Lebokose la Lipotso
◼ Re lokela ho hopola eng ha re sebelisa lithelefono tsa cellular le li-pager?
Thepa e joalo e ka re nolofalletsa ho buisana le ba bang hoo e batlang e le sebakeng sefe kapa sefe seo re leng ho sona. Le hoja sena se ka ba molemo, re lokela ho ela hloko hore re se ke ra sebelisa lithelefono tsa cellular le li-pager ka linako tse sa lokelang, moo re sitisang ba bang ho mamela ha re le tšebeletsong kapa libokeng tsa Bokreste. See se ka etsahala joang?
Nahana ka se ka etsahalang ha thelefono ea rōna ea cellular kapa pager e lla nakong eo re fanang ka bopaki tšebeletsong ea tšimo. Mong’a ntlo a ka nahana eng? Re ka fa mong’a ntlo maikutlo afe haeba re ka khaotsa moqoqo hore re arabe motho ea founang? Ka sebele re ke ke ra rata ho etsa eng kapa eng e ka sitisang ba bang ho mamela molaetsa oa ’Muso. (2 Bakor. 6:3) Kahoo, haeba re tšoere thelefono ea cellular kapa pager, re lokela ho e seta ka tsela eo e ke keng ea re sitisa kapa ea sitisa ba bang ha re le tšebeletsong ea tšimo.
Ho thoe’ng haeba e le nakong eo re letetseng bao re tsamaeang le bona ha ba ntse ba fana ka bopaki? Haeba re beheletse ka thōko nako ea tšebeletso ea tšimo, na ha rea lokela ho tsepamisa mehopolo ea rōna tšebeletsong eo? Kaha re hlompha tšebeletso ea rōna e halalelang, a re ke re phetheng mabaka ao e seng a bohlokoa kapa re etseng lintho tseo re li thahasellang ka nako e ’ngoe. (Bar. 12:7) Ka sebele, sena ha se bolele hore ke phoso ho sebelisa thelefono bakeng sa ho fana ka bopaki bo eketsehileng kapa ho laetsana le motho bakeng sa morero oo.
Re lokela ho ba hlokolosi ka taba ea ho sebelisa lithelefono tsa cellular ha re khanna, kaha lipatlisiso tse itseng li bontša hore ho etsa joalo ho eketsa menyetla ea ho ameha kotsing ea koloi. Afrika Boroa, ke tlōlo ea molao hore u sebelise thelefono ea cellular ha u ntse u khanna, ntle le haeba u e-na le sesebelisoa se u nolofalletsang ho e sebelisa u sa e tšoara ka letsoho. Ntle ho pelaelo re lokela ho boloka molao ona.
Re ba teng libokeng tsa Bokreste, likopanong tse nyenyane le tse khōlō ho tla rapela Jehova le ho rutoa ke eena. Na ho ananela liboka tsee e le tse halalelang ha hoa lokela ho etsa hore re sete lithelefono tsa rōna tsa cellular le li-pager ka tsela eo li ke keng tsa re sitisa, le hona ho sitisa ba bang? Haeba ho na le lebaka le potlakileng leo re lokelang ho le phetha, re lokela ho le phetha re se sebakeng sa liboka. Ntle ho moo, re lokela ho lokisetsa ho phetha mabaka a rōna le a sa amaneng le borapeli linakong tseo e seng tsa borapeli.—1 Bakor. 10:24.
E se eka tsela eo re sebelisang lithelefono tsa cellular kapa thepa leha e le efe ea elektronike, kamehla e ka bontša hore re nahanela ba bang le hore re ananela lintho tsa moea ka ho teba.