Tsoela Pele U Sebeletsa Jehova ka Pelo e Tiileng
“Pelo ea ka e tiile, Molimo, pelo ea ka e tiile.”—PESALEME EA 57:7.
1. Ke hobane’ng ha re ka ba le kholiseho e kang ea Davida?
JEHOVA a ka etsa hore re tiee tumelong ea Bokreste e le hore re khomarele Bokreste ba ’nete re le bahlanka ba hae ba inehetseng. (Baroma 14:4) Kahoo, re ka kholiseha joaloka mopesaleme Davida, ea ileng a susumelletseha ho bina: “Pelo ea ka e tiile, Molimo.” (Pesaleme ea 108:1) Haeba lipelo tsa rōna li tiile, re tla susumelletseha ho phetha boinehelo ba rōna ho Molimo. Ka ho itšetleha ka eena bakeng sa tataiso le matla, re ka ba ba sa sisinyeheng, ba tiileng boikemisetsong ba rōna le kholisehong ea rōna re le baboloki ba botšepehi, “kamehla [re] e-na le ho hongata hoo [re] ka ho etsang mosebetsing oa Morena.”—1 Bakorinthe 15:58.
2, 3. Moelelo oa likhothatso tsa Pauluse tse tlalehiloeng ho 1 Bakorinthe 16:13 ke ofe?
2 Likhothatsong tseo moapostola Pauluse a ileng a li fa balateli ba Jesu Korinthe ea boholo-holo empa ka sebele li ntse li sebetsa ho Bakreste ba kajeno, o ile a re: “Lulang le falimehile, le eme le tiile tumelong, le tsoele pele joaloka banna, le be matla.” (1 Bakorinthe 16:13) Ka Segerike, taelo ka ’ngoe ho tsena e boemong ba bojoale, e leng ho khothalletsang ketso e tsoelang pele. Moelelo oa keletso ee ke ofe?
3 Re ka ‘lula re falimehile’ moeeng ka ho hanyetsa Diabolose le ka ho atamela ho Molimo. (Jakobo 4:7, 8) Ho itšetleha ka Jehova ho re nolofalletsa hore re lule re momahane le hore re ‘eme re tiile tumelong ea Bokreste.’ Rōna—ho kopanyelletsa le basali ba bangata har’a rōna—‘re tsoela pele joaloka banna’ ka ho sebeletsa Molimo ka sebete re le bahoeletsi ba ’Muso. (Pesaleme ea 68:11) Re ba “matla” ka hore ka linako tsohle re itšetlehe ka Ntat’a rōna oa leholimo bakeng sa matla a ho etsa thato ea hae.—Bafilipi 4:13.
4. Ke eng e ileng ea lebisa kolobetsong ea rōna re le Bakreste?
4 Re ile ra emela tumelo ea ’nete ha re ne re etsa boinehelo bo feletseng ho Jehova ’me re bo bontša ka ho qoelisoa metsing. Empa ke eng e lebisitseng kolobetsong ea rōna? Pele, re ile ra rua tsebo e nepahetseng ka Lentsoe la Molimo. (Johanne 17:3) Sena se ile sa haha tumelo ’me sa re susumelletsa hore re bake, re bontše hore re hlile re soabela liphoso tsa nako e fetileng. (Liketso 3:19; Baheberu 11:6) Ka mor’a moo re ile ra sokoloha, kaha re ile ra furalla mekhoa e fosahetseng e le hore re phehelle bophelo bo tumellanong le thato ea Molimo. (Baroma 12:2; Baefese 4:23, 24) Sena se ile sa lateloa ke boinehelo ba pelo eohle ho Jehova ka thapelo. (Matheu 16:24; 1 Petrose 2:21) Re ile ra kōpa hore Molimo a re fe letsoalo le letle eaba rea kolobetsoa e le pontšo ea boinehelo ba rōna ho eena. (1 Petrose 3:21) Ho nahana ka mehato ena ho tla re thusa hore re lule re tsepamisitse mohopolo tabeng ea hore ho hlokahala boiteko bo tsoelang pele ba ho phelela boinehelo ba rōna le ho tsoela pele re sebeletsa Jehova ka pelo e tiileng.
Tsoela Pele U Batla Tsebo e Nepahetseng
5. Ke hobane’ng ha re lokela ho tsoela pele re rua tsebo ea Mangolo?
5 E le hore re phelele boinehelo ba rōna ho Molimo, re lokela ho tsoela pele re rua tsebo ea Mangolo e hahang tumelo. E bile ho nyakallisang hakaakang ho ja lijo tsa moea ha re ne re qala ho tseba ’nete ea Molimo! (Matheu 24:45-47) “Lijo” tseo li ne li hlabosa—’me li ile tsa re fepa hantle moeeng. Hona joale ke habohlokoa hore re tsoele pele re ja lijo tsa moea tse matlafatsang e le hore re lule re e-na le pelo e tiileng re le bahlanka ba inehetseng ba Jehova.
6. Ho ka etsahala hore ebe u ile ua thusoa joang hore u be le kananelo e tlohang pelong bakeng sa ’nete ea Bibele?
6 Ho hlokahala boiteko e le hore re fumane tsebo e eketsehileng ea Mangolo. Ho tšoana le ho batla matlotlo a patiloeng—ho hloka boikitlaetso. Empa ho putsa hakaakang ho fumana “tsebo ea Molimo”! (Liproverbia 2:1-6) Ha mohoeletsi oa ’Muso a ne a ithuta Bibele le uena ka lekhetlo la pele, e ka ’na eaba o ile a sebelisa buka ea Tsebo e Isang Bophelong bo sa Feleng. Ho ka etsahala hore ho ile ha hlokahala nako e ngata pele le qeta khaolo ka ’ngoe, mohlomong le ne le ithuta ka makhetlo a ’maloa pele le e qeta. U ile ua rua molemo ha mangolo a bontšitsoeng a ne a baloa ’me a tšohloa. Haeba ho ne ho le thata ho utloisisa ntlha e itseng, e ne e hlalosoa. Ea neng a u khannela thuto ea Bibele o ne a lokisetsa hantle, a rapella moea oa Molimo, ’me a u thusa hore u be le kananelo e tlohang pelong bakeng sa ’nete.
7. Ke eng e etsang hore motho a tšoanelehe hore a rute ba bang ’nete ea Molimo?
7 Boiteko bona bo ne bo loketse, kaha Pauluse o ile a ngola: “Leha e le mang ea ntseng a rutoa lentsoe ka molomo a ke a arolelane lintho tsohle tse molemo le ea mo fang thuto e joalo ea molomo.” (Bagalata 6:6) Mona taba e ngotsoeng ea Segerike e bontša hore lithuto tsa Lentsoe la Molimo li ile tsa kenngoa ka ho pheta-pheta kelellong le pelong ea ea neng “a rutoa ka molomo.” Ho rutoa ka tsela ena ho etsa hore u tšoanelehe hore u be mosuoe oa ba bang. (Liketso 18:25) E le hore u tšepahalle boinehelo ba hao, u lokela hore u boloke bomoea ba hao le ho tiea ha hao ka ho ithuta Lentsoe la Molimo kamehla.—1 Timothea 4:13; Tite 1:13; 2:2.
Hopola Pako ea Hao le Tšokoloho
8. Ho ka khoneha joang hore u lule u itšoere ka tsela ea bomolimo?
8 Na u sa hopola kamoo u ileng ua imoloha kateng ha u ne u qala ho ithuta ’nete, u baka, ’me u lemoha hore Molimo o u tšoaretse motheong oa tumelo sehlabelong sa Jesu sa thekollo? (Pesaleme ea 32:1-5; Baroma 5:8; 1 Petrose 3:18) Ka sebele ha u batle ho khutlela bophelong ba boetsalibe. (2 Petrose 2:20-22) Har’a lintho tse ling, ho rapela Jehova kamehla ho tla u thusa hore u lule u itšoere ka tsela ea bomolimo, u phelele boinehelo ba hao ’me u tsoele pele u sebeletsa Jehova ka botšepehi.—2 Petrose 3:11, 12.
9. aha re furaletse mekhoa ea boetsalibe, re lokela ho phehella tsela efe?
9 Kaha u sokolohile ka ho furalla mekhoa ea boetsalibe, tsoela pele u batla thuso ea Molimo bakeng sa hore pelo ea hao e lule e tiile. Ha e le hantle, u ne u tsamaea ka tsela e fosahetseng eaba u sheba ’mapa o tšepahalang ’me ua qala ho tsamaea tseleng e nepahetseng. U se ke ua kheloha tsela joale. U ’ne u itšetlehe ka tataiso ea Molimo, ’me u ikemisetse ho lula tseleng e isang bophelong.—Esaia 30:20, 21; Matheu 7:13, 14.
Le ka Mohla U se ke Ua Lebala Boinehelo ba Hao le Kolobetso
10. Re lokela ho hopola lintlha life mabapi le boinehelo ba rōna ho Molimo?
10 U hopole hore u inehetse ho Jehova ka thapelo, ka tebello ea ho mo sebeletsa ka botšepehi ka ho sa feleng. (Juda 20, 21) Boinehelo bo bolela ho behella ka thōko, kapa ho arola bakeng sa morero o halalelang. (Levitike 15:31; 22:2) Boinehelo ba hao e ne e se tumellano ea nakoana kapa boitlamo bo etsoang ho batho. E bile boinehelo ba ka ho sa feleng ho ’Musi oa Bokahohle, ’me ho bo phelela ho hloka hore re tšepahale ho Molimo bophelong bohle ba rōna. E, ‘le haeba re phela kapa le haeba re ka shoa, re ba Jehova.’ (Baroma 14:7, 8) Thabo ea rōna e itšetlehile ka ho ikokobelletsa thato ea hae le ho tsoela pele re mo sebeletsa ka pelo e tiileng.
11. Ke hobane’ng ha u lokela ho hopola kolobetso ea hao le se boleloang ke eona?
11 Kamehla hopola kolobetso ea hao eo e leng pontšo ea boinehelo ba hao ba pelo eohle ho Molimo. Ha ua qobelloa ho kolobetsoa, kaha u entse qeto eo ka bouena. Na joale u ikemiselitse ho phetha takatso ea hao tumellanong le thato ea Molimo bophelong bohle ba hao? U ile ua kōpa Molimo hore a u fe letsoalo le letle eaba u kolobetsoa e le pontšo ea boinehelo ba hao ho eena. Boloka letsoalo leo le letle ka ho phethahatsa boinehelo ba hao, ’me tlhohonolofatso e enneng ea Jehova e tla ba holim’a hao.—Liproverbia 10:22.
Takatso ea Hao e Phetha Karolo e Itseng
12, 13. Takatso ea rōna e amana joang le boinehelo le kolobetso?
12 Ka sebele boinehelo le kolobetso li tliselitse batho ba limilione litlhohonolofatso lefatšeng ka bophara. Ha re tšoantšetsa boinehelo ba rōna ho Molimo ka ho kolobetsoa metsing, rea shoa mabapi le tsela ea rōna e fetileng ea bophelo empa takatso ea rōna eona e lula e le teng. Ha e le hantle, kaha re balumeli ba rupetsoeng hantle, re ile ra sebelisa takatso ea rōna ha re ne re inehela ho Molimo ka thapelo ’me re kolobetsoa. Boinehelo le kolobetso li hloka hore re fumane hore na thato ea Molimo ke efe ebe ka boithatelo re khetha ho e etsa. (Baefese 5:17) Kahoo re etsisa Jesu, ea ileng a sebelisa takatso ea hae ha a ne a tlohela lithulusi tsa bobetli, a kolobetsoa, ’me a inehela ka ho feletseng ho etseng thato ea Ntat’ae oa leholimo.—Pesaleme ea 40:7, 8; Johanne 6:38-40.
13 Jehova Molimo o ne a rerile hore Mora oa hae a etsoe ea “phethahetseng ka litlhokofatso.” Kahoo, ho ile ha hlokahala hore Jesu a phethe takatso ea hae e le hore a mamelle litlhokofatso tse joalo ka botšepehi. E le hore a etse seo, o ile a nyehela “lithapeli le likōpo tse matla . . . ka mehoo e matla le meokho, ’me a utluoa ka mokhoa o amohelehang ka lebaka la tšabo ea hae ea bomolimo.” (Baheberu 2:10, 18; 5:7, 8) Haeba re bonahatsa tšabo e joalo e nang le tlhompho ho Molimo, ntle ho pelaelo le rōna re tla “utluoa ka mokhoa o amohelehang,” ’me re ka kholiseha hore Jehova o tla re tiisa kaha re Lipaki tsa hae tse inehetseng.—Esaia 43:10.
U ka Lula U E-na le Pelo e Tiileng
14. Ke hobane’ng ha re lokela ho bala Bibele letsatsi le leng le le leng?
14 U tla thusoa ke eng ho lula u e-na le pelo e tiileng e le hore u tle u phelele boinehelo ba hao ho Molimo? Bala Bibele letsatsi le leng le le leng ka sepheo sa hore u rue tsebo e ntseng e eketseha ea Lentsoe la Molimo. Ena ke ntho eo nako le nako “lekhoba le tšepahalang le le masene” le re khothalletsang hore re e etse. Ho fanoa ka keletso e joalo hobane ho phelela boinehelo ba rōna ho hloka hore re tsoele pele re tsamaea ’neteng ea Molimo. Haeba mokhatlo o hlophisitsoeng oa Jehova o ne o tšehetsa lithuto tsa bohata ka boomo, ho ka be ho sa khothalletsoe Lipaki tsa Jehova le batho bao li bolelang ho bona hore ba bale Bibele.
15. (a) Re lokela ho nahana ka eng ha re etsa liqeto? (b) Ke hobane’ng ha re ka re mosebetsi oa boipheliso hase oona o nkang sebaka sa pele oa Mokreste?
15 Ha u etsa liqeto, kamehla u nahane kamoo li ka ’nang tsa ama ho phethahatsa ha hao boinehelo ba hao ho Jehova. Liqeto tsena li ka ’na tsa ama mosebetsi oa hao oa boipheliso. Na u leka ho etsa hore o u thuse hore u ntšetse pele borapeli ba ’nete? Le hoja ka kakaretso bahiri ba fumane hore Bakreste ba inehetseng ke batho ba ka tšeptjoang le ba khothetseng, ba boetse baa hlokomela hore Lipaki tsa Jehova ha li iketelletse pele ka ho feteletseng bakeng sa hore li hlahelle lefatšeng ebile ha li hlōlisane le ba bang bakeng sa maemo a lefang chelete e ntle ka ho fetisisa. Lebaka la sena ke hore pakane ea Lipaki hase ho fumana leruo, botumo, boemo kapa matla. Ho ba phelelang boinehelo ba bona ho Molimo, ntho ea bohlokoa ka ho fetisisa ke ho etsa thato ea Molimo. Mosebetsi oa boipheliso o li nolofalletsang hore li fumane lintho tse hlokahalang bophelong hase oona o nkang sebaka sa pele. Joaloka moapostola Pauluse, mosebetsi oa tsona oa sehlooho ke tšebeletso ea Bokreste. (Liketso 18:3, 4; 2 Bathesalonika 3:7, 8; 1 Timothea 5:8) Na u boloka lithahasello tsa ’Muso li le ka pele bophelong ba hao?—Matheu 6:25-33.
16. Re ka etsa eng haeba ho tšoenyeha ho sa hlokahaleng ho etsa hore re thatafalloe ke ho phelela boinehelo ba rōna ho Molimo?
16 Ho ka etsahala hore ba bang ba batlile ba sithabetsoa ke matšoenyeho a sa tšoaneng pele ba ithuta ’nete. Empa lipelo tsa bona li ile tsa tlala thabo, kananelo le lerato hakaakang ho Molimo ha ba amohela tšepo ea ’Muso! Ho nahana ka litlhohonolofatso tseo ba seng ba li fumane ho tloha ka nako eo ho ka ba thusa hore ba phelele boinehelo ba bona ho Jehova. Ka lehlakoreng le leng, ho thoe’ng haeba joale ho tšoenyeha ka mathata a tloaelehileng bophelong tsamaisong ee ea lintho ho ka ’na ha pupetsa “lentsoe la Molimo,” joalokaha meutloa e ka thibela limela tse nyenyane ho hōla hore li behe litholoana? (Luka 8:7, 11, 14; Matheu 13:22; Mareka 4:18, 19) Haeba u lemoha hore sena se qala ho u etsahalla kapa ho etsahalla ba lelapa la hao, lahlela matšoenyeho a hao ho Jehova ’me u rapelle hore a u thuse hore lerato la hao le kananelo ea hao li hōle. Haeba u lahlela moroalo oa hao ho eena, o tla u tšehetsa ’me a u fe matla a hore u tsoele pele u mo sebeletsa ka thabo le ka pelo e tiileng.—Pesaleme ea 55:22; Bafilipi 4:6, 7; Tšenolo 2:4.
17. Re ka khona joang ho tobana le liteko tse boima?
17 U tsoele pele ho rapela Jehova Molimo kamehla, joalokaha u ile ua rapela ha u ne u inehela ho eena. (Pesaleme ea 65:2) Ha u lekoa hore u etse bobe kapa ha u tobane le teko e matla, batla tataiso ea Molimo le hore a u thuse hore u tsebe ho e sebelisa. U hopole hore ho hlokahala tumelo, etsoe morutuoa Jakobo o ile a ngola: “Haeba mang kapa mang oa lōna a haelloa ke bohlale [ba ho mamella teko], a ’ne a kōpe Molimo, hobane o fana ka seatla se bulehileng ho bohle a bile a sa nyelise; ’me o tla bo fuoa. Empa a ’ne a kōpe ka tumelo, a sa belaele ho hang, kaha ea belaelang o joaloka leqhubu la leoatle le khannoang ke moea le le fefoleloang koana le koana. Ha e le hantle, motho eo a se ke a nahana hore o tla amohela letho ho Jehova; ke motho ea hlōlehang ho etsa qeto, ea sa tsitsang litseleng tsohle tsa hae.” (Jakobo 1:5-8) Haeba ho bonahala eka teko e boima, re ka kholiseha ka sena: “Ha ho moleko o le hlahetseng haese se tloaelehileng ho batho. Empa Molimo oa tšepahala, ’me a ke ke a le tlohela hore le lekoe ho feta seo le ka se jarang, empa hammoho le moleko o tla boela a le bulele tsela ea ho tsoa e le hore le khone ho o mamella.”—1 Bakorinthe 10:13.
18. Re ka etsa eng haeba sebe se tebileng se patiloeng se fokolisa boikemisetso ba rōna ba hore re phelele boinehelo ba rōna ho Jehova?
18 Ho thoe’ng haeba sebe se tebileng se patiloeng se tšoenya letsoalo la hao ’me se fokolisa boikemisetso ba hao ba hore u phelele boinehelo ba hao ho Molimo? Haeba u bakile, u ka tšelisoa ke ho tseba hore Jehova ‘a ke ke a nyelisa pelo e robehileng le e sithabetseng.’ (Pesaleme ea 51:17) Batla thuso ea baholo ba lerato ba Bakreste, u tseba hore—kaha ba etsisa Jehova—ba ke ke ba nkela fatše takatso ea hao ea hore u boele u be le kamano e ntle le Ntate oa hao oa leholimo. (Pesaleme ea 103:10-14; Jakobo 5:13-15) Joale, ha matla a hao a moea a tsosolositsoe ’me pelo ea hao e tiile, u tla khona ho otlolla litsela bakeng sa maoto a hao ’me u fumane hore u ka khona ho phelela boinehelo ba hao ho Molimo.—Baheberu 12:12, 13.
Tsoela Pele U Sebeletsa ka Pelo e Tiileng
19, 20. Ke hobane’ng ha e le habohlokoa hore re tsoele pele re phelela boinehelo ba rōna?
19 Linakong tsena tse mahlonoko, re lokela ho sebetsa ka thata hore re phelele boinehelo ba rōna ’me re tsoele pele re sebeletsa Molimo ka pelo e tiileng. Jesu o itse: “Ea mameletseng ho isa bofelong ke eena ea tla pholoha.” (Matheu 24:13) Kaha re phela “matsatsing a ho qetela,” bofelo bo ka tla neng kapa neng. (2 Timothea 3:1) Ho feta moo, ha ho le ea mong oa rōna ea ka kholisehang hore o tla be a phela hosasane. (Jakobo 4:13, 14) Kahoo ke habohlokoa hore re tsoele pele re phelela boinehelo ba rōna kajeno!
20 Moapostola Petrose o ile a hatisa sena lengolong la hae la bobeli. O ile a bontša hore joalokaha batho ba sa tšabeng Molimo ba ile ba timela ka Moroallo, le lefatše la tšoantšetso, kapa moloko oa batho ba khopo, le tla timela ka “letsatsi la Jehova.” Kahoo Petrose o ile a re: “Le tšoanela ho ba batho ba mofuta ofe liketsong tse halalelang tsa boitšoaro le liketsong tsa boinehelo ba bomolimo”! O ile a boela a ba phehella: “Baratuoa, le e-na le tsebo ena e fanoeng esale pele, le itebele e le hore le se ke la hulanngoa [ke mesuoe ea bohata le batho ba sa tšabeng Molimo] ’me la oa ho tieeng ha lōna.” (2 Petrose 3:5-17) E ka ba ho soabisang hakaakang haeba motho ea kolobelitsoeng a ka kheloha ’me a shoa a hlōlehile ho lula a e-na le pelo e tiileng!
21, 22. Mantsoe a Pesaleme ea 57:7 a phethahetse joang tabeng ea Davida le Bakreste ba ’nete?
21 Boikemisetso ba hao ba ho phelela boinehelo ba hao ho Molimo bo ka matlafatsoa ke ha u hopola letsatsi le thabisang la ha u ne u kolobetsoa ebe u batla thuso ea Molimo hore mantsoe a hao le liketso tsa hao li ka thabisa pelo ea hae. (Liproverbia 27:11) Ha ho mohla Jehova a soetsang batho ba hae, ’me ka sebele re lokela ho tšepahala ho eena. (Pesaleme ea 94:14) O ile a bontša mohau le qenehelo ha a nyopisa merero ea lira ’me a lopolla Davida. A tletse teboho ka sena, Davida o ile a bolela ho tiea, ho se sisinyehe ha lerato la hae ho Molopolli oa hae. Ka boikutlo bo tebileng, o ile a bina: “Pelo ea ka e tiile, Molimo, pelo ea ka e tiile. Ke tla bina ’me ke tsanyaole lipina tsa thoriso.”—Pesaleme ea 57:7.
22 Joaloka Davida, Bakreste ba ’nete ha ba thekesele boinehelong ba bona ho Molimo. Ka lipelo tse tiileng, ba bolela hore topollo ea bona le poloko li tsoa ho Jehova, eo ka thabo ba mo binelang lithoriso. Haeba pelo ea hao e tiile, e tla itšetleha ka Molimo, ’me ka thuso ea hae u tla khona ho phethahatsa boinehelo ba hao. E, u ka tšoana le “ea lokileng” eo ka eena mopesaleme a itseng: “A ke ke a tšoha esita le litaba tse mpe. Pelo ea hae e tiile, e entsoe hore e itšetlehe ka Jehova.” (Pesaleme ea 112:6, 7) Ka ho ba le tumelo ho Molimo le ho itšetleha ka eena ka ho feletseng, u ka phelela boinehelo ba hao ’me ua tsoela pele u sebeletsa Jehova ka pelo e tiileng.
Na Ua Hopola?
• Ke hobane’ng ha re lokela ho tsoela pele re rua tsebo e nepahetseng ea Bibele?
• Ke hobane’ng ha re lokela ho hopola pako ea rōna le tšokoloho?
• Re rua molemo joang ka ho hopola boinehelo ba rōna le kolobetso?
• Ke eng e tla re thusa hore re tsoele pele re sebeletsa Jehova ka pelo e tiileng?
[Litšoantšo tse leqepheng la 18]
Ho etsa tšebeletso ea Bokreste mosebetsi oa rōna o ka sehloohong ho re thusa hore re tsoele pele re sebeletsa Jehova ka pelo e tiileng
[Litšoantšo tse leqepheng la 18]
Na u boloka bomoea ba hao ka ho bala Lentsoe la Molimo letsatsi le leng le le leng?