Lintho Tsa Khale Tse Epolotsoeng li Fana ka Bopaki ba Hore Morena Davida o Kile a Phela
Ho ea ka Bibele, Morena Davida oa Iseraele o phetse lilemong tsa bo-1100 pele Jesu a tla lefatšeng ’me litloholo tsa hae li ile tsa busa ka lilemo tse makholo. Empa bahanyetsi ba bang ba Bibele ba pheha khang ea hore Davida o kile a phela ’me ba re ke mohale oa litšomong tseo batho ba ileng ba iqapela tsona ha nako e ntse e-ea. Kahoo, na ehlile Morena Davida o kile a phela?
Ka 1993, moepolli e mong oa lintho tsa khale e leng Avraham Biran le basebetsi-’moho le eena, ba ile ba fumana karolo ea lejoe le ngotsoeng “Ntlo ea Davida” sebakeng sa Tel Dan e Iseraele leboea. Mongolo o lejoeng leo, o ngotsoe lilemong tsa bo-900 ka litlhaku tsa boholo-holo tsa Semitic. Ho ile ha hlaka hore ke karolo ea seemahale se neng se entsoe ke Baarame ba neng ba ikotla sefuba ka hore ba ile ba hlola Baiseraele ka makhetlo.
Sehlooho se seng se ho Bible History Daily se re: “Mongolo o buang ka ‘Ntlo ea Davida’ o ne o e-na le linthonyana tsa belaetseng. . . . Leha ho le joalo, litsebi tse ngata tsa Bibele le baepolli ba bang baa lumela hore karoloana ea lejoe le fumanoeng Tel Dan e paka hore Morena Davida oa Bibeleng o kile a phela. Taba ena kea bohlokoa ka ho fetisisa e ileng ea phatlalatsoa ke BAR [Biblical Archaeology Review].”