Lipotso Tse Tsoang ho Babali

Moapostola Pauluse o ile a re “Baiseraele bohle ba tla pholosoa.” (Bar. 11:26) Na o ne a bolela hore ho tla fihla nako eo ka eona Bajuda bohle ba tla sokolohela Bokresteng?

Che, seo hase sona seo Pauluse a neng a se bolela. E le sechaba, litloholo tsa Abrahama li ile tsa hana ho amohela Jesu e le Mesia. Ha ho se ho fetile lilemo ka mor’a lefu la Jesu, ho ile ha hlaka hore hase sechaba sohle sa Bajuda se neng se tla sokolohela Bokresteng. Leha ho le joalo, mantsoe a Pauluse a reng “Baiseraele bohle ba tla pholosoa” e ne e le ’nete. Joang?

Ha Jesu a bua le baeta-pele ba Bajuda ba mehleng ea hae, o ile a re: “’Muso oa Molimo o tla nkuoa ho lōna ’me o fuoe sechaba se hlahisang litholoana tsa oona.” (Mat. 21:43) Kahobane sechaba sa Iseraele ka kakaretso se ne se hanne ho amohela Jesu, Jehova o ne a tla retelehela ho sechaba se secha, sa moea. Pauluse o ile a re sechaba sena ke “Iseraele ea Molimo.”—Bagal. 6:16.

Litemana tse ling tse hlahang Mangolong a Segerike a Bakreste li tiisa hore “Iseraele ea Molimo” e entsoe ka Bakreste ba 144 000 ba tlotsitsoeng ka moea. (Bar. 8:15-17; Tšen. 7:4) Tšenolo 5:9, 10 e tiisa hore sehlopha sena se ne se tla akarelletsa batho bao e seng Bajuda, kaha e bontša hore Bakreste ba tlotsitsoeng ba tsoa “molokong o mong le o mong le lelemeng le leng le le leng le bathong ba bang le ba bang le sechabeng se seng le se seng.” Bao e leng litho tsa Iseraele ea moea ba khethetsoe ho ba “’muso le baprista . . . , ’me ba tla busa e le marena holim’a lefatše.” Le hoja Jehova a ile a lahla Iseraele hore e se ke ea hlola e e-ba sechaba se khethiloeng, batho ka bomong ba ne ba ka boela ba ba le kamano e ntle le eena. Seo ke sona se ileng sa etsahala ka baapostola le Bakreste ba bang ba bangata ba pele. Ho hlakile hore joaloka batho ba bang kaofela, Bajuda ba joalo ba ne ba lokela ho rekoa ka mali a Jesu Kreste.—1 Tim. 2:5, 6; Baheb. 2:9; 1 Pet. 1:17-19.

Le hoja lekholong la pele la lilemo boholo ba batho bao e neng e le Bajuda ka tsoalo ba sa ka ba amohela monyetla oa ho ba babusi-’moho le Jesu, seo ha sea ka sa sitisa morero oa Molimo ho phethahala. Le ka mohla seo se ne se ke ke sa etsahala, hobane Jehova o ile a re moprofeta oa hae a phatlalatse sena: “Le lentsoe la ka le tsoang molomong oa ka le tla ba joalo. Le ke ke la khutlela ho ’na le se na litholoana, empa ka sebele le tla etsa seo ke se thabelang, ’me ka sebele le tla atleha ho seo ke le rometseng sona.”—Esa. 55:11.

Ke sona se tla etsahala mabapi le morero oa Molimo oa ho hlomamisa ba 144 000 hore ba buse hammoho le Mora oa hae leholimong. Bibele e hlakisa hore Molimo o ne a tla tlotsa ba 144 000 kaofela ha bona. Ho ne ho ke ke ha haella le ea mong feela.—Tšen. 14:1-5.

Kahoo, ha Pauluse a ne a re “Baiseraele bohle ba tla pholosoa,” o ne a sa bolele hore Bajuda bohle ba tla sokolohela Bokresteng. Ho e-na le hoo, o ne a bolela hore morero oa Molimo oa hore Baiseraele ba moea ba 144 000 ba buse le Mora oa Hae, Jesu Kreste, leholimong o ne o tla phethahala. Ka nako ea Molimo e loketseng, lenane le feletseng—“Baiseraele bohle”—le ne le tla pholosoa ’me qetellong e be marena le baprista ’Musong oa Mesia.—Baef. 2:8.

[Litšoantšo tse leqepheng la 28]

Batlotsuoa ba tsoa “molokong o mong le o mong le lelemeng le leng le le leng le bathong ba bang le ba bang le sechabeng se seng le se seng”