“O Fana ka Matla ho ea Khathetseng”

¹ Bohle rea khathala nako le nako. Re ka ’na ra khathala ka lebaka la mosebetsi kapa lintho tse ling tseo re li etsang empa hape re ka khathatsoa ke mathata ao re thulanang le ’ona ‘linakong tsena tse mahlonoko tseo ho leng thata ho sebetsana le tsona.’ (2 Tim. 3:1) Ebe rōna joaloka bahlanka ba Jehova, ke joang re ka fumanang matla a moea ao re a hlokang hore re se ke ra khoehlisa tšebeletsong ea rōna? Re a fumana ka ho tšepa Jehova, ea nang le “matla a maholo.” (Esa. 40:26) Oa bona hore na re hloka eng ’me ka sebele o thabela ho re thusa.—1 Pet. 5:7.

² Litokisetso Tsa Jehova: Jehova o re matlafatsa ka moea o halalelang oo e leng matla a hae a sa hlōloeng ke letho, ao a ileng a bōpa bokahohle ka ’ona. Moea oa Molimo o re thusa hore re ‘boele re fumane matla’ haeba re khathala. (Esa. 40:31) Ipotse, ‘Ke qetetse neng ho rapella moea o halalelang hore o mphe matla a hore ke phethe mesebetsi ea ka ea Bokreste?’—Luka 11:11-13.

³ Ha re bala Lentsoe le bululetsoeng la Molimo ebile re thuisa ka lona letsatsi le letsatsi, le ha re feptjoa moeeng ka ho bala kamehla lingoliloeng tsa rōna tsa Bokreste, re tla tšoana le “sefate [se tlokomang] se lenngoeng haufi le melapo ea metsi, se fanang ka litholoana tsa sona nakong ea tsona le seo makhasi a sona a sa poneng.”—Pes. ea 1:2, 3.

⁴ Jehova o boetse o sebelisa balumeli-’moho le rōna bao e ka bang ‘thuso e re matlafatsang.’ (Kol. 4:10, 11) Ha re le libokeng tsa phutheho, ba re matlafatsa ka meqoqo, ka litlhaloso le ka lipuo tse khothatsang. (Lik. 15:32) Baholo ba Bakreste ke bona bao haholo-holo ba fanang ka thuso ea moea le khothatso e hlabollang moea.—Esa. 32:1, 2.

⁵ Tšebeletso: Haeba u utloa eka ua khathala, u se ke ua khaotsa ho bolela litaba tse molemo! Ho fapana le mesebetsi e meng e mengata, re khatholloa ke ho ba tšebeletsong kamehla. (Mat. 11:28-30) Ho bolela litaba tse molemo ho re thusa ho tsepamisa likelello ’Musong oa Molimo, ho boetse ho re thusa hore re lule re nahana ka bosafeleng le litlhohonolofatso tse babatsehang tse tlang le bona.

⁶ Ho na le mosebetsi o mongata o lokelang ho etsoa pele tsamaiso ena e khopo e timetsoa. Kaha re ‘itšetlehile ka matla ao Molimo a fanang ka ’ona,’ re na le mabaka ’ohle a hore re lule re tiile tšebeletsong ea rōna. (1 Pet. 4:11) Jehova o tla re thusa hore re qete mosebetsi oa rōna, hobane “o fana ka matla ho ea khathetseng.”—Esa. 40:29.