Ruta Seo Bibele e Hlileng e se Rutang

“Le etse batho ba lichaba tsohle barutuoa, . . . le ba rute.”—MATHEU 28:19, 20.

1. Ho ka thoe Bibele e atile hakae?

LENTSOE la Jehova, e leng Bibele e Halalelang, ke e ’ngoe ea libuka tsa khale ka ho fetisisa le tse ajoang ka ho fetisisa lefatšeng. Karolo e ’ngoe ea eona e fetoletsoe ka lipuo tse fetang 2 300. Ho baahi ba bang le ba bang ba lekholo ba lefatše, ba ka holimo ho 90 ba na le eona ka lipuo tseo ba li antseng letsoeleng.

2, 3. (a) Ke hobane’ng ha ho e-na le pherekano ka lithuto tsa Bibele? (b) Re tla tšohla lipotso life?

² Batho ba limilione ba bala karolo e itseng ea Bibele letsatsi le letsatsi. Ba bang ba e balile ka makhetlo a mangata ho tloha qalong ho isa qetellong. Malumeli a likete a re a thehile lithuto tsa ’ona Bibeleng, empa ha a lumellane ka seo e se rutang. Ho ferekanyang le ho feta ke ho se lumellane ho matla pakeng tsa litho tsa bolumeli bo le bong. Tse ling li khomaretse litumela-khoela tse itseng ka Bibele, ka tšimoloho ea eona le ka bohlokoa ba eona. Ba bangata ba nka hore ke buka e halalelang eo ka tloaelo e sebelisoang ha batho ba etsa likano kapa ha ba hlapanya hore ba tla bua ’nete ka khotla.

³ Ha e le hantle, Bibele e na le molaetsa o matla o tsoang ho Molimo o eang ho batho. (Baheberu 4:12) Kahoo, rōna Lipaki Tsa Jehova, re rata hore batho ba ithute seo Bibele e se rutang. Re thabela ho etsa mosebetsi oo Jesu Kreste a ileng a o fa balateli ba hae ha a ne a re: “E-eang . . . le etse batho ba lichaba tsohle barutuoa, . . . le ba rute.” (Matheu 28:19, 20) Ha re ntse re bolela phatlalatsa, re fumana batho ba lipelo li tšepahalang ba tsielehileng ka lebaka la pherekano ea bolumeli e atileng lefatšeng. Ba batla ho tseba ’nete ka ’Mōpi oa rōna ebile ba batla ho ithuta seo Bibele e se bolelang ka morero oa bophelo. A re ke re tšohleng lipotso tse tharo tseo batho ba bangata ba ipotsang tsona. Potsong ka ’ngoe, re tla bona lintho tse fosahetseng tseo baeta-pele ba bolumeli ba li buang, ebe joale re hlahloba hore na ha e le hantle ke eng seo Bibele e se rutang. Lipotso tseo ke tsena: (1) Na Molimo oa re tsotella? (2) Ke hobane’ng ha re le teng lefatšeng moo? (3) Ho etsahala’ng ka rōna ha re e-shoa?

Na Molimo oa Tsotella?

4, 5. Ke hobane’ng ha batho ba nahana hore Molimo ha a re tsotelle?

⁴ A re qaleng ka potso e reng, Na Molimo oa re tsotella? Ka masoabi, batho ba bangata ba nahana hore ha a re tsotelle. Ke hobane’ng ha ba ikutloa ka tsela eo? Le leng la mabaka ke hore ba phela lefatšeng le tletseng lehloeo, lintoa le lintho tse bohloko. Ba beha lebaka la ho re: ‘Haeba Molimo a hlile a tsotella, ka sebele a ka be a thibela lintho tsena tse bohloko hore li se ke tsa etsahala.’

⁵ Lebaka le leng hape leo ka lona batho ba nahanang hore Molimo ha a re tsotelle ke hore baeta-pele ba bolumeli ba entse hore ba ikutloe ka tsela eo. Baruti ba atisa ho re’ng ha ho hlaha tlokotsi? Ha mosali e mong a ne a hlokahalletsoe ke bana ba babeli ba banyenyane kotsing ea koloi, moruti oa hae o ile a re: “Ke thato ea Molimo. Molimo o ne a batla mangeloi a mang a mabeli.” Ha baruti ba bua joalo, ba hlile ba beha Molimo molato ka lintho tse bohloko tse etsahalang. Empa, morutuoa Jakobo o ile a ngola a re: “Ha a le tlas’a teko, ho se ke ha e-ba le ea reng: ‘Ke ntse ke lekoa ke Molimo.’ Etsoe Molimo a ke ke a lekoa ka lintho tse mpe kapa hona hore o leka leha e le mang ka tsona.” (Jakobo 1:13) Ha ho mohla Jehova Molimo a bakang lintho tse mpe. Ka sebele “ho ke ho be hōle le Molimo oa ’nete hore a sebetse bokhopo.”—Jobo 34:10.

 6. Ke mang ea hlohlelletsang bokhopo le bohloko lefatšeng lee?

⁶ Ebe joale ke hobane’ng ha bokhopo le lintho tse bohloko li atile hakaale? Lebaka ke hore batho ka kakaretso ba hana Bobusi ba Molimo, ha ba batle ho ikokobelletsa melao le melao-motheo ea hae e lokileng. Kaha “lefatše lohle le rapaletse matleng a ea khopo,” batho ha ba hlokomele hore ba ikokobeletsa Sera sa Molimo, e leng Satane. (1 Johanne 5:19) Ha re tseba ’nete ena, re tla utloisisa habonolo hore na ke hobane’ng ha maemo a mabe a le teng. Satane o khopo, o tletse lehloeo, o leshano, ebile o sehlōhō. Kahoo, re ka lebella hore lefatše le bonahatse botho ba ’musi oa lona. Hase feela bokhopo bo atileng hakana!

 7. Mabaka a mang ao re hlaheloang ke lintho tse bohloko ka ’ona ke afe?

⁷ Lebaka le leng leo ka lona batho ba utloang bohloko ke hobane ha baa phethahala. Batho ba baetsalibe ba rata ho loanela ho busa ba bang, ’me sena se atisa ho baka lintoa, khatello le lintho tse bohloko. Moeklesia 8:9 e nepile ha e re: ‘Motho o busitse motho ho mo ntša kotsi.’ Lebaka le leng hape leo ka lona ho etsahalang lintho tse bohloko ke “hobane bohle ba hlaheloa ke nako le ketsahalo e sa lebelloang.” (Moeklesia 9:11) Batho ba atisa ho hlaheloa ke tlokotsi hobane ba le sebakeng se fosahetseng ka nako e fosahetseng.

8, 9. Re tseba joang hore Jehova o hlile oa re tsotella?

⁸ Ke ho tšelisang ho tseba hore Jehova ha a bake lintho tse bohloko. Empa na Molimo o hlile oa tsotella hore na re hlaheloa ke eng bophelong? Karabo e thabisang ke hore oa tsotella! Rea tseba hore Jehova oa tsotella hobane Lentsoe la hae le bululetsoeng le re bolella hore na ke hobane’ng ha a lumeletse batho hore ba tsoele pele ba etsa lintho tse mpe. Mabaka a Molimo a ama lintho tse peli tse tsekoang: e leng bobusi ba hae le botšepehi ba batho. Kaha Jehova ke ’Mōpi ea matla ’ohle, ha ho letho le mo tlamang hore a re bolelle hore na ke hobane’ng ha a lumeletse lintho tse bohloko. Leha ho le joalo, oa re bolella hobane oa re tsotella.

⁹ Ak’u nahane ka bopaki bo bong bo bontšang hore Molimo oa re tsotella. “Pelo ea hae [e ile] ea utloa bohloko” ha bobe bo tlala lefatše matsatsing a Noe. (Genese 6:5, 6) Na ebe kajeno Molimo ha a utloe bohloko? Oa bo utloa, hobane ha a fetohe. (Malakia 3:6) O hloile ho hloka toka ebile o hloile ho bona ha batho ba utloa bohloko. Bibele e ruta hore Molimo o tla tloha a etsolla lintho tsohle tse bohloko tse bakiloeng ke puso ea batho le tšusumetso ea Diabolose. Na ketso ee hase bopaki bo kholisang ba hore Molimo oa re tsotella?

10. Jehova o ikutloa joang ka lintho tse bohloko tse hlahelang batho?

¹⁰ Baruti ba bolumeli ba senya Molimo lebitso ha ba re ke thato ea hae ha re hlaheloa ke litlokotsi bophelong. Ho fapana le moo, Jehova o labalabela ho felisa lintho tse bohloko tse hlahelang batho. Petrose oa Pele 5:7 e re: “Oa [re] tsotella.” Sena ke sona seo Bibele e hlileng e se rutang!

Ke Hobane’ng ha re le Teng Lefatšeng Moo?

11. Hangata malumeli a lefatše lena a re’ng ka bophelo ba batho lefatšeng moo?

¹¹ A re ke re tšohleng potso ea bobeli eo batho ba bangata ba ipotsang eona, e reng, Ke hobane’ng ha re le teng lefatšeng moo? Malumeli a lefatše lena a atisa ho araba potso ena ka ho re motho ke mofeti mona lefatšeng. A nka hore lefatše ke feela sebaka seo motho a emisang ho sona ho se hokae leetong la hae ha a fetela sebakeng se seng seo a il’o phela ho sona. Baruti ba bang ba ruta leshano la hore ka letsatsi le leng Molimo o tlil’o felisa polanete ena e bitsoang lefatše. Ka lebaka la lithuto tse joalo, batho ba bangata ba entse qeto ea hore haeba ho joalo, ba lokela ho etsa sohle seo ba ka khonang ho se finyella bophelong ha ba sa ntsane ba e-na le monyetla kaha ba emetsoe ke lefu feela. Ha e le hantle, ke eng seo Bibele e se rutang ka hore na ke hobane’ng ha re le teng lefatšeng moo?

12-14. Bibele e ruta eng mabapi le morero oa Molimo ka lefatše le ka batho?

¹² Molimo o na le morero o babatsehang ka lefatše le ka moloko oa batho. Ha ‘aa ka a bōpela lefatše lefeela’ empa ‘o le etselitse hore le be le baahi.’ (Esaia 45:18) Ho feta moo, Jehova “o thehile lefatše holim’a libaka tsa lona tse tiisitsoeng; le ke ke la sisinngoa ho isa nakong e sa lekanyetsoang, kapa ka ho sa feleng.” (Pesaleme ea 104:5) Ho tseba lintho tsena mabapi le morero oa Molimo ka lefatše le ka batho ho ka re thusa ho utloisisa lebaka leo ka lona re leng teng lefatšeng mona.

¹³ Genese khaolo ea 1 le ea 2 e bontša hore Jehova o ile a lokisa lefatše ka hloko haholo hore batho ba tle ba ahe ho lona. Ha Molimo a qeta ho bōpa lintho lefatšeng lena la rōna, ntho e ’ngoe le e ’ngoe e ne e le “molemo haholo.” (Genese 1:31) Molimo o ile a beha monna oa pele le mosali, Adama le Eva, serapeng se setle sa Edene eaba o ba fa lijo tse ngata tse molemo. Batho ba babeli ba pele ba ile ba bolelloa: “Atang le ngatafale le tlale lefatše ’me le le buse.” Ba ne ba lokela ho ba le bana ba phethahetseng, ba atolosetse meeli ea lehae la bona la serapa lefatšeng lohle ’me ba buse liphoofolo ka lerato.—Genese 1:26-28.

¹⁴ Morero oa Jehova ke hore ho be le batho ba phethahetseng ba phelang ka ho sa feleng lefatšeng. Lentsoe la Molimo le re: “Ba lokileng ba tla rua lefatše, ba tla lula ho lona ka ho sa feleng.” (Pesaleme ea 37:29) Ka sebele morero oa Molimo e ne e le hore batho ba phele ka ho sa feleng lefatšeng la Paradeise. Ona ke oona morero oa Molimo, ’me ha e le hantle, ke sona seo Bibele e se rutang!

Ho Etsahala’ng ka Rōna ha re E-shoa?

15. Malumeli a mangata a lefatše a ruta hore ho etsahala’ng ka rōna ha re e-shoa?

¹⁵ Joale, a re tšohleng potso ea boraro eo batho ba bangata ba ipotsang eona: Ho etsahala’ng ka rōna ha re e-shoa? Malumeli a mangata a lefatše a ruta hore motho o na le ntho e ’ngoe ka hare ho eena e tsoelang pele e phela ha ’mele o e-shoa. Malumeli a mang a ntse a khomaretse khopolo ea hore Molimo o otla ba khopo ka hore a ba hlokofatse ka ho sa feleng mollong oa lihele. Empa na seo ke ’nete? Ha e le hantle, Bibele e ruta eng ka lefu?

16, 17. Ho ea ka Bibele, bafu ba boemong bofe?

¹⁶ Lentsoe la Molimo le re: “Ba phelang baa tseba hore ba tla shoa; empa ha e le ba shoeleng, ho hang ha ba tsebe letho, leha e le hore ba sa na le moputso.” Kaha “ho hang [bafu] ha ba tsebe letho,” ha ba khone ho utloa, ho bona, ho bua, ho ba le boikutlo, kapa ho nahana. Ha ba sa fumana moputso leha e le ofe. Ba ne ba ka o fumana joang? Ba ne ba ke ke ba o fumana hobane ha ba khone ho etsa mosebetsi leha e le ofe! Ho feta moo, “lerato la bona le lehloeo la bona le poulelo ea bona li se li timetse,” hobane ba ke ke ba bontša boikutlo ba letho.—Moeklesia 9:5, 6, 10.

¹⁷ Seo Bibele e se buang tabeng ena se bonolo ebile se hlakile—ha motho a shoele o shoele. Ha re e-shoa, ha ho letho le tsoang ’meleng ea rōna ebe le tsoela pele le phela e le hore le ka tsoaloa ka ’mele o mong, joalokaha ho lumela ba kholoang taba ea ho tsoaloa hangata. Re ka ’na ra tšoantša sena ka tsela ena: Bophelo ba rōna bo tšoana le lelakabe la kerese. Ha lelakabe leo le tima, ha ho moo le eang teng. Lea fela.

18. Ha seithuti sa Bibele se tseba hore bafu ha ba utloe letho, se ka etsa qeto efe?

¹⁸ Nahana ka se boleloang ke ’nete eo e bonolo empa e le matla. Ha seithuti sa Bibele se ithutile hore bafu ha ba tsebe letho, se ka etsa qeto habonolo hore ho sa tsotellehe hore na baholo-holo ba sona ba shoeleng ba ne ba se hloile hakae ha ba sa ntse ba phela, ba ke ke ba se khathatsa. Hape se lokela ho utloisisa kapele hore baratuoa ba sona ba shoeleng ba ke ke ba hlola ba utloa, ba bona, ba bua, ba e-ba le boikutlo, kapa ba nahana. Kahoo, e ke ke eaba ba qetoa ke bolutu pelekatoring kapa ba ntse ba hlokofatsoa sebakeng sa tlhokofatso ea mollo. Ho e-na le hoo, Bibele e ruta hore bafu ba leng khopolong ea Molimo ba tla tsosoa. Ke tšepo e babatsehang hakaakang!—Johanne 5:28, 29.

Buka e Ncha eo re e Sebelisang

19, 20. Boikarabelo ba rōna ke bofe joaloka Bakreste, ’me ke buka efe e rutang Bibele e lokiselitsoeng hore re e sebelise tšebeletsong?

¹⁹ Re tšohlile lipotso tse tharo feela tseo batho ba bangata ba ipotsang tsona. Potsong ka ’ngoe, seo Bibele e se rutang se hlakile ebile sea utloahala. Ke ntho e thabisang hakaakang ho tšohla linnete tsee le batho ba batlang ho tseba seo Bibele e se rutang! Empa ho na le lipotso tse ling tse ngata tsa bohlokoa tseo batho ba lipelo li tšepahalang ba batlang likarabo tsa tsona tse khotsofatsang. Boikarabelo ba rōna joaloka Bakreste ke ho ba thusa hore ba fumane likarabo tsa lipotso tsena.

²⁰ Ke phephetso ho ruta ’nete ea Bibele ka tsela e hlakileng le e ipiletsang lipelong tsa batho. E le ho re thusa hore re thulane le phephetso eo, “lekhoba le tšepahalang le le masene” le lokiselitse buka eo ka ho khetheha re e sebelisang tšebeletsong ea rōna ea Bokreste. (Matheu 24:45-47) Buka ena, e na le maqephe a 224, ’me e bitsoa Ha e le Hantle ke Eng Seo Bibele e se Rutang?

21, 22. Litšobotsi tse ling tse molemo tsa buka ea Ha e le Hantle ke Eng Seo Bibele e se Rutang? ke life?

²¹ Buka ena e ileng ea lokolloa Likopanong Tsa Setereke Tsa Lipaki Tsa Jehova Tsa “Ho Mamela Molimo” tsa 2005/06, e na le litšobotsi tse fapa-fapaneng tse molemo. Ka mohlala, e na le selelekela sa maqephe a mahlano se thusang haholo ho qalisa lithuto tsa mahae tsa Bibele. Ha ho pelaelo hore u tla nolofalloa ho bua ka litšoantšo le litemana tse hlahang selelekeleng sena. Hape u ka sebelisa taba e karolong ena ho bontša liithuti tsela ea ho fumana likhaolo le litemana tsa Bibele.

²² Buka ena e ngotsoe ka mokhoa o bonolo le o utloahalang. Ho entsoe boiteko ba hore ho finyelloe pelo ea seithuti ka hore se bue neng le neng ha ho khoneha. Khaolo e ’ngoe le e ’ngoe e na le lipotso tse ’maloa tsa selelekela ’me qetellong e na le lebokose le nang le sehlooho se reng, “Seo Bibele e se Rutang.” Lebokose lena le na le likarabo tsa Mangolo tsa lipotso tse kenyelletsang khaolo ka ’ngoe. Litšoantšo tse ntle tse nang le mantsoe a li hlalosang haesita le lipapiso tsa buka ena, li tla thusa seithuti ho utloisisa maikutlo a macha. Le hoja likhaolo tsa buka ena li ngotsoe ka mokhoa o bonolo haholo, ho na le sehlomathiso se tla u thusa hore u tšohle ka botebo lintlha tse 14 tsa bohlokoa haeba seithuti se hloka boitsebiso bo eketsehileng.

23. Ho fanoa ka litlhahiso life tse ka sebelisoang lithutong tsa Bibele ha ho rutoa ka buka ea Seo Bibele e se Rutang?

²³ Buka ea Seo Bibele e se Rutang e ngotsoe ka morero oa ho re thusa hore re rute batho ba maemo a sa tšoaneng a thuto le ba malumeli a sa tšoaneng. Haeba seithuti se sa tsebe letho ka Bibele, ho ka ’na ha hlokahala hore le ithute khaolo e le ’ngoe le sona ka mekhahlelo. U se ke ua potlakela ho qeta khaolo, empa u leke ho finyella pelo ea seithuti. Haeba se sa utloisise papiso e itseng e sebelisitsoeng bukeng, e hlalose kapa u sebelise papiso e ’ngoe. Lokisetsa hantle, ’me u etse sohle se matleng a hao hore u sebelise buka ena hamolemo, u be u rapelle thuso ea Molimo hore u ‘tšoare lentsoe la ’nete ka nepo.’—2 Timothea 2:15.

Leboha Litokelo Tse Khōlōhali Tseo U li Filoeng

24, 25. Jehova o file batho ba hae litokelo life tse khōlōhali?

²⁴ Jehova o file batho ba hae litokelo tse khōlōhali. O re nolofalelitse hore re tsebe seo e leng ’nete ka eena. Le ka mohla ha rea lokela ho nka tokelo eo habobebe! Etsoe Molimo o senoletse ba ikokobelitseng merero ea hae empa o e patetse ba ikhohomosang. Tabeng ena, Jesu o ile a re: “Ke u rorisa phatlalatsa, Ntate, Morena oa leholimo le lefatše, hobane u patetse ba bohlale le ba nang le kelello lintho tsena ’me u li senoletse bana.” (Matheu 11:25) Ke tlotla e khōlō ho balelloa har’a ba ikokobelitseng ba sebeletsang Jehova, ’Musi oa Bokahohle.

²⁵ Molimo o boetse o re file tokelo ea ho ruta ba bang ka eena. Hopola hore Molimo o sentsoe lebitso ke batho ba ’nileng ba ruta mashano ka eena. Ka hona, batho ba bangata ba na le maikutlo a fosahetseng ka ho feletseng ka Jehova, ba nahana hore ha a tsotelle ebile ha a na kutloelo-bohloko. Na u ikemiselitse, ’me hape u na le cheseho ea ho thusa hore taba ee e lokisoe? Na u batla hore batho ba lipelo li tšepahalang ba libakeng tsohle ba tsebe seo e leng ’nete ka Molimo? Kahoo, etsa sohle se matleng a hao ho bontša hore u mamela Molimo ka hore u bolelle batho ba bang le ka hore u ba rute ka cheseho seo Mangolo a se bolelang litabeng tsa bohlokoa. Hoa hlokahala hore batho ba batlang ’nete ba ithute hore na ha e le hantle ke eng seo Bibele e se rutang.

U ka Araba Joang?

• Re tseba joang hore Molimo oa re tsotella?

• Ke hobane’ng ha re le teng lefatšeng moo?

• Ho etsahala’ng ka rōna ha re e-shoa?

• Ke litšobotsi life tseo u li ratang haholo bukeng ea Seo Bibele e se Rutang?

[Litšoantšo tse leqepheng la 22]

Bibele e ruta hore lintho tse bohloko li tla fela

[Litlhaloso Tsa Moo Litšoantšo li Nkiloeng Teng]

Top, girl: © Bruno Morandi/age fotostock; middle, woman: AP Photo/Gemunu Amarasinghe; bottom, refugees: © Sven Torfinn/Panos Pictures

[Setšoantšo se leqepheng la 23]

Ba lokileng ba tla phela ka ho sa feleng Paradeiseng