Ho Finyella Litlhokahalo Tsa Molimo ho Tlotlisa Jehova
“Ke tla mo tlotlisa ka liteboho.”—PESALEME EA 69:30.
1. (a) Ke hobane’ng ha Jehova a lokela ho tlotlisoa? (b) Re mo tlotlisa joang ka liteboho?
JEHOVA ke Molimo ea Matla ’Ohle, ke ’Musi Morena oa Bokahohle ebile ke ’Mōpi. Ka lebaka leo, lebitso la hae le merero ea hae li tšoanela ho tlotlisoa. Ho tlotlisa Jehova ho bolela ho mo phahamisa ka ho fetisisa, ho mo roka le ho mo rorisa ka lipolelo le ka liketso. E le hore re etse joalo ka “liteboho,” ho hlokahala hore kamehla re lebohe seo a re etsetsang sona hona joale le seo a tla se etsa ka moso. Boikutlo boo ho hlokahalang hore re be le bona bo bontšoa ho Tšenolo 4:11, moo libōpuoa tse tšepahalang tsa moea tse leholimong li reng: “Jehova, Molimo oa rōna, ua tšoaneleha ho amohela khanya le tlhompho le matla, hobane u bōpile lintho tsohle, ’me ka lebaka la thato ea hao li ile tsa e-ba teng ’me tsa bōptjoa.” Re tlotlisa Jehova joang? Ka ho ithuta ka eena ebe re etsa seo a se hlokang ho rōna. Re lokela ho ikutloa joaloka mopesaleme ha a ne a re: “Nthute ho etsa thato ea hao, etsoe u Molimo oa ka.”—Pesaleme ea 143:10.
2. Jehova o tšoara ba mo tlotlisang le ba sa mo tlotliseng joang?
2 Jehova o ananela ba mo tlotlisang. Ke ka lebaka leo e leng “moputsi oa ba mo batlang ka tieo.” (Baheberu 11:6) O ba putsa ka eng? Ha Jesu a rapela Ntat’ae oa leholimo, o ile a re: “Sena se bolela bophelo bo sa feleng, ho tsoela pele ba rua tsebo ka uena, Molimo a le mong feela oa ’nete, le ka eo u mo romileng, Jesu Kreste.” (Johanne 17:3) Ha ho pelaelo hore ba ‘tlotlisang [Jehova] ka liteboho’ ba tla “rua lefatše, ba tla lula ho lona ka ho sa feleng.” (Pesaleme ea 37:29) Ka lehlakoreng le leng, “ho ke ke ha e-ba le bokamoso bakeng sa mang kapa mang e mobe.” (Liproverbia 24:20) Matsatsing ana a ho qetela, ho potlakile hore batho ba tlotlise Jehova hobane haufinyane o tla timetsa ba khopo ’me a boloke ba lokileng. “Lefatše lea feta ’me ho joalo le ka takatso ea lona, empa ea etsang thato ea Molimo o hlola ka ho sa feleng.”—1 Johanne 2:17; Liproverbia 2:21, 22.
3. Ke hobane’ng ha re lokela ho ela hloko buka ea Malakia?
3 Thato ea Jehova e fumanoa ka Bibeleng, hobane “Lengolo lohle le bululetsoe ke Molimo.” (2 Timothea 3:16) Lentsoe leo la Molimo le na le litlaleho tse ngata tsa kamoo Jehova a hlohonolofatsang ba mo tlotlisang le tsa se etsahallang ba sa mo tlotliseng. Tlaleho e ’ngoe e bolela ka se ileng sa etsahala Iseraele nakong ea moprofeta Malakia. Hoo e ka bang ka selemo sa 443 B.C.E., nakong ea ha Juda e ne e busoa ke Nehemia, Malakia o ile a ngola buka e reheletsoeng ka eena. Buka ena e matla le e hlollang e na le boitsebiso le boprofeta bo ileng ba “ngoloa hore e be temoso ho rōna bao bofelo ba litsamaiso tsa lintho bo ba fihletseng.” (1 Bakorinthe 10:11) Ho ela hloko mantsoe a Malakia ho ka re thusa ho itokisetsa “letsatsi le leholo le le tšosang la Jehova,” leo ka lona A tla timetsa tsamaiso ena e khopo.—Malakia 4:5.
4. Ho Malakia khaolo ea 1, re hlokomelisoa lintlha life tse tšeletseng?
4 Buka ea Malakia, e ngotsoeng hoo e ka bang lilemong tse fetileng tse ka holimo ho 2 400, e re thusa joang lekholong lee la bo21 la lilemo ho lokisetsa letsatsi leo la Jehova le leholo le le tšosang? Khaolo ea pele e re hlokomelisa bonyane lintlha tse tšeletseng tsa bohlokoa bakeng sa hore re tlotlise Jehova ka liteboho e le hore a re amohele le hore re fumane bophelo bo sa feleng: (1) Jehova o rata batho ba hae. (2) Re lokela ho bontša kananelo bakeng sa lintho tse halalelang. (3) Jehova o lebeletse hore re mo fe se molemohali seo re nang le sona. (4) Borapeli ba ’nete bo susumetsoa ke lerato le se nang boithati, eseng meharo. (5) Tšebeletso e amohelehang ho Molimo hase mokhoka-khoale. (6) E mong le e mong oa rōna o lokela ho ikarabella ho Molimo. Kahoo, sehloohong sena sa pele ho tse tharo tse buang ka buka ea Malakia, a re tšohleng ntlha ka ’ngoe ho tsena ha re hlahlobisisa Malakia khaolo ea 1.
Jehova o Rata Batho ba Hae
5, 6. (a) Ke hobane’ng ha Jehova a ne a rata Jakobo? (b) Haeba re etsisa botšepehi ba Jakobo, re ka lebella’ng?
5 Lerato la Jehova le totobatsoa litemaneng tse qalang tsa Malakia. Buka ena e qala ka mantsoe a reng: “Phatlalatso: Lentsoe la Jehova malebana le Iseraele.” Molimo o boetse o re: “Ke le ratile.” Ha a qotsa mohlala, temaneng eona ena, Jehova o re: “Ke ratile Jakobo.” Jakobo e ne e le monna ea nang le tumelo ho Jehova. Ka mor’a nako, Jehova o ile a fetola lebitso la Jakobo hore e be Iseraele, ’me Jakobo e ile ea e-ba ntat’a Baiseraele. Jehova o ne a rata Jakobo hobane e ne e le motho oa tumelo. Jehova o ile a rata Baiseraele ba ileng ba mo bontša boikutlo bo tšoanang le ba Jakobo.—Malakia 1:1, 2.
6 Haeba re rata Jehova ’me re khomarela batho ba hae ka botšepehi, re ka fumana matšeliso polelong e fumanoang ho 1 Samuele 12:22 e reng: “Jehova a ke ke a tlohela sechaba sa hae ka lebaka la lebitso la hae le leholo.” Jehova o rata batho ba hae ’me oa ba putsa, qetellong o tla ba putsa ka bophelo bo sa feleng. Kahoo rea bala: “Tšepa Jehova ’me u etse se molemo; lula lefatšeng, ’me u sebetse ka botšepehi. Hape u ithabele ka ho phethehileng ho Jehova, o tla u fa tseo pelo ea hao e li kōpang.” (Pesaleme ea 37:3, 4) Ho rata Jehova ho ama ntlha ea bobeli eo re e hlokomelisoang ho Malakia khaolo ea 1.
Bontša Kananelo Bakeng sa Lintho Tse Halalelang
7. Ke hobane’ng ha Jehova a ile a hloea Esau?
7 Joalokaha re bala ho Malakia 1:2, 3, ka mor’a hore Jehova a re, “ke ratile Jakobo,” o re, “ke hloile Esau.” Phapang ee e bakoa ke’ng? Jakobo o ne a tlotlisa Jehova, empa lefahla le eena, e leng Esau, o ne a sa mo tlotlise. Lebitso le leng la Esau e ne e le Edomo. Ho Malakia 1:4 naha ea Edomo e bitsoa naha ea bokhopo, ’me baahi ba eona baa nyatsuoa. Esau o ile a rehoa lebitso la Edomo (le bolelang “Bofubelu”) hobane o ile a rekisetsa Jakobo tokelo ea hae ea bohlokoa ea tsoalo e le hore a fumane sechu se sefubelu. Genese 25:34 e re: “Esau [o ile] a nyelisa tokelo ea tsoalo.” Moapostola Pauluse o ile a phehella balumeli-’moho le eena hore ba be hlokolosi hore “ho se ke ha e-ba le sehlola kapa leha e le mang ea sa ananeleng lintho tse halalelang, joaloka Esau, ea ileng a fana ka litokelo tsa hae joaloka letsibolo e le phapanyetsano bakeng sa sejo se le seng.”—Baheberu 12:14-16.
8. Ke eng se ileng sa etsa hore Pauluse a tšoantše Esau le sehlola?
8 Ke hobane’ng ha Pauluse a ile a amahanya liketso tsa Esau le bohlola? Hobane ho ba le kelello e kang ea Esau ho ka etsa hore motho a se ke a ananela lintho tse halalelang. Ho feta moo, sena se ka lebisa libeng tse tebileng, tse kang bohlola. Kahoo, ka mong oa rōna a ka botsa: ‘Na ka linako tse ling ke lekeha hore ke rekise lefa la ka la Bokreste—bophelo bo sa feleng—hore feela ke fumane ntho ea nakoana joaloka sekotlolo se tletseng sechu sa lensisi? Na ke nyelisa lintho tse halalelang, mohlomong ke sa hlokomele?’ Esau o ne a e-na le takatso e hlokang mamello ea ho khotsofatsa tabatabelo ea nama. O ile a re ho Jakobo: “Ka kōpo, potlaka u mphe ke je bofubelu . . . boo.” (Genese 25:30) Ha e le hantle, ka masoabi bahlanka ba bang ba Molimo ba itse: “Potlaka! Ke hobane’ng ha u letela lenyalo le hlomphehang?” Takatso ea ho ikhotsofatsa ka ho kopanela liphate ho sa tsotellehe liphello e fetohile sekotlolo se tletseng sechu sa lensisi ho bona.
9. Re ka lula re e-na le tlhompho e nang le tšabo ho Jehova joang?
9 E se eka le ka mohla re ke ke ra nyelisa lintho tse halalelang ka ho nena bohloeki, botšepehi le lefa la rōna la moea. Ho e-na le ho tšoana le Esau, a re tšoaneng le Jakobo ea tšepahalang ’me re lule re e-na le tlhompho e nang le tšabo ho Molimo ka ho bontša kananelo e tebileng bakeng sa lintho tse halalelang. See re ka se etsa joang? Ka ho ba hlokolosi ho finyella litlhokahalo tsa Jehova. Ka ho loketseng sena se re lebisa ntlheng ea boraro e boletsoeng ho Malakia khaolo ea 1. Ke efe?
Ho fa Jehova se Molemohali Seo re Nang le Sona
10. Baprista ba ne ba nyelisa tafole ea Jehova ka tsela efe?
10 Baprista ba Juda ba neng ba sebeletsa tempeleng Jerusalema mehleng ea Malakia ba ne ba sa fe Jehova mahlabelo a molemohali. Malakia 1:6-8 e re: “‘Mora o hlompha ntate; ’me mohlanka, o hlompha mong’a hae e moholo. Kahoo haeba ke le ntate, ha le ntlhomphe ke’ng? Haeba ke le Monghali e Moholo, ha le ntšabe ke’ng?’ Ke seo Jehova oa mabotho a se boletseng ho lōna, baprista ba nyelisang lebitso la ka.” Baprista ba ile ba botsa: “Re nyelisitse lebitso la hao ka tsela efe?” Jehova a araba: “Ka ho hlahisa holim’a aletare ea ka bohobe bo silafetseng.” Baprista ba botsa: “Re u hlompholotse ka tsela efe?” Kahoo, Jehova a re ho bona: “Ha le re: ‘Tafole ea Jehova ke ntho e nyelisoang.’” Baprista bao ba ne ba bontša hore ba nyelisa tafole ea Jehova nako le nako ha ba nyehela phoofolo e holofetseng ba re: “Hase ntho e mpe.”
11. (a) Jehova o ile a re’ng ka mahlabelo a sa amoheleheng? (b) Batho ka kakaretso ba ne ba le molato ka tsela efe?
11 Joale, Jehova o ile a beha lebaka le utloahalang mabapi le mahlabelo ao a sa amoheleheng, a re: “Ka kōpo, e atametseng ho ’musisi oa lōna. Na o tla khahlisoa ke lōna, kapa na o tla le amohela ka mosa?” Che, ’musisi oa bona o ne a ke ke a khahlisoa ke mpho e joalo. ’Musi oa Bokahohle le eena a ke ke a amohela linyehelo tse nang le sekoli! Hape, hase baprista feela ba neng ba le molato. Ke ’nete hore ba ne ba nyelisa Jehova ka ho etsa mahlabelo ao. Empa na batho ka kakaretso ba ne ba se na molato? Ba ne ba e-na le oona! Ke bona ba neng ba khethile liphoofolo tseo tse foufetseng, tse holofetseng le tse kulang ebile e le bona ba li tlisitseng ho baprista hore li etsoe sehlabelo. Ke boetsalibe bo bokaakang!
12. Re thusoa joang hore re fe Jehova se molemohali seo re nang le sona?
12 Ho fa Jehova se molemohali seo re nang le sona ke tsela ea ho bontša hore re hlile rea mo rata. (Matheu 22:37, 38) Ho fapana le baprista ba sa laoleheng ba mehleng ea Malakia, mokhatlo o hlophisitsoeng oa Jehova kajeno o fana ka thupelo e ngata e molemo ea Mangolo e re thusang ho tlotlisa Jehova ka liteboho ka ho finyella litlhokahalo tsa Molimo. Taba e amanang le ena ke ntlha ea bohlokoa ea bone e fumanoang ho Malakia khaolo ea 1.
Borapeli ba ’Nete bo Susumetsoa ke Lerato, Eseng Meharo
13. Baprista ba ne ba etsa’ng e neng e bontša hore ba ne ba susumetsoa ke meharo?
13 Baprista ba mehleng ea Malakia ba ne ba e-na le boithati, ba se na lerato ’me ba hlanyetsa chelete. Re tseba joang? Malakia 1:10 e re: “‘Ke mang hape har’a lōna ea tla koala mamati? Lōna le ke ke la khantša aletare ea ka—mahala. Ha ke le thabele,’ ho boletse Jehova oa mabotho, ‘le nyehelo ea mpho e tsoang matsohong a lōna ha e nkhahlise.’” E, baprista bao ba meharo ba ne ba batla ho lefuoa bakeng sa litšebeletso tse nyenyane ka ho fetisisa tsa tempele, ba batla ho lefuoa bakeng sa ho koala mamati le ho besa mollo oa aletare! Ha ho makatse hore ebe Jehova o ne a sa khahlisoe ke linyehelo tse tsoang matsohong a bona!
14. Ke hobane’ng ha re ka re Lipaki tsa Jehova li susumetsoa ke lerato?
14 Meharo le boithati ba baprista ba tletseng boetsalibe ba Jerusalema ea boholo-holo li re hopotsa hore, ho ea ka Lentsoe la Molimo, batho ba meharo ba ke ke ba rua ’Muso oa Molimo. (1 Bakorinthe 6:9, 10) Ho nahanisisa ka litsela tsa boithati tsa baprista bao ho hōlisa kananelo ea rōna bakeng sa mosebetsi oa boboleli oa lefatše lohle o etsoang ke Lipaki tsa Jehova. Ke oa boithatelo ’me le ka mohla ha re batle ho lefuoa bakeng sa tšebeletso eohle ea rōna. Che, “ha re rekise lentsoe la Molimo.” (2 Bakorinthe 2:17) Joaloka Pauluse, e mong le e mong oa rōna kannete a ka re: “Ka thabo ke ile ka le bolella litaba tse molemo tsa Molimo ntle ho tefo.” (2 Bakorinthe 11:7) Hlokomela hore Pauluse ‘o ile a bolela litaba tse molemo ka thabo.’ Sena se re tlisa ntlheng ea bohlano eo re e hlokomelisoang ho Malakia khaolo ea 1.
Tšebeletso ea Molimo Hase Mokhoka-khoale
15, 16. (a) Baprista ba ne ba e-na le boikutlo bofe mabapi le ho nyehela mahlabelo? (b) Lipaki tsa Jehova li nyehela mahlabelo a tsona joang?
15 Baprista ba se nang tumelo Jerusalema ea boholo-holo ba ne ba nka ho nyehela mahlabelo e le tšebeletso e khathatsang. E ne e le moroalo ho bona. Joalokaha ho boletsoe ho Malakia 1:13, Molimo o ile a re ho bona: “Le itse, ‘Bonang! Ke ho khathatsang hakaakang!’ ’me le entse hore e soenyetsoe linko.” Baprista bao ba ne ba soenyetsa lintho tse halalelang tsa Molimo kapa ba li nyelisa. A re rapeleng hore le ka mohla re se ke ra tšoana le bona. Ho e-na le hoo, e se eka kamehla re ka bonahatsa moea o hlakisoang ke mantsoe a 1 Johanne 5:3, a reng: “Se boleloang ke lerato la Molimo ke sena, hore re boloke litaelo tsa hae; leha ho le joalo litaelo tsa hae ha li boima.”
16 A re thabeleng ho fana ka mahlabelo a moea ho Molimo, le ka mohla re se ke ra nka hore sena ke mokhoka-khoale. E se eka re ka ela hloko mantsoe ana a boprofeta: “E-reng ho [Jehova], kaofela ha lōna, ‘E se eka u ka tšoarela phoso; ’me u amohele se molemo, ’me re tla nyehela e le puseletso lipohoana tsa melomo ea rōna.’” (Hosea 14:2) Polelo e reng “lipohoana tsa melomo ea rōna” e hlalosa mahlabelo a moea, mantsoe ao re a buang ha re rorisa Jehova le merero ea hae. Baheberu 13:15 e re: “Ka eena [Jesu Kreste] a re nyeheleng kamehla ho Molimo sehlabelo sa thoriso, ke hore, litholoana tsa melomo e bolelang lebitso la hae phatlalatsa.” Re motlotlo hakaakang hore ebe mahlabelo a rōna a moea hase mokhoa feela, empa ke ponahatso ea pelo eohle ea lerato la rōna ho Molimo! Sena se re lebisa ntlheng ea botšelela e ithutoang ho Malakia khaolo ea 1.
E Mong le e Mong o Lokela ho Ikarabella
17, 18. (a) Ke hobane’ng ha Jehova a ile a rohaka “ea sebetsang ka mano”? (b) Ba neng ba etsa ka mano ba ne ba sa nahana ka’ng?
17 Batho ba neng ba phela mehleng ea Malakia ba ile ba jara boikarabelo ba liketso tsa bona, ’me le ho rōna ho joalo feela. (Baroma 14:12; Bagalata 6:5) Ka lebaka leo, Malakia 1:14 e re: “Ho rohakoe ea sebetsang ka mano ha mohlapeng oa hae ho e-na le phoofolo e tona [e se nang sekoli], ’me a etsa boitlamo le ho etsetsa Jehova sehlabelo ka e senyehileng.” Motho leha e le ofe ea nang le mohlape, o ne a e-na le liphoofolo tse ngata hoo a neng a ke ke a re ha a na khetho hobane, ka mohlala, o na le nku e le ’ngoe feela. Ha a khetha phoofolo ea sehlabelo, ho ne ho sa hlokahale hore a khethe e foufetseng, e holofetseng kapa e kulang. Haeba a ne a hlile a khetha phoofolo e joalo e nang le sekoli, hoo ho ne ho tla bontša hore o nyelisa tokisetso ea Jehova ea mahlabelo, hobane motho ea neng a e-na le mohlape oa liphoofolo o ne a ka fumana e ’ngoe e se nang likoli tseo!
18 Kahoo, ka lebaka le utloahalang Jehova o ne a rohaka ea sebetsang ka mano ea nang le phoofolo e tona e loketseng empa bakeng sa sehlabelo a tlisa ho moprista phoofolo e foufetseng, e holofetseng, kapa e kulang—eo mohlomong a neng a tlameha ho e hulanya. Empa ha ho na le tlhase feela e bontšang hore baprista leha e le bafe ba ne ba qotsa molao oa Molimo ebe ba hlalosa hore liphoofolo tse joalo tse nang le sekoli ha li amohelehe. (Levitike 22:17-20) Batho ba nang le kutloisiso ba ne ba tseba hore lintho li ka be li ba tsamaetse hampe haeba ba ne ba lekile ho fetisetsa mpho e joalo ho ’musisi oa bona. Empa ha e le hantle, ba ne ba sebelisana le ’Musi oa Bokahohle, Jehova, e moholo ho feta ’musisi ofe kapa ofe oa motho. Malakia 1:14 e re: “‘Ke ’na Morena e moholo,’ ho boletse Jehova oa mabotho, ‘’me lebitso la ka le tla tšabeha har’a lichaba.’”
19. Re labalabela eng, ’me re lokela hore ebe re etsa’ng?
19 Joaloka bahlanka ba tšepahalang ba Molimo, re labalabela letsatsi leo ka lona Morena e Moholo, Jehova, a tla hlomphuoa ke moloko oohle oa batho. Ka nako eo, “ka sebele lefatše le tla tlala tsebo ea Jehova joalokaha metsi a koahetse leoatle.” (Esaia 11:9) Ho sa le joalo, a re etseng sohle ho finyella litlhokahalo tsa Jehova ka ho etsisa mopesaleme ea ileng a re: “Ke tla mo tlotlisa ka liteboho.” (Pesaleme ea 69:30) E le ho finyella seo, Malakia o na le keletso e eketsehileng e ka re ruisang molemo. Lihloohong tse latelang tse peli, a re nahanisiseng ka hloko ka likarolo tse ling tsa buka ea Malakia.
Na Ua Hopola?
• Ke hobane’ng ha re lokela ho tlotlisa Jehova?
• Ke hobane’ng ha mahlabelo a baprista mehleng ea Malakia a ne a sa amohelehe ho Jehova?
• Re nyehela sehlabelo sa thoriso ho Jehova joang?
• Borapeli ba ’nete bo lokela ho susumetsoa ke eng?
[Setšoantšo se leqepheng la 9]
Boprofeta ba Malakia bo ne bo bua ka mehla ea rōna
[Setšoantšo se leqepheng la 10]
Esau ha aa ka a ananela lintho tse halalelang
[Setšoantšo se leqepheng la 11]
Baprista le batho ba ne ba nyehela mahlabelo a sa amoheleheng
[Setšoantšo se leqepheng la 12]
Lefatšeng ka bophara, Lipaki tsa Jehova ha li lefise ha li nyehela mahlabelo a thoriso