Ananela Bolokolohi ba Hao ba ho Ikhethela

1, 2. (a) Batho ba na le maikutlo afe a fapaneng ka bolokolohi ba ho ikhethela? (b) Bibele e re ruta eng ka bolokolohi ba ho ikhethela, hona re tla tšohla lipotso life?

HA MOSALI e mong a ne a lokela ho etsa qeto, o ile a re ho motsoalle oa hae: “Mpolelle feela hore na ke etse’ng, u se ke oa mpotsa lipotso.” Mosali eo o ne a thabela ho etsetsoa liqeto, ho e-na le ho sebelisa mpho eo ’Mopi a re fileng eona, e leng bolokolohi ba ho ikhethela. Uena u ikutloa joang? Na u rata ho iketsetsa liqeto, kapa u thabela ha ba bang ba u etsetsa tsona? U ikutloa joang ka bolokolohi ba ho ikhethela?

² Batho ba ile ba ba le maikutlo a fapaneng tabeng ena ka lilemo tse ngata. Ba bang ba re ha re na bolokolohi ba ho ikhethela, hobane Molimo o rerile esale pele hore na re tla etsa’ng bophelong. Athe ba bang ba re bolokolohi ha boa lokela ho beheloa meeli. Empa, e le hore re utloisise taba ena hantle, re lokela ho sheba ka Lentsoeng la Molimo, e leng Bibele. Hobane’ng? Hobane ke eona e rutang hore Jehova o re bopile re e-na le bolokolohi ba ho ikhethela, e leng bokhoni ba ho etsa liqeto tse bohlale. (Bala Joshua 24:15.) Ka Bibeleng, re boetse re fumana likarabo tsa lipotso tse kang: Re lokela ho sebelisa bolokolohi ba ho ikhethela joang? Na bolokolohi boo bo na le meeli? Liqeto tseo re li etsang li ka bontša joang hore re hlile re rata Jehova? Re ka bontša joang hore re hlompha liqeto tsa ba bang?

 3. Ke joang Jehova a re behelang mohlala o motle ha a sebelisa bolokolohi?

³ Jehova ke eena feela ea nang le bolokolohi bo feletseng, empa re ka ithuta ho hongata tseleng eo a bo sebelisang ka eona. Ka mohlala, o ile a khetha sechaba sa Iseraele hore e be batho ba hae, ‘thepa ea hae e khethehileng.’ (Deut. 7:6-8) O ne a e-na le lebaka la ho etsa khetho eo. Jehova o ne a batla ho boloka tšepiso eo a ileng a e etsa ho motsoalle oa hae Abrahama. (Gen. 22:15-18) Ho feta moo, kamehla Jehova o sebelisa bolokolohi ba hae ka tsela e bontšang lerato le toka. Re bona sena tseleng eo a neng a khalemela Baiseraele ka eona ha ba ne ba furalla borapeli ba ’nete. Ha ba ikoahlaela liphoso tsa bona, Jehova o ne a ba bontša mohau. O ile a re: “Ke tla folisa ho se tšepahale ha bona. Ke tla ba rata ka boithatelo ba ka.” (Hos. 14:4) Ke mohlala o babatsehang hakaakang oa ho sebelisa bolokolohi ba ho ikhethela molemong oa ba bang!

4, 5. (a) Ke mang oa pele eo Molimo a ileng a mo fa bolokolohi ba ho ikhethela, hona o ile a bo sebelisa joang? (b) Ke potso efe eo re lokelang ho ipotsa eona?

⁴ Ka lerato, Jehova o ile a khetha ho bopa mangeloi le batho ba e-na le bolokolohi ba ho ikhethela. Mora oa Molimo oa letsibolo, eo e leng “setšoantšo sa Molimo ea sa bonahaleng,” ke eena oa pele ea ileng a fuoa bolokolohi bona. (Bakol. 1:15) Le pele Jesu a tla lefatšeng, o ile a khetha ho tšepahala ho Ntate oa hae, ho e-na le ho tšehetsa bofetoheli ba Satane. Hamorao ha a le lefatšeng, o ile a sebelisa bolokolohi ba ho ikhethela ho hanela liteko tsa Diabolose. (Mat. 4:10) Bosiung ba pele a bolaoa, Jesu o ile a rapela ka tieo, a bontša hore o ikemiselitse ho etsa thato ea Molimo. O ile a re: “Ntate, haeba u lakatsa, tlosa senoelo sena ho ’na. Leha ho le joalo, ho ke ho etsahale thato ea hao, eseng ea ka.” (Luka 22:42) E se eka re ka etsisa Jesu ka ho sebelisa bolokolohi ba rona ba ho ikhethela ho tlotlisa Jehova le ho etsa thato ea hae! Na re ka khona ho etsa seo?

⁵ E, re ka khona ho etsisa mohlala oa Jesu, hobane le rona re entsoe ka setšoantšo sa Molimo. (Gen. 1:26) Leha ho le joalo, re behetsoe meeli. Ha re na bolokolohi bo lekanang le ba Jehova. Bibele e re Jehova o re behetse meeli e loketseng, ’me re lokela ho e hlompha. Ka mohlala, basali ba lokela ho ipeha tlas’a banna ba bona, le bana ba hlomphe batsoali. (Baef. 5:22; 6:1) Kaha re behetsoe meeli, re lokela ho sebelisa bolokolohi ba rona ba ho ikhethela joang? Karabo ea potso ena e tla bontša hore na re letetsoe ke bokamoso bofe.

 6. Fana ka mohlala o bontšang hore na ke hobane’ng ha re hloka ho beheloa meeli.

⁶ Na re ka re bolokolohi ba rona ke ba sebele empa re behetsoe meeli? E, ho joalo! Ke hobane’ng ha re cho joalo? Meeli eo re e behetsoeng e ka re sireletsa. Ka mohlala, re ka ’na ra etsa qeto ea ho etela sebakeng se seng ka koloi. Empa na u ne u tla ikutloa u sireletsehile haeba ho ne ho sa behoa melao ea tsela, motho e mong le e mong a khanna ka lebelo leo a le batlang, a bile a khanna ka lehlakoreng la tsela le ratoang ke eena? Le letho! Ho hlokahala meeli e le hore kaofela re thabele bolokolohi ba sebele. E le hore re utloisise ka ho eketsehileng hore na ke hobane’ng ha e le habohlokoa ho hlompha meeli eo Jehova a e behileng, a re ke re hlahlobeng mehlala e seng mekae e ka Bibeleng.

 7. (a) Adama o ne a fapane le liphoofolo joang? (b) Hlalosa tsela eo Adama a ileng a sebelisa bolokolohi ba hae hantle kateng.

⁷ Ha Molimo a bopa motho oa pele e leng Adama, le eena o ile a mo fa bolokolohi ba ho ikhethela feela joalokaha a ile a fa mangeloi. Sena se ile sa etsa hore Adama a fapane le liphoofolo, kaha tsona li tataisoa ke melao ea tlhaho. Hlokomela kamoo Adama a ileng a sebelisa bolokolohi ba hae ba ho ikhethela ka tsela e nepahetseng kateng. Molimo o bopile liphoofolo pele a bopa motho. Empa Jehova o ile a fa motho oa pele tlotla ea hore a li rehe mabitso. Molimo o ile a tlisa liphoofolo ho motho hore a li rehe mabitso. Ka mor’a hore Adama a li shebe le ho li reha mabitso a li loketseng, Jehova ha aa ka a kenella eaba o fetola mabitso ao. Ho e-na le hoo, ‘eng kapa eng eo motho a neng a e reha phoofolo e ’ngoe le e ’ngoe, e ne e e-ba lebitso la eona.’—Gen. 2:19.

 8. Ke joang Adama a ileng a sebelisa hampe bolokolohi ba hae ba ho ikhethela, hona seo se ile sa e-ba le liphello life?

⁸ Ka masoabi, Adama ha aa ka a khotsofalla mosebetsi oo Molimo a neng a mo file oona, oa hore a leme le ho hlokomela lefatše la paradeise. O ne a boetse a sa khotsofalla bolokolohi boo Molimo a neng a mo file bona ha a re: “Atang le ngatafale le tlale lefatše ’me le le buse, ’me le laole litlhapi . . . le libōpuoa tse fofang . . . le sebōpuoa se seng le se seng se phelang se hahabang lefatšeng.” (Gen. 1:28) Ho e-na le hoo, o ile a khetha ho tlola meeli eo Molimo a mo behetseng eona, ka hore a je tholoana e hanetsoeng. Ho sebelisa bolokolohi ba ho ikhethela ka tsela ena e mpe, ho ile ha fella ka bohloko le mahlomola ho Adama le bana ba hae. (Bar. 5:12) Liphello tse bohloko tseo Adama a ileng a li fumana, li lokela ho re susumelletsa ho hlompha meeli ea Jehova ha re etsa liqeto.

 9. Jehova o ile a fa Baiseraele khetho efe, hona ba ile ba arabela joang?

⁹ Ka lebaka la ho se mamele ha Adama le Eva, bana bohle ba bona ba ile ba futsa sebe le lefu. Empa ba ile ba tsoela pele ba e-na le bolokolohi ba ho ikhethela. Sena se bonahala tseleng eo Molimo a ileng a sebelisana le Baiseraele ka eona. Jehova o ile a ba fa bolokolohi ba hore ba khethe hore na e tla ba sechaba sa hae se khethehileng kapa che. (Ex. 19:3-6) Ba ile ba arabela joang? Ba ile ba khetha ho mamela melao eo Molimo a ba fileng eona, eaba ba bua ka tumellano ba re: “Sohle seo Jehova a se buileng re ikemiselitse ho se etsa.” (Ex. 19:8) Ka masoabi, ha nako e ntse e-ea, ba ile ba sebelisa bolokolohi ba bona hampe, eaba ba tlola molao oa Molimo. A re ithuteng mohlaleng ona, ’me kamehla re sebelise bolokolohi ba ho ikhethela hantle, ka hore re itšetlehe ka Jehova le ho mamela melao ea hae.—1 Bakor. 10:11.

10. Ke mehlala efe e bontšang hore re ka sebelisa bolokolohi ba rona ka tsela e khahlisang Molimo? (Sheba setšoantšo se qalong.)

¹⁰ Baheberu khaolo ea 11 e thathamisa mabitso a bahlanka ba Molimo ba 16 ba ileng ba khetha ho sebelisa bolokolohi ba bona ka tsela e mo khahlisang. Ka lebaka leo, ba fumana litlhohonolofatso le tšepo ea bophelo bo sa feleng. Ka mohlala, Noe o ile a bontša tumelo ka hore a khethe ho mamela Molimo ’me a hahe areka e ileng ea pholosa eena le lelapa la hae, hammoho le moloko o tlang. (Baheb. 11:7) Abrahama le Sara ba ile ba ithaopela ho mamela Molimo ’me ba ea naheng e tšepisitsoeng. Le hoja ba ile ba tsamaea, ba ne ba ntse ba e na le ‘monyetla oa ho khutlela’ naheng ea Ure. Empa ba ile ba beha tumelo ea bona litšepisong tsa Molimo. Bibele e re ba ile ba “hahamalla sebaka se molemo.” (Baheb. 11:8, 13, 15, 16) Moshe o ile a siea maruo a Egepeta, “a khetha ho tšoaroa hampe hammoho le sechaba sa Molimo ho e na le hore a thabele sebe ka nakoana.” (Baheb. 11:24-26) E se eka re ka etsisa tumelo ea bahlanka bana ba nakong e fetileng, ka hore re sebelise bolokolohi ba ho ikhethela ka tsela e nepahetseng ’me re etse thato ea Molimo.

11. (a) Ke tlhohonolofatso efe e tlisoang ke bolokolohi ba ho ikhethela? (b) Ke’ng e u susumetsang hore u sebelise bolokolohi ba hao ka tsela e nepahetseng?

¹¹ Le hoja ho ka bonahala eka ho betere ha ba bang ba re etsetsa liqeto, seo se tla re tima tlhohonolofatso e tlisoang ke ho sebelisa mpho ea ho ikhethela. Tlhohonolofatso ena e hlalosoa hantle ho Deuteronoma 30:19, 20. (E bale.) Temana ea 19 e hlalosa khetho eo Molimo a ileng a e fa Baiseraele. Temana ea 20 e re Jehova o ile a ba fa monyetla oa hore ba bontše hore na ba mo rata hakae. Le rona re ka khetha ho sebeletsa Jehova. Ha ho ntho ea bohlokoa eo re ka e etsang ho feta ho sebelisa bolokolohi ba rona ba ho ikhethela hore re rate Molimo le ho mo tlotlisa!

12. Ke’ng seo re sa lokelang ho se etsa ka mpho eo re e filoeng ea ho ikhethela?

¹² Nka hore u file motsoalle oa hao mpho ea bohlokoa. U ne u tla utloa bohloko hakaakang ha u utloa hore o e lahlile, kapa o e sebelisitse ho ntša motho e mong kotsi! Joale nahana hore na Jehova o ikutloa joang ha a bona batho ba bangata ba sebelisa bolokolohi ba bona hampe, mohlomong ba bile ba lematsa batho ba bang. Ho joalokaha Bibele e ile ea bolela esale pele hore “matsatsing a ho qetela,” batho e ne e tla ba “ba se nang teboho.” (2 Tim. 3:1, 2) Le ka mohla a re se keng ra sebelisa mpho ena ea bohlokoa e tsoang ho Jehova hampe, kapa ra e nka habobebe. Empa re ka etsang hore re qobe ho sebelisa bolokolohi ba ho ikhethela hampe?

13. Re ka qoba joang ho sebelisa bolokolohi ba rona hampe?

¹³ Kaofela re na le bolokolohi ba ho ikhethela metsoalle, tsela eo re aparang le ho itokisa ka eona hammoho le boithabiso. Leha ho le joalo, haeba re le makhoba a litakatso tsa nama kapa re etsisa mekhoa e mebe ea lefatše, re tla be re sebelisa bolokolohi ba rona hore e be “lesira le patang bobe”. (Bala 1 Petrose 2:16.) Ho e-na le hore re sebelise bolokolohi ba rona e le monyetla oa ho phehella litakatso tse mpe, re batla ho ikemisetsa ho etsa liqeto tse tla re thusa ho mamela keletso ena e reng: “Le etse lintho tsohle bakeng sa thoriso ea Molimo.”—Bagal. 5:13; 1 Bakor. 10:31.

14. Ke hobane’ng ha re lokela ho tšepa Jehova ha re sebelisa bolokolohi ba rona ba ho ikhethela?

¹⁴ Ntho e tla re thusa ho sebelisa bolokolohi ba rona hantle, ke hore re tšepe Jehova, re mo lumelle hore a re tataise ’me re hlomphe meeli eo a re behetseng eona. Ke eena ‘ea re rutang hore re itsoele molemo, ea etsang hore re tsamaee tseleng eo re lokelang ho tsamaea ka eona.’ (Esa. 48:17) Re lokela ho lumela hore seo Lentsoe la Molimo le se buang ke ’nete ha le re: “Tsela ea motho oa lefatše ha e matleng a hae. Ha ho matleng a motho ea tsamaeang hore a tsamaise mehato ea hae.” (Jer. 10:23) Le ka mohla a re se keng ra itšetleha ka kutloisiso ea rona, joalokaha Adama a ile a etsa, hammoho le Baiseraele ba marabele. Ho e-na le hoo, e se eka re ka ‘tšepa Jehova ka lipelo tsa rona tsohle.’—Liprov. 3:5.

15. Re ithutang molao-motheong o fumanoang ho Bagalata 6:5?

¹⁵ Moeli o mong oo re o behetsoeng, ke hore re hlomphe tokelo eo ba bang ba nang le eona ea ho iketsetsa liqeto. Hobane’ng? Kaha kaofela re na le bolokolohi ba ho ikhethela, re ke ke ra lebella hore Bakreste ba babeli ba etse qeto e tšoanang. Sena se ka etsahala esita le litabeng tse amang boitšoaro ba rona le borapeli. Hopola molao-motheo o fumanoang ho Bagalata 6:5. (E bale.) Ha re hopola hore Mokreste “e mong le e mong o tla jara mojaro oa hae,” re tla hlompha tokelo eo ba bang ba nang le eona ea ho iketsetsa liqeto.

16, 17. (a) Ho ile ha ba le ho se lumellane hofe phuthehong ea Korinthe? (b) Pauluse o ile a rarolla bothata boo joang, hona see se re ruta’ng tabeng ea ho hlompha liqeto tsa ba bang?

¹⁶ Nahana ka mohlala o hlahang ka Bibeleng o bontšang hore na ke hobane’ng ha re lokela ho hlompha liqeto tsa ba bang ha ho tluoa litabeng tse amang letsoalo. Bakreste ba Korinthe ba ile ba ba le maikutlo a sa tšoaneng tabeng ea ho ja nama e neng e nyehetsoe ho litšoantšo, ebe hamorao e rekisoa ’marakeng. Ba bang ba ne ba re kaha ‘litšoantšo hase letho’, re ka ja nama ka letsoalo le khutsitseng. Empa ba bang ba neng ba rapela litšoantšo nakong e fetileng, ba ne ba nka ho ja nama eo e le karolo ea borapeli. (1 Bakor. 8:4, 7) Taba ena e ne e le thata, kaha e ne e ka ’na ea baka likarohano ka phuthehong. Pauluse o ile a thusa Bakreste ba Korinthe joang hore ba talime lintho ka tsela eo Molimo a li talimang ka eona?

¹⁷ Pauluse o ile a qala ka ho ba hopotsa hore lijo li ke ke tsa ba atametsa ho Molimo. (1 Bakor. 8:8) Eaba o ba lemosa hore seo ba se khethang, ‘se se ke sa fetoha khopiso ho ba fokolang.’ (1 Bakor. 8:9) Hamorao, o ile a bolella ba matsoalo a fokolang hore ba se ke ba ahlola ba khethang ho ja nama eo. (1 Bakor. 10:25, 29, 30) Kahoo, tabeng ena ea bohlokoa e amang borapeli, Mokreste ka mong o ne a lokela ho iketsetsa qeto a tataisoa ke letsoalo la hae. Joale, na le rona ha rea lokela ho hlompha liqeto tseo ba bang ba iketsetsang tsona, esita le ha li ka bonahala eka li nyenyane?—1 Bakor. 10:32, 33.

18. U ka bontša joang hore u ananela bolokolohi boo Molimo a re fileng bona ba ho ikhethela?

¹⁸ Jehova o re file bolokolohi ba ho ikhethela, e leng se etsang hore re lokolohe e le kannete. (2 Bakor. 3:17) Re ananela mpho ena, hobane e re lumella ho etsa liqeto tse bontšang hore na re rata Jehova hakae. E se eka re ka tsoela pele ho e ananela ka hore re e sebelise ka tsela e tlotlisang Molimo le ka ho hlompha tokelo eo ba bang ba nang le eona ea ho iketsetsa liqeto.