Babali ba Batla ho Tseba

Na ’Muso oa Molimo o ka Lipelong?

Kajeno ba bangata ba lumela hore karabo ea potso e ka holimo ke e. Ka mohlala, The Catholic Encyclopedia ha e hlathe koana le koana e re: “’Muso oa Molimo o bolela hore . . . Molimo o laola ka lipelong tsa rōna.” Baruti ba ruta khopolo ena haholo. Na ka sebele Bibele e ruta hore ’Muso oa Molimo o ka lipelong tsa batho?

Ba bang ba nahana hore ha e le hantle motho oa pele ea ileng a fana ka maikutlo a hore ’Muso oa Molimo o ka lipelong tsa batho ke Jesu. Ke ’nete hore Jesu o ile a re: “Bonang! ’Muso oa Molimo o har’a lōna.” (Luka 17:21) Libibele tse ling tsona li re: “’Muso oa Molimo o ho lōna” ha tse ling tsona li re “o ka hare ho lōna.” Na li fetoletse mantsoe a Jesu ka nepo? Na ka sebele o ne a bolela hore ’Muso oa Molimo o ka lipelong tsa batho?

Tabeng ea pele, ak’u nahane feela hore na pelo ea motho e joang. Bibele e re pelo ea tšoantšetso ke motho ea ka hare, ke moo ho simolohang mehopolo ea motho le maikutlo a hae. Khopolo ea hore ntho e hlomphehang joaloka ’Muso oa Molimo e ka pelong ea motho—kahobane ka mohlala, ’Muso oa Molimo o khona ho fetola batho le ho ba etsa ba hlomphehang—e ka ’na ea thabisa, empa na ea utloahala?

Bibele e re: “Pelo e bolotsana ho feta ntho leha e le efe ’me e tsitlella seo e se batlang.” (Jeremia 17:9) Jesu o ile a re: “Ka hare, ka lipelong tsa batho, ho hlaha menahano e kotsi: bohlola, bosholu, lipolao, bofebe, ho chacheha ka mohono, liketso tsa bokhopo.” (Mareka 7:20-22) Ak’u nahane: Na boholo ba masisa-pelo ao re a bonang lefatšeng kajeno ha a simolohe lipelong tsa batho tse khopo? Kahoo, ke joang ’Muso oa Molimo o phethahetseng o ka simolohang moo? Ha e le hantle, joalokaha hlaba-hlabane e ke ke ea beha lifeiga, le pelo ea motho e ke ke ea hlahisa ’Muso oa Molimo.—Matheu 7:16.

Tabeng ea bobeli, ak’u nahane ka batho bao Jesu a neng a bua le bona ha a bua mantsoe a ho Luka 17:21. Temana e tlang pele ho ’ona e re: “Ha Bafarisi ba mo botsa hore na ’muso oa Molimo o tla neng, a ba araba.” (Luka 17:20) Bafarisi e ne e le lira tsa Jesu. Jesu o ile a re baikaketsi bao ba ne ba ke ke ba kena ’Musong oa Molimo. (Matheu 23:13) Haeba Bafarisi ba ne ba ke ke ba kena ’Musong oa Molimo, na ’Muso oo o ne o ka ba ka lipelong tsa bona? Le hanyenyane! Ekaba Jesu o ne a bolela’ng?

Ha Libibele tse ’maloa tse fetoletsoeng ka hloko li fetolela mantsoe ao a Jesu, li sebelisa mantsoe a tšoanang le a Phetolelong ea Lefatše le Lecha. Tse ling li re “o ho lōna” kapa “o har’a lōna.” Ke joang ’Muso oa Molimo o neng o le har’a batho ba mehleng eo, ho akarelletsa le Bafarisi? Jesu ke eena ea neng a khethiloe ke Jehova Molimo ho ba Morena oa ’Muso oa Molimo. E le Morena ea Khethiloeng, Jesu o ne a le har’a batho bao. O ile a ruta ka ’Muso oa Molimo a ba a etsa le mehlolo, a ba bontša esale pele seo ’Muso oo o neng o tla se etsa. Kahoo, ka sebele ’Muso o ne o le har’a bona.

Ho hlakile hore Mangolo ha a tšehetse khopolo ea hore ’Muso oa Molimo o ka lipelong tsa batho. Ho e-na le hoo, ke puso ea sebele, e tla tlisa liphetoho tse khōlō lefatšeng, joalokaha baprofeta ba boletse esale pele.—Esaia 9:6, 7; Daniele 2:44.