Baholo ba Lokela ho Etsa’ng ha ba Thusa Motho ea Entseng Sebe se Tebileng?

 1. Re ka kholiseha ka eng ha motho a entse sebe se tebileng?

SEHLOOHONG se fetileng re bone ha moapostola Pauluse a sebetsa taba ea Mokreste oa Korinthe ea entseng sebe se tebileng. Moetsalibe eo o ne a sa baka kahoo o ne a lokela ho tlosoa ka phuthehong. Empa temana ea sehlooho ea re tiisetsa hore ha motho a entse sebe se tebileng a ka thusoa ho baka. (Bar. 2:4) Baholo ba ka mo thusa joang?

2, 3. Re lokela ho etsa’ng ha re tsebile ka sebe se tebileng seo Mokreste-’moho a se entseng, hona hobane’ng?

² Baholo ba ka khona ho thusa motho ea entseng sebe haeba feela ba tseba ka taba eo. Rona re ka etsa’ng haeba re tseba hore Mokreste o entse sebe se tebileng se ka etsang hore a tlosoe ka phuthehong? Re lokela ho khothaletsa motho eo ho kopa thuso ho baholo.—Esa. 1:18; Lik. 20:28; 1 Pet. 5:2.

³ Re lokela ho etsa’ng haeba Mokreste eo a sa batle ho bua le baholo? Boemong boo, re lokela ho bua le baholo e le hore motho eo a tle a fumane thuso. Ha re etsa joalo, re tla be re bontša hore rea mo rata hobane baholo ba ka khona ho mo thusa. Ho seng joalo, motho eo a ka tsoela pele ka sebe seo eaba o senya kamano ea hae le Jehova le ho feta. Le hoja ho ka ba thata, re lokela ho ba sebete re bue le baholo hobane re rata motho eo le Jehova.—Pes. 27:14.

BAHOLO BA THUSA MOTHO EA ENTSENG SEBE SE TEBILENG JOANG?

 4. Boikemisetso ba baholo ke bofe ha ba kopana le motho ea entseng sebe se tebileng?

⁴ Ha Mokreste a etsa sebe se tebileng, sehlopha sa baholo se khetha komiti ea baholo ba bararo ba tla thusa motho eo.a Ka boikokobetso ba leka ho thusa motho eo hore a bake empa baa hlokomela hore ba ke ke ba mo qobella ho fetoha. (Deut. 30:19) Baa elelloa hore ha se motho e mong le e mong ea tla baka joalokaha Morena Davida a ile a etsa. (2 Sam. 12:13) Batho ba bang ba entseng sebe ba ka khetha hore ba se ke ba mamela ha Jehova a ba khalemela. (Gen. 4:​6-8) Empa baholo ba ntse ba ikemisetsa ho thusa motho ho baka haeba ho khoneha. Ke melao-motheo efe e ka tataisang baholo ha ba il’o thusa motho ea entseng sebe se tebileng?

 5. Baholo ba lokela ho tšoara motho ea entseng sebe se tebileng joang ha ba bua le eena? (2 Timothea 2:​24-26) (Sheba setšoantšo.)

⁵ Baholo baa tseba hore leha motho a fositse, e ntse e le nku ea bohlokoa ea Jehova. (Luka 15:​4, 6) Baholo ha baa lokela ho hlaba motho eo ka mantsoe empa ba lokela ho mo tšoara ka mosa. Ha ba nke hore ho kopana le eena ke taba feela ea ho mo botsa lipotso le ho utloa hore na ho etsahetse’ng. Ho e-na le hoo, ba bontša makhabane ao ho buuoang ka oona lengolong la 2 Timothea 2:​24-26. (Le bale.) Ba ba mosa ebile ba ba bonolo hobane ba batla ho mo thusa hore a fetole tsela eo a nahanang ka eona.

 6. Baholo ba lokela ho etsa’ng pele ba kopana le motho ea entseng sebe se tebileng? (Baroma 2:4)

⁶ Baholo ba batla tataiso ea Jehova. Ba leka ho etsisa tsela eo Jehova a tšoarang motho ea entseng sebe ka eona ka hore ba hopole mantsoe a Pauluse ha a ne a re: “Ka mosa Molimo o leka ho u thusa hore u bake.” (Bala Baroma 2:4.) Baholo ba lokela ho hopola hore ke balisa ’me ba lokela ho latela tataiso ea Kreste le ho mo etsisa ka tsela eo ba tšoarang phutheho ka eona. (Esa. 11:​3, 4; Mat. 18:​18-20) Pele baholo ba kopana le motho ea entseng sebe se tebileng, ba rapela Jehova e le hore ba ka khona ho thusa motho eo hore a bake. Ba etsa lipatlisiso ka Mangolong le lingoloeng ’me ba rapela Jehova hore a ba fe temoho. Sena se tla ba thusa ho tseba hore na motho ea entseng sebe o ne a nahana le ho itšoara joang hore a tle a qetelle a entse sebe.—Liprov. 20:5.

7, 8. Baholo ba ka etsisa Jehova joang ka ho ba le mamello ha ba thusa motho ea entseng sebe?

⁷ Baholo ba etsisa Jehova ka hore ba be le mamello. Ba leka ho hopola hore na Jehova o ile a etsa’ng nakong e fetileng ha a ne a thusa batho ba entseng sebe. Ka mohlala, Jehova o ile a mamella Kaine ’me a mo lemosa hore na ho ne ho tla etsahala’ng haeba a ne a ke ke a fetoha le hore o ne a tla mo hlohonolofatsa haeba a ne a ka mamela. (Gen. 4:​6, 7) Jehova o ile a romela moprofeta Nathane hore a eletse Davida. Nathane o ile a sebelisa papiso e ileng ea thusa Davida hore a bake. (2 Sam. 12:​1-7) Jehova o ile a boela a romela baprofeta ba hae “ka makhetlo-khetlo” ho thusa Baiseraele ba neng ba sa mo mamele. (Jer. 7:​24, 25) Ha aa ka a emela batho ba hae hore ba bake pele a ka ba thusa. Ho e-na le hoo, o ile a nka mohato oa pele ka ho ba kopa hore ba bake.

⁸ Baholo ba etsisa Jehova ha ba leka ho thusa batho ba entseng libe tse tebileng. Joalokaha 2 Timothea 4:2 e bontša, “ka mamello eohle” ba thusa Mokreste-’moho ea entseng sebe. Ka hona, moholo o lokela ho lula a khobile matšoafo le ho ba le mamello ha a ntse a thusa motho ea entseng sebe hore a etse se nepahetseng. Haeba moholo a koata kapa a teneha, motho eo a ka ’na a se ke a mamela keletso kapa a hana ho baka.

9, 10. Baholo ba ka etsa’ng ho thusa motho ea entseng sebe ho bona hore na ke’ng e entseng hore kamano ea hae le Jehova e senyehe le hore qetellong a etse sebe?

⁹ Baholo ba leka ho bona hore na ke’ng e entseng hore motho a qetelle a entse sebe. Ka mohlala, na kamano ea hae le Jehova e ile ea fokola hobane a ne a se a sa etse thuto ea botho le ho ba teng tšimong kamehla? Na o ne a se a sa rapele Jehova kamehla? Na o ne a se a tlohetse ho loantša litakatso tse fosahetseng? O qeta nako ea hae a e-na le bo-mang hona o khetha boithabiso bo joang? Liqeto tseo a li entseng linthong tsena li susumelitse tsela eo a nahanang le ho etsa lintho ka eona joang? Na oa utloisisa hore na Jehova Ntate oa hae o ikutloa joang ka lintho tseo a li entseng?

¹⁰ Baholo ba ka botsa motho eo lipotso tse tla mo thusa ho nahana hore na ke’ng e entseng hore kamano ea hae le Jehova e senyehe le hore qetellong a etse sebe. Ba etsa sena ka mosa ’me ha ba mo botse lipotso ka litaba tsa hae tsa botho tseo ba sa hlokeng ho li tseba. (Liprov. 20:5) Ho ekeletsa moo, baholo ba ka sebelisa papiso ho thusa motho eo hore a nahane ka lintho tseo a li entseng le ho bona hore na ke hobane’ng ha li fosahetse, feela joalokaha Nathane a ile a sebelisa papiso ho thusa Davida. Mohlomong ka mor’a ho kopana le motho ea entseng sebe ka lekhetlo la pele, o tla qala ho soabela boitšoaro ba hae ’me a ka ’na a baka.

11. Jesu o ile a thusa baetsalibe joang?

¹¹ Baholo ba loanela ho etsisa Jesu. Ha Jesu a ne a thusa Saule ea tsoang Tarsase, o ile a mo botsa potso ena e fatang maikutlo: “Saule, Saule, ekaba u ntlhorisetsa’ng?” Potso ena e ile ea mo thusa ho hlokomela hore seo a se etsang se ne se fosahetse. (Lik. 9:​3-6) Athe ha Jesu a bua ka “mosali eane ea kang Jezebele” o ile a re: “Ke mo file nako ea hore a bake.”—Tšen. 2:​20, 21.

12, 13. Baholo ba ka fa motho ea entseng sebe nako joang hore a bake? (Sheba setšoantšo.)

¹² Baholo ba etsisa Jesu ’me ha ba potlakele ho etsa qeto ea hore motho ea entseng sebe ha a batle ho baka. Ke ’nete hore batho ba bang ba ka baka ka lekhetlo la pele feela ha ba qeta ho kopana le komiti ea baholo empa ba bang ba ka hloka nako. Kahoo, baholo ba ka kopana ka makhetlo a ’maloa le motho ea entseng sebe. Mohlomong ka mor’a ho kopana le baholo ka lekhetlo la pele, Mokreste enoa ea entseng sebe a ka qala ho nahana ka ho teba ka seo baholo ba mo boleletseng sona. A ka ikokobetsa ’me a kopa Jehova hore a mo tšoarele. (Pes. 32:5; 38:18) Kahoo, ha baholo ba kopana hape le motho ea entseng sebe, mohlomong o tla be a se a fetotse tsela eo a bonang lintho ka eona.

¹³ Baholo ba bontša kutloelo-bohloko ’me ba ba mosa ha ba thusa motho ea entseng sebe hore a bake. Ba rapela Jehova ka tšepo ea hore o tla hlohonolofatsa boiteko ba bona ba ho thusa Mokreste enoa ea entseng sebe hore a bake.—2 Tim. 2:​25, 26.

14. Ha e le hantle ke mang ea thusang motho ea entseng sebe hore a bake, hona ke hobane’ng ha re cho joalo?

¹⁴ Rea thaba haeba moetsalibe a baka. (Luka 15:​7, 10) Ke ’nete hore baholo ba etsa boiteko ba ho thusa motho ea entseng sebe empa ha e le hantle ke mang ea etsang hore a bake? Hopola seo Pauluse a ileng a se bua ka batho ba entseng sebe. O ile a re: “Mohlomong Molimo o tla ba fa monyetla oa hore ba bake.” (2 Tim. 2:25) Ka hona, Jehova ke eena feela ea thusang Mokreste ea entseng sebe hore a fetole tsela eo a nahanang le ho etsa lintho ka eona. Pauluse o re ho etsahala lintho tse thabisang ka mor’a hore motho a bake. Motho ea bakileng o ba le tsebo e nepahetseng ea ’nete, oa hlaphoheloa ’me o baleha ho tšoasoa a ntse a phela ke Satane.—2 Tim. 2:26.

15. Baholo ba tsoela pele ho thusa motho ea seng a bakile joang?

¹⁵ Leha motho a se a bakile, baholo ba tsoela pele ho mo etsetsa maeto a bolisa ho mo thusa ho matlafatsa tumelo ea hae, e le hore a qobe liteko tsa Satane ’me a tsoele pele a etsa lintho tse nepahetseng. (Baheb. 12:​12, 13) Baholo ha baa lokela ho ntša litaba tsa lekunutu tsa motho ea entseng sebe. Leha ho le joalo, ke’ng seo ba lokelang ho se tsebisa phutheho?

“U BA KHALEMELE KA PEL’A BATHO BOHLE”

16. Ho ea ka 1 Timothea 5:​20, “batho bohle” bao Pauluse a buang ka bona ke bo-mang?

¹⁶ Bala 1 Timothea 5:20. Pauluse o ile a ngolla Timothea moholo-’moho le eena mantsoe ana e le ho mo bontša hore o lokela ho sebetsana joang le “ba tloaetseng ho etsa sebe.” Pauluse o ne a bolela’ng? O ne a sa bolele hore “batho bohle” ke motho e mong le e mong ka phuthehong. Leha ho le joalo, o ne a bua ka batho ba tsebang ka sebe seo. E ka ba batho ba boneng se etsahetseng kapa e ka ba batho bao motho ea entseng sebe a ba boleletseng ka ho toba seo a se entseng. Ka hona, baholo ba bolella batho bao feela hore taba ea motho eo e se e sebelitsoe.

17. Haeba batho ba bangata ka phuthehong ba tseba hore motho ea itseng o entse sebe se tebileng kapa ba tseba hamorao ka sona, ho tla etsoa tsebiso efe, hona hobane’ng?

¹⁷ Maemong a mang e ka ’na eaba batho ba bangata ka phuthehong baa tseba hore motho ea itseng o entse sebe se tebileng kapa ba ka ’na ba tseba hamorao. Boemong boo, “batho bohle” ba ka akarelletsa motho e mong le e mong ka phuthehong. Kahoo moholo o tla etsa tsebiso phuthehong ea hore mora kapa morali oa bo rona o khalemetsoe. Hobane’ng? Ha Pauluse a fana ka lebaka o re: “E le hore le ba bang ba tle ba tšabe ho etsa sebe.”

18. Baholo ba ka thusa ngoana ea kolobelitsoeng joang ha a entse sebe se tebileng? (Sheba setšoantšo.)

¹⁸ Ha ngoana ea kolobelitsoeng ea lilemo li ka tlase ho 18 a entse sebe se tebileng, baholo ba sebetsa taba ea hae joang? Sehlopha sa baholo se tla kopa baholo ba babeli hore ba kopane le ngoana eo le batsoali ba hae ba Lipaki.b Baholo bao ba lokela ho fumana hore na batsoali ba entse’ng ho leka ho thusa ngoana oa bona hore a bake. Haeba ngoana eo a mamela khalemelo ea batsoali ba hae ’me a fetola tsela eo a nahanang le ho itšoara ka eona, baholo bao ba babeli ba ka etsa qeto ea hore taba eo e felle moo hobane ha e le hantle Jehova o file batsoali boikarabelo ba ho khalemela bana ba bona. (Deut. 6:​6, 7; Liprov. 6:20; 22:6; Baef. 6:​2-4) Ka mor’a moo, baholo ba tla ’ne ba etele lelapa leo ho netefatsa hore ngoana o ntse a fumana thuso eo a e hlokang. Leha ho le joalo, haeba ngoana eo a sa bake, komiti ea baholo e tla kopana le eena le batsoali ba hae ba Lipaki.

“JEHOVA O LERATO HAPE O MOHAU”

19. Baholo ba loanela ho etsisa Jehova joang ha ba thusa motho ea entseng sebe se tebileng?

¹⁹ Jehova o file baholo ba sebetsang likomiting boikarabelo ba hore ba thuse phutheho hore e lule e hloekile. (1 Bakor. 5:7) Ba thusa motho ea entseng sebe ba e-na le tšepo ea hore o tla fetoha ’me a bake. Sepheo sa bona ke ho etsisa Jehova hobane o “lerato hape o mohau.” (Jak. 5:11) Moapostola Johanne o ile a tšoara Bakreste-’moho le eena ka tsela e tšoanang. O ile a re: “Bana ba ka bao ke ba ratang, ke le ngolla lintho tsena hore le se ke la etsa sebe. Leha ho le joalo, haeba mang kapa mang a etsa sebe, re na le mothusi ea lokileng ea ho Ntate, e leng Jesu Kreste.”—1 Joh. 2:1.

20. Re tl’o ithuta’ng sehloohong sa ho qetela?

²⁰ Ka masoabi, ka linako tse ling Mokreste ha a bake leha baholo ba se ba lekile ho mo thusa. Boemong boo, o tla lokela ho tlosoa ka phuthehong. Sehloohong sa ho qetela, re tla bona hore na baholo ba lokela ho etsa’ng ha seo se etsahala.