PHELA JOALOKA MOKRESTE

Karolo e Ncha ea Seboka sa Har’a Beke

Ho qala ka January 2018, sebokeng sa har’a beke ho se ho tla ba le karolo ea litlhaloso le litšoantšo tse hlahang karolong ea Phetolelo ea Lefatše le Lecha ea Mangolo a Halalelang ea Senyesemane e hlahang Inthaneteng (nwtsty) le haeba li le sieo ka puo ea heno. Karolo ena e ncha e tla u thusa ho lokisetsa liboka hantle le ho feta. Empa ntho ea bohlokoa haholo ke hore e tla u thusa ho atamela ho ntate oa hao ea lerato e leng Jehova.

LITLHALOSO

Karolo ea litlhaloso e re beha leseling ka litaba tsa setso, libaka le lipuo ka litemana tse ka Bibeleng.

Matheu 12:20

Khoele ea lebone e kunkelang: Mehleng eo, lebone le tloaelehileng e ne e le le entsoeng ka letsopa ebe le tšeloa oli ea mehloaare. Ho ne ho sebelisoa khoele ea folakse leboneng lena. Poleloana ea Segerike “khoele ea lebone ea folakse e kunkelang” e ka bolela hore ho na le mosi o kunkelang feela ha ho lelakabe, mohlomong hobane lelakabe le ntse le fela butle-butle kapa hobane ehlile le timme. Kahoo boprofeta bo ho Esaia 42:3 bo bolela hore kaha Jesu o mosa, a ke ke a tima tlhase ea tšepo ho batho ba ikokobelitseng le ba nyahameng.

Matheu 26:13

Kannete: Lentsoe la Segerike a·menʹ le fetoletsoe ho tsoa ho la Seheberu ʼa·menʹ ao ka bobeli a bolelang “ha ho be joalo” kapa “kannete.” Hangata ha Jesu a ne a sebelisa lentsoe lena o ne a le bua ho tiisa mantsoe ao motho a qetang ho a bua kapa pele eena a bolela tšepiso kapa boprofeta ho bontša hore tšepiso eo kapa boprofeta boo joang kapa joang bo tla phethahala. Tsela eo Jesu a neng a sebelisa lentsoe “kannete” kapa amen, ea ikhetha ka Mangolong a halalelang. Moo a·menʹ e phetiloeng ka makhetlo a latellanang joalokaha ho le joalo kosepeleng ea Johanne, e fetoletsoe e le “Kannete-nete.”—Joh 1:51.

LITŠOANTŠO

Ena ke karolo e nang le litšoantšo, livideo tse se nang molumo kapa mantsoe le litšoantšo tse takiloeng tsa litaba tse ka Bibeleng.

Bethefage, Thaba ea Mehloaare le Jerusalema

Video ena e khutšoanyane e bontša leeto le eang ka bochabela ho Jerusalema motseng oo hona joale o bitsoang et-Tur, eo ho lumeloang hore ke Bethefage eo ho builoeng ka eona ka Bibeleng, ho ea Thabeng ea Mehloaare. Bethani e karolong e ka bochabela ho Bethefage letsoapong la Thaba ea Mehloaare. Ha ba ne ba le Jerusalema, Jesu le barutuoa ba hae ba ne ba tloaetse ho robala Bethani, moo hona joale e leng el-ʽAzariyeh (El ʽEizariya) eo ka Searabia e bolelang “Sebaka sa Lazaro.” Ha Jesu a ne le moo, o ne a ea ha Maretha, Maria le Lazaro. (Mat 21:17; Mar 11:11; Lu 21:37; Joh 11:1) Ho ka etsahala hore ha Jesu a ne tloha ha bona a khutlela Jerusalema o ne a tsamaea ka tsela ena eo re e boneng videong ena. Ka la 9 khoeling ea Nisane selemong sa 33 ha Jesu a ne a palame petsana ea esele a tloha Thabeng ea Mohloaare a ea Jerusalema, ho ka etsahala hore ebe o ile a ea teng ka tsela ena e tlohang Bethefage e eang Jerusalema.

Tsela e tlohang Bethani e ea Bethefage
Bethefage
Thabeng ea Mohloaare
Phula ea Kidrone
Tempele e Thabeng

Sepekere Lesapong la Serethe

Sena ke setšoantšo sa lesapo la serethe sa motho le khokhothetsoeng ka sepekere se bolele ba lisenthimithara tse 4.5. Setšoantšo sa pele se ile sa fumanoa ka leboea ho Jerusalema ke baepolli ba lintho tsa khale ka 1968 ’me se bontša hore se entsoe nakong eo Roma e neng e busa lefatše. Se paka hore mehleng ea khale ha batho ba ne ba ahloletsoe lefu, ho ne ho sebelisoa lipekere ho ba khokhothela thupeng. Mohlomong sepekere se na se tšoana le seo masole a Roma a ileng a se sebelisa ho khokhothela Jesu thupeng. Setšoantšo sa maiketsetso sa lesapo la serethe sa motho le khokhothetsoeng ka sepekere, le ile la fumanoa ka har’a lekese le entsoeng ka lejoe, e leng moo ho neng ho behoa masapo a motho ka mor’a hore nama ea hae e bole. Taba ena e paka hore motho ea ileng a khokhotheloa thupeng eaba o shoella teng, o ne a patoa lebitleng.—Mat 27:35.