Kabo ea Mangolo ea Bo127 ea Gileade
Baromuoa ba Rongoa ho ea “Karolong e Hōle-hōle ea Lefatše”
JESU o ile a laela baapostola ba hae hore e be lipaki “ho isa karolong e hōle-hōle ea lefatše.” (Liketso 1:8) Lipaki Tsa Jehova li nka taelo eo ka botebo.
Ha e le hantle, ka lilemo tse fetang 65, baromuoa ba koetlisitsoeng Sekolong sa Bibele sa Gileade sa Watchtower ba thusitse ho etella pele mosebetsing ona oa boboleli libakeng tse fetang 200. Ka Moqebelo oa la 12 September, 2009, baboleli ba bang ba 56 bao e leng khale ba le tšebeletsong, ba ile ba fumana mangolo ka mor’a hore ba koetlisoe ka likhoeli tse hlano sekolong sa boromuoa se Patterson, New York, U.S.A.
Matla ao Monahano o Nang le ’Ona
Stephen Lett, setho sa Sehlopha se Busang sa Lipaki Tsa Jehova, eo e neng e le molula-setulo oa lenaneo la ho ajoa ha mangolo, o ile a bua le sehlopha ka sehlooho se reng, “Sebelisa Monahano oa Hao ka Tsela e Bohlale.” O ile a qala ka ho lemosa liithuti ka litsela tse ’nè tseo ka tsona li sa lokelang ho sebelisa menahano ea tsona. Ha a bua ka lintlha tsa pele tse tharo, o ile a re: (1) Le se ke la nahana hore lintho tse bonahalang li tla le sireletsa ka ho sa feleng; (2) qobang ho nahana ka lintho tse amanang le boitšoaro bo litšila; (3) le se ke la ngongoreha ho tlōla tekano, eaba le nahana hore ka moso maemo a ka ’na a e-ba mabe le ho feta. (Liproverbia 18:11; Matheu 5:28; 6:34) Ha sebui se bua ka ntlha ea boraro se ile sa re motho ea ngongorehang ho tlōla tekano o bokella matšoenyeho a maobane ka holim’a a kajeno, a be a late le a letsatsi le hlahlamang ebe o ipokella ka ’ona. Mor’abo rōna Lett o ile a re: “Oo ke mojaro o boima hore ebe le ka o jara.” Ntlha ea bone eona? Sehlopha se ile sa eletsoa hore se se ke sa nahana hore se ne se phela hamonate pele se kenela tšebeletso ea boromuoa. Ho etsa joalo ho tla etsa hore ba se ke ba thabela lintho tse thabisang tse teng sebakeng seo ba eang ho sona.
Joale Mor’abo rōna Lett o ile a khothalletsa hore sehlopha se sebelise menahano ea sona ka litsela tse ’nè tse nepahetseng. O ile a re: (1) Elelloang lintho tse ka ’nang tsa e-ba kotsi moeeng kapa ’meleng ea lōna ’me le li qobe; (2) ha le ntse le bala liketsahalo tse ka Bibeleng, nkang hore le boemong boo, le be le ipone le le moo; (3) nkang hore motho e mong le e mong eo le mo pakelang kabelong ea lōna e ncha e ka ’na ea e-ba mosebeletsi oa Jehova nakong e tlang; (4) ipeheng boemong ba batho bao le ba pakelang.—Liproverbia 22:3.
Bohlokoa ba ho Koetlisa ba Bang
David Splane, setho sa Sehlopha se Busang, o ile a tšohla sehlooho se reng “Lintho Tsena U li Behe ho Banna ba Tšepahalang,” se neng se thehiloe ho 2 Timothea 2:2. Ha moapostola Pauluse a ne a laela Timothea hore a koetlise banna ba tšepahalang, morero oa hae e ne e le hore Timothea a se ke a ruta banna bao ’nete feela, empa a be a ba khothalletse le ho koetlisa ba bang. Sebui se ile sa bolella sehlopha hore ho hlokahala banna ba tataisang ka phuthehong ea Bokreste le mosebetsing oa boboleli. Banna baa ba tla koetlisoa neng hona joang? Mor’abo rōna Splane o ile a khothalletsa sehlopha hore se qalelle ho koetlisa banna bana hang ha se qala ho ithuta Bibele le bona.
Ka ho khetheha, ke joang baromuoa ba ka koetlisang liithuti tsa Bibele hore e be mehlala ea sebele ho ba bang? Sebui se ile sa qoolla litsela tse ’maloa. Baromuoa ba lokela ho ba koetlisetsa hore ba lokisetse thuto ea bona ea Bibele hantle. Joale ha liithuti li qala ho tla libokeng, li lokela ho rutoa hore na li lokisetse lingoliloeng tse thehiloeng Bibeleng tse tšohloang libokeng joang. Sebui se ile sa re: “Haeba motho a sitoa ho ithuta Bibele a le mong, a ke ke a khona ho e ruta ba bang.” Mor’abo rōna Splane o ile a boela a re baromuoa ba ka thusa batho ba bacha hore ba fihle ka nako, ba tšehetse mosebetsi oa boboleli ka lichelete, ba be ba mamele ba etellang pele. O ile a re tsela e nepahetseng ka ho fetisisa ea ho ba ruta sena ke ka hore ba ba behele mohlala o motle.
Tokelo ea ho ba Lipaki
Guy Pierce, eo le eena e leng setho sa Sehlopha se Busang, o ile a tšohla sehlooho se neng se thehiloe mantsoeng ana a Jesu a tlalehiloeng ho Liketso 1:8, a reng “Le Tla ba Lipaki Tsa Ka.” O ile a hopotsa sehlopha hore lekholong la pele la lilemo C.E., sechaba sa Baiseraele se ile sa lahleheloa ke tokelo ea ho ba lipaki tsa Jehova. Tokelo eo e ile ea nehoa sechaba se hlahisang litholoana tsa ’Muso. (Matheu 21:43) Phutheho ea Bakreste ba tlotsitsoeng e ile ea ipaka hore ke sona sechaba seo. Sebui se ile sa qotsa mantsoe a moapostola Petrose ea ileng a re “sechaba se halalelang” sa Bakreste ba tlotsitsoeng se tla “bolela hohle” makhabane a hlomphehang a Jehova. (1 Petrose 2:6-9) Kahoo, Jesu o ne a sa bolele hore Bakreste e tla ba lipaki tsa hae feela, e se ke ea hlola e e-ba tsa Jehova. Etsoe Jesu o bitsoa “Paki e Tšepahalang.” (Tšenolo 1:5; 3:14) Ke Paki ea Jehova e ka sehloohong ebile ke mohlala oo re o latelang.—1 Petrose 2:21.
Sebui se ile sa bolella sehlopha hore mehleng ena mantsoe a Jesu a ho Liketso 1:8 a phethahetse le ho feta. Hobane’ng? Ketsahalo ea bohlokoa e tlalehiloeng ho Tšenolo 11:15 e se e phethahetse! ’Muso oa Molimo oa Bomesia o se o thehiloe. Hona joale ka tsela eo ehlileng e leng ea sebele, mosebetsi oa ho paka o se o ntse o etsoa “ho isa karolong e hōle-hōle ea lefatše.” (Liketso 1:8) Mor’abo rōna Pierce o ile a hatisa hore ba lokela ho paka ka Jehova le ’Muso oa hae, eseng ka bona kapa ka tsela eo ba neng ba phela ka eona pele, setso sa bona le naha ea bona. O ile a khothalletsa sehlopha hore se rute “ba bangata ka hohle kamoo ho ka khonehang nakong ena e setseng.”
Lintlha Tse Ling Tse Ileng Tsa Tšohloa
Alex Reinmueller, mothusi oa Komiti ea Khatiso, o ile a tšohla sehlooho se reng, “Jehova o Tla le fa Sebete.” O ile a re haeba baromuoa ba tšepile matla a Jehova, Jehova o tla ba thusa hore ba lemohe moo ba ipabolang teng le moo ba fokolang teng, ba se ke ba tšaba, empa ba sebeletse Molimo ka hohle kamoo ba ka khonang.
Bakoetlisi ba babeli ba Lefapheng la Likolo Tsa Puso ea Molimo, e leng Sam Roberson le William Samuelson, le bona ba ile ba bua le liithuti. Mor’abo rōna Roberson o ile a tšohla sehlooho se reng, “Ke na le Uena,” se neng se thehiloe ho Esaia 41:10. O ile a re baromuoa ba tla ba le lintho tse ngata tse ba thabisang. Ba tla boela ba be le mathata. Ba tla khona ho sebetsana le ’ona haeba ba etsisa Morena Davida ea ileng a rapela, a llela ho Ntate oa hae ea lerato. (Pesaleme ea 34:4, 6, 17, 19) Sehlooho se neng se tšohloa ke Mor’abo rōna Samuelson se ne se bua ka hore na ke hobane’ng ha ho hlokahala hore ba ’ne ba ntlafatse tsebo ea bona ea ho nahana. Baromuoa ba etsang joalo ba khona ho itšoara ha batho ba bua lintho tse ba utloisang bohloko ’me ha ba khopisehe habobebe.—Liproverbia 2:10, 11.
Jim Mantz, mothusi Komiting ea Bongoli, o ile a buisana le setho sa Komiti ea Lekala sa Republic of Georgia le sa Honduras hammoho le sa Komiti ea Naha sa Republic of Tajikistan. Bara bana babo rōna ba nang le phihlelo ba ile ba eletsa baromuoa hore na ke joang e ka bang metsoalle ea batho bao e ka ’nang eaba ba ba hloile ka hore ba “hlōle bobe ka botle.” (Baroma 12:21) Mark Noumair eo e neng e le e mong oa bakoetlisi ba sehlopha seo, o ile a tsamaisa puisano e neng e thahasellisa haholo ea liphihlelo tseo liithuti li bileng le tsona nakong ea ha li ntse li koetlisoa Gileade. Puo eo e ne e e-na le sehlooho se etsang hore motho a nahane ka botebo, se reng “Nka Thusa Joang?”
Molula-setulo o ile a phethela lenaneo ka ho qotsa mantsoe a pina e ncha e reng, “Ipone U le Teng ha Tsohle li se li le Ncha.” Ba 6 509 ba neng ba le teng moo ba ile ba tloha ba ikemiselitse ka hohle ho paka ka Jehova le Mora oa hae ho “isa karolong e hōle-hōle ea lefatše.”
[Chate/’Mapa o leqepheng la 31]
LIPALO-PALO TSA SEHLOPHA
Palo ea linaha tse emetsoeng 8
Palo ea baromuoa 56
Palo ea malapa 28
Karolelano ea lilemo 33,6
Karolelano ea lilemo ba kolobelitsoe 18,3
Karolelano ea lilemo ba le tšebeletsong ea nako e tletseng 13,6
[’Mapa]
(Ha u batla ho bona boitsebiso bo hlophisitsoeng hantle, sheba sengoliloeng)
Sehlopha se abetsoe ho ea linaheng tse 22 tse bontšitsoeng tlaase mona
LINAHA TSEO BA ABETSOENG HO TSONA
JAMAICA
HAITI
NICARAGUA
COSTA RICA
PANAMA
CURAÇAO
GUYANA
PERU
BOLIVIA
PARAGUAY
CHILE
MOLDOVA
SERBIA
ALBANIA
CÔTE D’IVOIRE
CONGO, DEM. REP.
UGANDA
BURUNDI
TANZANIA
MOZAMBIQUE
NEPAL
CAMBODIA
[Setšoantšo se leqepheng la 31]
Sehlopha sa Bo127 sa Sekolo sa Bibele sa Gileade sa Watchtower se Abetsoeng Mangolo
Lethathamong le tlaase mona, mela e baloa ho tloha ka pele ho ea ka morao, ’me mabitso a thathamisitsoe ho tloha ka letsohong le letšehali ho ea ho le letona moleng ka mong.
(1) Marshall, T.; Prudent, L.; Mashburn, A.; Rosenström, S.; Testa, A.; Takeyama, M.; Sisk, M.
(2) Grooms, K.; Miura, S.; Camacho, M.; Rozas, S.; Burch, M.; Meza, I.; Young, G.; Geraghty, S.
(3) Bonilla, C.; Knaller, D.; Parrales, R.; Hotti, S.; Takada, A.; Tournade, M.; Sopel, C.
(4) Miura, Y.; Parrales, K.; Prudent, K.; Colburn, S.; Willis, L.; Vääränen, A.; Sisk, B.; Takada, R.
(5) Grooms, J.; Vääränen, M.; Geraghty, B.; Stackhouse, R.; Wilson, A.; Bonell, E.; Camacho, D.; Meza, R.; Bonell, M.
(6) Takeyama, S.; Testa, G.; Colburn, T.; Mashburn, C.; Willis, W.; Tournade, L.; Burch, J.; Stackhouse, J.
(7) Wilson, J.; Young, J.; Marshall, E.; Rozas, M.; Knaller, J.; Hotti, N.; Rosenström, A.; Sopel, J.; Bonilla, O.