‘Jehova, U Nteke’

“JEHOVA ke eena ea hlahlobang lipelo.” (Liproverbia 17:3) Seo se lokela ho khothatsa e mong le e mong oa rōna haholo. Hobane’ng? Hobane ho fapana le batho, ba ahlolang ka seo ba se bonang ka mahlo a bona, Ntate oa rōna oa leholimo “o bona seo pelo e leng sona.”—1 Samuele 16:7.

Ha e le hantle, le rōna ka borōna ha re khone ho hlahloba hamolemo sepheo sa rōna le litšekamelo tsa rōna. Hobane’ng? Hobane ‘lipelo tsa rōna li bolotsana ho feta ntho leha e le efe ’me li tsitlella seo li se batlang. Ke mang ea ka li tsebang?’ Leha ho le joalo, Molimo o tseba pelo hamolemo, hobane o re: “’Na, Jehova, ke hlahloba pelo, ke phenya liphio.” (Jeremia 17:9, 10) Ka sebele, Jehova o utloisisa “pelo”—ho akarelletsa le lintho tse re susumetsang ho tsoa botebong ba pelo—hammoho le “liphio,” mehopolo le maikutlo a rōna a tebileng.

Ke Hobane’ng ha ba Lekoa?

Ha ho makatse hore ebe Morena Davida oa boholo-holo o ile a re ho Molimo: “Ntlhahlobe, Jehova, ’me u nteke; hloekisa liphio tsa ka le pelo ea ka.” (Pesaleme ea 26:2) Na liketso le lipuo tsa Davida li ne li hloekile ka ho feletseng, hoo a neng a ke ke a tšaba letho haeba Jehova a ne a ka mo leka? Ho hlakile hore ha ho joalo! Joaloka rōna kaofela, Davida o ne a sa phethahala ’me a sa khone ho finyella litekanyetso tsa Molimo ka ho phethahetseng. Davida o ile a etsa libe tse tebileng ka lebaka la mefokolo ea hae, empa ho sa tsotellehe seo, o ile a ‘tsamaea ka pelo e tšepahalang.’ (1 Marena 9:4) Joang? Ka ho amohela khalemelo le ho lokisa litsela tsa hae. Ka lebaka leo, o ile a bontša hore o rata Jehova e le kannete. O ne a inehetse ho Molimo ka ho feletseng.

Ho thoe’ng ka rōna kajeno? Jehova oa tseba hore ha rea phethahala le hore re ka sitoa ka lipuo le ka liketso. Leha ho le joalo, ha a sebelise bokhoni ba hae ba ho tseba bokamoso esale pele hore a laole tsela eo re tla phela ka eona. O re bōpile re e-na le bolokolohi ba ho ikhethela ebile o hlompha bolokolohi boo—e leng mpho eo a re fileng eona ka lerato.

Ho ntse ho le joalo, ka linako tse ling Jehova o leka maikutlo a rōna a tebileng,

ho akarelletsa le sepheo sa rōna. A ka ’na a etsa sena ka ho re fa menyetla ea hore re senole se ka lipelong tsa rōna. A ka boela a lumella maemo kapa liphephetso tse sa tšoaneng hore li senole lintho tseo lipelo tsa rōna li sekametseng ho tsona. Sena se re fa monyetla oa ho bontša Jehova hore na re inehetse ho eena hakae le hore na re tšepahala hakae. Liteko tse joalo tseo Jehova a li lumellang li ka ’na tsa bontša boleng ba tumelo ea rōna, hore na re “ba feletseng le ba phethahetseng ka litsela tsohle, le [ba sa haelloeng] ke letho.”—Jakobo 1:2-4.

Teko ea Boholo-holo ea Tumelo

Lintho tse lekang tumelo le sepheo seo bahlanka ba Jehova ba etsang lintho ka sona ha li ncha. Nahana ka mopatriareka Abrahama. “Molimo oa ’nete [o ile] a leka Abrahama.” (Genese 22:1) Ha mantsoe ao a ne a buuoa, tumelo ea Abrahama ho Molimo e ne e se e lekiloe. Lilemo tse mashome pele ho moo, Jehova o ne a ile a kōpa Abrahama hore eena le lelapa la hae ba tlohe motseng o atlehileng oa Ure ba ee naheng eo ba neng ba sa e tsebe. (Genese 11:31; Liketso 7:2-4) Abrahama, eo ho ka etsahalang hore ebe o ne a e-na le ntlo ea hae Ure, ha aa ka a reka sebaka sa bolulo se tsitsitseng Kanana, moo a ileng a lula teng ka lilemo tse mashome. (Baheberu 11:9) Bophelo ba hloma-u-hlomole boo Abrahama a neng a bo phela bo ne bo ka ’na ba etsa hore eena le lelapa la hae ba bolaoe ke tlala, ba hlaseloe ke batho ba hlometseng le babusi ba bahetene ba sebaka seo. Nakong ena eohle, ho ile ha hlaka hore tumelo ea Abrahama ke ea boleng bo phahameng ka ho fetisisa.

Joale Jehova a beha Abrahama tekong e khōloanyane. A re ho eena: “Ka kōpo, nka mora oa hao, mora oa hao ea mong eo u mo ratang haholo, Isaka, . . . u mo nyehele e le nyehelo ea secheso.” (Genese 22:2) Ho Abrahama Isaka e ne e se mora feela tjee. E ne e le eena feela ngoana oa Abrahama le mosali oa hae, Sara. Isaka e ne e le mora ea tšepisitsoeng, e le eena feela eo Abrahama a neng a tšepile hore “peō” ea hae e neng e tla ja naha ea Kanana lefa e tla tsoa ho eena ’me e be tlhohonolofatso ho ba bangata, ho latela tšepiso ea Molimo. Ha e le hantle, Isaka e ne e le eena mora eo ho neng ho lebeletsoe hore Abrahama a be le eena le ea neng a hlahile ka mor’a mohlolo oo Molimo a o entseng!—Genese 15:2-4, 7.

U ka inahanela hore e tlameha ebe ho ne ho le thata hakae hore Abrahama a utloisise taelo ena. Na Jehova o ne a tla batla hore motho a etsoe sehlabelo? Ke hobane’ng ha Jehova a ne a ka etsa hore Abrahama a latsoe monate oa ho ba le mora botsofaling ba hae, ebe o mo kōpa hore a etse mora eo sehlabelo?a

Abrahama o ile a phetha taelo eo a e filoeng le hoja a ne a sa fuoa likarabo tse hlakileng tsa lipotso tsena. O ile a nka matsatsi a mararo ho ea fihla thabeng e khethiloeng. Ha a le moo a haha aletare ’me a beha patsi holim’a eona. Joale teko ena ea fihla sehlohlolong. Abrahama a nka thipa, empa ha a le makhatheng a ho bolaea mora oa hae, Jehova a mo thibela ka lengeloi la hae ’me a re: “Joale kea tseba hore u tšaba Molimo kahobane ha ua nkhanela ka mora oa hao, ea mong feela.” (Genese 22:3, 11, 12) Nahana hore na Abrahama o ile a thaba hakaakang ha a utloa mantsoe ao! Pono eo Jehova a neng a e-na le eona ka tumelo ea hae e ne e nepahetse. (Genese 15:5, 6) Ka mor’a moo, Abrahama a etsa sehlabelo ka pheleu e ileng ea nkela Isaka sebaka. Eaba Jehova o tiisa litšepiso tsa selekane se mabapi le peō ea Abrahama. Ke ka lebaka le utloahalang Abrahama a ileng a tsejoa e le motsoalle oa Jehova.—Genese 22:13-18; Jakobo 2:21-23.

Tumelo ea Rōna le Eona ea Lekoa

Kaofela ha rōna rea hlokomela hore kajeno bahlanka ba Molimo ba ke ke ba phema liteko. Leha ho le joalo, teko e ka ba lintho tseo Jehova a lumellang hore li re hlahele eseng tseo a re bolellang hore re li etse.

Moapostola Pauluse o ile a ngola: “Bohle ba lakatsang ho phela ka boinehelo ba bomolimo kamanong le Kreste Jesu le bona ba tla hlorisoa.” (2 Timothea 3:12) Mahloriso a joalo a ka tsoa ho liithuti-’moho le rōna, metsoalle, beng ka rōna, baahelani, kapa ba boholong ba thetsitsoeng. A ka ’na a akarelletsa lipuo tse mpe le tlhekefetso haesita le maemo a sitisang Mokreste ho fumana lintho tseo a ka iphelisang ka tsona. Bakreste ba ’nete ba boetse ba hlaheloa ke mathata a hlahelang mang kapa mang—e leng ho kula, ho soetseha le ho hloka toka. Liteko tsohle tse joalo li leka tumelo ea motho.

Moapostola Petrose o ile a hatisa melemo ea ho lekoa ha tumelo ha a re: “Le baketsoe mesarelo ke liteko tse sa tšoaneng, e le hore tšobotsi e lekiloeng ea tumelo ea lōna, ea bohlokoa bo boholo ho feta khauta e timelang ho sa tsotellehe ho pakoa ha eona ka mollo, e ka fumanoa e le lebaka la thoriso le khanya le tlhompho tšenolong ea Jesu Kreste.” (1 Petrose 1:6, 7) Ka hona, liphello tsa liteko li bapisoa le ho hloekisoa ha khauta ka mollo. Tlhoekiso eo e senola se hloekileng ’me e tšeka litšila. Ho etsahala ntho e tšoanang ka tumelo ea rōna ha re hlaheloa ke liteko.

Ka mohlala, kotsi e itseng kapa koluoa ea tlhaho e ka fella ka mathata. Ho ntse ho le joalo, ba nang le tumelo ea sebele ha ba tšoenyehe ka ho feteletseng. Ba tšelisoa ke mantsoe ana a Jehova a kholisang: “Ho hang nke ke ka u tlohela kapa ka u furalla.” (Baheberu 13:5) Ba tsoela pele ho etelletsa pele lintho tsa moea, ba kholisehile hore Jehova Molimo o tla hlohonolofatsa boiteko boo ba bo etsang ba ho fumana seo ba hlileng ba se hlokang. Tumelo ea bona ea ba matlafatsa linakong tse thata ’me e ba thusa hore ba se ke ba mpefatsa boemo ba bona ka ho tšoenyeha ho sa hlokahaleng.

Taba ea hore liteko li ka ’na tsa senola mefokolo e itseng tumelong ea rōna le eona e ka ba molemo haeba re hlokomela hore re lokela ho nka mehato ea ho ntlafatsa. Motho o lokela ho ipotsa lipotso tsena: ‘Nka matlafatsa tumelo ea ka joang? Na ho hlokahala hore ke nke nako e eketsehileng ke ithuta Lentsoe la Molimo ka botebo ke bile ke thuisa ka lona? Na ke sebelisa monyetla o mong le o mong oa ho ba teng libokeng le balumeli-’moho le ’na? Na kea itšepa ho e-na le hore ke tsebise Jehova Molimo lintho tseo ke amehileng ka tsona?’ Leha ho le joalo, ho itlhahloba ho joalo ke qalo feela.

E le hore motho a matlafatse tumelo ea hae ho ka ’na ha hlokahala hore a leotse takatso ea hae ea lijo tsa moea, a bontše “tabatabelo ea lebese le sa tsoakoang la lentsoe.” (1 Petrose 2:2; Baheberu 5:12-14) Re lokela ho loanela ho tšoana le motho eo mopesaleme a ileng a mo hlalosa ha a re: “O thabela molao oa Jehova, molao oa hae o o bala ka lentsoe le tlaase bosiu le motšehare.”—Pesaleme ea 1:2.

Ho bala Bibele feela ha hoa lekana. Ke habohlokoa hore re nahane ka seo Lentsoe la Molimo le re bolellang sona, ’me re sebelise keletso eo re e fuoang. (Jakobo 1:22-25) Ka lebaka leo, lerato la rōna ho Molimo le tla hōla, lithapelo tsa rōna li tla toba taba haholoanyane ’me re mo tšollele maikutlo, ’me tumelo ea rōna ho eena e be matla haholoanyane.

Bohlokoa ba Tumelo e Lekiloeng

Se ka re susumetsang ka matla hore re matlafatse tumelo ea rōna, ke ho tseba hore tumelo ea hlokahala e le hore Molimo a re amohele. Bibele ea re hopotsa ha e re: “Kantle ho tumelo ho ke ke ha khoneha ho mo khahlisa, kaha ea atamelang Molimo o lokela ho lumela hore o teng le hore e ba moputsi oa ba mo batlang ka tieo.” (Baheberu 11:6) Kahoo, re lokela ho ikutloa joaloka monna ea ileng a kōpa Jesu ka tieo a re: “Nthuse moo ke hlokang tumelo!”—Mareka 9:24.

Liteko tsa tumelo ea rōna li ka boela tsa thusa ba bang. Ka mohlala, ha Mokreste a shoeloa ke moratuoa oa hae, tumelo ea hae e matla tšepisong ea Molimo ea tsoho ea mo matlafatsa. Oa siama, empa ha a ‘sareloe feela joalokaha ba bang kaofela ba se nang tšepo le bona ba sareloa.’ (1 Bathesalonika 4:13, 14) Ba bang ba lemohang kamoo tumelo ea Mokreste enoa e mo matlafatsang kateng ba ka elelloa hore o na le ntho e ’ngoe eo ruri e leng ea bohlokoa. Sena se ka fehla ka hare ho bona takatso ea ho ba le tumelo e tšoanang, sa ba susumelletsa ho ithuta Lentsoe la Molimo le ho ba barutuoa ba Jesu Kreste.

Jehova oa tseba hore tumelo e lekiloeng ke ea bohlokoa haholo. Ho phaella moo, liteko tsa tumelo li re nolofalletsa ho bona hore na tumelo ea rōna e matla hakae. Re thusoa ho bona moo tumelo ea rōna e fokolang teng, e leng se re nolofalletsang ho lokisa boemo. Taba ea ho qetela ke hore ha re feta litekong ka katleho, seo se ka thusa ba bang hore e be barutuoa ba Jesu. Ka hona, e se eka re ka etsa sohle seo re ka se khonang ho lula re le matla tumelong—e leng tumelo ‘e tla fumanoa e le lebaka la thoriso le khanya le tlhompho tšenolong ea Jesu Kreste’ ka mor’a hore e fete litekong tse fapa-fapaneng.—1 Petrose 1:7.

[Mongolo o botlaaseng ba leqephe]

[Setšoantšo se leqepheng la 13]

Mesebetsi ea Abrahama ea tumelo e ile ea etsa hore e be motsoalle oa Jehova

[Setšoantšo se leqepheng la 15]

Liteko li ka bontša hore ka sebele tumelo ea rōna e matla

[Tlhaloso ea Moo Setšoantšo se Nkiloeng Teng e leqepheng la 12]

From the Illustrated Edition of the Holy Scriptures by Cassell, Petter, & Galpin