“Re Tla Mamela Molimo e le ’Musi ho E-na le Batho”

‘Molimo oa Rōna o Tla Khona ho re Pholosa’

HO NE ho reriloe hore ketsahalo eo e be e hlollang haholo. Ho ne ho emisitsoe setšoantšo sa khauta sa setonanahali thoteng ea Dura, mohlomong e le haufi le motse oa Babylona. Setšoantšo seo se ne se lokela ho khakoloa nakong ea mokete o khethehileng oo ho oona ho neng ho tlile ba boholong pusong bao ho neng ho lebeletsoe hore ba iname ka pel’a setšoantšo seo ha ho letsoa liletsa tse fapa-fapaneng tsa ’mino. Morena Nebukadnezare oa Babylona o ne a laetse hore motho leha e le ofe ea neng a ke ke a rapela setšoantšo seo o ne a tla shoella ka sebōping se besitsoeng haholo sa mollo. Ebe ke mang ea neng a ka iteta sebete hore a se ke a mamela taelo eo?

Ho ileng ha makatsa bashebelli ke hore barapeli ba bararo ba Jehova ba tšabang Molimo—e leng Shadrake, Meshake le Abednego—ha baa ka ba se inamela. Ba ne ba tseba hore ha ba etsa joalo ba ne ba tla be ba tlōla taelo ea hore ba bontše boinehelo bo khethehileng ho Jehova Molimo feela. (Deuteronoma 5:8-10) Eitse ha ba laeloa hore ba hlalose boemo bona ba bona bo tiileng, ka sebete ba ile ba bolella Nebukadnezare ba re: “Haeba ho ka ba joalo, Molimo oa rōna eo re mo sebeletsang o tla khona ho re pholosa. O tla re pholosa sebōping se tukang sa mollo le letsohong la hao, morena. Empa haeba ho se joalo, u tsebe, morena, hore melimo ea hao hase eona eo re e sebeletsang, ’me setšoantšo sa khauta seo u se emisitseng re ke ke ra se rapela.”—Daniele 3:17, 18.

Ha Baheberu bao ba bararo ba akheloa ka sebōping se chesang sa mollo, ba ile ba pholosoa feela ka mohlolo. Molimo o ile a romela lengeloi ho ea sireletsa bahlanka ba Hae ba tšepahalang. Empa ba ne ba se ntse ba khethile ho beha bophelo ba bona kotsing ho e-na le hore ba se ke ba mamela Jehova.a Boemo ba bona bo ne bo tšoana le ba baapostola ba Jesu Kreste, bao lilemo tse fetang makholo a tšeletseng hamorao ba ileng ba bolella lekhotla le phahameng la Bajuda ba re: “Re tla mamela Molimo e le ’musi ho e-na le batho.”—Liketso 5:29.

Thuto ea Bohlokoa ho Rōna

Shadrake, Meshake le Abednego ke mehlala e metle ea tumelo, ho mamela le botšepehi. Baheberu bao ba bararo ba ile ba bontša tumelo ho Jehova. Matsoalo a bona a koetlisitsoeng ke Mangolo ha aa ka a ba lumella ho kopanela ketsong leha e le efe ea borapeli ba bohata kapa ea ho inehela borapeling ba bochaba. Ka ho tšoanang, Bakreste ba kajeno ba tšepa Molimo oa ’nete ka ho feletseng. Ba tataisoa ke matsoalo a bona a koetlisitsoeng ke Bibele ’me ba hana ho kopanela liketsong tsa borapeli ba bohata kapa meketeng e tlōlang melao le melao-motheo ea Molimo.

Baheberu ba bararo ba tšepahalang ba ne ba tšepile Jehova ’me ba ile ba mamela Molimo ho sa tsotellehe ntho leha e le efe eo ’Muso oa Babylona o neng o ka ba fa eona, ebang ke ho hlompheha, maemo kapa ho tlotlisoa. Bahlankana bao ba ne ba ikemiselitse ho utloa bohloko le ho shoa ho e-na le ho senya kamano ea bona le Molimo. Joaloka Moshe ea phetseng pele ho bona, ba ile ba “tsoela pele [ba] tiile joalokaha eka [ba] bona Ea sa bonahaleng.” (Baheberu 11:27) Ebang Jehova o ne a tla khetha ho ba pholosa lefung kapa che, bahlankana bana ba bararo ba ne ba ikemiselitse ho tšepahala ho eena ho e-na le ho sekisetsa hore ba sireletse bophelo ba bona. Kamoo ho bonahalang kateng, moapostola Pauluse o ne a bua ka mokhoa o sa tobang ka mohlala oa bona, ha a ne a bua ka ba ‘ileng ba thiba matla a mollo.’ (Baheberu 11:34) Bahlanka ba Jehova ba bontša tumelo e joalo le ho mamela ha ba tobana le liteko tsa botšepehi mehleng ea rōna.

Ka sena se ileng sa etsahalla Shadrake, Meshake le Abednego, re boetse re ithuta hore Molimo o putsa ba tšepahalang ho eena. Mopesaleme o ile a bina a re: “Jehova . . . a ke ke a tlohela ba tšepahalang ba hae.” (Pesaleme ea 37:28) Kajeno, re ke ke ra lebella hore Molimo a re pholose ka mohlolo joalokaha a ile a pholosa Baheberu bao ba bararo. Leha ho le joalo, re ka kholiseha hore ho sa tsotellehe hore na re thulana le mahlomola afe, Ntate oa rōna oa leholimo o tla re thusa. Molimo a ka ’na a tlosa bothata boo, a re fa matla a ho bo mamella kapa a re tsosa bafung haeba re tšepahala ho isa lefung. (Pesaleme ea 37:10, 11, 29; Johanne 5:28, 29) Tumelo, ho mamela le botšepehi lia hlōla kamehla ha botšepehi ba rōna bo lekoa ’me re khetha ho mamela Molimo ho e-na le batho.

[Mongolo o botlaaseng ba leqephe]

[Lebokose/Setšoantšo se leqepheng la 9]

NA U NE U TSEBA?

• Baheberu ba bararo ba ne ba e-na le lilemo tse ka bang 30 ha ba ne ba tobana le teko ena ea botšepehi.

• Ho ka etsahala hore ebe sebōpi se ile sa beseletsoa hore se chese haholo kamoo ho neng ho ka khoneha.—Daniele 3:19.