi a le se ke la le likella le le boemong ba ho halefa, leha e le ho lumella Diabolose sebaka.”—Baefese 4:26, 27.
Tsela e molemo, e bohlale, ke ea ho tlohela hore Molimo a rere hore na phetetso e tla tla neng hona e tlele bo-mang. A ka etsa joalo ka tsebo e feletseng ea litaba, ’me tefetso efe kapa efe eo a e etsang e tla bontša toka ea hae e phethahetseng. Re ka bona hore ena ke ntlha ea bohlokoa eo Pauluse a neng a e hlahisa ho Baroma 12:19 ha re hlokomela hore o bua ka Deuteronoma 32:35, 41, e nang le mantsoe ana: “Phetetso e tla ba ea ka, le eona tefetso.” (Bapisa le Baheberu 10:30.) Kahoo, le hoja mantsoe a reng “ea Molimo” a le sieo tabeng e ngotsoeng ea Segerike, bafetoleli ba bangata ba kajeno ba a kentse ho Baroma 12:19. Sena se etsa hore e balehe ka litsela tse kang tsena “tlohella Molimo a iphetetse” (The Contemporary English Version); “neha bohale ba Molimo sebaka” (American Standard Version); “tlohella Molimo a fane ka kotlo haeba o tla etsa joalo” (The New Testament in Modern English); “siela tefetso ea bomolimo sebaka.”—The New English Bible.
Leha re hlekefetsoa kapa re hlorisoa ke lira tsa ’nete, re ka bontša hore re tšepa tlhaloso ea Jehova Molimo eo Moshe a ileng a e utloa: “Jehova, Jehova, Molimo ea mohau le ea mosa, ea liehang ho halefa le ea tletseng mosa o lerato le ’nete, ea bolokelang ba likete mosa o lerato, ea tšoarelang phoso le tlōlo le sebe, empa ho hang a ke ke a lokolla kotlong.”—Exoda 34:6, 7, NW.