Sechaba se Hloekiselitsoeng Mesebetsi e Metle
“A re itlhatsoeng litšila tsohle tsa nama le tsa moea, re phethahatse khalalelo ka ho tšaba Molimo.”—2 BAKORINTHE 7:1.
1. Jehova o hloka’ng ho ba mo rapelang?
“KE MANG ea ka nyolohelang thabeng ea Jehova, ke mang ea ka phahamang sebakeng sa hae se halalelang?” Morena Davida oa Iseraele ea boholo-holo o ile a botsa potso eo e fatang maikutlo mabapi le borapeli bo amohelehang ho Jehova. Ka mor’a moo o ile a fana ka karabo, a re: “Mang kapa mang eo matsoho a hae a hlokang molato le eo pelo ea hae e hloekileng, ea sa nkang moea oa Ka e le o se nang thuso ka ho feletseng, kapa a nka kano ka thetso.” (Pesaleme ea 24:3, 4) E le hore motho a amohelehe ho Jehova, mothofatso ea khalalelo, o lokela ho hloeka le ho halalela. Pejana, Jehova o ile a hopotsa phutheho ea Baiseraele, a re: “Le ikhalaletse ’me le halalele, hobane kea halalela.”—Levitike 11:44, 45; 19:2.
2. Pauluse le Jakobo ba ile ba hlakisa bohlokoa ba ho hloeka borapeling ba ’nete joang?
2 Makholo a lilemo hamorao, moapostola Pauluse o ile a ngolla Bakreste-’moho le eena motseng o silafetseng boitšoarong oa Korinthe a re: “Kaha re na le litšepiso tsena, baratuoa, a re itlhatsoeng litšila tsohle tsa nama le tsa moea, re phethahatse khalalelo ka ho tšaba Molimo.” (2 Bakorinthe 7:1) Sena le sona se hlakisa hore e le hore motho a be le kamano le Molimo ’me a amohele litlhohonolofatso tseo a li tšepisitseng, o lokela ho hloeka litšileng tsa ’mele le tsa moea. Ka tsela e tšoanang, ha morutuoa Jakobo a ne a ngola ka borapeli bo amohelehang ho Molimo, o ile a re: “Mofuta oa borapeli o hloekileng le o sa silafalang ponong ea Molimo le Ntate oa rōna ke ona: ho hlokomela likhutsana le bahlolohali matšoenyehong a bona, le hore motho a ipoloke a se na letheba lefatšeng.”—Jakobo 1:27.
3. E le hore borapeli ba rōna bo amohelehe ho Molimo, re lokela ho ameha ka eng ka botebo?
3 Kaha ho hloeka, ho halalela le ho se silafale ke lintho tsa bohlokoa hakana borapeling ba ’nete, bohle ba ratang ho amoheloa ke Molimo ba lokela ho ameha ka botebo ka hore na baa tšoaneleha ntlheng ena. Leha ho le joalo, kaha batho kajeno ba na le litekanyetso tse fapaneng ka ho feletseng ka bohloeki, ho hlokahala hore re utloisise le ho phela ka seo Jehova a nkang hore se hloekile, sea amoheleha. Ho hlokahala hore re fumane seo Molimo a se hlokang ho barapeli ba hae ntlheng ena le seo a se entseng ho ba thusa hore ba lule ba hloekile ’me ba amoheleha ho eena.—Pesaleme ea 119:9; Daniele 12:10.
Ho Hloeka Bakeng sa Borapeli ba ’Nete
4. Hlalosa khopolo ea Bibele ea bohloeki.
4 Batho ba bangata ba nka hore ho hloeka ke feela ho hloka litšila kapa ho se silafale. Leha ho le joalo, ka Bibeleng, ho hloeka ho khetholloa ka mantsoe a ’maloa a Seheberu le Segerike ao hangata a ho hlalosang ka kutloisiso ea ho hloeka boitšoarong le moeeng, eseng ’meleng feela. Kahoo, encyclopedia e ’ngoe ea Bibele e re: “‘Ho hloeka’ le ‘ho se hloeke’ ke lipoleloana tse amanang ka seoelo le litaba tsa ho hloeka ’meleng, li amana haholo le litaba tsa bolumeli. Kahoo, molao-motheo oa ‘ho hloeka’ o ama hoo e ka bang karolo e ’ngoe le e ’ngoe ea bophelo.”
5. Molao oa Moshe o ne o laola bohloeki hakae bophelong ba Baiseraele?
5 Ka sebele, Molao oa Moshe o ne o akarelletsa litaelo le melao ea tsamaiso hoo e ka bang likarolong tsohle tsa bophelo ba Baiseraele, tse neng li hlalosa se hloekileng le se neng se amoheleha, se neng se sa hloeka le se neng se sa amohelehe. Ka mohlala, ho Levitike khaolo ea 11 ho ea ho ea 15, re fumana litaelo tse qaqileng tse amanang le ho hloeka le ho se hloeke. Liphoofolo tse itseng li ne li sa hloeka, ’me Baiseraele ba ne ba sa lokela ho li ja. Ho beleha ho ne ho silafatsa mosali ka nako e behiloeng. Maloetse a itseng a letlalo, haholo-holo lepera, le ho lutla ha litho tsa botona kapa tsa botšehali, ka tsela e tšoanang a ne a silafatsa motho. Molao o ne o boetse o qaqisa se lokelang ho etsoa maemong a amang ho se hloeke. Ka mohlala, ho Numere 5:2, rea bala: “Laela bara ba Iseraele hore ba ntšetse ka ntle ho liahelo motho e mong le e mong ea nang le lepera le e mong le e mong ea nang le mohlapo o lutlang le e mong le e mong ea sa hloekang ka lebaka la moea o shoeleng.”
6. Melao ea bohloeki e ile ea fanoa ka sepheo sefe?
6 Ha ho pelaelo hore melao ena le e meng e tsoang ho Jehova e ne e e-na le khopolo ea bongaka le ea bohloeki e neng e tsoetse pele haholo bakeng sa nako eo, ’me batho ba ne ba rua molemo ha ba e latela. Leha ho le joalo, melao ena e ne e sa fanoa e le melao feela tjee e thibelang ho kula kapa hore e be tataiso feela ho tsa bongaka. E ne e le karolo ea borapeli ba ’nete. ’Nete ea hore e ne e ama bophelo ba batho ba letsatsi le letsatsi—ho ja, ho beleha, likamano tsa lenyalo le tse ling—e hatisa ntlha ea hore Jehova, joaloka Molimo oa bona, o ne a e-na le tokelo ea ho etsa qeto hore na se ba loketseng le se sa ba lokelang ke sefe likarolong tsohle tsa bophelo, bo neng bo nehetsoe ka ho khetheha ho eena a ’notsi.—Deuteronoma 7:6; Pesaleme ea 135:4.
7. Sechaba sa Iseraele se ne se tla fumana tlhohonolofatso efe ha se boloka Molao?
7 Selekane sa Molao le sona se ne se sireletsa Baiseraele mekhoeng e silafatsang ea lichaba tse ba potolohileng. Ha Baiseraele ba ne ba ka tšepahala ho bolokeng Molao, ho akarelletsa le litlhokahalo tsohle tsa ho lula ba hloekile mahlong a Jehova, ba ne ba tla tšoaneleha bakeng sa ho sebeletsa Molimo oa bona le ho amohela tlhohonolofatso ea hae. Ntlheng ena, Jehova o ile a re ho sechaba sena: “Haeba le tla mamela lentsoe la ka ka tieo ’me ruri le boloke selekane sa ka, joale ka sebele le tla fetoha thepa ea ka e khethehileng har’a lichaba tse ling tsohle, hobane lefatše lohle ke la ka. Le tla fetoha ’muso oa baprista le sechaba se halalelang ho ’na.”—Exoda 19:5, 6; Deuteronoma 26:19.
8. Ke hobane’ng ha Bakreste kajeno ba ela hloko seo Molao o se bolelang ka bohloeki?
8 Kaha Jehova o ile a akarelletsa makolopetso ana Molaong ho laea Baiseraele hore na ebe ba hloekileng, ba halalelang le ba amohelehang joang ho eena, na ha hoa lokela hore Bakreste kajeno ba nahane ka hloko hore na ba etsa joang ntlheng ee? Le hoja Bakreste ba sa tlangoa ke Molao, ba lokela ho hopola hore, joalokaha Pauluse a hlalositse, lintho tsohle tse ngotsoeng Molaong “ke seriti sa lintho tse tlang ho tla, empa ntho ea sebele ke ea Kreste.” (Bakolose 2:17; Baheberu 10:1) Haeba Jehova Molimo, ea reng “ha kea fetoha,” a ne a talima ho hloeka le ho se silafale e le tsa bohlokoa borapeling ba ’nete ka nako eo, kajeno re lokela ho nka ka botebo taba ea ho hloeka ’meleng, boitšoarong le moeeng haeba re batla hore a re amohele le ho re hlohonolofatsa.—Malakia 3:6; Baroma 15:4; 1 Bakorinthe 10:11, 31.
Ho Hloeka ’Meleng Hoa re Buella
9, 10. (a) Ke hobane’ng ha ho hloeka ’meleng e le habohlokoa ho Mokreste? (b) Hangata batho ba re’ng ka likopano tse khōlō tsa Lipaki tsa Jehova?
9 Na ho hloeka ’meleng e sa ntsane e le karolo ea bohlokoa ea borapeli ba ’nete? Le hoja ho hloeka ’meleng ka bohona ho sa etse motho morapeli oa ’nete oa Molimo, ka sebele ho loketse hore morapeli oa ’nete a hloeke ’meleng kamoo maemo a hae a mo lumellang kateng. Batho ba lulang ba hloekile le tikoloho ea bona e hloekile baa totobala, haholo kajeno ha batho ba bangata ba sa tsotelle hore ba lule ba hloekile, ba hloekisitse liaparo tsa bona le tikoloho ea bona. Sena se ka tlisa liphello tse ntle, feela joalokaha Pauluse a ile a bolella Bakreste ba Korinthe a re: “Ka tsela leha e le efe ha re fane ka sesosa leha e le sefe sa ho khoptjoa, e le hore bosebeletsi ba rōna bo se ke ba fumanoa bo e-na le molato; empa re ipuella ka tsela e ’ngoe le e ’ngoe hore re basebeletsi ba Molimo.”—2 Bakorinthe 6:3, 4.
10 Lipaki tsa Jehova li ’nile tsa babatsoa hangata ke ba boholong ka ho hloeka, ho hlophiseha, boitšoaro le mekhoa e hlomphehang, tse bonahalang haholo likopanong tsa tsona tse khōlō. Ka mohlala, mabapi le kopano e khōlō e neng e tšoaretsoe profinseng ea Savona, Italy, koranta ea La Stampa e ile ea re: “Ntho e totobalang hang-hang ha motho a potoloha sebaka sena ke ho hloeka le ho hlophiseha ha batho ba se sebelisang.” Ka mor’a kopano e khōlō ea Lipaki São Paulo, Brazil, mookameli oa lebala la lipapali o ile a bolella molaoli oa sehlopha sa hae se hloekisang, a re: “Ho tloha joale ho ea pele, re batla ho hloekisa lebala lena la lipapali joaloka Lipaki tsa Jehova.” Mookameli e mong lebaleng lona leo la lipapali o ile a re: “Ha Lipaki tsa Jehova li batla ho hira lebala lena, re tšoenyeha feela ka matsatsi ao li le batlang ka ’ona. Ha ho letho le leng le re tšoenyang.”
11, 12. (a) Re lokela ho hopola molao-motheo ofe oa Bibele tabeng ea ho hloeka ha motho ka mong? (b) Ho ka botsoa lipotso life ka mekhoa le litsela tsa rōna tsa bophelo re le batho ka bomong?
11 Haeba ho hloeka le ho hlophiseha ha libaka tsa rōna tsa borapeli e ka ba mohloli oa ho rorisa Molimo eo re mo rapelang, ha ho pelaelo hore ho bonahatsa litšobotsi tsena bophelong ba rōna ke habohlokoa ka tsela e tšoanang. Leha ho le joalo, ha re le bang malapeng a rōna, re ka ’na ra ikutloa hore re na le bolokolohi ’me re ka etsa kamoo re ratang kateng. Tabeng ea moaparo le boitlhopho, ka sebele re na le tokelo ea ho khetha seo re utloang re lokolohile ha re se apere le seo re se ratang! Empa, bolokolohi bona bo na le meeli. Hopola hore ha Pauluse a ne a bua ka hore motho o ikhethela ho ja lijo tse itseng, o ile a hlokomelisa Bakreste-’moho le eena a re: “Le lule le lebetse hore matla ana a lōna, ka tsela e itseng a se ke a fetoha khopiso ho ba fokolang.” Ka mor’a moo o ile a bolela molao-motheo oa bohlokoa: “Lintho tsohle li lumelloa ke molao; empa hase lintho tsohle tse molemo. Lintho tsohle li lumelloa ke molao; empa hase lintho tsohle tse hahang.” (1 Bakorinthe 8:9; 10:23) Keletso ea Pauluse e sebetsa joang ho rōna tabeng ea bohloeki?
12 Ke ntho e utloahalang hore batho ba lebelle hore mosebeletsi oa Molimo a phele ka tsela e hloekileng le e hlophisehileng. Ka lebaka leo, re lokela ho tiisa hore ponahalo ea matlo a rōna le tikoloho ea ’ona ha e khahlanong le boipolelo ba rōna ba hore re basebeletsi ba Lentsoe la Molimo. Mahae a rōna a paka eng ka rōna le tumelo ea rōna? Na a bontša hore kannete re lakatsa ho phela lefatšeng le lecha le le hlophisehileng la ho loka, leo re le buellang ka matla ho ba bang? (2 Petrose 3:13) Ka tsela e tšoanang, molaetsa oo re o bolelang, o ka ipiletsa haholo kapa hanyenyane ka lebaka la ponahalo ea rōna nakong ea ha re qhoaollotse kapa ha re le tšebeletsong. Ka mohlala, hlokomela sena se ileng sa boleloa ke mongolli e mong oa koranta oa Mexico: “Ke ’nete hore bacha ke karolo e khōlō ea Lipaki tsa Jehova, ’me ba ikhetha ka tsela ea ho kuta moriri, ho hloeka le ho apara ka tsela e tšoanetseng.” Re thaba hakaakang ho ba le bacha ba joalo ka har’a rōna!
13. Re ka etsa’ng ho tiisa hore re hloekile ebile re hlophisehile likarolong tsohle tsa bophelo ba letsatsi le letsatsi?
13 Ha e le hantle, ha ho bonolo ho tiisa hore rōna ka borōna, thepa ea rōna le mahae a rōna re lula re hloekile kamehla. Ha re hloke thepa kapa lisebelisoa tse majaba-jaba kapa tse bitsang chelete e ngata, empa re hloka ho lokisetsa hantle le ho phehella. Nako e lokela ho behoa bakeng sa ho hlapa, ho hlatsoa liaparo, ho hloekisa lehae, koloi le tse ling. Ho tšoareha ka tšebeletso, ho ba teng libokeng le thuto ea botho—ho phaella ho hlokomeleng mesebetsi e meng ea letsatsi le letsatsi bophelong—hase lebaka la hore re se ke ra lula re hloekile ebile re amoheleha mahlong a Molimo le batho. Molao-motheo o tloaelehileng oa hore “ho na le nako e behiloeng bakeng sa ntho e ’ngoe le e ’ngoe” o sebetsa le karolong ena ea bophelo ba rōna.—Moeklesia 3:1.
Pelo e sa Silafalang
14. Ke hobane’ng ha re ka re ho hloeka boitšoarong le moeeng ke lintho tsa bohlokoa ho feta ho hloeka ’meleng?
14 Feela joalokaha e le habohlokoa ho hlokomela ho hloeka ’meleng, ke habohlokoa haholoanyane ho ameha ka ho hloeka boitšoarong le moeeng. Re etsa qeto ena re ntse re hopola hore Jehova ha aa ka a lahla Baiseraele hobane ba ne ba sa hloeka ’meleng, empa o ile a ba lahla hobane ba ne ba silafetse boitšoarong le moeeng. Jehova o ile a sebelisa moprofeta Esaia, ho ba bolella hore ka lebaka la hore e ne e le “sechaba se nang le sebe, batho ba imetsoeng ke phoso,” mahlabelo a bona, ho boloka ha bona khoeli e ncha le sabatha, e, le tsona lithapelo tsa bona li ne li mo tšoenya. Ba tšoanela ho etsa’ng e le hore mohau oa Molimo o boele ho bona? Jehova o ile a re: “Itlhatsoeng; itlhoekiseng; tlosang bobe ba mesebetsi ea lōna ka pel’a mahlo a ka; khaotsang ho etsa bobe.”—Esaia 1:4, 11-16.
15, 16. Jesu o itse ke eng e silafatsang motho, ’me re ka rua molemo joang mantsoeng a Jesu?
15 E le hore re ananele ka ho eketsehileng bohlokoa ba ho hloeka boitšoarong le moeeng, nahana ka seo Jesu a ileng a se bolella Bafarisi le bangoli ba neng ba bolela hore barutuoa ba hae ha baa hloeka hobane ba ja ba sa hatlela. Jesu o ile a lokisa litaba ka ho re: “Se kenang molomong oa motho hase sona se mo silafatsang; empa motho o silafatsoa ke se tsoang molomong oa hae.” Jesu o ile a hlalosa a re: “Lintho tse tsoang molomong li tsoa pelong, ’me lintho tseo li silafatsa motho. Ka mohlala, pelong ho tsoa menahano e khopo, lipolao, bofebe, bohlola, bosholu, bopaki ba bohata, linyefolo. Tsena ke lintho tse silafatsang motho; empa ho ja lijo ka matsoho a sa hlatsuoang ha ho silafatse motho.”—Matheu 15:11, 18-20.
16 Re ka ithuta’ng mantsoeng a Jesu? Jesu o ne a bontša hore liketso tse khopo, tsa boitšoaro bo bobe le tse sa hloekang li etelloa pele ke litšekamelo tse khopo, tsa boitšoaro bo bobe le tse sa hloekang tse ka pelong. Joalokaha morutuoa Jakobo a ile a bolela, “e mong le e mong o lekoa ke ho huloa le ho ekoa ke takatso ea hae.” (Jakobo 1:14, 15) Kahoo, haeba re sa batle ho oela libeng tse tebileng tseo Jesu a li hlalositseng, re lokela ho ntša lipelong tsa rōna litšekamelo tse lebisang linthong tse joalo. Ho bolela hore re lokela ho ba hlokolosi ka seo re se balang, re se shebellang le ho se mamela. Kajeno, molemong oa bolokolohi ba puo le ho ngola, liindasteri tsa boithabiso le phatlalatso li etsa letoto la ’mino le litšoantšo le khotsofatsang litakatso tsa boetsalibe. Re lokela ho ikemisetsa hore re ke ke ra lumella likhopolo tse joalo ho itsetsepela lipelong tsa rōna. Ntlha ea sehlooho ke hore e le hore re be ba khahlisang le ba amohelehang ho Molimo, re lokela ho ikalosa ka linako tsohle e le hore re boloke lipelo tsa rōna li hloekile, li sa silafala.—Liproverbia 4:23.
Re Hloekiselitsoe Mesebetsi e Metle
17. Ke hobane’ng ha Jehova a hloekisitse sechaba sa hae?
17 Ka sebele ke tlhohonolofatso le tšireletso hore ebe Jehova o re thusa hore re thabele boemo bo hloekileng ka pel’a hae. (2 Bakorinthe 6:14-18) Leha ho le joalo, rea utloisisa hore Jehova o hloekisitse sechaba sa hae bakeng sa morero o khethehileng. Pauluse o ile a bolella Tite hore Kreste Jesu o ile “a inehela bakeng sa rōna e le hore a ka re lopolla tlōlong ea molao ea mofuta o mong le o mong le ho itlhoekisetsa sechaba seo ka ho khethehileng e leng sa hae, se chesehelang mesebetsi e metle.” (Tite 2:14) Kaha re sechaba se hloekisitsoeng, re lokela ho chesehela mesebetsi efe?
18. Re ka bontša joang hore re chesehela mesebetsi e metle?
18 Ntho ea pele, re lokela ho ikitlaetsa ha re bolela litaba tse molemo tsa ’Muso oa Molimo phatlalatsa. (Matheu 24:14) Ka ho etsa joalo, re beha ka pel’a batho hohle tšepo ea ho phela ka ho sa feleng lefatšeng le tla beng le se na tšilafalo ea mofuta ofe kapa ofe. (2 Petrose 3:13) Mesebetsi ea rōna e metle e boetse e akarelletsa ho bonahatsa litholoana tsa moea oa Molimo bophelong ba rōna ba letsatsi le letsatsi, kahoo re tlotlisa Ntat’a rōna oa leholimo. (Bagalata 5:22, 23; 1 Petrose 2:12) Hape, ha re lebale ba seng ’neteng bao e ka ’nang eaba ba sithabelitsoe ke likoluoa tsa tlhaho kapa masetla-pelo a hlahelang batho. Re hopola keletso ea Pauluse e reng: “Ka sebele, joale, hafeela re sa na le nako e loketseng, a re sebetseng se molemo ho bohle, empa haholo-holo ho ba amanang le rōna tumelong.” (Bagalata 6:10) Molimo o khahloa haholo ke litšebeletso tsohle tse joalo, tse etsoang ka pelo e hloekileng le ka sepheo se setle.—1 Timothea 1:5.
19. Re letetsoe ke litlhohonolofatso life haeba re lula re hloekile ka mokhoa o phahameng—’meleng, boitšoarong le moeeng?
19 Joaloka bahlanka ba Ea Holimo-limo, re nka ka botebo mantsoe a Pauluse a reng: “Ke le kōpa ka tieo ka qenehelo ea Molimo, barab’eso, hore le hlahise ’mele ea lōna e le sehlabelo se phelang, se halalelang, se amohelehang ho Molimo, e le tšebeletso e halalelang ka matla a lōna a ho nahana.” (Baroma 12:1) E se eka re ka tsoela pele ho ananela tokelo ea ho hloekisoa ke Jehova ’me re etse sohle se matleng a rōna ho lula re hloekile ka mokhoa o phahameng ’meleng, boitšoarong le moeeng. Ka ho etsa joalo, re ke ke ra ba ba itlhomphang le ba khotsofetseng feela hona joale, empa hape re tla lebella ho bona “lintho tsa pele”—e leng tsamaiso ea hona joale e khopo le e silafetseng—li feta ha Molimo a “etsa hore lintho tsohle li be ncha.”—Tšenolo 21:4, 5.
Na Ua Hopola?
• Ke hobane’ng ha Baiseraele ba ile ba fuoa melao e mengata ea bohloeki?
• Ho hloeka ’meleng ho eketsa ho ipiletsa ha molaetsa oo re o bolelang joang?
• Ke hobane’ng ha ho hloeka boitšoarong le moeeng e le lintho tsa bohlokoa ho feta ho hloeka ’meleng?
• Re ka bontša joang hore re sechaba se “chesehelang mesebetsi e metle”?
[Litšoantšo tse leqepheng la 21]
Ho hloeka ’meleng ho eketsa ho ipiletsa ha molaetsa oo re o bolelang
[Litšoantšo tse leqepheng la 22]
Jesu o lemositse hore likhopolo tse khopo li tsoala liketso tse khopo
[Litšoantšo tse leqepheng la 23]
Lipaki tsa Jehova li chesehela mesebetsi e metle e le sechaba se hloekisitsoeng