Jehova—“Mopholosi” Mehleng ea ha ho ne ho Ngoloa Bibele
“Molimo, u nke bohato ka potlako bakeng sa ka. U thuso ea ka le Mopholosi oa ka.”—PES. 70:5.
1, 2. (a) Barapeli ba Molimo ba kōpa thuso ho eena neng? (b) Ho hlaha potso efe, ’me re ka fumana karabo hokae?
HA BATSOALI ba mosali e mong ea lilemo li 23 ba le phomolong, ba tsebisoa hore morali oa bona o nyametse ka mohlolo. Pelaelo ke hore o bolailoe. Hang-hang ba phutha thōtō ba khutlela hae, ba ntse ba rapela Jehova hore a ba thuse. Ho fumanoa hore Paki e lilemo li 20 e na le lefu le tla qetella le entse hore e shoe litho ka ho feletseng. Kapele-pele e rapela Jehova. ’Mè ea se nang molekane ea lekang ka thata ho fumana mosebetsi, ha a na chelete e lekaneng ea hore eena le morali oa hae ea lilemo li 12 ba reke lijo. O rapela Jehova ka pelo eohle. Ka sebele, ho tloaelehile hore barapeli ba Molimo ba kōpe thuso ho eena ha ba thulana le mathata kapa liteko tse boima. Na u kile ua kōpa Jehova hore a u thuse ha u ne u le mathateng a maholo?
2 Ho hlaha potso ea bohlokoa: Na ka sebele re ka lebella hore Jehova a arabe lithapelo tsa rōna ha re kōpa thuso? Karabo e matlafatsang tumelo e fumanoa Pesalemeng ea 70. Pesaleme ena e susumetsang e ngotsoe ke Davida, morapeli ea tšepahalang oa Jehova ea ileng a tobana le liteko le mathata a mangata a boima bophelong ba hae. Mopesaleme enoa ea bululetsoeng o ile a susumelletseha hore a re ka Jehova: “Molimo, . . . u thuso ea ka le Mopholosi oa ka.” (Pes. 70:5) Ho hlahloba Pesaleme ea 70 ho ka re thusa ho bona hore na ke hobane’ng ha le rōna re ka rapela Jehova ha re le mathateng ’me re be le tšepo e feletseng ea hore e tla ba “Mopholosi” oa rōna.
‘U Mopholosi’
3. (a) Pesalemeng ea 70 ho etsoa kōpo efe e potlakileng ea thuso? (b) Davida o bontša kholiseho efe Pesalemeng ea 70?
3 Pesaleme ea 70 e qala ka ho kōpa thuso e potlakileng ho Molimo ebile e qetella ka eona. (Bala Pesaleme ea 70:1-5.) Davida o kōpa Jehova ka tieo hore a “potlakele” ho mo thusa le hore a “nke bohato ka potlako” hore a mo lopolle. Litemaneng tse lipakeng, Davida o etsa likōpo tse matla tse hlano, ’me o qala kōpo ka ’ngoe ka ho re “e se eka,” e leng se bontšang seo a neng a se lakatsa kapa a se kōpa. Likōpo tsa pele tse tharo li mabapi le ba neng ba leka ho mo bolaea. Davida o kōpa Jehova hore a hlōle lira tsena le hore a li hlabise lihlong ka lebaka la bokhopo ba tsona. Likōpo tse peli tse latelang, tse temaneng ea 4, li ama batho ba Molimo. Davida o rapella hore ba batlang Jehova ba thabe ba be ba mo tlotlise. Ha a phetha pesaleme ea hae, Davida o re ho Jehova: “U thuso ea ka le Mopholosi oa ka.” Hlokomela hore Davida ha a re, “E se eka u ka,” joalokaha eka o etsa kōpo e ’ngoe hape. Ho e-na le hoo, o re, “U,” e le ha a bontša hore o kholisehile. Davida o lumela hore Molimo o tla mo thusa.
4, 5. Re ithuta eng ka Davida Pesalemeng ea 70, ’me re ka kholiseha ka eng?
4 Pesaleme ea 70 e bontša’ng ka Davida? Ha a ne a talimane le lira tse neng li ikemiselitse ho mo bolaea, Davida o ile a etsa qeto ea hore a se ke a inkela molao matsohong. Ho e-na le hoo, o ne a tšepile hore Jehova o tla sebetsana le bahanyetsi bao ka nako ea hae le ka tsela ea hae. (1 Sam. 26:10) Davida o ile a tsoela pele a kholisehile ka tieo hore Jehova o thusa ba mo batlang ebile oa ba lopolla. (Baheb. 11:6) Davida o ne a lumela hore barapeli bao ba ’nete ba na le mabaka a ho thaba le ho tlotlisa Jehova ka ho bolella ba bang ka boholo ba hae.—Pes. 5:11; 35:27.
5 Joaloka Davida, re ka kholiseha ka botlalo hore Jehova ke Mothusi oa rōna le “Mopholosi” oa rōna. Kahoo, ha re thulana le liteko tse boima kapa re selebaletsoe, ka nepo re ka rapela Jehova hore a re thuse kapele. (Pes. 71:12) Leha ho le joalo, ke sefe seo Jehova a ka se etsang ho araba lithapelo tsa rōna ha re kōpa thuso? Pele re tšohla taba ea hore na Jehova a ka re thusa joang, a re ke re hlahlobeng litsela tse tharo tseo a ileng a pholosa Davida ka tsona, a mo thusa linakong tseo a neng a hloka thuso ka potlako.
Ho Lopolloa ho Bahanyetsi
6. Ke eng e ileng ea thusa Davida ho tseba hore Jehova o pholosa batho ba lokileng?
6 Ho latela tlaleho e bululetsoeng ea Bibele e neng e le teng ka nako eo, Davida o ne a tseba hore batho ba lokileng ba ka tšepa hore Jehova o tla ba thusa. Ha Jehova a ne a timetsa batho ba sa tšabeng Molimo ka Moroallo, o ile a pholosa Noe le lelapa la hae le tšabang Molimo. (Gen. 7:23) Ha Jehova a ne a nesa mollo le sebabole holim’a baahi ba khopo ba Sodoma le Gomora, o ile a pholosa Lota ea lokileng le barali ba hae ba babeli. (Gen. 19:12-26) Ha Jehova a ne a timetsa Faro ea ikhohomosang le lebotho la hae Leoatleng le Lefubelu, O ile a sireletsa batho ba hae, kahoo a ba thusa hore ba se ke ba timela. (Ex. 14:19-28) Kahoo, na hoa makatsa hore ebe pesalemeng e ’ngoe Davida o ile a rorisa Jehova a re ke “Molimo oa liketso tse pholosang”?—Pes. 68:20.
7-9. (a) Davida o ne a e-na le lebaka lefe la ho tšepa matla a Molimo a pholosang? (b) Davida o ile a re ke mang ea mo pholositseng?
7 Davida o ne a boetse a e-na le lebaka la ho tšepa matla a Jehova a pholosang ka botlalo. Davida o ile a iponela ka boeena hore “matsoho a mehla eohle” a Jehova a ka pholosa ba Mo sebeletsang. (Deut. 33:27, Bibele—Phetolelo e Ncha) Ka makhetlo, Jehova o ne a ile a pholosa Davida ‘lireng tsa hae tse halefileng.’ (Pes. 18:17-19, 48) Nahana ka mohlala o latelang.
8 Ha basali ba Baiseraele ba ne ba qala ho rorisa Davida ka lebaka la bonatla ba hae ntoeng, Morena Saule o ile a qetoa ke mōna hoo a ileng a betsa Davida ka lerumo ka makhetlo a mabeli. (1 Sam. 18:6-9) Makhetlong ao ka bobeli, Davida o ile a qoba ho hlajoa ke lerumo le nchocho. Na Davida o ile a pholosoa feela ke hore ebe e ne e le mohlabani ea nang le boiphihlelo le ea matjato? Che. Tlaleho ea Bibele e hlalosa hore “Jehova o ne a e-na le eena.” (Bala 1 Samuele 18:11-14.) Hamorao, ha leano la Saule la hore Davida a bolaoe ke Bafilista le ne le hlōleha, ‘Saule o ile a bona ’me a tseba hore Jehova o ne a e-na le Davida.’—1 Sam. 18:17-28.
9 Davida o ile a re ke mang ea mo pholositseng? Sehlooho sa Pesaleme ea 18 se bolela hore Davida ‘o ile a bua le Jehova mantsoe a pina ena letsatsing leo ka lona Jehova a neng a mo lopolotse letsohong la Saule.’ Davida o ile a bua maikutlo a hae ka pina a re: “Jehova ke lefika la ka le qhobosheane ea ka le Mopholosi oa ka. Molimo oa ka ke lefika la ka. Ke tla tšabela ho eena.” (Pes. 18:2) Na ha ho matlafatse tumelo ho tseba hore Jehova a ka lopolla batho ba hae?—Pes. 35:10.
Ho Hlokomeloa Liphateng Tse Chesang
10, 11. Ke eng e re thusang ho fumana hore na e ka ’na eaba Davida o ile a kula neng joalokaha ho boletsoe Pesalemeng ea 41?
10 Ka lekhetlo le leng Morena Davida o kile a kula haholo, joalokaha ho boletsoe Pesalemeng ea 41. Ha a ne a le liphateng tse chesang ka nakoana, Davida o ne a kula hoo lira tse ling tsa hae li neng li nahana hore a ke ke a hlola “a tsoha.” (Temana ea 7, 8) Davida o ile a hlaseloa neng ke boloetse boo bo matla? E ka ’na eaba maemo a boletsoeng Pesalemeng ena a amana le nako e neng e baka mahlomola bophelong ba Davida ha mora oa hae Absalome a ne a leka ho inkela borena ka likhoka.—2 Sam. 15:6, 13, 14.
11 Ka mohlala, Davida o bolela hore o ekoa ke motsoalle eo a neng a mo tšepa, eo a neng a tloaetse ho ja bohobe le eena. (Temana ea 9) Sena se ka ’na sa re hopotsa ketsahalo e ’ngoe e ileng ea etsahala bophelong ba Davida. Nakong ea bofetoheli ba Absalome, Akitofele, moeletsi eo Davida a neng a mo tšepa e ile ea e-ba lehlabaphio eaba o ikopanya le Absalome ho fetohela morena. (2 Sam. 15:31; 16:15) Ak’u nahane feela morena ea fokolang a le liphateng tse chesang, a se na le matla a ho ema feela, empa ka nako eo eohle a tseba hore o pota-potiloe ke mahlabaphio a neng a mo lakaletsa lefu e le hore a ka ntšetsa pele merero ea ’ona e mebe.—Temana ea 5.
12, 13. (a) Davida o ile a bolela hore o ne a kholisehile ka eng? (b) E ka ’na eaba Molimo o ile a matlafatsa Davida joang?
12 Davida o ile a lula a tšepile “Mopholosi.” Tabeng ea mohlanka oa Jehova ea tšepahalang ea kulang, Davida o ile a re: “Jehova o tla mo pholosa letsatsing la tlokotsi. Jehova o tla mo tšehetsa holim’a setulo sa hae se kang moalo sa ho kula; ka sebele u tla fetola liphate tsohle tsa hae nakong ea boloetse ba hae.” (Pes. 41:1, 3) Le hona mona, hlokomela ho kholiseha ha Davida, joalokaha ho bontšoa ke mantsoe a reng “Jehova o tla.” Davida o ne a kholisehile hore Jehova o ne a tla mo pholosa. Joang?
13 Davida o ne a sa lebella hore Jehova a etse mohlolo, ebe oa mo phekola. Ho e-na le hoo, Davida o ne a kholisehile hore Jehova o ne a tla “mo tšehetsa”—ke hore a mo matlafatse ha a ntse a robetse liphateng tse chesang. Ntle ho pelaelo Davida o ne a hloka thuso e joalo. Ho phaella boloetseng bo neng bo mo fokolisa, o ne a pota-potiloe ke lira tse neng li mo bua hampe. (Litemana 5, 6) Ho ka etsahala hore ebe Jehova o ile a matlafatsa Davida ka ho mo hopotsa lintho tse tšelisang. Hoa thahasellisa hore ebe Davida o ile a re: “U ntšehelitse ka lebaka la botšepehi ba ka.” (Temana ea 12) E ka ’na eaba Davida o ile a boela a matlafatsoa ke ho nahana ka taba ea hore ho sa tsotellehe ho fokola ha hae le lintho tse mpe tseo lira tsa hae li neng li li bua, Jehova o ne a nka hore oa tšepahala. Qetellong Davida o ile a fola. Na ha ho khothatse ho tseba hore Jehova a ka tšehetsa ba kulang?—2 Bakor. 1:3.
Ho Fuoa Lijo
14, 15. Davida le banna ba hae ba ile ba hloka lijo neng, ’me ba ile ba fumana thuso efe?
14 Ha Davida e ne e e-ba morena oa Iseraele, o ne a ka ja lijo le ho noa lino tse molemo ka ho fetisisa haesita le ho mema batho ba bangata hore ba tl’o ja tafoleng ea hae. (2 Sam. 9:10) Leha ho le joalo, Davida o ne a boetse a tseba hore na ho hloka lijo ke ntho e joang. Ha mora oa hae Absalome a ne a hlophisa hore Davida a tsoheloe matla ’me a leka ho inkela borena ka likhoka, Davida hammoho le batho ba neng ba mo tšehetsa ka botšepehi ba ile ba tsoa Jerusalema. Ba ile ba balehela naheng ea Gileade, e ka bochabela ho Nōka ea Jordane. (2 Sam. 17:22, 24) Kaha ba ne ba tlameha ho baleha batho ba neng ba lula ba ba tsoma, ho e-s’o ee kae Davida le banna ba hae ba ne ba hloka lijo le lino e le kannete ba bile ba hloka ho phomola. Leha ho le joalo, ebe ba ne ba tla fumana lijo hokae lefeelleng leo?
15 Qetellong, Davida le banna ba hae ba ile ba fihla motseng oa Mahanaime. Ha ba le moo ba ile ba kopana le banna ba bararo ba sebete—Shobi, Makire le Barzilai. Ba ne ba ikemiselitse ho beha bophelo ba bona kotsing e le hore ba thuse morena ea neng a khethiloe ke Molimo, hobane haeba Absalome a ne a ka fumana borena, ha ho pelaelo hore o ne a tla fa motho ofe kapa ofe ea neng a tšehetsa Davida kotlo e bohloko. Ha ba bona bothata boo Davida le banna ba hae ba neng ba le ho bona, bafo bana ba bararo ba tšepahalang ba ile ba ba tlisetsa lintho tseo ba neng ba hlile ba li hloka, tse akarelletsang liphate, koro, harese, lijo-thollo tse halikiloeng, linaoa tse sephara, lensisi, mahe a linotši, sereleli le linku. (Bala 2 Samuele 17:27-29.) E tlameha ebe Davida o ile a leboha haholo botšepehi bo hlollang ba banna bana ba bararo le mosa oa bona. Le ka mohla Davida o ne a ke ke a lebala seo ba mo etselitseng sona.
16. Ha e le hantle ke mang ea ileng a fa Davida le banna ba hae lijo?
16 Leha ho le joalo, ha e le hantle ke mang ea ileng a fa Davida le banna ba hae lijo? Davida o ne a kholisehile hore Jehova o hlokomela batho ba hae. Ka sebele Jehova a ka susumetsa bahlanka ba bang ba hae hore ba thuse morapeli-’moho le bona ea hlokang. Ha ho pelaelo hore ha a nahana ka se ileng sa etsahala naheng ea Gileade, Davida o ile a hlokomela hore mosa oa banna bao ba bararo o ne o bontša tlhokomelo e lerato ea Jehova. Ho ella qetellong ea bophelo ba hae, Davida o ile a ngola a re: “Nkile ka ba mohlankana, ke se ke tsofetse, leha ho le joalo ha ke e-s’o bone mang kapa mang ea lokileng [ho akarelletsa le eena] a tloheloa ka ho feletseng, kapa bana ba hae ba batla bohobe.” (Pes. 37:25) Na ha ho tšelise ho tseba hore Jehova o tla fa bahlanka ba hae lintho tseo ba li hlokang?—Liprov. 10:3.
“Jehova o Tseba ho Lopolla Batho”
17. Nako le nako Jehova o ’nile a bontša eng?
17 Davida e ne e le e mong feela oa barapeli ba bangata bao Jehova a ileng a ba pholosa mehleng ea ha ho ne ho ngoloa Bibele. Ho tloha mehleng ea Davida, nako le nako Molimo o ’nile a bontša bonnete ba mantsoe ana a moapostola Petrose: “Jehova o tseba ho lopolla batho ba boinehelo ba bomolimo tekong.” (2 Pet. 2:9) Ela hloko mehlala e meng e ’meli.
18. Jehova o ile a pholosa bahlanka ba hae joang mehleng ea Ezekiase?
18 Ha lebotho le matla la Assyria le ne le hlasela Juda le bile le sokela Jerusalema lekholong la borobeli la lilemo B.C.E., Morena Ezekiase o ile a rapela a re: “Jehova Molimo oa rōna, re pholose . . . e le hore mebuso eohle ea lefatše e ka tseba hore uena, Jehova, u Molimo u le mong.” (Esa. 37:20) Ezekiase o ne a amehile haholo ka lebitso la Molimo le botumo ba hae. Jehova o ile a araba thapelo eo e neng e tsoa botebong ba pelo. Ka bosiu bo le bong feela, lengeloi le le leng le ile la bolaea Baassyria ba 185 000, ’me la pholosa bahlanka ba Jehova ba tšepahalang.—Esa. 37:32, 36.
19. Bakreste ba lekholong la pele la lilemo ba ile ba pholoha tlokotsi ka ho mamela temoso efe?
19 Matsatsi a se makae feela pele ho lefu la hae, Jesu o ile a fana ka temoso ea boprofeta molemong oa barutuoa ba hae ba neng ba le Judea. (Bala Luka 21:20-22.) Ho ile ha feta lilemo tse mashome, empa ka 66 C.E., bofetoheli ba Bajuda bo ile ba etsa hore mabotho a Baroma a hlasele Jerusalema. Mabotho ao a neng a laoloa ke Cestius Gallus a ile a atleha ho fokolisa karolo e ’ngoe ea lebota la tempele, eaba ho sa lebelloa, a khutlela morao. Ha Bakreste ba tšepahalang ba hlokomela hore sena ke monyetla oa hore ba pholohe timetso eo Jesu a neng a buile ka eona esale pele, ba ile ba balehela lithabeng. Mabotho a Baroma a ile a khutla ka 70 C.E. Lekhetlong lena ha aa ka a khutlela morao ’me Jerusalema e ile ea timetsoa ka ho feletseng. Bakreste ba ileng ba mamela temoso ea Jesu ba ile ba pholoha tlokotsi eo e tšabehang.—Luka 19:41-44.
20. Ke hobane’ng ha re ka tšepa hore Jehova e tla ba “Mopholosi” oa rōna?
20 Ho nahana ka bopaki ba hore Jehova o thusa batho ba hae ho matlafatsa tumelo. Seo a se entseng nakong e fetileng se re fa lebaka la hore re mo tšepe. Ho sa tsotellehe mathata ao re ka ’nang ra thulana le ’ona hona joale kapa ao re ka ’nang ra thulana le ’ona ka moso, le rōna re ka ba le tšepo e feletseng ea hore Jehova e tla ba “Mopholosi” oa rōna. Leha ho le joalo, Jehova a ka re pholosa joang? Ho thoe’ng ka batho bao ho builoeng ka bona qalong ea sehlooho see? Ho ile ha etsahala’ng ka bona? Re tla bona sehloohong se latelang.
Na U sa Hopola?
• Pesaleme ea 70 e re fa lebaka la ho kholiseha ka eng?
• Davida o ile a hlokomeloa joang ha a ne a kula?
• Ke mehlala efe e bontšang hore Jehova a ka lopolla batho ba hae ho bahanyetsi?
[Setšoantšo se leqepheng la 6]
Jehova o ile a araba thapelo ea Ezekiase