Lefu, Sera sa ho Qetela, le Etsoa Lefeela

1, 2. Qalong Adama le Eva ba ne ba le boemong bofe, hona ho hlaha lipotso life?

HA Adama le Eva ba bōptjoa, ba ne ba se na sera. E ne e le batho ba phethahetseng ba phelang paradeiseng. Ba e-na le kamano e haufi le ’Mōpi oa bona e le bana ba hae. (Gen. 2:7-9; Luka 3:38) Taelo eo Molimo a ileng a ba fa eona e ile ea bontša seo ba neng ba ka se lebella bophelong. (Bala Genese 1:28.) Ho ne ho tla nka nako e itseng hore ba ‘tlatse lefatše ’me ba le buse.’ Empa e le hore ba tsoele pele ‘ho laola sebōpuoa se seng le se seng se phelang se lefatšeng,’ Adama le Eva ba ne ba tla lokela ho phela ka ho sa feleng, ’me ho se mohla Adama a tla sitoa ho phetha boikarabelo ba hae ka lebaka la lefu.

² Joale ke hobane’ng ha hona joale boemo bo fapane hakaale? Ho tlile joang hore batho ba be le lira tse ngata hakaale tse ba sitisang ho thaba, ’me lefu e le sera se ka sehloohong? Molimo o tla etsa’ng ho felisa lira tsee? Re ka fumana likarabo tsa lipotso tsena le tse ling ka Bibeleng. A re hlahlobeng lintlha tse ling tsa bohlokoa tse amehang tabeng ena.

3, 4. (a) Molimo o ile a fa Adama le Eva taelo efe? (b) Ke hobane’ng ha e ne e le habohlokoa hore ba mamele taelo eo?

³ Le hoja Adama le Eva ba ne ba e-na le tebello ea ho phela ka ho sa feleng, seo se ne se sa bolele hore ba ke ke ba shoa. E le hore ba lule ba phela, ba ne ba lokela ho hema, ho ja, ho noa le ho robala. Habohlokoa le ho feta, ho ne ho hlokahala hore ba be le kamano e ntle le Monehi-Bophelo. (Deut. 8:3) Ba ne ba lokela ho amohela tataiso ea Molimo e le hore ba tsoele pele ho thabela bophelo. Jehova o ile a totobatsa sena ka ho hlaka ho Adama, le pele Eva a bōptjoa. O ile a etsa see joang? “Jehova Molimo a boela a laela motho sena: ‘U ka ja tsa sefate se seng le se seng sa serapa hore u khotsofale. Empa ha e le sefate sa tsebo ea botle le bobe u se ke ua ja tsa sona, etsoe ka letsatsi leo ka lona u jang tsa sona ka sebele u tla shoa.’”—Gen. 2:16, 17.

⁴ “Sefate sa tsebo ea botle le bobe” se ne se emela tokelo ea Molimo ea ho bolela se nepahetseng le se fosahetseng. Ke ’nete hore Adama o ne a se a ntse a tseba se nepahetseng le se fosahetseng; o ne a bōpiloe ka setšoantšo sa Molimo ’me a e-na le letsoalo. Sefate seo se ne se bontša hore Adama le Eva ba tla lula ba hloka tataiso ea Jehova. Ho ja ha bona sefate seo ho ne ho tla bontša hore ba batla ho ipusa, e leng se neng se tla ba tlisetsa mathata a tebileng hammoho le bana bao ba neng ba tla ba le bona. Hore ebe Molimo o ile a fana ka taelo ena, a ba a bolela kotlo e tsamaisanang le eona ho ne ho bontša hore taba ena e tebile.

 5. Ho tlile joang hore Adama le Eva ba se ke ba mamela?

⁵ Ka mor’a hore Eva a bōptjoe, Adama o ile a mo bolella taelo eo Molimo a faneng ka eona. Eva o ne a e tseba hantle, kaha o ile a khona ho e phetha lentsoe ka lentsoe. (Gen. 3:1-3) O ile a e bolella motho ea neng a ikhakantse joaloka noha, e leng phoofolo e masene. Moikhakanyi eo e ne e le Satane Diabolose, e leng mora oa Molimo oa moea ea neng a itumeletse hore a be le takatso ea ho ipusa le ea ho laola. (Bapisa le Jakobo 1:14, 15.) E le hore a finyelle morero oo oa hae o mobe, o ile a qosa Molimo ka hore o leshano. O ile a tiisetsa Eva hore ba ke ke ba shoa ha ba ipusa, empa ba tla tšoana le Molimo. (Gen. 3:4, 5) Eva o ile a mo kholoa, a bontša hore o batla ho ipusa ka ho ja tholoana ea sefate, a ba a phehella Adama hore le eena a e je. (Gen. 3:6, 17) Diabolose o ne a mo thetsitse. (Bala 1 Timothea 2:14.) Leha ho le joalo, Adama ‘o ile a mamela lentsoe la mosali oa hae.’ Le hoja e ka ’na eaba noha e ne e bonahala eka ke motsoalle, Satane Diabolose e ne e le sera se sehlōhō se neng se tseba hore tlhahiso eo e tla tlisetsa Eva lefu.

6, 7. Jehova o ile a ahlola bafosi bao joang?

⁶ Adama le Eva ba ile ba khetha ho fetohela ’Mōpi oa bona ea neng a ba file bophelo le sohle seo ba nang le sona. Ke ’nete hore Jehova o ne a tseba lintho tsohle tse etsahetseng. (1 Likron. 28:9; bala Liproverbia 15:3.) O ile a lumella batho bao ba bararo hore ba bontše hore na ba ikutloa joang ka eena. Kaha ke Ntate, ha ho potang hore Jehova o ile a utloa bohloko bo tebileng. (Bapisa le Genese 6:6.) Kahoo o ile a tlameha ho ba Moahloli, e le hore a phethahatse liphello tseo a neng a itse li tla latela ketso eo.

⁷ Molimo o ne a itse ho Adama: ‘Letsatsing leo u jang sefate sa tsebo ea botle le bobe ka sebele u tla shoa.’ Mohlomong Adama o ne a nahana hore “letsatsi” leo ke la lihora tse 24. Ka mor’a hore a tlōle molao oa Molimo, mohlomong o ne a lebeletse hore Jehova o tla nka khato le pele letsatsi le likela. Jehova o ile a buisana le banyalani bao ‘nakong ea letsatsi ea ha ho foka moea o pholileng.’ (Gen. 3:8) O ile a ba kenyetsa nyeoe, a mamela mabaka ao Adama le Eva ba fanang ka ’ona. (Gen. 3:9-13) Ka mor’a moo a ahlola bafosi bao. (Gen. 3:14-19) Ha a ne a ka ba bolaea hona hoo, seo a neng a se rerile ka Adama le Eva le ka bana ba bona se ne se sa tl’o phethahala. (Esa. 55:11) Le hoja a ile a tiisa kotlo ea lefu ’me liphello tsa sebe tsa qala hang-hang, o ile a lumella Adama le Eva hore ba be le bana ba neng ba ka rua molemo litokisetsong tseo a neng a tla li etsa. Kahoo, ho ea ka pono ea Molimo, Adama le Eva ba ile ba shoa hona letsatsing leo ba entseng sebe ka lona, ha e le hantle ba ile ba shoa le pele “letsatsi,” e leng lilemo tse 1 000, le fela.—2 Pet. 3:8.

8, 9. Bana ba Adama ba ile ba angoa ke sebe sa hae joang? (Sheba setšoantšo se qalong.)

⁸ Na bana ba Adama le Eva ba ne ba tla angoa ke seo batsoali ba bona ba se entseng? E. Baroma 5:12 e re: “Sebe se ile sa kena lefatšeng ka motho a le mong le lefu la kena ka sebe, ’me kahoo lefu la namela ho batho bohle hobane kaofela ba ne ba entse sebe.” Motho oa pele ea ileng a shoa ke Abele ea tšepahalang. (Gen. 4:8) Ka mor’a moo, bana ba bang ba Adama ba ile ba tsofala ’me ba shoa. Na le bona ba ne ba futsitse sebe le lefu? Moapostola Pauluse o araba ka ho re: “Ka ho se mamele ha motho a le mong ba bangata ba ile ba etsoa baetsalibe.” (Bar. 5:19) Kahoo, sebe le lefu tseo ba li futsitseng ho Adama, li ile tsa fetoha lira tseo batho ba sa phethahalang ba sitoang ho li phema. Le hoja re sa utloisise hantle hore na sebe sa Adama se fetetse joang baneng ba hae, ’nete ke hore bohle ba se futsitse.

⁹ Ka ho loketseng, Bibele e re sebe le lefu ke “sekoahelo se koahetseng lichaba tsohle, le moloho o loheletsoeng hammoho holim’a lichaba tsohle.” (Esa. 25:7) Sekoahelo sena se bipetsang se koahetse batho kaofela. Kahoo, ’nete ke hore ‘ka Adama bohle baa shoa.’ (1 Bakor. 15:22) Ka tlhaho re ka ipotsa potso eo Pauluse a ileng a ipotsa eona ha a re: “Ke mang ea tla mpholosa ’meleng ona o fetang lefung?” Na ho na le ea ka re pholosang?a—Bar. 7:24.

10. (a) Ke litemana life tse ling tsa Bibele tse bontšang hore Jehova o tla felisa lefu le bakiloeng ke Adama? (b) Litemana tsee li senola eng ka Jehova le Mora oa hae?

¹⁰ Ka sebele, Jehova o ne a ka pholosa Pauluse. Ha Esaia a qeta ho bua ka “sekoahelo,” o ile a ngola a re: “O tla metsa lefu ka ho sa feleng, ’me ka sebele ’Musi Morena Jehova o tla hlakola meokho lifahlehong tsohle.” (Esa. 25:8) Joalokaha ntate a tlosa lintho tse bakelang bana ba hae matšoenyeho ’me a ba hlakola meokho, Jehova o thabela ho felisa lefu le bakiloeng ke Adama! O na le mothusi ntlheng ena. Ho 1 Bakorinthe 15:22 rea bala: “Feela joalokaha ka Adama bohle ba shoa, kahoo hape bohle ba tla phelisoa ka Kreste.” Ka ho tšoanang, ka mor’a hore Pauluse a botse, a re “Ke mang ea tla mpholosa?” o ile a tsoela pele ka ho re: “Ho lebohuoe Molimo ka Jesu Kreste Morena oa rōna!” (Bar. 7:25) Ho hlakile hore lerato le ileng la susumelletsa Jehova hore a bōpe batho, ha lea ka la tapa ha Adama le Eva ba mo fetohela. Motho ea ileng a sebetsa le Jehova ho bōpa banyalani ba pele o ile a tsoela pele ho rata bana ba bona ka tsela e khethehileng. (Liprov. 8:30, 31) Empa o ne a tla ba pholosa joang?

11. Jehova o entse tokisetso efe ho thusa batho?

¹¹ Ho se phethahale ha batho le lefu li tlisitsoe ke sebe sa Adama le kahlolo ea Jehova e lokileng. (Bar. 5:12, 16) Rea bala: “Ka tšito e le ’ngoe phello ho batho ba mefuta eohle e ile ea e-ba tsuo.” (Bar. 5:18) Jehova o ne a ka etsa’ng ho tlosa kahlolo ee ea tsuo empa a sa khelohe melao ea hae? Re fumana karabo mantsoeng a Jesu a reng: ‘Mor’a motho o tletse ho fana ka moea oa hae hore e be thekollo e le phapanyetsano bakeng sa ba bangata.’ (Mat. 20:28) Mora oa Jehova oa moea oa letsibolo o ile a totobatsa hore o tlile lefatšeng e le motho ea phethahetseng, e le hore a fane ka thekollo. Thekollo ee e ne e tla phethahatsa toka joang?—1 Tim. 2:5, 6.

12. Thekollo e ile ea phethahatsa toka joang?

¹² Kaha Jesu e ne e le motho ea phethahetseng, o ne a e-na le tebello e kang ea Adama pele a etsa sebe. Morero oa Jehova e ne e le ho tlatsa lefatše ka bana ba phethahetseng ba Adama. Kahoo, ka lebaka la ho rata Ntate oa hae le bana ba Adama, Jesu o ile a itela hore e be sehlabelo. Ha e le hantle, Jesu o ile a tela bophelo ba hae bo phethahetseng bo lekanang hantle le boo Adama a neng a bo lahlile. Ka mor’a moo, Jehova o ile a tsosetsa Mora oa hae bophelong ba moea. (1 Pet. 3:18) Ka toka, Jehova o ile a amohela sehlabelo sa Jesu ea phethahetseng e le thekollo ho rekolla bana ba Adama le ho ba fa monyetla oa ho fumana bophelo boo Adama a bo lahlileng. Ka mantsoe a mang, Jesu o ile a nkela Adama sebaka. Pauluse o re: “Ho bile ho ngoliloe joalo: ‘Motho oa pele Adama e ile ea e-ba moea o phelang.’ Adama oa ho qetela ea e-ba moea o fanang ka bophelo.”—1 Bakor. 15:45.

13. “Adama oa ho qetela” o tla nka khato efe ho thusa bafu?

¹³ Qetellong ho tla tla nako ea hore “Adama oa ho qetela” a nke khato e le “moea o fanang ka bophelo” ho batho bohle. Bana ba bangata ba Adama ba tla khutlisetsoa bophelong. Hobane’ng? Hobane ba ne ba phela eaba baa shoa. Ho tla hlokahala hore ba tsosoe, e le hore ba boele ba phele lefatšeng.—Joh. 5:28, 29.

14. Jehova o entse tokisetso efe e tla etsolla liphello tsa ho se phethahale hoo Adama a ho fetiselitseng ho bana ba hae?

¹⁴ Batho ba tla lokolloa joang liphellong tse tlisoang ke ho se phethahale hoo ba ho futsitseng? Jehova o lokiselitse ’Muso o tla tsamaisoa ke “Adama oa ho qetela” le balateli ba hae ba khethiloeng har’a moloko oa batho. (Bala Tšenolo 5:9, 10.) Bana ba tla busa le Jesu leholimong, ba tla be ba tseba hore na ho se phethahale ho joang. Puso ea bona ea lilemo tse likete e tla thusa batho ba lefatšeng hore ba hlōle ho se phethahale ho neng ho ba khomaretse.—Tšen. 20:6.

15, 16. (a) Ho tla etsahala’ng ka ‘sera sa ho qetela, e leng lefu,’ hona le tla etsoa lefeela neng? (b) Ho latela 1 Bakorinthe 15:28, Jesu o tla etsa’ng?

¹⁵ Qetellong ea lilemo tse sekete tsa puso ea ’Muso, batho ba mamelang ba tla be ba lokolotsoe lireng tsohle tse tlisitsoeng ke ho se mamele ha Adama. Bibele e re: “Etsoe feela joalokaha ka Adama bohle ba shoa, kahoo hape bohle ba tla phelisoa ka Kreste. Empa e mong le e mong boemong ba hae: Kreste ke litholoana tsa pele, ka mor’a moo bao e leng ba Kreste [babusi-’moho le eena] nakong ea ho ba teng ha hae. Ka mor’a moo, e be bofelo, ha a nehelana ka ’muso ho Molimo le Ntat’ae, ha a entse puso eohle le bolaoli bohle le matla lefeela. Kaha o tla busa e le morena ho fihlela Molimo a behile lira tsohle tlas’a maoto a hae. E le sera sa ho qetela, lefu le tla etsoa lefeela.” (1 Bakor. 15:22-26) Ka sebele, qetellong lefu leo re le futsitseng ho Adama le tla felisoa. “Sekoahelo” se koahetseng batho bohle se tla be se tlositsoe ka ho sa feleng.—Esa. 25:7, 8.

¹⁶ Moapostola Pauluse o ile a qetella tlaleho ea hae ka tsela ena: “Ha lintho tsohle li tla be li behiloe tlas’a hae, joale Mora le eena o tla ipeha tlas’a Ea ileng a beha lintho tsohle tlas’a hae, e le hore Molimo e ka ba lintho tsohle ho e mong le e mong.” (1 Bakor. 15:28) Morero oa puso ea Mora o tla be o finyeletsoe. Ka mor’a moo o tla khutlisetsa puso le batho ba phethahetseng ho Jehova, ’me o tla etsa seo a khotsofetse.

17. Qetellong ho tla etsahala’ng ka Satane?

¹⁷ Ho tla etsahala’ng ka Satane, ea bakileng mahlomola ’ohle ao batho ba tobanang le ’ona? Tšenolo 20:7-15 e re fa karabo. Ha batho ba phethahetseng ba lekoa ka lekhetlo la ho qetela, Satane o tla lumelloa hore a leke ho ba khelosa. Diabolose le ba mo latelang ba tla felisoa ka ho sa feleng ka “lefu la bobeli.” (Tšen. 21:8) Kaha ba tla shoa lefu la bobeli ba tla felisoa ka ho sa feleng, lefu lena le ke ke la etsoa lefeela. Empa “lefu la bobeli” hase sera ho batho ba ratang ’Mōpi oa bona le ba mo sebeletsang.

18. Taelo eo Molimo a neng a e file Adama e tla phethahala joang?

¹⁸ Ka mor’a moo batho ba phethahetseng ba tla ema ka pel’a Jehova e le ba tšoanelehelang bophelo bo sa feleng, ba se na sera leha e le sefe. Seo Adama a neng a se laetsoe se tla be se phethahalitsoe le hoja a tla be a le sieo. Lefatše le tla tlala bana ba hae, ba tla thabela ho le hlokomela hammoho le lintho tse ngata tse phelang ho lona. E se eka re ka lula re ananela tsela e lerato eo Jehova a tla etsa lefu, e leng sera sa ho qetela, lefeela ka eona!