Na ka Sebele U na le Tumelo Litabeng Tse Molemo?
“’Muso oa Molimo o atametse. Bakang, ’me le be le tumelo litabeng tse molemo.”—MAREKA 1:15.
1, 2. U ka hlalosa Mareka 1:14, 15 joang?
E NE e le ka selemo sa 30 C.E. Jesu Kreste o ne a qalile tšebeletso ea hae ea bohlokoa Galilea. O ne a bolela “litaba tse molemo tsa Molimo,” ’me Bagalilea ba bangata ba ile ba angoa maikutlo ke polelo ea hae e reng: “Nako e behiloeng e phethehile, ’me ’muso oa Molimo o atametse. Bakang, ’me le be le tumelo litabeng tse molemo.”—Mareka 1:14, 15.
2 “Nako e behiloeng” ea hore Jesu a qale tšebeletso ea hae le ea hore batho ba etse qeto e neng e tla etsa hore ba amoheloe ke Molimo e ne e fihlile. (Luka 12:54-56) ‘’Muso oa Molimo o ne o atametse’ hobane Jesu o ne a le teng e le Morena ea Tla Behoa. Mosebetsi oa hae oa boboleli o ile oa susumelletsa ba lipelo li lokileng hore ba bake. Empa ba ile ba bontša “tumelo litabeng tse molemo” joang—’me rōna re ka e bontša joang?
3. Batho ba entse’ng ho bontša hore ba na le tumelo litabeng tse molemo?
3 Joaloka Jesu, moapostola Petrose o ile a khothalletsa batho hore ba bake. Ha a bua le Bajuda ba Jerusalema ka Pentekonta ea 33 C.E., Petrose o ile a re: “Bakang, ’me e mong le e mong oa lōna a ke a kolobetsoe ka lebitso la Jesu Kreste hore le tšoareloe libe, ’me le tla amohela mpho e sa lefelloeng ea moea o halalelang.” Ba likete ba ile ba baka, ba kolobetsoa ’me ea e-ba balateli ba Jesu. (Liketso 2:38, 41; 4:4) Ka 36 C.E., Balichaba ba bakileng ba ile ba etsa se tšoanang. (Liketso 10:1-48) Mehleng ea rōna, tumelo litabeng tse molemo e susumelletsa ba likete hore ba bakele libe tsa bona, ba inehele ho Molimo ’me ba kolobetsoe. Ba amohetse litaba tse molemo tsa poloko ’me ba bontša tumelo sehlabelong sa thekollo sa Jesu. Ho feta moo, ba etsa ho loka ’me ba eme ka lehlakoreng la ’Muso oa Molimo.
4. Tumelo ke eng?
4 Empa tumelo ke eng? Moapostola Pauluse o ile a ngola a re: “Tumelo ke tebello e tiisitsoeng ea lintho tseo ho nang le tšepo bakeng sa tsona, ke bopaki bo totobetseng ba lintho tsa sebele le hoja li sa bonoe.” (Baheberu 11:1) Tumelo ea rōna e re kholisa hore sohle seo Molimo a se tšepisitseng Lentsoeng la hae joang kapa joang se tla phethahala. Ho tšoana leha re e-na le lengolo la tiiso le pakang hore re na le thepa e itseng. Hape tumelo ke “bopaki bo totobetseng,” kapa bopaki ba ho kholiseha ka lintho tse sa bonoeng. Seo re se nahanang le kananelo e lipelong tsa rōna li re kholisa hore lintho tse joalo ke tsa sebele, le hoja re e-s’o li bone.—2 Bakorinthe 5:7; Baefese 1:18.
Re Hloka Tumelo!
5. Ke hobane’ng ha tumelo e le ea bohlokoa hakaale?
5 Re tsoetsoe re e-na le seo re se hlokang moeeng empa ha rea tsoaloa re e-na le tumelo. Ha e le hantle, “hase batho bohle ba nang le tumelo.” (2 Bathesalonika 3:2) Leha ho le joalo, Bakreste ba lokela ho ba le tumelo e le hore ba tle ba fumane litšepiso tsa Molimo. (Baheberu 6:12) Ka mor’a ho qotsa mehlala e mengata ea tumelo, Pauluse o ile a ngola a re: “Kahobane re e-na le leru le leholo hakaalo la lipaki le re pota-potileng, le rōna a re hloboleng boima bo bong le bo bong le sebe se re tšoasang habonolo, ’me a re matheng ka mamello peisong e behiloeng ka pel’a rōna, ha re ntse re talimile ka hloko Moemeli ea ka Sehloohong le Mophethahatsi oa tumelo ea rōna, Jesu.” (Baheberu 12:1, 2) “Sebe se re tšoasang habonolo” ke eng? Ke ho hloka tumelo, esita le ho lahleheloa ke tumelo eo u kileng ua ba le eona. Hore re lule re e-na le tumelo e matla, re lokela ho ‘talima ka hloko ho Jesu’ ’me re latele mohlala oa hae. Hape re lokela ho hana boitšoaro bo bobe, re loantše mesebetsi ea nama, le ho qoba lerato la lintho tse bonahalang, lifilosofi tsa lefatše le lineano tseo e seng tsa Mangolo. (Bagalata 5:19-21; Bakolose 2:8; 1 Timothea 6:9, 10; Juda 3, 4) Ho feta moo, re lokela ho lumela hore Molimo o na le rōna le hore keletso ea Lentsoe la hae ka sebele ea sebetsa.
6, 7. Ke hobane’ng ha ho loketse ho rapella tumelo?
6 Re ke ke ra etsa hore re be le tumelo ka borōna. Tumelo ke e ’ngoe ea litholoana tsa moea o halalelang oa Molimo, e leng matla a hae a sebetsang. (Bagalata 5:22, 23) Kahoo, re tla etsa joang haeba tumelo ea rōna e lokela ho matlafatsoa? Jesu o ile a re: “Haeba . . . le tseba ho fa bana ba lōna limpho tse ntle, Ntate ea leholimong o tla fana ka moea o halalelang hakaakang ho ba mo kōpang!” (Luka 11:13) E, a re rapelleng moea o halalelang, hobane o ka etsa hore re be le tumelo e hlokahalang hore re etse thato ea Molimo esita le ka tlas’a maemo a lekang ka ho fetisisa.—Baefese 3:20.
7 Ho loketse ho rapella tumelo e eketsehileng. Ha Jesu a ne a le mothating oa ho leleka modemona moshanyaneng, ntat’ae o ile a ipiletsa ho eena a re: “Ke na le tumelo! Nthuse moo ke hlokang tumelo!” (Mareka 9:24) Barutuoa ba Jesu ba ile ba re: “Re fe tumelo e eketsehileng.” (Luka 17:5) Ka lebaka leo, a re rapelleng tumelo, re kholisehile hore Molimo o araba lithapelo tse joalo.—1 Johanne 5:14.
Tumelo Lentsoeng la Molimo ke ea Bohlokoa
8. Tumelo Lentsoeng la Molimo e ka re thusa joang?
8 Pelenyana ho lefu la hae la sehlabelo, Jesu o ile a re ho balateli ba hae: “Le se ke la lumella lipelo tsa lōna hore li khathatsehe. Bontšang tumelo ho Molimo, le bontše tumelo le ho ’na.” (Johanne 14:1) Joaloka Bakreste, re na le tumelo ho Molimo le ho Mora oa hae. Empa na re na le eona Lentsoeng la Molimo? Le ka fana ka matla a ho etsa se molemo bophelong ba rōna haeba re ithuta lona ’me re le sebelisa ka tumelo ea hore le re fa keletso e molemohali le tataiso e molemohali eo re ka e fumanang.—Baheberu 4:12.
9, 10. U ka hlalosa joang se boleloang ka tumelo ho Jakobo 1:5-8?
9 Bophelo ba rōna joaloka batho ba sa phethahalang bo tletse likhathatso. Leha ho le joalo, tumelo Lentsoeng la Molimo e ka re thusa e le kannete. (Jobo 14:1) Ka mohlala, a re nke hore ha re tsebe kamoo re ka sebetsanang le teko e itseng kateng. Lentsoe la Molimo le re fa keletso ena: “Haeba mang kapa mang oa lōna a haelloa ke bohlale, a ’ne a kōpe Molimo, hobane o fana ka seatla se bulehileng ho bohle a bile a sa nyelise; ’me o tla bo fuoa. Empa a ’ne a kōpe ka tumelo, a sa belaele ho hang, kaha ea belaelang o joaloka leqhubu la leoatle le khannoang ke moea le le fefoleloang koana le koana. Ha e le hantle, motho eo a se ke a nahana hore o tla amohela letho ho Jehova; ke motho ea hlōlehang ho etsa qeto, ea sa tsitsang litseleng tsohle tsa hae.”—Jakobo 1:5-8.
10 Jehova Molimo a ke ke a re nyelisa haeba re hloka bohlale ’me re bo rapella. Ho e-na le ho re nyelisa, o tla re thusa hore re talime teko ka tsela e loketseng. Balumeli-’moho le rōna ba ka re bontša mangolo a re thusang kapa re ka a bona ha re ithuta Bibele. Kapa moea o halalelang oa Jehova o ka re tataisa ka tsela e itseng. Ntat’a rōna oa leholimo o tla re fa bohlale ba ho tobana ka katleho le liteko haeba ‘re ntse re kōpa ka tumelo, re sa belaele ho hang.’ Haeba re tšoana le leqhubu la leoatle le khannoang ke moea, re ke ke ra lebella hore Molimo a re fe letho. Hobane’ng? Hobane sena se ne se tla bolela hore re hlōleha ho etsa qeto ’me ha rea tsitsa ha re rapela kapa ha re etsa lintho tse ling—e, esita leha re bontša tumelo ho Molimo. Kahoo, ho hlokahala hore re be le tumelo e tiileng Lentsoeng la Molimo le tataisong eo le fanang ka eona. A re nahaneng ka mehlala e meng ea kamoo le fanang ka thuso le tataiso kateng.
Tumelo le Lintho Tse Hlokahalang
11. Tumelo Lentsoeng la Molimo e re fa tiisetso efe ka lintho tseo re li hlokang letsatsi le letsatsi?
11 Ho etsahala joang haeba re futsanehile? Tumelo Lentsoeng la Molimo e re fa tebello e tiisitsoeng ea hore Jehova o tla re fa lintho tseo re li hlokang letsatsi le letsatsi ’me qetellong o tla fa bohle ba mo ratang sohle seo ba se hlokang. (Pesaleme ea 72:16; Luka 11:2, 3) Ho ka ’na ha re khothatsa ho nahana ka tsela eo Jehova a ileng a fepa moprofeta oa hae Elia nakong ea tlala. Hamorao ka mohlolo Molimo o ile a etsa hore phofo le oli tseo mosali e mong, mora oa hae hammoho le Elia ba neng ba phela ka tsona li se ke tsa fela. (1 Marena 17:2-16) Ka ho tšoanang Jehova o ile a hlokomela moprofeta Jeremia ha Babylona e ne e thibeletse Jerusalema. (Jeremia 37:21) Le hoja Jeremia le Elia ba ne ba haelloa ke lijo, Jehova o ile a ba hlokomela. Le kajeno o hlokomela ba bontšang tumelo ho eena.—Matheu 6:11, 25-34.
12. Tumelo e tla re thusa joang ho fumana lintho tseo re li hlokang?
12 Tumelo hammoho le ho sebelisa melao-motheo ea Bibele li ke ke tsa re ruisa, empa li tla re thusa ho fumana lintho tse hlokahalang. Ka mohlala: Bibele e re eletsa hore re be batho ba tšepahalang, ba nang le bokhoni le ba mahlahahlaha. (Liproverbia 22:29; Moeklesia 5:18, 19; 2 Bakorinthe 8:21) Le ka mohla ha rea lokela ho halala bohlokoa ba ho ba basebetsi ba nang le botumo bo botle. Esita le moo mesebetsi e lefang hantle e haellang, basebetsi ba tšepahalang, ba nang le bokhoni le ba mahlahahlaha ke bona ba fumanang menyetla e eketsehileng. Le hoja basebetsi ba joalo ba se na lintho tse ngata tse bonahalang, hangata ba na le lintho tse hlokahalang ’me ba khotsofalla ho ja lijo tseo ba li fumaneng ka mofufutso oa liphatla tsa bona.—2 Bathesalonika 3:11, 12.
Tumelo e re Thusa ho Mamella Mesarelo
13, 14. Tumelo e re thusa ho mamella mesarelo joang?
13 Ka ho utloahalang, Lentsoe la Molimo le bontša hore ho tloaelehile ho sareloa ha moratuoa a e-shoa. Abrahama, mopatriareka ea tšepahalang o ile a sareloa ka lefu la mosali oa hae ea ratoang, Sara. (Genese 23:2) Davida o ile a hlomoha ha a utloa hore mora oa hae Absalome o shoele. (2 Samuele 18:33) Esita le motho ea phethahetseng Jesu, o ile a lla ka lefu la motsoalle oa hae Lazaro. (Johanne 11:35, 36) Ha moratuoa oa rōna a e-shoa, re ka ’na ra sareloa habohloko, empa tumelo litšepisong tse ka Lentsoeng la Molimo e ka re thusa ho mamella ho sareloa ho joalo.
14 Pauluse o ile a re: “Ke na le tšepo ho Molimo, . . . ea hore ho tla ba le tsoho ea ba lokileng le ba sa lokang.” (Liketso 24:15) Re lokela ho ba le tumelo tokisetsong ea Molimo ea ho tsosa matšoele. (Johanne 5:28, 29) Har’a ’oona ho tla ba le Abrahama le Sara, Isaka le Rebeka, Jakobo le Lea—bao kaofela ba robetseng lefung ’me ba emetse tsoho lefatšeng le lecha la Molimo. (Genese 49:29-32) E tla ba thabo e kaakang ha baratuoa ba tsosoa borokong ba lefu ho tla phela moo lefatšeng! (Tšenolo 20:11-15) Khabareng, tumelo e ke ke ea tlosa mesarelo, empa e tla re atametsa ho Molimo, ea re thusang ho mamella ho shoeloa.—Pesaleme ea 121:1-3; 2 Bakorinthe 1:3.
Tumelo e Matlafatsa ba Tepeletseng Maikutlo
15, 16. (a) Ke hobane’ng ha re ka bolela hore ho tepella maikutlo hase mohlolo ho ba bontšang tumelo? (b) Re ka sebetsana le ho tepella maikutlo joang?
15 Hape, Lentsoe la Molimo le bontša hore esita le ba bontšang tumelo ba ka ’na ba tepella maikutlo. Ha Jobo a ne a lekoa ka matla, o ile a nahana hore Molimo o mo lahlile. (Jobo 29:2-5) Tšenyeho ea Jerusalema le marako a eona e ile ea etsa hore Nehemia a soabe. (Nehemia 2:1-3) Petrose o ile a sithabela haholo ka mor’a ho latola Jesu hoo a ileng a “lla habohloko.” (Luka 22:62) Pauluse o ile a khothalletsa balumeli-’moho le eena phuthehong ea Thesalonika hore ba “bue ka mokhoa o tšelisang le meea e tepeletseng maikutlo.” (1 Bathesalonika 5:14) Ka lebaka leo, ho tepella maikutlo ha batho ba bontšang tumelo hase mohlolo. Joale, re ka etsa’ng ho sebetsana ka katleho le ho tepella maikutlo?
16 Re ka ’na ra tepeletsoa maikutlo ke ho thulana le mathata a mangata. Ho e-na le ho nahana hore mathata a rōna ke thabahali, re ka sebeletsa ho a tlosa tseleng ka bonngoe ka ho sebelisa melao-motheo ea Bibele. Sena se ka fokotsa ho tepella maikutlo. Ho se ithukhubetse ka ho feteletseng le ho phomola ka ho lekaneng le tsona li ka thusa. ’Nete e salang ke hore tumelo ho Molimo le Lentsoeng la hae e etsa hore re atlehe moeeng hobane e matlafatsa kholiseho ea rōna ea hore o hlile oa re tsotella.
17. Re tseba joang hore Jehova oa re tsotella?
17 Petrose o re tšelisa ka tieo o re: “Le ikokobetse tlas’a letsoho le matla la Molimo, e le hore a ka le phahamisa nakong e loketseng; ha le ntse le lahlela matšoenyeho ’ohle a lōna ho eena, hobane oa le tsotella.” (1 Petrose 5:6, 7) Mopesaleme o ile a bina a re: “Jehova o tšehetsa bohle ba oang, o phahamisa bohle ba inameng.” (Pesaleme ea 145:14) Re lokela ho lumela mantsoe ana a re kholisang, hobane a fumanoa ka Lentsoeng la Molimo. Leha ho tepella maikutlo ho sa tlohe, ho matlafatsa tumelo hakaakang ho tseba hore re ka lahlela matšoenyeho a rōna ho Ntat’a rōna ea lerato oa leholimo!
Tumelo le Liteko Tse Ling
18, 19. Tumelo e re thusa joang ho sebetsana ka katleho le boloetse le ho tšelisa balumeli-’moho le rōna ba kulang?
18 Tumelo ea rōna e ka lekoa haholo ha rōna kapa baratuoa ba rōna ba kula haholo. Le hoja Bibele e sa tlalehe hore Bakreste ba kang Epafroditase, Timothea le Trofimase ba ile ba folisoa ka mohlolo, ha ho pelaelo hore Jehova o ile a ba thusa ho mamella. (Bafilipi 2:25-30; 1 Timothea 5:23; 2 Timothea 4:20) Ho feta moo, mabapi le “mang kapa mang ea nahanelang motho ea tlaase,” mopesaleme o ile a bina a re: “Jehova o tla mo tšehetsa holim’a setulo sa hae se kang moalo sa ho kula; ka sebele u tla fetola liphate tsohle tsa hae nakong ea boloetse ba hae.” (Pesaleme ea 41:1-3) Mantsoe a mopesaleme a ka re thusa ho tšelisa balumeli-’moho le rōna ba kulang joang?
19 Tsela e ’ngoe ea ho fana ka thuso ea moea ho ba kulang, ke ka ho rapela le bona le ho ba rapella. Le hoja kajeno re ke ke ra kōpa Molimo hore a ba folise ka mohlolo, re ka mo kōpa hore a ba fe matla a ho mamella boloetse ba bona le hore a ba matlafatse moeeng e le hore ba mamelle linako tse joalo tsa ho kula. Jehova o tla ba matlafatsa, ’me tumelo ea bona e tla tiisoa ke ho lebella nakong ea ‘ha ho se moahi ea tla re: “Kea kula.”’ (Esaia 33:24) Ho tšelisa hakaakang ho tseba hore ka Jesu Kreste ea tsositsoeng le ka ’Muso oa Molimo, batho ba utloang ba tla lokolloa ka ho sa feleng sebeng, boloetseng le lefung! Bakeng sa litšepiso tsena tse babatsehang, re leboha Jehova ‘ea tla folisa mafu ’ohle a rōna.’—Pesaleme ea 103:1-3; Tšenolo 21:1-5.
20. Ke hobane’ng ha ho ka thoe tumelo e ka re thusa ho mamella “matsatsi a tlokotsi” a botsofali?
20 Tumelo e ka boela ea re thusa ho mamella “matsatsi a tlokotsi” a botsofali, ha re se re haelloa ke bophelo le matla. (Moeklesia 12:1-7) Ka hona, ba hōlileng ba ka rapela joaloka mopesaleme ea hōlileng ea ileng a bina a re: “U tšepo ea ka, ’Musi Morena Jehova . . . U se ke ua ntahla nakong ea botsofali; ha ke felloa ke matla, u se ke ua ntlohela.” (Pesaleme ea 71:5, 9) Mopesaleme o ile a hlokomela hore o hloka tšehetso ea Jehova, feela joalokaha le Bakreste-’moho le rōna ba tsofaletseng tšebeletsong ea Molimo ba e hloka. Ka lebaka la tumelo ea bona, ba ka kholiseha hore Jehova o tla ba tšehetsa kamehla ka matsoho a hae a sa feleng.—Deuteronoma 33:27.
Lula U E-na le Tumelo Lentsoeng la Molimo
21, 22. Haeba re e-na le tumelo, see se tla ama kamano ea rōna le Molimo joang?
21 Tumelo litabeng tse molemo le Lentsoeng lohle la Molimo e re thusa ho atamela ho Jehova. (Jakobo 4:8) Ke ’nete hore ke Morena ’Musi oa rōna, empa hape ke ’Mōpi le Ntat’a rōna. (Esaia 64:8; Matheu 6:9; Liketso 4:24) Mopesaleme o ile a bina a re: “U Ntate, Molimo oa ka le Lefika la poloko ea ka.” (Pesaleme ea 89:26) Haeba re bontša tumelo ho Jehova le Lentsoeng la hae le bululetsoeng, le rōna re ka nka hore ke ‘Lefika la poloko ea rōna.’ See ke tokelo e kaakang!
22 Jehova ke Ntate oa Bakreste ba tsoetsoeng ka moea le oa metsoalle ea bona e nang le tšepo ea ho phela lefatšeng. (Baroma 8:15) Tumelo ea rōna ho Ntat’a rōna oa leholimo ha ho mohla e tla re soetsa. Davida o ile a re: “Haeba Ntate le ’Mè ba ne ba ka ntlohela, Jehova o ne a tla nthola.” (Pesaleme ea 27:10) Ho feta moo, re na le tiisetso ena e reng: “Jehova a ke ke a tlohela sechaba sa hae ka lebaka la lebitso la hae le leholo.”—1 Samuele 12:22.
23. Ke eng se hlokahalang e le hore re be le kamano e sa feleng le Jehova?
23 Ho hlakile hore e le hore re be le kamano e sa feleng le Jehova, re lokela ho ba le tumelo litabeng tse molemo ’me re amohele hore Bibele ehlile ke Lentsoe la Molimo. (1 Bathesalonika 2:13) Re lokela ho ba le tumelo e feletseng ho Jehova ’me re lumelle hore Lentsoe la hae le khantše tsela ea rōna. (Pesaleme ea 119:105; Liproverbia 3:5, 6) Tumelo ea rōna e tla hōla ha re ntse re mo rapela re kholisehile hore o tla re utloela bohloko, a re hauhele le ho re thusa.
24. Ke khopolo efe e tšelisang e ho Baroma 14:8?
24 Tumelo e ile ea re susumelletsa hore re inehele ka ho sa feleng ho Molimo. Kaha re na le tumelo e matla, esita leha re ka shoa, re bahlanka ba hae ba inehetseng ba nang le tšepo ea tsoho. E, “haeba re phela le haeba re shoa, re ba Jehova.” (Baroma 14:8) E se eka re ka boloka khopolo ena e tšelisang lipelong tsa rōna ha re lula re tšepile Lentsoe la Molimo ’me re tsoela pele ho ba le tumelo litabeng tse molemo.
U ka Araba Joang?
• Tumelo ke eng, ’me ke hobane’ng ha re e hloka?
• Ke hobane’ng ha e le habohlokoa hore re be le tumelo litabeng tse molemo le Lentsoeng lohle la Molimo?
• Tumelo e re thusa joang hore re tobane ka katleho le liteko tse sa tšoaneng?
• Ke eng se ka re thusang e le hore re lule re e-na le tumelo?
[Litšoantšo tse leqepheng la 12]
Jehova o ile a tšehetsa Jeremia le Elia hobane ba ne ba e-na le tumelo
[Litšoantšo tse leqepheng la 13]
Jobo, Petrose le Nehemia ba ne ba e-na le tumelo e matla
[Litšoantšo tse leqepheng la 15]
E le hore re be le kamano e sa feleng le Jehova, re lokela ho ba le tumelo litabeng tse molemo