Bara ba bo Rona ba Bacha, E-bang Banna ba Bakreste ba Nang le Tumelo e Matla

 1. Bara ba bo rona ba bacha ba lokela ho etsa’ng e le hore ba atlehe?

MORENA Davida o ile a re ho Solomone: “E-ba matla ’me u be sebete joaloka monna.” (1 Mar. 2:​1-3) Banna bohle ba Bakreste ba tla be ba etsa lintho ka bohlale haeba ba mamela keletso ena. E le hore ba atlehe, ba tlameha ho mamela melao ea Molimo le ho sebelisa melao-motheo ea Bibele linthong tsohle tseo ba li etsang. (Luka 2:52) Ke hobane’ng ha e le habohlokoa hore bara ba bo rona ba bacha e be Bakreste ba nang le tumelo e matla?

2, 3. Ke hobane’ng ha e le habohlokoa hore bara ba bo rona ba bacha ba etse lintho hantle?

² Monna oa Mokreste o na le boikarabelo bo bongata ba bohlokoa ka lapeng le ka phuthehong. Re kholisehile hore lona bara ba bo rona ba bacha le kile la nahana ka boikarabelo boo le ka bang le bona nakong e tlang. U ka ’na oa batla ho ba pula-maliboho, mohlanka ea sebeletsang ’me hamorao oa ba moholo. U ka ’na oa batla ho nyala le ho ba le bana. (Baef. 6:4; 1 Tim. 3:1) E le hore u atlehe ho finyella lintho tsena, u lokela ho ba Mokreste ea nang le tumelo e matla.b

³ Ke’ng e ka u thusang hore u be Mokreste ea nang le tumelo e matla? Ho na le lintho tseo u tla lokela u ithute tsona u be u ipabole ka tsona. Joale, u ka etsa’ng hore u itokisetse boikarabelo boo u tla ba le bona nakong e tlang e le hore u tle u atlehe?

 4. U ka fumana mehlala ea banna bao u ka ba etsisang hokae? (Sheba setšoantšo.)

⁴ Etsisa mehlala ea batho ba ileng ba etsa lintho hantle. Bibele e na le mehlala e mengata e metle eo bara ba bo rona ba bacha ba ka e etsisang. E na le mehlala ea banna ba neng ba rata Molimo ba bile ba hlokomela batho ba Molimo ka litsela tse fapaneng. U ka boela oa fumana mehlala ea banna ba Bakreste ba nang le tumelo e matla lapeng leno le ka phuthehong. (Baheb. 13:7) U ka etsisa le mohlala oa Jesu Kreste. (1 Pet. 2:21) Ha u ntse u ithuta mehlala ea bona hantle, nahana ka makhabane a bona ao u a ratang. (Baheb. 12:​1, 2) Ka mor’a moo, u shebe hore na u ka ba etsisa joang.

 5. U ka etsa’ng e le hore u khone ho sebelisa kelello ea hao hantle, hona ke hobane’ng ha e le habohlokoa ho etsa joalo? (Pesaleme ea 119:9)

⁵ “Sireletsa . . . kelello ea hao.” (Liprov. 3:21) Monna ea nang le kelello o nahana hantle pele a etsa lintho. Kahoo, u lokela ho sebetsa ka thata e le hore u lule u etsa lintho tse nang le kelello. Hobane’ng? Hobane boholo ba bacha ba sa sebeletseng Molimo mehleng ena ba etsa liqeto ba itšetlehile ka lintho tseo ba li nahanang kapa maikutlo a bona. (Liprov. 7:7; 29:11) Hape TV, li-movie, Inthanete le mecha ea puisano e ka susumetsa tsela eo u nahanang le ho etsa lintho ka eona. Empa u ka etsa’ng e le hore u khone ho sebelisa kelello ea hao? Qala ka ho ithuta ho tsoa ka Bibeleng hore na Jehova o nahana le ho ikutloa joang ebe oa nahana hore na ke hobane’ng ha ho le molemo ho etsa seo a reng u se etse. Ka mor’a moo, sebelisa lintho tseo u ithutileng tsona e le hore u etse liqeto tse tla thabisa Jehova. (Bala Pesaleme ea 119:9.) Ho ithuta ho nahana ka tsela ena ho tla u thusa hore qetellong u be monna oa Mokreste ea nang le tumelo e matla. (Liprov. 2:​11, 12; Baheb.5:14) Nahana hore na ho sebelisa kelello ea hao ka tsela ena ho ka u tsoela molemo joang maemong ana a mabeli: (1) tseleng eo u tšoarang barali ba bo rona ka eona le (2) tseleng eo u itokisang ka eona.

 6. Mor’abo rona e mocha ea nahanang joaloka Jehova a ka bontša joang hore o hlompha barali ba bo rona?

⁶ Monna ea nahanang joaloka Jehova o hlompha basali. Ha se ntho e makatsang hore mor’abo rona e mocha a ka khahloa ke morali oa bo rona hoo a ka batlang ho mo fereha. Leha ho le joalo, mor’abo rona e mocha ea nahanang joaloka Jehova a ke ke a bua, a ngola kapa a etsa ntho e ’ngoe e ka etsang hore morali oa bo rona a nahane hore o batla hore ba ratane, ntle le haeba a nahana hore a ka ’na a nyala morali eo oa bo rona. (1 Tim. 5:​1, 2) Haeba mor’abo rona a ratana le morali oa bo rona, o tla sireletsa botumo ba hae bo botle ka hore ba se ke ba e-ba bang ho se na motho ea ba behileng leihlo.—1 Bakor. 6:18.

 7. Mor’abo rona e mocha ea nahanang joaloka Jehova a ka apara le ho itokisa hantle joang?

⁷ Tsela e ’ngoe e bontšang hore mor’abo rona e mocha o se a nahana joaloka Jehova ke ka hore a apare le ho itokisa hantle. Hangata batho ba tlang ka feshene le ba e bapatsang ha ba hlomphe Jehova. Hape ba boitšoaro bo bobe, liaparo tseo ba li etsang li penya bo-ntate kapa li etsa hore ba shebahale eka ke bo-’mè. Mor’abo rona e mocha ea batlang ho ba le tumelo e matla o tataisoa ke melao-motheo ea Bibele le mehlala e metle ka phuthehong. Ha a khetha hore na o tla apara’ng, a ka ipotsa: ‘Na tsela eo ke itokisang ka eona e bontša hore ke nahanela ba bang? Na tsela eo ke aparang ka eona e nolofalletsa ba bang hore ba lumele hore ehlile ke ikemiselitse ho sebeletsa Molimo?’ (1 Bakor. 10:​31-33; Tite 2:6) Mor’abo rona e mocha ea nahanang joaloka Jehova, o tla hlomphuoa ke bara le barali ba bo rona le Ntate oa hae ea leholimong.

 8. Mor’abo rona e mocha a ka etsa’ng e le hore e ka ba motho ea ka tšeptjoang?

⁸ E-ba motho ea ka tšeptjoang. Mor’abo rona e mocha ea ka tšeptjoang ke ea phethang mosebetsi oohle oo a u fuoeng hantle. (Luka 16:10) Nahana ka mohlala oo Jesu a re behetseng oona. E ne e le motho ea tsotellang a bile a e-na le boikarabelo. O ile a phetha mosebetsi oo Jehova a neng a mo file oona, le hoja ka linako tse ling ho ne ho le thata. O ne a rata batho, haholo-holo barutuoa ba hae hoo a ileng a fana ka bophelo ba hae bakeng sa bona. (Joh. 13:1) Etsisa Jesu ka hore le uena u sebetse ka thata ho phetha mosebetsi oo u o fuoeng. Haeba ha u tsebe ho etsa mosebetsi oo u o fuoeng, e-ba motho ea ikokobelitseng ka hore u kope thuso ho bara ba bo rona ba tsebang mosebetsi oo. U se ke oa khotsofalla feela ho etsa ho honyenyane. (Bar. 12:11) Ho e-na le hoo, phetha mosebetsi oo u o fuoeng “joalokaha eka u o etsetsa Jehova eseng batho.” (Bakol. 3:23) U ka ’na oa etsa liphoso hobane ha oa phethahala, kahoo ikokobetse ’me u amohele liphoso tsa hao.—Liprov. 11:2.

 9. Ke hobane’ng ha mor’abo rona e mocha a lokela ho ithuta lintho tse tla mo thusa bophelong?

⁹ E le hore u be monna oa Mokreste ea nang le tumelo e matla, u lokela ho ithuta lintho tse tla u thusa bophelong. Lintho tsena li tla u thusa hore u amohele boikarabelo ka phuthehong, u fumane mosebetsi u be u tšoarelle ho oona e le hore u ka itlhokomela kapa oa hlokomela lelapa la hao, le hore u utloane le batho. Nahana ka lintho tse ’maloa tsa bohlokoa tseo u ka ithutang tsona.

10, 11. Ke melemo efe eo mor’abo rona e mocha a tla e fumana ha a ithuta ho bala le ho ngola hantle? (Pesaleme ea 1:​1-3) (Sheba setšoantšo.)

¹⁰ Ithute ho bala le ho ngola hantle. Bibele e re monna ea thabileng le ea atlehileng bophelong ke ea balang Lentsoe la Molimo letsatsi le letsatsi a bile a nahanisisa ka lona. (Bala Pesaleme ea 1:​1-3.) Haeba a bala Bibele letsatsi le letsatsi, sena se tla mo thusa hore a nahane ka tsela eo Jehova a nahanang ka eona, e leng se tla mo thusa hore a nahane hantle le ho sebelisa seo a ithutileng sona ka Mangolong. (Liprov. 1:​3, 4) Ho hlokahala banna ba joalo ka phuthehong. Hobane’ng?

¹¹ Bara le barali ba bo rona ba hloka thuso ea banna ba khonang ho ruta le ho fana ka keletso e tsoang ka Bibeleng. (Tite 1:9) Haeba u khona ho bala le ho ngola hantle, u tla khona ho fana ka lipuo le likarabo tse matlafatsang tumelo. U tla boela u khone ho ngola lintlha tsa bohlokoa ha u ntse u ithuta le ha u mametse lipuo libokeng, likopanong tsa potoloho le likopanong tsa setereke. Lintlha tseo u li ngotseng li tla u thusa hore u matlafatse tumelo ea hao u be u khothatse batho ba bang.

12. Ke’ng e tla u thusa ho mamela le ho buisana le batho hantle?

¹² Ithute ho mamela le ho buisana le batho hantle. Monna oa Mokreste o lokela ho ithuta ho mamela le ho buisana le batho hantle. Sena se bolela hore o lokela ho mamela le ho utloisisa hore na batho ba bang ba nahana’ng le hore ba ikutloa joang. (Liprov. 20:5) A ka ithuta ho bona hore na motho o ikutloa joang ka ho mamela tsela eo a buang ka eona, ka ho mo sheba sefahlehong le boitšisinyo ba ’mele. U ke ke oa khona ho etsa lintho tsena haeba u sa qete nako u e-na le batho. Haeba hangata u bua le batho ka e-mail kapa u ba ngolla melaetsa ka founu, sena se ka etsa hore u se ke oa khona ho buisana le batho ba bang hantle kapa ho utloisisa maikutlo a bona. Kahoo, etsa menyetla ea hore u buisane le batho ba bang le shebane mahlong.—2 Joh. 12.

13. Ke’ng hape eo mor’abo rona e mocha a lokelang ho ithuta eona? (1 Timothea 5:8) (Sheba setšoantšo.)

¹³ Ithute ho itšebeletsa. Monna oa mokreste ea nang le tumelo e matla o lokela ho khona ho itlhokomela le ho hlokomela lelapa la hae. (Bala 1 Timothea 5:8.) Linaheng tse ling, bara ba bo rona ba bacha ba ka ithuta ho etsa mesebetsi e itseng ho bo-ntate ba bona kapa ho e mong oa lelapa. Libakeng tse ling teng, bara ba bo rona ba bacha ba ka ithuta mesebetsi ea matsoho le e meng ha ba ntse ba le sekolong se phahameng. Ntho ea bohlokoa ke hore u ithute ho etsa lintho tse tla u thusa hore u fumane mosebetsi. (Lik. 18:​2, 3; 20:34; Baef. 4:28) Qeta mosebetsi oo u o etsang, u se ke oa o siea hare. Sena se tla etsa hore batho ba u tsebe u le motho ea sebetsang ka thata. Ha u etsa joalo, ho tla ba bonolo hore u fumane mosebetsi le hore u tšoarelle ho oona. Makhabane le lintho tseo re buileng ka tsona, li tla thusa banna ba Bakreste hore ba khone ho phetha boikarabelo boo ba tla ba le bona nakong e tlang. A re bueng ka boikarabelo boo ba ka ’nang ba e-ba le bona.

14. Mor’abo rona e mocha a ka itokisetsa ho kenela tšebeletso ea nako e tletseng joang?

¹⁴ Tšebeletso ea nako e tletseng. Bara ba bo rona ba bangata ba nang le tumelo e matla ba kenetse tšebeletso ea nako e tletseng e sa le bacha. Ho ba pula-maliboho ho thusa mor’abo rona e mocha hore a sebetse le batho ba fapaneng hantle. Ho boetse ho mo thusa hore a khone ho sebelisa chelete hantle. (Bafil. 4:​11-13) Haeba mor’abo rona e mocha a batla ho kenela tšebeletso ea nako e tletseng, a ka qala pele ka hore e be pula-maliboho e thusang. Ba bangata ba qala e le bo-pula-maliboho ba thusang ka nakoana ’me seo se ba thusa hore e be bo-pula-maliboho ba kamehla. Ho ba pula-maliboho ho ka u bulela menyetla e meng ea tšebeletso joaloka ho sebeletsa kahong kapa Bethele.

15, 16. Mor’abo rona e mocha o lokela ho etsa’ng e le hore a ka tšoaneleha ho ba mohlanka ea sebeletsang kapa moholo?

¹⁵ Ho ba mohlanka ea sebeletsang kapa moholo. Bara ba bo rona ba lokela ho leka ho etsa hore ba tšoanelehe hore e be baholo. Bibele e re bara ba bo rona ba batlang ho ba baholo ba “lakatsa mosebetsi o motle.” (1 Tim. 3:1) Pele mor’abo rona e ba moholo o lokela ho sebetsa ka thata hore e be mohlanka ea sebeletsang. Bahlanka ba sebeletsang ba thusa baholo ka litsela tse ngata. Baholo le bahlanka ba sebeletsang ba hlokomela phutheho ebile ba chesehela ho bolela litaba tse monate. Le bara ba bo rona ba e-s’o etse lilemo tse 20 e ka ba bahlanka ba sebeletsang. Mohlanka ea sebeletsang ea seng a tšoaneleha, ea fetileng lilemo tse 20 e ka ba moholo.

¹⁶ U ka etsa’ng hore u khone ho tšoaneleha ho etsa mesebetsi ee? Bibele e ka u thusa. Bibele e bontša lintho tseo u lokelang ho li etsa e le hore u tšoanelehe. Hape e re u rate Jehova, lelapa leno le phutheho. (1 Tim. 3:​1-13; Tite 1:​6-9; 1 Pet. 5:​2, 3) Leka ho utloisisa lintho tsena kaofela tseo Bibele e reng oa li hloka e le hore u tšoanelehe. Kopa Jehova hore a u thuse hore u khone ho tšoaneleha.c

17. Mor’abo rona e mocha a ka itokisetsa joang hore e be monna le hlooho ea lelapa? (Sheba setšoantšo.)

¹⁷ Ho ba monna le hlooho ea lelapa. Joalokaha Jesu a bontšitse, bara ba bo rona ba bang ba khetha ho se nyale. (Mat. 19:12) Leha ho le joalo, haeba u khetha ho nyala, boikarabelo ba hao boa eketseha. U ba monna le hlooho ea lelapa. (1 Bakor. 11:3) Jehova o lebeletse hore monna a rate mosali oa hae le ho mo hlokomela ka lintho tseo a li hlokang, e be motsoalle oa hae le ho mo thusa hore a lule a rata Jehova. (Baef. 5:​28, 29) Makhabane le lintho tseo re buileng ka tsona sehloohong sena joaloka ho ba motho ea nang le kelello, ho hlompha basali le ho ba motho ea ka tšeptjoang li tla u thusa hore u be monna ea molemo. U tla khona ho phetha boikarabelo ba hao ba ho ba monna le hlooho ea lelapa.

18. Mor’abo rona e mocha a ka etsa’ng ho itokisetsa ho ba ntate?

¹⁸ Ho ba motsoali. Ka mor’a hore u nyale, u ka khetha ho ba le bana. U ka ithuta ho ba ntate ea molemo joang ho Jehova? Ho na le lintho tse ngata tseo u ka ithutang tsona ho eena. (Baef. 6:4) Jehova o ile a bolella Mora oa hae Jesu hore oa mo rata le hore oa mo khahlisa. (Mat. 3:17) Haeba u ba le bana, etsa bonnete ba hore kamehla oa ba tiisetsa hore oa ba rata. Lula u ba babatsa ha ba etsa lintho tse ntle. Bo-ntate ba etsisang mohlala oa Jehova ba thusa bana ba bona hore e be banna le basali ba Bakreste ba nang le tumelo e matla. U ka itokisetsa boikarabelo bona hona joale ka hore u hlokomele lelapa leno le ba bang ka phuthehong le ka hore u ithute ho ba bolella hore oa ba rata ebile oa ba ananela. (Joh. 15:9) Ho etsa joalo ho tla u thusa hore u tle u khone ho phetha boikarabelo boo u ka bang le bona ba ho ba monna le ho ba motsoali. Empa hona joale u tla ba motho oa bohlokoa ho Jehova, lelapa leno le ho phutheho.

19, 20. Ke lintho life tse tla thusa bara ba bo rona ba bacha hore e be banna ba Bakreste ba nang le tumelo e matla? (Sheba setšoantšo se ka ntle.)

¹⁹ Bara ba bo rona ba bacha, le tla lokela ho sebetsa ka thata hore le be banna ba Bakreste ba nang le tumelo e matla. Le lokela ho khetha mehlala e metle eo le ka e etsisang, le be batho ba nang le kelello, ba ka tšeptjoang, le ithute ho etsa mesebetsi e itseng le be le itokisetse boikarabelo boo le tla ba le bona nakong e tlang.

²⁰ Ha le nahana ka lintho tsena le ka utloa eka le na le mosebetsi o mongata empa le ka atleha. Hopolang hore Jehova o ikemiselitse ho le thusa. (Esa. 41:​10, 13) Hape Bakreste-’moho le lona ba ikemiselitse ho le thusa. Ha u se u le monna oa Mokreste ea nang le tumelo e matla u tla thabela bophelo le Jehova o tla u hlohonolofatsa. Re le rata haholo lona bara ba bo rona ba bacha. E se eka Jehova a ka le hlohonolofatsa ha le ntse le sebetsa ka thata hore le be banna ba Bakreste ba nang le tumelo e matla.—Liprov. 22:4.