1922 Lilemo Tse Lekholo Tse Fetileng

Ho ne ho hlokahala lingoloa tse eketsehileng ha bara le barali babo rona ba ntse ba tsoela pele ho ruta batho Bibele. Ho ne ho etsoa limakasine Bethele e Brooklyn empa ho ne ho ntse ho hlokahala k’hamphani e hatisang hore e ba thuse ka ho etsa libuka tsa lekoko le thata. Ka nako e telele, k’hamphani eo e ne e se e sa khone ho hatisa libuka tse hlokehang tse sebelisoang ho ruta batho Bibele. Kahoo, Mor’abo rona Rutherford o ile a botsa Mor’abo rona Martin eo a neng a ikarabella ka mosebetsi o etsoang ke feme eo hore na o bona eka ba ka khona ho ikhatisetsa libuka tsa bona.

Mor’abo rona Martin o ile a re eo ke qeto e thabisang hobane e ne e bolela hore ho ne ho tla ba le feme e neng e tla thusa hore re etse libuka. Bara babo rona ba ile ba hira sebaka atereseng ea 18 Concord Street e Brooklyn ’me ba fumana lintho tseo ba tla li sebelisa.

Ha se batho bohle ba neng ba thabile ha ba utloa hore bara babo rona ba ne ba tla iketsetsa libuka tsa bona. Mopresidente oa k’hamphani e neng e re etsetsa libuka o ile a tla femeng ea rona e ncha. O ile a re: “Le na le lintho tse sebetsang hantle tseo le ka etsang libuka ka tsona empa ha le tsebe ho li sebelisa. Ka likhoeli tse tšeletseng feela li tla be li senyehile lintho tseo.”

Mor’abo rona Martin o ile a re: “Seo mopresidente eo a se buileng se ne se utloahala empa re ne re tseba hore Jehova o tla re thusa ’me o ile a fela a etsa joalo.” Mor’abo rona Martin o ne a nepile hobane hang-hang ka mor’a moo ho ne ho etsoa libuka tse 2 000 ka letsatsi.

Ntle le ho iketsetsa libuka tse ling tsa bona, bahlanka ba Jehova ba ile ba qala ho sebelisa mokhoa o mocha oa ho ruta batho Bibele ka seea-le-moea. Ka la 26 February 1922 ka Sontaha mantsiboea, Mor’abo rona Rutherford o ile a bua ka lekhetlo la pele seea-le-moeeng. O ile a fana ka puo seea-le-moeeng sa KOG se Los Angeles, California, Amerika e reng, “Ba Limillione ba Phelang Hona Joale ba ke ke ba Hlola ba E-shoa.”

Hoo e ka bang batho ba 25 000 ba ne ba mametse lenaneo leo. Batho ba bang ba neng ba mametse lenaneo leo, ba ile ba romella Mor’abo rona Rutherford mangolo ho mo leboha ka puo eo. Lengolo le leng le ne le tsoa ho Willard Ashford ea lulang Santa Ana, California. O ile a leboha Mor’abo rona Rutherford ka puo eo e monate. O ile a re: “Ho na le batho ba bararo ba kulang lapeng la ka ba sa khoneng ho tloha. Kahoo, re ne re ke ke ra khona ho mamela puo ea hao le haeba u ne u ka fana ka eona haufi le moo re leng teng.”

Lipuo tse ling li ile tsa fanoa seea-le-moeeng libekeng tse latelang. Ho ea qetellong ea 1922, Molula-Qhooa oa Senyesemane o ile oa re “batho ba ka bang 300 000 ba ile ba fumana molaetsa oa Bibele ka seea-le-moea.”

Liithuti tsa Bibele li ile tsa etsa qeto ea ho haha seteishene sa seea-le-moea Staten Island haufi le Bethele e Brooklyn ka lebaka la mangolo ao li a fumaneng. Lilemong tse latelang Liithuti tsa Bibele li ne li tla sebelisa seteishene sa seea-le-moea se bitsoang WBBR ho bolella batho ba bangata libakeng tse ngata molaetsa oa ’Muso.

Molula-Qhooa oa Senyesemane oa June 15 1922, o ile oa etsa tsebiso ea hore ho tla ba le kopano Cedar Point, Ohio ho tloha ka la 5 ho ea ho 13 September 1922. Liithuti tsa Bibele li ne li thabile haholo ha li fihla Cedar Point.

Puong ea hae ea pele Mor’abo rona Rutherford o ile a re: “Ke kholisehile hore Morena o tla . . . hlohonolofatsa kopano ena le ho etsa bonnete ba hore e fana ka bopaki bo boholo ho feta bo kileng ba e-ba teng lefatšeng.” Batho ba neng ba fana ka lipuo moo kopanong ba ne ba khothalletsa bara le barali babo rona hore ba rute batho Bibele.

Ka Labohlano la 8 September, batho ba ka bang 8 000 ba ile ba kena ka holong ba thabetse ho tl’o mamela puo ea Mor’abo rona Rutherford. Ba ne ba nahana hore o tla hlalosa hore na “ADV” e neng e ngotsoe limemong tsa bona e bolela’ng. Ha ba ntse ba lula fatše, bongata ba bona ba ile ba bona seile e kholo e thatetsoe holimo sethaleng. Mor’abo rona Arthur Claus ea neng a tlile kopanong a tsoa Tulsa, Oklahoma, Amerika, o ile a lula moo a neng a khona ho utloa lipuo hantle. Ka nako eo ho ne ho se na libuela-hole kahoo ho ne ho le thata hore motho a utloe lipuo hantle.

Molula-setulo o ile a etsa tsebiso ea hore ha ho na motho ea tla lumelloa ho kena ka holong ha Mor’abo rona Rutherford a ntse a fana ka puo, e le hore ho se ke ha e-ba le tšitiso ha puo e ntse e tsoela pele. Ka 9:​30 hoseng, Mor’abo rona Rutherford o ile a qala ka ho qotsa mantsoe a Jesu a ho Matheu 4:​17 a reng: “‘Muso oa maholimo o atametse.” (King James Version) Mor’abo rona Rutherford o ile a bua hore na batho ba tla tseba joang ka ’Muso ona. O ile a re: “Jesu o ile a re ha a e-ba teng o tla etella pele kotulo ea batho ba hae, e leng nako eo ka eona a tla bokella batho ba tšepahalang.”

Mor’abo rona Claus o ne a lutse ka holong e kholo ’me o ile a re o ne a mametse ka hloko. Empa ka masoabi o ile a kula ’me a tlameha ho tsoa ka holong le hoja a ne a sa batle hobane o ne a tseba hore ha a ka tsamaea a ke ke a lumelloa ho khutla.

Ka mor’a metsotso e itseng o ile a ikutloa a se a le betere. O re ha a re oa khutla o ile a utloa lerata la batho ba opang liatla. Sena se ile sa etsa hore a thabe haholo. O ile a etsa qeto ea hore haeba a tlameha ho hloella ka holim’a marulelo o tla etsa joalo hore feela a khone ho utloa puo ena e monate. Ka nako eo, Mor’abo rona Claus o ne a le lilemo li 23 ’me o ile a khona ho hloella marulelong a holo. Le hoja lebota leo le ne le le bolelele ba limithara tse fetang tse ’nè, o ile a khona ho le hloella. Lifensetere tse ka holimo tsa holo li ne li butsoe kahoo ha a li atamela o ile a thaba haholo ha a hlokomela hore o khona ho utloa puo hantle.

Mor’abo rona Arthur o ne a e-na le e meng ea metsoalle ea hae marulelong a holo. Motsoalle oa hae e mong e leng Frank Johnson o ile a ea ho eena ’me a mo botsa hore na ebe ha aa tšoara thipa.

Mor’abo rona Arthur o ile a re: “E, ke e tšoere.”

Mor’abo rona Frank a re: “U karabo ea thapelo ea rona. Na u bona seile ee e kholo e thatetsoeng? E tlameletsoe lipekereng tsena. Mamela Moahlolia hantle. Ha a re ‘le lokela ho phatlalatsa le phatlalatse,’ uena u khaole lithapo tsena tse ’nè.”

Mor’abo rona Arthur, o ile a lula a tšoere thipa a emetse Mor’abo rona Rutherford a bue mantsoe ao. Mor’abo rona Rutherford o ile a fihla karolong eo a seng a hatisa lintlha tsa bohlokoa puong ea hae. O ne a thabile ebile a cheseha hoo a ileng a batla a hoeletsa ha a ne bua mantsoe a reng: “Tšepahalang ’me le be lipaki tsa ’nete tsa Morena. Tsoelang pele ho loana ho fihlela Babilona e leng bolumeli ba bohata bo felisoa. Bolellang batho molaetsa ona hohle. Batho ba lokela ho tseba hore Jehova ke Molimo le hore Jesu Kreste ke Morena oa marena. Lena ke letsatsi la bohlokoa historing. Bonang Morena oa busa! Le na le boikarabelo ba ho bolella motho e mong le e mong ka taba ena. Kahoo, phatlalatsang, phatlalatsang, phatlalatsang Morena le ’Muso oa hae!”

Mor’abo rona Arthur o re eena le metsoalle ea hae ba ile ba khaola lithapo tsa seile ’me e ile ea theohela tlase e sa etse lerata. Litlhaku “ADV” li ne li bolela lentsoe phatlalatsang ka Senyesemane kahoo seile e ne e ngotsoe: “Phatlalatsang Morena le ’Muso.”

Kopano e neng e le Cedar Point e ile ea thusa bara le barali babo rona hore ba amehe ka mosebetsi oa bohlokoa oa ho bolela ka ’Muso. Bohle ba neng ba ikemiselitse ho ruta batho Bibele ba ne ba thabetse ho nka karolo mosebetsing ona. Morekisi e mong oa libuka tsa bolumeli (eo hona joale a tsebahalang e le pulamaliboho) ea lulang Oklahoma, Amerika, o ile a re: “Re bolela libakeng tseo batho ba bangata ba sebetsang limmaeneng tsa mashala ebile ba futsanehile haholo.” Hangata ha batho ba ne ba utloa molaetsa o neng o le makasineng ea Golden Age ba ne ba lla. O boetse o re: “Re ne re thaba haholo hobane re ne re khona ho ba khothatsa.”

Liithuti tsena tsa Bibele li ne li tseba kamoo mantsoe a Jesu a hlahang ho Luka 10:2 a reng “kotulo e kholo empa basebetsi baa fokola,” a leng bohlokoa kateng. Ha selemo se fela ba ne ba ikemiselitse le ho feta ho phatlalatsa molaetsa oa ’Muso lefatšeng lohle.