Na U Lemoha Matla a Molimo Bophelong ba Hao?

1, 2. Batho ba bang ba nahana’ng ka Molimo?

BATHO ba bangata ba nka hore Molimo ha a na taba le hore na ba etsa’ng. Ba nahana hore Molimo ha a tsotelle hore na ba hlaheloa ke’ng. Ka mohlala, ka mor’a hore sefefo se matla se senye karolo e khōlō ea Philippines ka November 2013, ramotse oa sebakeng seo o ile a re: “E tlameha ebe ho na le moo Molimo a ileng teng.”

² Batho ba bang ba nahana hore Molimo ha a bone lintho tseo ba li etsang. (Esaia 26:10, 11; 3 Johanne 11) Le mehleng ea moapostola Pauluse batho ba bang ba ne ba nahana joalo. O ile a re ka bona: ‘Ha baa ka ba ela Molimo hloko.’ Ba ne ba sa loka, ba le khopo ba bile ba le meharo.—Baroma 1:28, 29.

 3. (a) Re lokela ho ipotsa lipotso life? (b) Ka Bibeleng, hangata ha ho buuoa ka “letsoho” la Molimo, ho buuoa ka eng?

³ Rōna re nahana’ng ka Molimo? Rea tseba hore Jehova o bona lintho tsohle tseo re li etsang. Empa na rea lumela hore Jehova o oa re tsotella? Na re lemoha tsela eo a re thusang ka eona? Ka Bibeleng, hangata ha ho buuoa ka “letsoho” la Molimo, ho boleloa matla a hae. O sebelisa matla ao ho thusa bahlanka ba hae le ho hlōla lira tsa hae. (Bala Deuteronoma 26:8.) Jesu o ile a re batho ba bang “ba tla bona Molimo.” (Matheu 5:8) Na re ba bang ba bona? Re ka “bona Molimo” joang? A re tšohleng mehlala ea batho ba bang ka Bibeleng ba ileng ba lemoha matla a Molimo le ba sa kang ba a lemoha. Re tla boela re bone kamoo tumelo e re thusang kateng ho lemoha matla a Molimo.

 4. Ke hobane’ng ha lira tsa Baiseraele li sa ka tsa lemoha matla a Molimo?

⁴ Nakong e fetileng, batho ba bangata ba ne ba e-na le monyetla oa ho bona le ho utloa kamoo Molimo a ’nileng a thusa Iseraele kateng. Jehova o ile a etsa mehlolo e le hore a lopolle batho ba hae Egepeta le hore a hlōle marena a mangata Naheng e Tšepisitsoeng. (Joshua 9:3, 9, 10) Le hoja marena a mang a ne a utloile a bile a bone kamoo Jehova a sireletsang batho ba hae kateng, a ile a ‘bokana ho loantša Joshua le Baiseraele.’ (Joshua 9:1, 2) Marena ao a ile a ba le monyetla oa ho bona matla a Molimo. Matla a tsotehang a Jehova a ile a etsa hore ‘letsatsi le se ke la sisinyeha, le khoeli e se ke ea sisinyeha, ho fihlela sechaba se iphetelitse ho lira tsa sona.’ (Joshua 10:13) Empa Jehova o ile a tlohella lira tsa Baiseraele hore “li be manganga,” kahoo tsa loantša Iseraele. (Joshua 11:20) Lira tsa Baiseraele li ile tsa hlōloa kaha li ne li sa batle ho lumela hore Jehova o loanela batho ba hae.

 5. Ke’ng eo Morena Akabe ea khopo a ileng a hana ho e lumela?

⁵ Hamorao, Morena Akabe ea khopo o ile a ba le monyetla oa ho bona matla a Molimo ka makhetlo a ’maloa. Elia o ile a re ho eena: “Ho ke ke ha e-ba le phoka kapa pula, haese ka taelo ea lentsoe la ka!” (1 Marena 17:1) Sena se ile sa etsahala ka matla a Molimo, empa Akabe o ile a hana ho lumela seo. Ha nako e ntse e ea, Elia o ile a rapela Jehova, ’me Molimo a araba thapelo ea hae ka ho romela mollo o tsoang leholimong. Akabe o ile a bona ketsahalo eo. Elia a ntan’o bolella Akabe hore Jehova o tl’o nesa pula ’me a felise komello. (1 Marena 18:22-45) Akabe o ile a bona mehlolo ena eohle leha ho le joalo a ’na a hana ho lumela hore o bone matla a Jehova. Re ithuta’ng mohlaleng oo? Re lokela ho ikitlaelletsa ho lemoha litsela tseo Molimo a re thusang ka tsona.

6, 7. Bagibeone le Rahaba ba ile ba lemoha eng?

⁶ Bagibeone ba ne ba fapane hōle le batho ba lichaba tse ba potolohileng. Ba ile ba lemoha matla a Molimo. Ho e-na le hore Bagibeone ba loantše Baiseraele, ba ile ba batla ho etsa khotso le bona. Hobane’ng? Ba ile ba re ba utloetse ka Jehova le ka lintho tseo a li entseng. (Joshua 9:3, 9, 10) E ne e le qeto e bohlale ho lumela hore Jehova o loanela Baiseraele.

⁷ Rahaba le eena o ile a lemoha matla a Jehova. E ne e se Moiseraele, empa o ne a utloetse kamoo Jehova a ileng a lopolla batho ba hae Egepeta kateng. Ha lihloela tse peli tsa Baiseraele li fihla ha hae, o ile a re ho tsona: “Ke fela ke tseba hore ka sebele Jehova o tla le fa naha ena.” Rahaba o ne a lumela hore Jehova o tla mo pholosa a be a pholose ba lelapa labo. O ile a bontša hore o lumela ho Jehova, le hoja ho etsa seo ho ne ho le kotsi.—Joshua 2:9-13; 4:23, 24.

 8. Baiseraele ba bang ba ile ba lemoha matla a Molimo joang?

⁸ Ho fapana le Morena Akabe ea khopo, Baiseraele ba bang ba ileng ba bona mollo o theoha leholimong ka mor’a hore Elia a rapele, ba ile ba lemoha hore mollo oo o rometsoe ke Molimo. Ba ile ba hooa ba re: “Jehova ke Molimo oa ’nete!” (1 Marena 18:39) Ba ne ba bone matla a Molimo ka ho hlaka.

 9. Re ka bona Jehova le ho lemoha matla a hae joang kajeno?

⁹ Re buile ka mehlala e metle le e mebe e re thusang ho utloisisa hore na ho bolela’ng ho “bona Molimo” kapa ho lemoha matla a hae. Ha re tsoela pele ho ithuta ka Jehova le ka litšobotsi tsa hae, re khona ho lemoha matla a hae ka ‘mahlo a lipelo tsa rōna.’ (Baefese 1:18) Sena se re susumelletsa ho batla ho etsisa batho ba tšepahalang ba boholo-holo le ba mehleng ea kajeno ba boneng kamoo Jehova a ’nileng a hlokomela batho ba hae kateng. Empa na re na le bopaki ba hore Molimo o thusa batho kajeno?

10. Re na le bopaki bofe ba hore Jehova o ntse a thusa batho le kajeno? (Sheba setšoantšo se qalong.)

¹⁰ Re na le bopaki bo bongata ba hore Jehova o ntse a thusa batho le kajeno. Re atisa ho utloa liphihlelo tsa batho ba ileng ba rapela Molimo hore a ba thuse, ’me Molimo a araba lithapelo tsa bona. (Pesaleme ea 53:2) Ka mohlala, ha Allan a ntse a paka sehlekehlekeng se seng sa Philippines, o ile a buisana le mosali e mong, ’me mosali eo a qala ho lla. O re: “Hoseng hoo, mosali eo o ne a ile a rapela Jehova, a mo kōpa hore a mo thuse ho kopana le Lipaki.” O ne a ithuta Bibele le Lipaki ha e sa le ngoanana, eaba ha a nyaloa o fallela sehlekehlekeng seo, ’me a khaotsa ho ithuta. Molimo o ile a arabela thapelo ea hae ka potlako hoo a ileng a ameha maikutlo. Le pele selemo se fela, o ile a inehela ho Jehova.

11, 12. (a) Jehova o thusa bahlanka ba hae joang? (b) Jehova o ile a thusa morali’abo rōna e mong joang?

¹¹ Bahlanka ba bangata ba Jehova ba lemohile matla a hae ha ba khaotsa mekhoa e mebe e kang ho tsuba, ho sebelisa lithethefatsi kapa ho sheba litšoantšo tse litšila tse tsosang takatso. Ba bang ba re ba lekile ho khaotsa mekhoa eo, ’me ba hlōleha. Empa ha ba kōpa Jehova hore a ba thuse, o ile a ba fa “matla a fetang se tloaelehileng,” ’me qetellong ba atleha ho khaotsa mekhoa eo e mebe.—2 Bakorinthe 4:7; Pesaleme ea 37:23, 24.

¹² Jehova o boetse o thusa bahlanka ba hae hore ba mamelle mathata ao ba tobanang le ’ona. O ile a thusa Amy. O ne a abetsoe ho ea thusa ho haha Holo ea ’Muso le lehae la baromuoa sehlekehlekeng se seng se Leoatleng la Pacific. O ne a sa tloaela moetlo oa moo, motlakase o atisa ho khaoha le metsi a atisa ho fela, ho ba le likhohola, a hloloheloa ba lelapa labo ebile a lula ka kamoreng e nyenyane ea hotele. Ka le leng, o ile a tjolietsa morali’abo rōna e mong eo a neng a ntse a sebetsa le eena. O ile a ikoahlaela seo. Ha a fihla kamoreng eo a lulang ho eona, o ile a rapela Jehova hore a mo thuse. Ha a fihla ho ne ho se na motlakatse, kahoo ha motlakase o khutla a bala sehlooho sa Molula-Qhooa se buang ka kabo ea mangolo a Gileade. Sehlooho seo se ne se bua ka mathata ao a tobaneng le ’ona. O re: “Ke ile ka hlokomela hore Jehova o bua le ’na bosiung boo. Seo se ile sa ntšusumelletsa hore ke tsoele pele ke le kabelong eo ke e filoeng.”—Pesaleme ea 44:25, 26; Esaia 41:10, 13.

13. Re na le bopaki bofe ba hore Jehova o ’nile a thusa batho ba hae hore ba sireletse tokelo ea ho bolela litaba tse molemo?

¹³ Jehova o boetse o thusitse batho ba hae hore ba sireletse tokelo ea ho bolela litaba tse molemo le ho e theha ka molao. (Bafilipi 1:7) Ka mohlala, ha mebuso e meng e leka ho thibela mosebetsi oa boboleli, re kōpa thuso makhotleng. Re se re hlōtse bonyane linyeoe tse 268 makhotleng a phahameng lefatšeng ka bophara, ’me tse 24 ho tseo re li hlōtse Lekhotleng la Europe la Litokelo Tsa Botho ho tloha ka 2000. Ho hlakile hore ha ho motho ea ka emang morero oa Molimo pele!—Esaia 54:17; bala Esaia 59:1.

14. Re na le bopaki bofe bo bong ba hore Molimo o thusa batho ba hae?

¹⁴ Ho boleloa ha litaba tse molemo lefatšeng ka bophara ke bopaki bo bong ba hore Molimo o thusa batho ba hae. (Matheu 24:14; Liketso 1:8) Ha e le hantle, ke ka thuso ea Jehova feela bahlanka ba hae ba tsoang lichabeng tsohle ba momahaneng. Bonngoe bona boa ikhetha! Esita le batho ba sa rapeleng Jehova ba re: “Ka sebele Molimo o har’a lōna.” (1 Bakorinthe 14:25) Re na le bopaki bo bongata bo bontšang hore Molimo o tšehetsa batho ba hae. (Bala Esaia 66:14.) Na le uena o oa u tšehetsa? Na u lemoha litsela tseo Jehova a u thusang ka tsona?

15. Ke hobane’ng ha ka linako tse ling re ka ’na ra se ke ra lemoha litsela tseo Jehova a re thusang ka tsona?

¹⁵ Ka linako tse ling, re ka ’na ra se ke ra lemoha litsela tseo Molimo a re thusang ka tsona. Hobane’ng? Ha re aparetsoe ke mathata, re ka ’na ra lebala makhetlo a mangata ao Jehova a ’nileng a re thusa ka ’ona. Sena ke sona se ileng sa etsahalla Elia. O ne a le sebete, empa o ile a tšoha ha Mofumahali Jezebele a batla ho mo bolaea. Ka nakoana, o ile a lebala hore Jehova o ’nile a mo thusa. Bibele e re Elia o ne a batla ho shoa. (1 Marena 19:1-4) O ne a tla thusoa ke mang hore a be sebete? O ne a lokela ho itšetleha ka Jehova!—1 Marena 19:14-18.

16. Ke’ng e ka re thusang ho lemoha seo Molimo a re etsetsang sona ha re tobane le mathata?

¹⁶ Jobo o ne a amehile ka mathata a hae hoo a neng a sa talime lintho ka tsela eo Jehova a li talimang ka eona. (Jobo 42:3-6) Ka linako tse ling, le rōna ha re tobane le mathata re ka ’na ra thatafalloa ho lemoha litsela tseo Molimo a re thusang ka tsona. Ke’ng e ka re thusang ho lemoha seo Molimo a re etsetsang sona? Re lokela ho thuisa ka seo Bibele e se buang ka mathata ao re tobanang le ’ona. Seo se tla re thusa ho nka Jehova e le motho oa sebele, ’me le rōna re tla khona ho re: “Ke utloile ka uena ka monyenyetsi, empa joale leihlo la ka lea u bona.”

17, 18. (a) Ke’ng e ka u thusang ho lemoha litsela tseo Jehova a u thusang ka tsona? (b) Pheta phihlelo e bontšang kamoo Molimo a re thusang kateng kajeno.

¹⁷ Ke’ng e ka u thusang ho lemoha litsela tseo Jehova a u thusang ka tsona? A re tšohleng mehlala ena e latelang e mehlano. Oa pele, mohlomong u ua lemoha hore Jehova o u thusitse hore u fumane ’nete. Oa bobeli, mohlomong u hopola ka le leng u ile libokeng tsa Bokreste u mametse puo, ’me u re, “Ke eona keletso eo ke neng ke e hloka!” Oa boraro, mohlomong u bone kamoo Jehova a arabetseng thapelo ea hao kateng. Oa bone, e ka ’na eaba u ne u batla ho etsetsa Jehova ho eketsehileng ’me u lemohile kamoo a u thusitseng kateng hore u finyelle pakane eo. Oa bohlano, mohlomong u tlohetse mosebetsi hobane o u sitisa ho sebeletsa Jehova ’me u bone ha Molimo a phethahatsa tšepiso ea hae, e reng: “Ho hang nke ke ka u tlohela kapa ka u furalla.” (Baheberu 13:5) Haeba kamano ea rōna le Jehova e le matla, re tla nolofalloa ho lemoha litsela tseo a re thusang ka tsona.

¹⁸ Morali’abo rōna e mong oa Kenya ea bitsoang Sarah, o re: “Ke ile ka rapella motho e mong eo ke neng ke bona eka ha a sa thahasella ho ithuta Bibele. Ke ile ka botsa Jehova hore na ke khaotse ho ithuta le eena. Hang feela ha ke qeta ho re ‘Amen,’ fono e ile ea lla. Motho eo o ne a mpotsa hore na a ka ea le ’na libokeng! Ke ile ka hlolloa ke seo!” Haeba re etsa boiteko, re tla lemoha litsela tseo Molimo a re thusang ka tsona. Morali’abo rōna e mong oa Asia ea bitsoang Rhonna o re ho nka nako ho lemoha litsela tseo Jehova a re thusang ka tsona. O phaella ka ho re: “Ha u li lemoha, u tla hlolloa ke kamoo a re thahasellang kateng!”

19. Ke’ng hape eo re lokelang ho e etsa e le hore re bone matla a Molimo?

¹⁹ Jesu o ile a re “ba tla bona Molimo” e lokela ho ba ba “lipelo li hloekileng.” (Matheu 5:8) See se bolela’ng? Se bolela hore re lokela ho boloka monahano oa rōna o hloekile ’me re khaotse ho etsa ntho leha e le efe e fosahetseng. (Bala 2 Bakorinthe 4:2.) Sehloohong sena, re ithutile hore re lokela ho boloka kamano ea rōna le Molimo e le matla e le hore re bone kamoo a re thusang kateng. Sehloohong se latelang re tla tšohla kamoo tumelo e re thusang kateng ho bona matla a Jehova.