Latela Mohlala oa Jesu ’me U Amehe ka Mafutsana
BOFUTSANA le khatello ke khale li le teng. Le hoja Molao oo Molimo a neng a o file Baiseraele o ne o reretsoe ho sireletsa mafutsana le ho a imolla matšoenyehong, hangata Molao oo o ne o sa lateloe. (Amose 2:6) Moprofeta Ezekiele o ile a nyatsa tsela eo mafutsana a neng a tšoaroa ka eona. O ile a re: “Sechaba se ntšetsa pele morero oa bolotsana ka ho nka ka mahahapa ’me se rusolotse ka tlatlapo, se tšoere ea hlorileng le mofutsana hampe, ’me se etselitse mojaki bolotsana ho se na toka.”—Ezekiele 22:29.
Ha Jesu a ne a le lefatšeng bofutsana le khatello li ne li ntse li le teng. Baeta-pele ba bolumeli ba ne ba sa ameha ho hang ka mafutsana le bahloki. Baeta-pele ba bolumeli ba ne ba hlalosoa e le ‘batho ba ratang chelete’ ba ‘neng ba harola matlo a bahlolohali’ le ba neng ba amehile haholo ka ho boloka lineano tsa bona ho e-na le ho hlokomela batho ba hōlileng le ba hlokang. (Luka 16:14; 20:47; Matheu 15:5, 6) Hoa thahasellisa hore ebe papisong ea Jesu ea Mosamaria ea molemo, ha moprista le Molevi ba ne ba bona monna ea lemetseng, ba ile ba mo feta eaba ba tsamaela ka lehlakoreng le leng la tsela ho e-na le hore ba fapohele ho ea mo thusa.—Luka 10:30-37.
Jesu o Ile a Bontša Hore o Amehile ka Mafutsana
Litlaleho tsa Likosepele tsa bophelo ba Jesu li bontša hore o ne a utloisisa hantle mathata a mafutsana a bile a amehile haholo ka litlhoko tsa ’ona. Le hoja Jesu a ne a ile a phela leholimong, o ile a ikhokhotha, a phela e le motho oa nama, ’me ‘ea e-ba mofutsana ka lebaka la rōna.’ (2 Bakorinthe 8:9) Ha Jesu a bona bongata, o ile “a bo hauhela, hobane bo ne bo sohlokehile ’me bo qhalakane joaloka linku tse se nang molisa.” (Matheu 9:36) Tlaleho ea mohlolohali ea hlokang e bontša hore Jesu ha aa ka a khahloa ke limpho tse khōlō tsa barui, ba neng ba fana “ho tsoa botlallong ba bona,” empa o ile a khahloa ke monehelo o monyenyane oa mohlolohali ea futsanehileng. Seo mohlolohali enoa a se entseng se ile sa ama Jesu pelo hobane “o [ne a] akhetse mokhoa oohle oa ho iphelisa oo a neng a e-na le oona.”—Luka 21:4.
Jesu o ne a sa utloele mafutsana bohloko feela, empa o ne a hlile a amehile le ka litlhoko tsa ’ona. Eena le baapostola ba hae ba ne ba e-na le letlōle leo ba neng ba le sebelisa ho thusa Baiseraele ba hlokang. (Matheu 26:6-9; Johanne 12:5-8; 13:29) Jesu o ile a khothalletsa ba neng ba batla ho ba balateli ba hae hore ba ele hloko boikarabelo ba bona ba ho thusa bahloki. O ile a re ho ’musi e mong e mocha lilemong ea neng a ruile: “Rekisa lintho tsohle tseo u nang le tsona ’me u abele mafutsana, ’me u tla ba le letlotlo maholimong; u tle ’me u be molateli oa ka.” Taba ea hore monna enoa o ne a sa batle ho arohana le maruo a hae e ile ea bontša hore o ne a rata maruo haholo ho feta Molimo le batho ba bang. Kahoo, o ne a se na litšobotsi tse hlokahalang tsa hore e be morutuoa oa Jesu.—Luka 18:22, 23.
Balateli ba Kreste ba Amehile ka Mafutsana
Ka mor’a lefu la Jesu, baapostola le balateli ba bang ba Kreste ba ile ba tsoela pele ho ameha ka mafutsana a neng a le har’a bona. Hoo e ka bang ka 49 C.E., moapostola Pauluse o ile a kopana le Jakobo, Petrose le Johanne eaba ba tšohla mosebetsi oa ho bolela litaba tse molemo oo Morena Jesu Kreste a neng a o file Pauluse. Ba ile ba lumellana ka hore Pauluse le Barnabase ba lokela ho “ea lichabeng,” ba amehe haholo ka ho pakela Balichaba. Leha ho le joalo, Jakobo le bo-mphato ba hae ba ile ba khothalletsa Pauluse le Barnabase hore ba ‘lule ba hopotse mafutsana.’ ’Me Pauluse o ile a ‘leka ka tieo ho etsa joalo.’—Bagalata 2:7-10.
Pusong ea Moemphera Claudiase, ho ile ha oa tlala ea sekoboto likarolong tse sa tšoaneng tsa ’Muso oa Roma. Ka lebaka leo, Bakreste ba Antioke “ba [ile ba] etsa qeto, e mong le e mong oa bona ho ea kamoo leha e le mang a neng a ka ho khona, ho romela tšebeletso ea lithuso ho barab’abo rōna ba lulang Judea; eaba ba etsa sena, ba e romela ho banna ba baholo ka matsoho a Barnabase le Saule.”—Liketso 11:28-30.
Le kajeno Bakreste ba ’nete baa utloisisa hore balateli ba Jesu ba lokela ho ameha ka mafutsana le bahloki, ba lokela ho ameha haholo-holo ka mafutsana le bahloki bao e leng balumeli-’moho le bona. (Bagalata 6:10) Ka lebaka leo ba bontša kameho ea sebele ka litlhoko tsa nama tsa bahloki. Ka mohlala, ka 1998, karolo e khōlō e ka leboea-bochabela ea Brazil e ile ea hlaseloa ke komello. Komello eo e ile ea senya raese, linaoa le poone, ’me seo se ile sa fella ka tlala e khōlō—e mpe ka ho fetisisa lilemong tse 15. Libakeng tse ling, ho ne ho bile ho e-na le khaello ea metsi a nooang. Kapele-pele Lipaki Tsa Jehova tse likarolong tse ling tsa naha li ile tsa hlophisa likomiti tsa liphallelo, ’me ka nako e khutšoanyane feela, li ne li bokeletse lijo tse ngata ’me li lefelletse litšenyehelo tsa ho li isa sebakeng seo.
Lipaki tse ileng tsa fana ka liphallelo li ile tsa ngola tsa re: “Re thabile haholo hore ebe re ile ra khona ho thusa barab’abo rōna, haholo-holo hobane re kholisehile hore re thabisitse pelo ea Jehova. Ha re lebale mantsoe a ho Jakobo 2:15, 16.” Litemana tseo tsa Bibele li re: “Haeba mor’abo rōna kapa morali’abo rōna a le boemong ba tlhobolo ’me a haelloa ke lijo tse lekaneng letsatsi, empa leha ho le joalo e mong ho lōna a re ho bona: ‘Tsamaeang ka khotso, le futhumale ’me le khore,’ empa le sa ba fe tse hlokoang ke ’mele ea bona, ho na le molemo ofe?”
Phuthehong e ’ngoe ea Lipaki Tsa Jehova motseng oa São Paulo, Paki e ’ngoe e ikokobelitseng le e mafolofolo e futsanehileng, hangata e phela ka thata. E re: “Le hoja ke le mofutsana, molaetsa oa Bibele o entse hore ke be le morero bophelong. Ha ke tsebe hore na ho ka be ho etsahetse’ng ka ’na hoja ke ne ke sa ka ka fumana thuso ho Lipaki tse ling.” Nakoaneng e fetileng, mosali enoa oa Mokreste ea sebetsang ka thata o ile a lokela ho buuoa empa o ne a se na chelete ea ho lefella litšenyehelo tsa sepetlele. Boemong boo, bara le baralib’abo ba Bakreste ka phuthehong ba ile ba khona ho lefella litšenyehelo tsa ho buuoa hoo. Lefatšeng ka bophara, Bakreste ba ’nete ba thusa balumeli-’moho ba hlokang thuso.
Leha ho le joalo, ho sa tsotellehe hore na liphihlelo tse joalo li thabisa hakae, ho hlakile hore boiteko bo joalo ba sebele bo ke ke ba felisa bofutsana. Esita le mebuso e matla le mekhatlo e meholo ea machaba e fanang ka liphallelo, le hoja e atleha ka tsela e itseng, e ’nile ea hlōleha ho felisa bothata bona boo e leng khale bo le teng ba bofutsana. Ka hona, ho hlaha potso e reng, Ke eng e tla hle e felise bofutsana le mathata a mang a tšoenyang batho?
Lithuto Tsa Bibele li Fana ka Thuso ea Nako e Telele
Litlaleho tsa Likosepele li bontša hore kamehla Jesu Kreste o ne a thusa mafutsana kapa batho ba bang ba neng ba hloka lintho tse itseng. (Matheu 14:14-21) Leha ho le joalo, mosebetsi oa bohlokoa ka ho fetisisa oo a neng a o etsa ke ofe? Ka lekhetlo le leng, ka mor’a ho qeta nako e itseng a thusa bahloki, Jesu o ile a re ho barutuoa ba hae: “A re eeng sebakeng se seng sesele, litoropong tse haufi tsa metsana, e le hore nka bolela le moo.” Ke hobane’ng ha Jesu a ile a emisa mosebetsi oa hae oa ho thusa ba kulang le ba hlokang e le hore a tsoele pele ka mosebetsi oa hae oa ho bolela? O ile a hlalosa seo ka ho re: “Ke tsoile ka morero ona [oa ho bolela].” (Mareka 1:38, 39; Luka 4:43) Le hoja Jesu a ne a nka ho thusa bahloki e le habohlokoa, mosebetsi oa hae o ka sehloohong e ne e le oa ho bolela ka ’Muso oa Molimo.—Mareka 1:14.
Kaha Bibele e khothalletsa Bakreste hore ba “latele mehato ea [Jesu] haufi-ufi,” kajeno Bakreste ba fuoe tataiso e hlakileng mabapi le hore na ke lintho life tse lokelang ho tla pele ha ba ntse ba leka ho thusa batho ba bang. (1 Petrose 2:21) Joaloka Jesu, ba thusa bahloki. Leha ho le joalo, joaloka Jesu, ba boetse ba etsa hore mosebetsi oa ho ruta molaetsa oa Bibele o mabapi le litaba tse molemo tsa ’Muso oa Molimo e be oona o tlang pele bophelong ba bona. (Matheu 5:14-16; 24:14; 28:19, 20) Leha ho le joalo, ke hobane’ng ha ho bolela molaetsa o fumanoang Lentsoeng la Molimo e lokela ho ba eona ntho ea bohlokoa ho feta mefuta e meng ea ho thusa ba bang?
Liphihlelo tsa sebele tse tsoang lefatšeng ka bophara li bontša hore ha batho ba utloisisa keletso e sebetsang ea Bibele ba bile ba e latela, ba khona ho sebetsana le mathata a letsatsi le letsatsi a bophelo, a akarelletsang bofutsana. Ho feta moo, molaetsa oa Bibele oa ’Muso oa Molimo o boleloang ke Lipaki Tsa Jehova kajeno o fa batho tšepo ea bokamoso—tšepo e etsang hore ba bone hore bophelo ke ba bohlokoa, esita leha ba phela tlas’a maemo a thata ka ho fetisisa. (1 Timothea 4:8) Tšepo eo ke efe?
Lentsoe la Molimo le re tiisetsa tjena ka bokamoso: “Ho na le maholimo a macha le lefatše le lecha tseo re li letetseng ho ea ka tšepiso ea [Molimo], ’me ho loka ho tla aha ho tsona.” (2 Petrose 3:13) Ka linako tse ling, ha Bibele e bua ka “lefatše,” e bua ka batho ba phelang lefatšeng. (Genese 11:1) Kahoo “lefatše le lecha” la ho loka leo ho tšepisitsoeng hore le tla tla, ke batho ba amoheloang ke Molimo. Lentsoe la Molimo le boetse le tšepisa hore pusong ea Kreste, batho ba amohetsoeng ke Molimo ba tla fumana mpho ea bophelo bo sa feleng ’me ba tla phela bophelo bo khotsofatsang lefatšeng la paradeise. (Mareka 10:30) Batho bohle, ho akarelletsa le mafutsana, ba ka ba le tšepo eo e thabisang. ‘Lefatšeng leo le lecha,’ bothata ba bofutsana bo tla be bo rarollotsoe ka ho sa feleng.
[Lebokose/Setšoantšo se leqepheng la 7]
JESU O TLA “LOPOLLA EA FUTSANEHILENG” JOANG?—Pesaleme ea 72:12
TOKA: “A ke a ahlole ba hlorileng ba sechaba, a pholose bara ba mofutsana, a silakanye molotsana.” (Pesaleme ea 72:4) Ha Kreste a se a busa lefatšeng, ho tla ba le toka bakeng sa bohle. Bobolu bo ke ke ba e-ba teng, e leng bokhopo bo futsanehisitseng linaha tse ngata tseo ho neng ho ka ba le monyetla oa hore li rue.
KHOTSO: “Matsatsing a hae ea lokileng o tla atleha, khotso e tla ba ngata ho fihlela khoeli e se e le sieo.” (Pesaleme ea 72:7) Bofutsana bo bongata bo leng teng lefatšeng bo bakoa ke lintoa le likhohlano tsa batho. Kreste o tla tlisa khotso e phethahetseng lefatšeng, ’me a felise lintoa le likhohlano, e leng tsona lintho tse ka sehloohong tse bakang bofutsana.
QENEHELO: “O tla utloela ea tlaase bohloko le ea futsanehileng, o tla pholosa meea ea ba futsanehileng. O tla lopolla meea ea bona khatellong le pefong, mali a bona e tla ba a bohlokoa mahlong a hae.” (Pesaleme ea 72:12-14) Batho ba tlaase le ba futsanehileng, le ba hatelletsoeng ba tla fetoha karolo ea lelapa le le leng la batho le thabileng, le le momahaneng tlas’a boeta-pele ba Morena Jesu Kreste.
KATLEHO: “Ho tla ba le lijo-thollo tse ngata lefatšeng.” (Pesaleme ea 72:16) Pusong ea Kreste, ho tla ba le katleho. Batho ba ke ke ba tšoenngoa ke khaello ea lijo kapa litlala tseo hangata e leng tsona tse bakang bofutsana kajeno.
[Setšoantšo se leqepheng la 4, 5]
Jesu o ne a thahasella ho tseba litlhoko tsa batho ba futsanehileng
[Setšoantšo se leqepheng la 6]
Molaetsa oa Bibele o fana ka tšepo ea sebele