Lipotso Tse Tsoang ho Babali

Ka lebaka la litaelo tsa Bibele mabapi le tšebeliso e nepahetseng ea mali, Lipaki tsa Jehova li na le pono efe ka mekhoa ea phekolo e sebelisang mali a mokuli ka boeena?

Ho e-na le hore a etse qeto a itšetlehile feela ka khetho ea hae kapa ka likhothalletso tsa lingaka, Mokreste ka mong o lokela ho nahana ka botebo ka seo Bibele e se bolelang. Ke taba e lipakeng tsa hae le Jehova.

Jehova, mophelisi oa rōna, o ile a laela hore mali ha aa lokela ho jeoa. (Genese 9:3, 4) Molaong o neng o nehiloe Baiseraele ba boholo-holo, Molimo o ile a beha meeli ea tšebeliso ea mali kahobane a emela bophelo. O ile a laela: “Moea [kapa bophelo] oa nama o maling, ’me ke a behile aletareng hore le koahele libe tsa meea ea lōna.” Ho ne ho etsahala joang haeba motho a bolaea phoofolo e le hore a e je? Molimo o ile a re: “Tabeng eo a tšolle mali a eona ’me a a koahele ka mobu.”a (Levitike 17:11, 13, NW) Jehova o ile a pheta taelo ena hangata. (Deuteronoma 12:16, 24; 15:23) Soncino Chumash ea Sejuda, e re: “Mali ha aa lokela ho bolokoa empa a lokela ho tšolleloa fatše e le hore a se ke a jeoa.” Ho ne ho se Moiseraele ea neng a ka khakeletsa, a boloka le ho sebelisa mali a sebōpuoa se seng, se phelisoang ke Molimo.

Tlamo ea ho boloka Molao oa Moshe e ile ea fela ha Mesia a e-shoa. Empa, pono ea Molimo ka khalalelo ea mali ha ea fetoha. Ka lebaka la ho susumetsoa ke moea o halalelang oa Molimo, baapostola ba ile ba laela Bakreste hore ba ‘ile mali.’ Taelo eo e ne e sa lokela ho nkoa habobebe. E ne e le ea bohlokoa boitšoarong joaloka ho ila bohlola kapa borapeli ba litšoantšo. (Liketso 15:28, 29; 21:25) Ha ho fana ka mali le ho a tšela ho tloaeleha lekholong la bo20 la lilemo, Lipaki tsa Jehova li ile tsa utloisisa hore mokhoa ona o hanana le Lentsoe la Molimo.b

Maemong a mang ngaka e tla khothalletsa mokuli hore a fane ka mali a hae libeke pele a buuoa (e leng ho bitsoang preoperative autologous blood donation, kapa PAD) e le hore haeba ho ka hlokahala, e tšele mokuli eo mali a hae a ileng a bolokoa. Leha ho le joalo, ho bokella, ho boloka le ho tšela mali ka tsela e joalo, ho hanana ka ho toba le se boletsoeng ho Levitike le Deuteronoma. Mali ha aa lokela ho bolokoa; a lokela ho tšolloa—joalokaha eka a busetsoa ho Molimo. Ke ’nete hore Molao oa Moshe ha o sebetse hona joale. Leha ho le joalo, Lipaki tsa Jehova li hlompha melao-motheo eo Molimo a e akarelelitseng ho oona, ’me li ikemiselitse ho ‘ila mali.’ Kahoo, mali a rōna a lokelang ho ‘tšolloa,’ ha re fane ka ’ona, kapa hona ho a bolokela tšelo ea mali. Tloaelo eo e hanana le molao oa Molimo.

Mekhoa e meng kapa litlhahlobo tse amang mali a mokuli ha li hanane ka ho hlaka le melao-motheo e boletsoeng ke Molimo. Ka mohlala, Bakreste ba bangata ba lumetse hore ba nkoe mali bakeng sa litlhahlobo, tseo ka mor’a tsona mali a nkiloeng ho mokuli a tšolloang. Ho ka ’na ha buelloa mekhoa e meng e rarahaneng haholoanyane e amang mali a mokuli.

Ka mohlala, ka linako tse ling ha motho a buuoa, mali a mang a ka ’na a faposoa ’meleng mokhoeng o bitsoang ho hlapolla mali. Mali a setseng ka ho mokuli aa hlapolloa. Hamorao, mali a neng a faposelitsoe ka ntle ka mathopo a mochine, a khutlisetsoa ka ho eena ka oona, ka tsela eo ho etsoa hore mali a hae a batle a boela boemong ba ’ona bo tloaelehileng. Ka ho tšoanang, mali a tsoang leqebeng a ka ’na a huloa ka lethopo le ho sefuoa e le hore lisele tse khubelu li ka khutlisetsoa ho mokuli; sena se bitsoa hore ke ho pholosa lisele. Mokhoeng o mong, mali a ka ’na a faposetsoa mochineng oo ka nakoana o etsang mosebetsi oo ka tloaelo o etsoang ke litho tsa ’mele (tse kang, pelo, matšoafo, kapa liphio). Mali a tsoang mochineng a khutlisetsoa ho mokuli. Mekhoeng e meng, mali a faposetsoa mochineng o a sefang e le hore ho ka tlosoa likarolo tsa ’ona tse kulisang kapa tse phoso. Kapa pakane e ka ’na ea e-ba ho arola motsoako o itseng oa mali ebe o sebelisetsoa ho etsa peche e thibang leqeba le tsoang mali. Ho boetse ho na le litlhahlobo tseo ho tsona ho ntšoang mali a itseng e le hore likarolo tsa ’ona li tšoauoe kapa hore a tsoakoe le moriana, ’me ka mor’a moo a khutlisetsoe ho mokuli.

Makolopetso a ka ’na a fapana, ’me ha ho pelaelo hore ho tla hlahisoa mekhoa e mecha, lipheko tse ncha le litlhahlobo tse ncha. Hase boikarabelo ba rōna ho qaqisa mokhoa o mong le o mong ebe re etsa qeto. Mokreste o tlameha ho iketsetsa qeto hore na mali a hae a tla tšoaroa joang nakong ea ho buuoa, ea tlhahlobo ea bongaka, kapa mekhoeng e sebelisoang hona joale ea ho phekola. O lokela ho fumana makolopetso ho ngaka kapa ho setsebi esale pele mabapi le hore na ho ka ’na ha etsoa’ng ka mali a hae ha a ntse a buuoa. Joale, o tla tlameha hore a etse qeto ho latela seo letsoalo la hae le se lumellang. (Bona lebokose.)

Bakreste ba lokela ho hopola hore ba inehetse ho Molimo le hore ba tlamehile ‘ho mo rata ka lipelo tsohle tsa bona le ka lisoule tsohle tsa bona, le ka matla ’ohle a bona, le ka likelello tsohle tsa bona.’ (Luka 10:27) Ho fapana le ba bangata lefatšeng, Lipaki tsa Jehova li nka kamano e ntle ea tsona le Molimo e le ea bohlokoa haholo. Monehi-Bophelo o khothalletsa bohle hore ba tšepe mali a tšolotsoeng a Jesu. Rea bala: “Ka eena [Jesu Kreste] re na le tokollo ka thekollo ka mali a eo, e, tšoarelo ea litšito tsa rōna.”—Baefese 1:7.

[Mongolo o botlaaseng ba leqephe]

[Lebokose/Litšoantšo tse leqepheng la 31]

LIPOTSO TSEO U KA IPOTSANG TSONA

Haeba mali a ka a mang a tla faposetsoa ka ntle ho ’mele oa ka ’me ho phalla ha ’ona ho khaotse ka nakoana, na letsoalo la ka le tla ntumella hore ke nke hore mali aa e sa le karolo ea ka, kahoo ha a hloke hore ‘a tšolleloe fatše’?

Na letsoalo la ka le koetlisitsoeng ka Bibele le ne le tla khathatseha haeba nakong ea liphuputso kapa ea phekolo mali a mang a ka a ka ntšoa, a lokisoa eaba a khutlisetsoa ’meleng oa ka?