Le Matlafatsoe ke Lerato

“U rate Jehova Molimo oa hao ka pelo ea hao eohle le ka soule ea hao eohle le ka kelello ea hao eohle.”—MATHEU 22:37.

 1. (a) Litšoaneleho tse ling tse hlaoleloang ke Bakreste ke life? (b) Tšoaneleho ea bohlokoa ka ho fetisisa ea Bokreste ke efe, hona hobane’ng?

MOKRESTE o hlaolela lintho tse ngata e le hore e be mosebeletsi ea atlehang. Buka ea Liproverbia e phahamisa bohlokoa ba tsebo, kutloisiso le bohlale. (Liproverbia 2:1-10) Moapostola Pauluse o ile a bua ka hore tumelo e tiileng le tšepo e matla lia hlokahala. (Baroma 1:16, 17; Bakolose 1:5; Baheberu 10:39) Mamello le boitšoaro le tsona ke tsa bohlokoa. (Liketso 24:25; Baheberu 10:36) Leha ho le joalo, ho na le ntho e ’ngoe eo ha e le sieo, e tlosang ho hong litšoanelehong tse ling kaofela ’me e ka ba ea li nyopisa. Ntho eo ke lerato.—1 Bakorinthe 13:1-3, 13.

 2. Jesu o bontšitse bohlokoa ba lerato joang, ’me see se hlahisa lipotso life?

² Jesu o bontšitse bohlokoa ba lerato ha a re: “Ka sena bohle ba tla tseba hore le barutuoa ba ka, haeba le e-na le lerato har’a lōna.” (Johanne 13:35) Kaha lerato ke letšoao le khethollang Mokreste oa ’nete, ho hlokahala hore re botse lipotso tse kang, Lerato ke eng? Ke hobane’ng ha e le la bohlokoa hoo Jesu a itseng ke lona le khethollang barutuoa ba hae ho feta eng kapa eng? Re ka hlaolela lerato joang? Ke bo-mang bao re lokelang ho ba rata? A re hlahlobeng lipotso tsena.

Lerato ke Eng?

 3. Lerato le ka hlalosoa joang, ’me ke hobane’ng ha le ama kelello le pelo?

³ Tlhaloso e ’ngoe ea lerato ke ‘boikutlo bo mofuthu ba katamelano kapa ho ikutloa u le haufi haholo le motho e mong, ho thabela motho e mong kapa ho mo phutholohela.’ Ke tšoaneleho e susumelletsang batho ho sebeletsa molemo oa ba bang, ka linako tse ling ka boitelo bo boholo. Lerato, joalokaha le hlalosoa ka Bibeleng, le ama kelello hammoho le pelo. Kelello, kapa matla a ho nahana, e na le karolo eo e e phethang hobane motho ea ratang o etsa joalo ka tsebo e feletseng, a elelloa hore eena le batho ba bang bao a ba ratang kaofela ba na le mefokolo hammoho le litšoaneleho tse ratehang. Matla a ho nahana aa ameha kahobane ho na le bao Mokreste a lokelang ho ba rata—mohlomong e bile e le khahlanong le takatso ea hae ka linako tse ling—hobane ha a ntse a bala Bibele oa tseba hore Molimo o batla ha a etsa joalo. (Matheu 5:44; 1 Bakorinthe 16:14) Ho ntse ho le joalo, hantle-ntle lerato le tsoa pelong. Lerato la ’nete joalokaha le senoloa ka Bibeleng ha ho mohla le tsoang monahanong feela. Le akarelletsa botšepehi bo tebileng le ho inehela ka maikutlo a feletseng.—1 Petrose 1:22.

 4. Ke ka tsela efe lerato e leng tlamo e matla?

⁴ Batho ba nang le moea oa boithati lipelong tsa bona hase hangata ba khonang ho ba le likamano tse lerato e le kannete le ba bang kahobane motho ea ratang o ikemisetsa ho etelletsa lithahasello tsa motho e mong ka pele ho tsa hae. (Bafilippi 2:2-4) Mantsoe a Jesu a reng “ho na le thabo e eketsehileng ho faneng ho feta e teng ho amoheleng” ke ’nete e khethehileng ha ho fana hoo ho etsoa ka lerato. (Liketso 20:35) Lerato ke tlamo e matla. (Bakolose 3:14) Hangata le akarelletsa setsoalle, empa maqhama a lerato a matla ho feta a setsoalle. Ka linako tse ling kamano ea ho hohelana ka maikutlo e pakeng tsa monna le mosali oa hae e hlalosoa e le lerato; leha ho le joalo, lerato leo Bibele e re khothalletsang ho le hlaolela le mamella ho feta khoheli ea ’mele. Ha banyalani ba ratana e le kannete, ba khomarelana leha kamano ea ’mele e se e sa khonehe ka lebaka la mefokolo ea botsofali kapa kahobane e mong a e-na le khoreletso.

Lerato ke Tšoaneleho ea Bohlokoa

 5. Ke hobane’ng ha lerato e le tšoaneleho ea bohlokoa ho Mokreste?

⁵ Ke hobane’ng ha lerato e le tšoaneleho ea bohlokoa ho Mokreste? Lebaka la pele ke hobane Jesu o laetse balateli ba hae hore ba ratane. O itse: “Le metsoalle ea ka haeba le etsa seo ke le laelang sona. Lintho tsena ke le laela tsona, hore le ratane.” (Johanne 15:14, 17) Lebaka la bobeli ke hobane Jehova ke mothofatso oa lerato, ’me joaloka barapeli ba hae re lokela ho mo etsisa. (Baefese 5:1; 1 Johanne 4:16) Bibele e bolela hore ho rua tsebo ka Jehova le Jesu ho bolela bophelo bo sa feleng. Re ka bolela joang hore re tseba Molimo haeba re sa leke ho tšoana le eena? Moapostola Johanne o ile a re: “Ea sa rateng ha a tsebe Molimo, hobane Molimo ke lerato.”—1 Johanne 4:8.

 6. Lerato le ka leka-lekanya litšobotsi tse sa tšoaneng tsa bophelo ba rōna joang?

⁶ Lerato ke la bohlokoa ka lebaka la boraro: Le re thusa ho leka-lekanya litšobotsi tse sa tšoaneng bophelong ba rōna ’me le etsa hore re be le sepheo se setle ho seo re se etsang. Ka mohlala, ke habohlokoa hore motho a tsoele pele a rua tsebo ea Lentsoe la Molimo. Ho Mokreste, tsebo e joalo e tšoana le lijo. E mo thusa hore a hōle tsebong le hore a etse lintho tumellanong le thato ea Molimo. (Pesaleme ea 119:105; Matheu 4:4; 2 Timothea 3:15, 16) Leha ho le joalo, Pauluse o ile a lemosa: “Tsebo ea hohomosa, empa lerato lea haha.” (1 Bakorinthe 8:1) Che, ha ho letho le phoso ka tsebo e nepahetseng. Bothata bo ho rōna—re na le litšekamelo tsa boetsalibe. (Genese 8:21) Haeba tšusumetso e leka-lekanyang ea lerato e le sieo, tsebo e ka etsa hore motho a ikhohomose, a nahana hore o molemo ho feta ba bang. Seo se ke ke sa etsahala haeba a susumetsoa haholo ke lerato. “Lerato . . . ha le ithorise, ha le hohomohe.” (1 Bakorinthe 13:4) Mokreste ea susumetsoang ke lerato ha a ikhohomose le haeba a e-ba le tsebo e tebileng. Lerato lea mo kokobetsa ’me le mo thibela ho batla ho iketsetsa lebitso.—Pesaleme ea 138:6; Jakobo 4:6.

7, 8. Lerato le re thusa joang ho tsepamisa mohopolo linthong tsa bohlokoa haholoanyane?

⁷ Pauluse o ile a ngolla Bafilippi, a re: “Sena ke seo ke tsoelang pele ho se rapella, hore lerato la lōna le ka ata ka ho eketsehileng haholoanyane ka tsebo e nepahetseng le temoho e feletseng; e le hore le ka nepisisa lintho tsa bohlokoa haholoanyane.” (Bafilippi 1:9, 10) Lerato la Bokreste le tla re thusa ho latela khothatso ena ea ho nepisisa lintho tsa bohlokoa haholoanyane. Ka mohlala, nahana ka mantsoe a Pauluse ho Timothea: “Haeba monna leha e le ofe a hahamalla boemo ba molebeli, o lakatsa mosebetsi o motle.” (1 Timothea 3:1) Selemong sa tšebeletso sa 2000, palo ea liphutheho lefatšeng ka bophara e ile ea eketseha ka tse 1 502, ea etsa hore ha li kopana kaofela li be 91 487. Kahoo, ho hlokahala baholo ba eketsehileng, ’me ba hahamallang tokelo ena baa thoholetsoa.

⁸ Leha ho le joalo, ba hahamallang litokelo tsa bolebeli ba tla etsa lintho ka teka-tekano hantle haeba ba hopola morero oa tokelo e joalo. Ho ba le matla a ho laela kapa lebitso le tsebisahalang haholoanyane hase eona ntho ea bohlokoa. Baholo ba khahlisang Jehova ba susumetsoa ke ho mo rata le ho rata barab’abo bona. Ha ba batle botumo kapa bolaoli. Ka mor’a hore moapostola Petrose a eletse baholo ba phutheho hore ba boloke boikutlo bo botle, o ile a hatisa bohlokoa ba “ho ikokobetsa kelellong.” O ile a eletsa bohle ka phuthehong, a re: “Le ikokobetse tlas’a letsoho le matla la Molimo.” (1 Petrose 5:1-6) Ke hantle ha mang le mang ea hahamallang bolebeli a nahana ka mohlala oa baholo ba bangata lefatšeng ka bophara ba sebetsang ka thata, ba ikokobelitseng, ’me ka lebaka leo e le tlhohonolofatso liphuthehong tsa habo bona.—Baheberu 13:7.

Sepheo se Setle se re Thusa ho Mamella

 9. Ke hobane’ng ha Bakreste ba lula ba hopotse litlhohonolofatso tseo Jehova a li tšepisitseng?

⁹ Bohlokoa ba ho susumetsoa ke lerato bo bonahala ka tsela e ’ngoe. Ba phehellang borapeli ka lebaka la ho rata Molimo, Bibele e ba tšepisa litlhohonolofatso tse enneng hona joale le litlhohonolofatso tse babatsehang ka ho fetisisa nakong e tlang. (1 Timothea 4:8) Mokreste ea lumelang litšepiso tsena ka matla le ea kholisehileng hore Jehova “e ba moputsi oa ba mo batlang ka tieo” oa thuseha hore a eme a tiile tumelong. (Baheberu 11:6) Boholo ba rōna re labalabela phethahatso ea litšepiso tsa Molimo ’me re pheta mantsoe a moapostola Johanne ha a re: “Amen! Tloo, Morena Jesu.” (Tšenolo 22:20) E, ho nahanisisa ka litlhohonolofatso tse tla tloha li tla, haeba re tšepahala, ho re fa matla a ho mamella, hantle feela joalokaha Jesu a ile a thusoa ho mamella ke ho hopola “thabo e neng e behiloe ka pel’a hae.”—Baheberu 12:1, 2.

10, 11. Ho susumetsoa ke lerato ho re thusa joang hore re mamelle?

¹⁰ Leha ho le joalo, ho thoe’ng haeba takatso ea rōna ea ho phela lefatšeng le lecha e le sona sepheo feela sa hore re sebeletse Jehova? Joale re ka fela pelo habonolo kapa ra se ke ra khotsofala ha lintho li thatafala kapa li sa etsahale ho latela seo re se lebeletseng kapa ka nako eo re lebeletseng hore li tla etsahala ka eona. Re ka ba kotsing e tebileng ea ho hoholeha. (Baheberu 2:1; 3:12) Pauluse o ile a bua ka eo e neng e le motsoalle oa hae ea bitsoang Demase, ea ileng a mo lahla. Ka lebaka lefe? Hobane “o ile a rata tsamaiso ea lintho ea hona joale.” (2 Timothea 4:10) Ba sebeletsang feela ka mabaka a boithati ba kotsing ea ho mo etsisa. Ba ka ’na ba hoheloa ke menyetla ea hona joale eo lefatše lena le fanang ka eona ’me ba ba monyebe hore motsotsong ona ba itele ha ba ntse ba lebeletse litlhohonolofatso tse tlang.

¹¹ Leha e le ho loketseng ebile e le ntho ea tlhaho ho ba le takatso ea ho amohela litlhohonolofatso tsa nako e tlang le ea ho lopolloa litekong, lerato le matlafatsa kananelo ea rōna bakeng sa seo e lokelang ho ba sa bohlokoa ka ho fetisisa bophelong ba rōna. Ntho ea bohlokoa ke thato ea Jehova, eseng ea rōna. (Luka 22:41, 42) E, lerato lea re matlafatsa. Le re etsa hore re khotsofalle ho letela Molimo oa rōna ka mamello, re khotsofalletse litlhohonolofatso leha e le life tseo a re fang tsona ’me re kholisehile hore ka nako ea hae re tla amohela sohle seo a se tšepisitseng—le ho feta moo. (Pesaleme ea 145:16; 2 Bakorinthe 12:8, 9) Khabareng, lerato le re thusa ho tsoela pele re sebeletsa ntle ho boithati hobane “lerato . . . ha le batle lithahasello tsa lona.”—1 Bakorinthe 13:4, 5.

Bakreste ba Lokela ho Rata Bo-mang?

12. Ho latela Jesu, re lokela ho rata bo-mang?

¹² Jesu o fane ka taelo e batsi ea hore na ke mang eo re ka mo ratang ha a qotsa lipolelo tse peli Molaong oa Moshe. O itse: “U rate Jehova Molimo oa hao ka pelo ea hao eohle le ka soule ea hao eohle le ka kelello ea hao eohle” hape, “U rate moahelani oa hao joalokaha u ithata.”—Matheu 22:37-39.

13. Re ka ithuta joang ho rata Jehova, le hoja re ke ke ra mo bona?

¹³ Mantsoe a Jesu a hlakisa hore pele ho tsohle re lokela ho rata Jehova. Leha ho le joalo, ha rea tsoaloa re e-na le lerato le feletseng ho Jehova. Ke ntho eo re lokelang ho e hlaolela. Ha re qala ho utloa ka eena, re ile ra hohelloa ho eena ke seo re ileng ra se utloa. Re ile ra ithuta butle-butle kamoo a ileng a lokisetsa batho lefatše kateng. (Genese 2:5-23) Re ithutile kamoo a ’nileng a sebetsana le batho kateng, a sa re lahle ha sebe se qala ho futuhela lelapa la motho, empa a nka mehato ea ho re lopolla. (Genese 3:1-5, 15) O ile a sebetsana ka mosa le ba tšepahalang, ’me qetellong a fana ka Mora ea tsoetsoeng a ’notši oa hae bakeng sa tšoarelo ea libe tsa rōna. (Johanne 3:16, 36) Tsebo ena e eketsehileng e hōlisitse kananelo ea rōna bakeng sa Jehova. (Esaia 25:1) Morena Davida o itse o ne a rata Jehova ka lebaka la tlhokomelo ea Hae e lerato. (Pesaleme ea 116:1-9) Kajeno, Jehova oa re hlokomela, oa re tataisa, oa re matlafatsa, ’me oa re khothatsa. Ha re ithuta ka ho eketsehileng ka eena, lerato la rōna le tla teba ka ho eketsehileng.—Pesaleme ea 31:23; Sofonia 3:17; Baroma 8:28.

Re ka Bontša Lerato la Rōna Joang?

14. Re ka bontša ka tsela efe hore lerato la rōna ho Molimo ke la ’nete?

¹⁴ Ha e le hantle, ba bangata ho pota lefatše ba re ba rata Molimo, empa tsela eo ba itšoarang ka eona e hanana le seo ba se bolelang. Re ka tseba joang hore re hlile re rata Jehova? Re ka bua le eena thapelong ’me ra mo bolella hore na re ikutloa joang. Hape re ka itšoara ka tsela e bontšang lerato la rōna. Moapostola Johanne o itse: “Mang kapa mang ea felang a boloka lentsoe la [Molimo], kannete ho motho enoa lerato la Molimo le entsoe le phethahetseng. Ka sena re na le tsebo ea hore re kopanong le eena.” (1 Johanne 2:5; 5:3) Har’a lintho tse ling, Lentsoe la Molimo le re bolella hore re bokane hammoho le ho phela bophelo bo hloekileng, ba boitšoaro bo botle. Re qoba boikaketsi, re bua ’nete ’me re boloka menahano ea rōna e hloekile. (2 Bakorinthe 7:1; Baefese 4:15; 1 Timothea 1:5; Baheberu 10:23-25) Re bontša lerato ka ho fana ka thuso ea lintho tse bonahalang ho ba li hlokang. (1 Johanne 3:17, 18) Ha re cheche tabeng ea ho bolella ba bang ka Jehova. Seo se akarelletsa ho kopanela ho boleleng litaba tse molemo tsa ’Muso lefatšeng ka bophara. (Matheu 24:14; Baroma 10:10) Ho mamela Lentsoe la Molimo linthong tse joalo ke bopaki ba hore lerato la rōna ho Jehova ke la ’nete.

15, 16. Ho rata Jehova ho ile ha ama bophelo ba ba bangata joang selemong se fetileng?

¹⁵ Ho rata Jehova ho thusa batho ho etsa liqeto tse molemo. Selemong se fetileng, lerato le joalo le ile la susumetsa batho ba 288 907 ho nehela bophelo ba bona ho eena le ho tšoantšetsa qeto eo ka ho kolobetsoa metsing. (Matheu 28:19, 20) Boinehelo ba bona bo ne bo e-na le morero. Bo ile ba tšoaea phetoho bophelong ba bona. Ka mohlala, Gazmend e ne e le e mong oa likhalala tsa basketball tsa Albania. Eena le mosali oa hae ba ile ba ithuta Bibele ka lilemo tse itseng, ’me qetellong ba ile ba tšoaneleha hore e ka ba bahoeletsi ba ’Muso, ho sa tsotellehe litšitiso. Selemong se fetileng, Gazmend o ile a kolobetsoa, e le e mong oa ba 366 ba ileng ba kolobetsoa Albania selemong sa tšebeletso sa 2000. Koranta e ’ngoe e ile ea bua ka eena ’me ea re: “O phelela morero o itseng, ’me ka lebaka lena, eena le lelapa la hae ba thabile ka ho fetisisa bophelong ba bona. Ho eena, ha e sa le habohlokoa ho bona hore na a ka fumana molemo o mokae bophelong empa, ho e-na le hoo, ke habohlokoa ho bona hore na a ka fana ka ho hokae ho thusa batho ba bang.”

¹⁶ Ka ho tšoanang, morali’abo rōna ea sa tsoa kolobetsoa ea sebeletsang k’hamphani ea oli ea Guam o ile a fuoa mosebetsi o hohelang. Ka mor’a lilemo tse ngata a ntse a phahamisoa mosebetsing, qetellong o ile a fuoa monyetla oa hore e be mosali oa pele oa ho ba motlatsi oa mopresidente historing ea k’hamphani eo. Leha ho le joalo, nakong ena o ne a se a nehetse bophelo ba hae ho Jehova. Kahoo, ka mor’a ho tšohla taba ena le monna oa hae, enoa eo e sa tsoa ba morali’abo rōna o ile a hana mpho eo ’me ho e-na le hoo a lokisetsa mosebetsi o nkang lihora tse ka tlaase ho tse tloaelehileng e le hore a ka tsoela pele e le mosebeletsi oa nako e tletseng, kapa pula-maliboho. Ho rata Jehova ho ile ha mo susumelletsa hore a batle ho mo sebeletsa e le pula-maliboho ho e-na le ho phehella lithahasello tsa chelete tsa lefatše lena. Ha e le hantle, lefatšeng ka bophara lerato le joalo le ile la susumelletsa ba 805 205 hore ba kopanele litšobotsing tse sa tšoaneng tsa tšebeletso ea bopula-maliboho selemong sa tšebeletso sa 2000. Bo-pula-maliboho bao ba bontšitse lerato le tumelo hakaakang!

Ba Susumelelitsoe ho Rata Jesu

17. Ke mohlala ofe o motle oa lerato oo re o bonang ho Jesu?

¹⁷ Jesu ke mohlala o babatsehang oa motho ea susumetsoang ke lerato. Pele e e-ba motho oa nama, o ne a rata Ntat’ae ’me o ne a rata moloko oa batho. Kaha ke mothofatso oa bohlale, o itse: “Ke ile ka ba mabapa le [Jehova] ke le mosebetsi ea hloahloa, ’me ka ba eo a neng a mo rata ka ho khethehileng letsatsi le letsatsi, ke ntse ke nyakaletse ka pel’a hae ka nako eohle, ke ntse ke nyakaletse ka lebaka la naha e behang ea lefatše la hae, ’me lintho tseo ke neng ke li rata li ne li le ho bara ba batho.” (Liproverbia 8:30, 31, NW) Lerato la Jesu le ile la mo susumelletsa ho tela bolulo ba hae ba leholimo le ho tsoaloa e le lesea le hlokang ho sireletsoa. O ne a sebetsana ka mamello le ka mosa le baikokobetsi le ba tlaase ’me o ile a utloisoa bohloko ke lira tsa Jehova. Qetellong, o ile a shoela thupeng ea tlhokofatso bakeng sa moloko oohle oa batho. (Johanne 3:35; 14:30, 31; 15:12, 13; Bafilippi 2:5-11) Ke mohlala o motle hakaakang oa tšusumetso e nepahetseng!

18. (a) Re hlaolela ho rata Jesu joang? (b) Re bontša ka tsela efe hore re rata Jesu?

¹⁸ Ha ba lipelo li lokileng ba bala litlaleho tsa bophelo ba Jesu ka Likosepeleng ’me ba nahanisisa ka hore na ke litlhohonolofatso tse kae tseo tsela ea hae ea botšepehi e ba tliselitseng tsona, sena se hōlisa ka ho bona lerato le tebileng bakeng sa hae. Rōna kajeno re tšoana le bao Petrose a neng a bua le bona ha a re: “Le hoja le sa ka la . . . bona [Jesu] le ka mohla, lea mo rata.” (1 Petrose 1:8) Lerato la rōna le bonahatsoa ha re bontša tumelo ho eena ’me re etsisa bophelo ba hae ba boitelo. (1 Bakorinthe 11:1; 1 Bathesalonika 1:6; 1 Petrose 2:21-25) Ka la 19 April, 2000, ba 14 872 086 ba ne ba tlile Sehopotsong sa selemo le selemo sa lefu la Jesu, ’me ba ile ba hopotsoa mabaka ao re mo ratang ka ’ona. Palo eo e ne e le khōlō hakaakang! Ho matlafatsa hakaakang ho tseba hore ba bangata hakana ba thahasella poloko e tlang ka sehlabelo sa Jesu! Ka sebele re matlafatsoa ke lerato leo Jehova le Jesu ba re ratang ka lona le lerato leo re ba ratang ka lona.

19. Ke lipotso life tse mabapi le lerato tse tla tšohloa sehloohong se latelang?

¹⁹ Jesu o itse re lokela ho rata Jehova ka pelo eohle, moea oohle, kelello eohle le matla ’ohle. Empa hape o itse re lokela ho rata baahelani ba rōna joalokaha re ithata. (Mareka 12:29-31) Baahelani bao ba akarelletsa bo-mang? Lerato la moahelani le re thusa joang hore re se ke ra ba leeme le hore re be le sepheo se nepahetseng? Lipotso tsena li tla tšohloa sehloohong se latelang.

Na Ua Hopola?

• Ke hobane’ng ha lerato e le tšoaneleho ea bohlokoa?

• Re ka ithuta joang ho rata Jehova?

• Boitšoaro ba rōna bo paka joang hore re rata Jehova?

• Re bontša joang hore re rata Jesu?

[Litšoantšo tse leqepheng la 10, 11]

Lerato le re thusa ho letela topollo ka mamello

[Setšoantšo se leqepheng la 12]

Sehlabelo sa bohlokoa sa Jesu se re susumelletsa hore re mo rate