Fana ka Tlhompho ho Bao e ba Tšoanelang

 1. Ke’ng e etsang hore batho ba bang ba tšoaroe ka tsela e khethehileng, hona re tlo bua ka’ng sehloohong see?

HO HLOMPHA motho e mong ho bolela ho etsa hore a ikutloe e le oa bohlokoa. Motho o tšoaroa ka tsela ena hobane a entse ntho e khethehileng kapa a le boemong bo phahameng. Kahoo, ke bo mang bao re lokelang ho ba hlompha, hona hobane’ng?

2, 3. (a) Ke hobane’ng ha re lokela ho hlompha Jehova? (Sheba setšoantšo se qalong.) (b) Tšenolo 5:13, e re Konyana ke mang, hona ke hobane’ng ha re lokela ho mo hlompha?

² Tšenolo 5:13 e re, “Ea lutseng teroneng le . . . Konyana” ba lokela ho hlomphuoa. Khaolong ea 4 Lengolong lona lena, re hlokomela le leng la mabaka a etsang hore Jehova a lokeloe ke tlhompho. Mangeloi a rorisa Jehova ka mantsoe a phahameng, “Ea phelang ka ho sa feleng le kamehla.” A re: “Jehova, Molimo oa rōna, ua tšoaneleha ho amohela khanya le tlhompho le matla, hobane u bōpile lintho tsohle, ’me ka lebaka la thato ea hao li ile tsa e-ba teng ’me tsa bōptjoa.”​—Tšen. 4:9-11.

³ Jesu Kreste ke, “Konyana ea Molimo e tlosang sebe sa lefatše.” (Joh. 1:29) Bibele e re bolella hore o phahame ho feta batho bohle bao e leng marena le bao e kileng ea e ba marena. E re ke “Morena oa ba busang e le marena le Khosi ea ba busang e le likhosi, eo e leng eena feela ea nang le ho se shoe, ea lulang leseling le sa atameleheng, eo ho seng le ea mong oa batho ea mo boneng kapa ea ka mo bonang.” (1 Tim. 6:14-16) Kannete ha ho na morena e mong ea ileng a ithaopela ho shoela libe tsa rona! Na le uena joalo ka limiriade tsa mangeloi ha u susumelletsehe ho rorisa Jehova ’me u re: “Konyana e ileng ea hlajoa e tšoaneleha ho amohela bonatla le maruo le bohlale le matla le tlhompho le khanya le poko.”​—Tšen. 5:12.

 4. Ke hobane’ng ha re tlamehile ho hlompha Jehova le Kreste?

⁴ Re tlamehile ho hlompha Jehova le Kreste, hobane hore re fumane bophelo bo sa feleng ho itšetlehile ka ho etsa joalo. Mantsoe a Jesu a ngotsoeng ho Johanne 5:22, 23 a re thusa hore re utloisise seo: “Etsoe ho hang ha ho eo Ntate a mo ahlolang, empa o file Mora ho ahlola hohle, e le hore bohle ba ka hlompha Mora feela joalokaha ba hlompha Ntate. Ea sa hlompheng Mora ha a hlomphe Ntate ea mo romileng.”​—Bala Pesaleme 2:11, 12.

 5. Ke hobane’ng ha re lokela ho hlompha batho ba bang?

⁵ Batho ba bopiloe “ka setšoantšo sa Molimo.” (Gen. 1:27) Kahoo, ba bangata ba bontša makhabane a tšoanang le a Molimo ka litsela tse sa tšoaneng. Ba khona ho bontšana lerato, mosa le ho utloelana bohloko. Batho ba bopiloe ba e-na le letsoalo, le hoja ka linako tse ling le fosa, le ba thusa ho lemoha ntho e nepahetseng le e fosahetseng, e lokileng le e sa lokang, ho tšepahala le ho se tšepahale. (Bar. 2:14, 15) Batho ba bangata ba rata lintho tse hloekileng le tse ntle ’me ba batla ho phelisana le ba bang ka khotso. Ho sa tsotellehe hore na baa hlokomela kapa che, ho isa boholeng bo itseng ba tlotlisa Jehova ’me ka lebaka leo ba lokela ho hlomphuoa.​—Pes. 8:5.

6, 7. Lipaki Tsa Jehova li fapana joang le batho ba bang tabeng ea ho hlompha batho?

⁶ Re lokela ho hlompha e mong le e mong ka tsela e mo loketseng. Batho ba bangata ba sa phethahalang ba khelosoa ke lefatše la Satane. Ke kahoo ba tloaetseng ho rapela banna le basali ba itseng ho e na le hore ba bafe tlhompho e ba loketseng feela. Ba hlompha baeta-pele ba bolumeli le ba lipolotiki, likhalala tsa lipapali le tsa boithabiso le batho ba bang ba hlaheletseng ka mahetla ’me ba ba nkela holimo ka tsela e feteletseng. Ke kahoo bana le batho ba baholo ba latelang mohlala oa bona, ka ho etsisa mekhoa, moaparo le boitšoaro ba bona.

⁷ Bakreste ba ’nete ha ba hlomphe batho ka tsela e joalo e fosahetseng. Re nka Kreste e le eena motho a kileng a phela eo re ka latelang mohlala oa hae. (1 Pet. 2:21) Jehova a ke ke a thaba haeba re fa batho tlhompho e feteletseng. Re lokela ho hopola ’nete ena ea Bibele e reng: “Etsoe bohle ba entse sebe ’me ba haelloa ke khanya ea Molimo.” (Bar. 3:23) Kahoo ha ho na motho ea lokelang ho hlomphuoa joalokaha e ka ke Molimo.

8, 9. (a) Lipaki Tsa Jehova li talima bolaoli joang? (b) Ke ho isa boholeng bofe re lokelang ho hlompha ba boholong pusong?

⁸ Batho ba bang ba sebeletsa e le balaoli pusong. Hangata re lebeletse hore batho ba boholong pusong ba mamele melao hape ba thuse le baahi ka lintho tseo ba li hlokang. ’Me re rua molemo ha ba etsa joalo. Moapostola Pauluse o ile a eletsa Bakreste hore ba nke batho bao e le “balaoli ba phahameng” ’me ba ba mamele. O ile a re ho bona: “Fang bohle tse ba lokelang, ea batlang lekhetho, le mo fe lekhetho; . . . ea batlang tlhompho, le mo fe tlhompho e joalo.”​—Bar. 13:1, 7.

⁹ Lipaki Tsa Jehova li thabela ho fa basebeletsi ba sechaba tlhompho e ba lokelang ho ea ka molao oa sebaka seo ba lulang ho sona. Re etsa lintho tseo ba reng re li etse. Leha ho le joalo Bibele ke eona e re thusang ho tseba hore na re ba mamela ho fihlela boholeng bofe. Re ke ke ra ba mamela haeba ba re re etse lintho tse etsang hore re tlōle melao ea Molimo joaloka ho nka karolo lipolotiking.​—Bala 1 Petrose 2:13-17.

10. Bahlanka ba Jehova ba nakong e fetileng ba ile ba re behela mohlala joang tabeng ea ho sebelisana le balaoli?

¹⁰ Bahlanka ba Jehova ba nakong e fetileng ba ile ba re behela mohlala tabeng ea ho hlompha balaoli. Ha ’Muso oa Roma o ntša taelo ea hore ho baloe batho, Josefa le Maria ba ile ba mamela taelo eo. Ba ile ba ea Bethlehema le hoja Maria a ne a se a le haufi le ho ba le ngoana oa hae oa pele. (Luka 2:1-5) Hamorao, ha ho ne ho thoe Pauluse o entse tlōlo ea molao, o ile a ipuella ka tlhompho ho Morena Heroda Agripa le ho Festase e leng ’musi oa profinse ea Roma ea Judea.​—Lik. 25:1-12; 26:1-3.

11, 12. (a) Phapang ke efe pakeng tsa tlhompho eo re e fang ba boholong pusong le eo re e fang baeta-pele ba malumeli? (b) Ho ile ha e-ba le melemo efe ha Paki ea Austria e ne bua le ralipolotiki e mong ka tlhompho?

¹¹ Baeta-pele ba bolumeli ba thabela ho hlomphuoa ka tsela e feteletseng, empa Lipaki Tsa Jehova li qoba ho ba hlompha ka tsela e joalo. Ho e-na le hoo, re ba hlompha joalo ka motho e mong le mong. Malumeli a bohata ha a etse lintho tse khahlisang Molimo ebile a sotha lithuto tsa Bibele. Jesu o ne a sa tšehetse baeta-pele ba bolumeli ba neng ba batla tlhompho e feteletseng. O ile a re ke baikaketsi le batataisi ba foufetseng. (Mat. 23:23, 24) Ka lehlakoreng le leng, ho ka ba le melemo e tlisoang ke ho hlompha balaoli.

¹² Leopold Engleitner e ne e le Paki ea Austria e neng e lula e phathahane ka ho sebeletsa Molimo. Manazi a ile a mo tšoara a mo isa kampong ea mahloriso ea Buchenoald ka terene. Motšoaruoa e mong ea bitsoang Dr. Heinrich Gleissner le eena o ne a le teng ka tereneng eo. E ne e kile ea e-ba ralipolotiki oa Austria. Empa joale Manazi a ne a se a sa mo rate. Ha ba ntse ba le leetong, mor’abo rona Engleitner ka tlhompho o ile a hlalosetsa Gleissner seo a se lumelang ’me Gleissner o ile a mamela ka hloko. Kaha Gleissner e ne e le akhente, ka mor’a ntoa ea bobeli ea lefatše o ile a thusa Lipaki tsa Austria ka makhetlo. Mohlomong u hopola mehlala e meng e bontša hore ho ba le litla-morao tse molemo ha Lipaki li fa basebeletsi ba sechaba tlhompho eo Bibele e reng Bakreste ba lokela ho ba fa eona.

13. Ke bo mang bao re lokelang ho ba hlompha, hona hobane’ng?

¹³ Re boetse re lokela ho hlompha Bakreste-’moho le rona, haholo-holo ba re etellang pele. (Bala 1 Timothea 5:17.) Re hlompha bara ba na babo rona ho sa tsotellehe boemo ba bona ba lichelete, hore na ba tsoa naheng efe, ba rutehile hakae kapa ba tumme hakae. Bibele e re ke “limpho [tseo e leng] banna,” ’me ke bona bao Molimo a ba khethileng hore ba hlokomele litlhoko tsa batho ba hae. (Baef. 4:8) Ba akarelletsa baholo, balebeli ba potoloho, litho tsa Komiti ea Lekala le tsa Sehlopha se Busang. Bakreste ba mehleng ea baapostola ba ne ba hlompha ba etellang pele ’me le rona re etsa se tšoanang. Ha re rapele bara bao ba bo rona ebile ha re ba bona ha re itšoare joalo ka ha e ka re bona mangeloi. Leha ho le joalo rea ba hlompha ka lebaka la mosebetsi oa bona o boima le boikokobetso boo ba bo bontšang.​—Bala 2 Bakorinthe 1:24; Tšenolo 19:10.

14, 15. Balisa ba Bakreste ba ’nete ba fapane joang le baeta-pele ba malumeli a mang?

¹⁴ Baholo ke balisa ba ikokobelitseng le ba nang le kamano e ntle le Molimo. Kahoo, ha ba batle ho tšoaroa joalo ka batho ba tummeng. Ha ba tšoane le baeta-pele ba malumeli a mehleng ena le a mehleng ea baapostola, bao Jesu a ileng a re ka bona: “Ba rata sebaka se hlaheletseng ka ho fetisisa lijong tsa shoalane le litulo tse ka pele ka lisynagogeng, le litumeliso limmarakeng.”—Mat. 23:6, 7.

¹⁵ Ka ha balisa ba Bakreste ba ’nete ba ikokobelitse ba mamela mantsoe a Jesu ha a re: “Empa lōna, le se ke la bitsoa Rabi, kaha mosuoe oa lōna o mong, athe lōna bohle le bara ba motho. Ho feta moo, le se ke la bitsa mang kapa mang ntat’a lōna lefatšeng, kaha Ntat’a lōna o mong, Oa leholimo. Leha e le hore le bitsoe ‘baeta-pele,’ kaha Moeta-pele oa lōna o mong, Kreste. Empa e moholo har’a lōna e lokela ho ba mosebeletsi oa lōna. Mang kapa mang ea iphahamisang o tla kokobetsoa, ’me mang kapa mang ea ikokobetsang o tla phahamisoa.” (Mat. 23:8-12) Ka lebaka leo Bakreste lefatšeng lohle ba rata baholo ebile baa ba hlompha.

16. Ke hobane’ng ha re lokela ho leka ka matla ho utloisisa le ho sebelisa seo Bibele e se rutang mabapi le ho hlompha ba bang?

¹⁶ Ke ’nete hore ho ka ’na ha re nka nako e telele hore re khone ho fa batho tlhompho e ba loketseng. Taba ena e ile ea etsahalla le Bakreste ba mehleng ea pele. (Lik. 10:22-26; 3 Joh. 9, 10) Empa re lokela ho leka ka matla ho sebelisa seo re ithutang sona Bibeleng ha e bua ka ho hlompha ba bang. Re tla rua molemo haeba re qoba ho hlompha ba bang ka tsela e feteletseng.

17. Re ka rua molemo joang ka ho hlompha ba boholong?

¹⁷ Ha re hlompha ba boholong, ho ka etsahala hore ba re thuse ho sireletsa tokelo ea rona ea ho bolela litaba tse molemo. Hangata ba hlompha mosebetsi oa rona. Lilemong tse ’maloa tse fetileng, morali oabo rona oa Germany oa pula-maliboho ea bitsoang Birgit, o ile a ea moketeng oa ho aba mangolo sekolong sa morali oa hae. Matichere a ile a mo bolella hore ka lilemo tse ngata, haesale a thabela ho ruta bana ba Lipaki. Ba ile ba re ho ne ho ke ke ha e-ba monate sekolong haeba ho ne ho se na bana ba Lipaki. Birgit o ile a re, “Bana ba rona ba rutoa ho latela melao ea Molimo ea boitšoaro e akarelletsang hore ba hlomphe matichere.” Tichere e ’ngoe e ile ea re, “Haeba bana bohle ba ne ba tšoana le ba Lipaki, matichere a ne a tla natefeloa ke mosebetsi oa bona.” Libeke tse ’maloa ka mor’a moo, e mong oa matichere ao o ile a ea kopanong e neng e tšoaretsoe Leipzig.

18, 19. Ke hobane’ng ha re lokela ho hlompha baholo?

¹⁸ Re lokela ho latela melao-motheo e Lentsoeng la Molimo ha re bontša tlhompho ho baholo ka phuthehong. (Bala Baheberu 13:7, 17.) Re ka ba babatsa bakeng sa mosebetsi o boima oo ba o etsang ’me ra mamela tataiso eo ba re fang eona. Haeba re etsa joalo ba tla thabela ho etsa mosebetsi oa bona. Empa sena ha se bolele hore re lokela ho etsisa ntho e ’ngoe le e ’ngoe eo moholo ea “itseng” a e etsang, ho akarelletsa tsela eo a itokisang le ho apara ka eona le tsela eo a buoang ka eona ha a fana ka lipuo kapa a qoqa. Haeba re ka etsa joalo re ka khopisa ba bang. Ha rea lokela ho lebala hore le eena ha a phethahala. Motho eo re lokelang ho mo etsisa ke Kreste.

¹⁹ Haeba re hlompha baholo ka tsela e loketseng ’me re qoba ho ba tšoara joalo ka batho ba tummeng, rea ba thusa. Re etsa hore ho be bonolo hore ba qobe leraba la ho ikhomosa kapa hore ba ikutloe ba phahame ho feta batho ba bang.

20. Ho hlompha ba bang ho re thusa joang?

²⁰ Ho hlompha ba bang ho re thusa hore re se ke ra ikhohomosa, le hore re lule re ikokobelitse le ha ba bang ba re fa tlhompho e itseng. Ho boetse ho re thusa ho sebelisana le mokhatlo oa Jehova, o re thusang ho qoba ho fa batho tlhompho e feteletseng ebang ke Lipaki kapa ha se tsona. Ho feta moo re fumana bohlale, bo re thusang hore re se ke ra nyahamisoa ke batho bao re ba hlomphang haeba ba etsa lintho tse soabisang.

21. Lebaka le ka sehloohong la ho hlompha batho ba bang ke lefe?

²¹ Ka holimo ho tsohle re thabisa Molimo ha re hlompha batho ba bang. Re etsa seo a reng re se etse ebile re lula re mo tšepahalla. ’Me ha re etsa joalo re etsa ho re Molimo a arabe mang kapa mang ea mo qosang. (Lipro. 27:11) Lefatše le tletse ka batho ba sa hlompheng. Re motlotlo hore e be re khona ho hlompha ka tsela eo Jehova a batlang hore re hlomphe ka eona.