re ka utloisisa Mangolo a Bakreste a Segerike. Litaba tse ngata li ne li ka hloka molemo ntle le tšehetso eo Mangolo a Seheberu a fanang ka eona. Jesu le Bakreste ba pele, hammoho le Bajode bao a buileng le bona, ba ne ba tloaelane hantle le oona.

Ke hobane’ng ha u sa iphe nako ea ho tloaelana le oona ka ho lekanang le bona? Kahoo u tla nka molemo o tletseng oa “Lengolo lohle,” le ‘bululetsoeng ke Moea oa Molimo, le le nang le molemo oa ho ruta.’—2 Timothea 3:16.

Lipotso Tse Tsoang ho Babali

■ Ho ea ka litlaleho tse reng lingaka li ka ’na tsa tseba ho etsolla ho inyopisa (sterilization) ho ithaopetsoeng, na Bakreste ba bang ba ke ke ba khetha hona e le mokhoa oa ho laola tsoalo ea bana?

Bibele e bontša hore Molimo o hlompha matla a ho hlahisa bana haholo. O ile a rera hore batho ba tlatse lefatše ka mofuta oa bona. (Genese 1:28; 9:6, 7) Hamorao, Baiseraele ba ne ba nka malapa a maholo e le lehlohonolo le tsoang ho Jehova, ’me ho khathatsana le litho tsa ho hlahisa bana ho ne ho halefisa Molimo. (Pesaleme ea 127:3-5; Deuteronoma 1:11; 23:1; 25:11, 12) Lintlha tse joalo Mangolong a Seheberu li susumelitse monahano oa bahlanka ba bangata ba Molimo mabapi le mokhoa oa ho inyopisa ka morero.a

Leha ho le joalo, re fumana eng Mangolong a Bakreste a Segerike e amanang le taba ee? Tabeng e ’ngoe, re ithuta hore Bakreste ha ba tlas’a Molao oa Moshe. (Ba-Galata 3:24, 25) Ho feta moo, Jesu o ile a phehella hore Bokreste bo atolosoe ka boboleli ba litaba tse molemo, e seng ka tsoalo ea bana. Kaha ho ne ho tla fella ka kotulo e khōlō ea barutuoa, Jesu a eletsa barutuoa ba neng ba ka khona hore e be maqhalaha ka kutloisiso ea moea, ba bontša boitšoaro e le masooa. Habohlokoa bo tšoanang, moapostola Pauluse a khothalletsa Bakreste hore ba se ke ba nyala ’me kahoo ba be le tokoloho e kholoanyane ea ho bolela le ho ruta. Ka tsela eo ba ne ba tla bokella bana ba moea. Le bona ba lenyalong ba ne ba lokela ho hopola hore “nako [e setseng] e khutšoanyane”; pakane ea bona e lokela ho ba ‘ho lokoloha lipelaelong’ tsa bophelo ba lelapa.—1 Ba-Korinthe 7:29-32, 35; Mattheu 9:37, 38; 19:12.

Nakong e fetileng moo re buileng ka taba ea ho inyopisa sehloohong sena lingaka tse ngata li ne li nahana hore mokhoa oo o ke ke oa etsolloa ’me kahoo o ema kamehla. Leha ho le joalo, tsoelopele ho tsa meriana lilemong tse fetileng tse leshome e fetotse boemo hanyenyane. Ka mohlala, Population Reports (November-December 1983, Univesithing ea Johns Hopkins) e re ka ho nyopisoa ha banna: “Litlalehong tsa morao ho etsolleha ha tšebetso ena ho ’nile ha tsosolosa pelehi—ke ho re, peō ea banna e ’nile ea fumaneha tselaneng ea eona—ho karolo ea 67 lekholong ho isa ho ea 100 lekholong ea banna. Ho ima ha basali bao ho inyopisa ha banna ba bona ho ileng ha etsolleha—ho phahame ho tloha karolong ea 16 ho ea ho 85 lekholong.” Mekhoa e mecha ea ho buoa le ea ho hloma lintho tse thibelang kemoliso ka nakoana le eona e suptjoa e le pontšo ea hore katleho ea ho etsolloa ha ho inyopisa e tla ’ne e hōle.

Kaha Mangolo a Bakreste a Segerike ha a tataise ka ho toba litabeng tse joalo, Bakreste ba lokela ho etsa liqeto tsa botho ka ho lekanyetsa boholo ba malapa a bona le ka ho laola pelehi. Ka ho inyopisa, ba lokela ho hopola hore le hoja ho boleloa hore matla a ho emola a ka ’na a tsosolosoa hona joale ho feta kamoo ho neng ho le kateng lilemong tse fetileng tse leshome, lingaka li ke ke tsa tiisa hore matla a ho ba le bana a ka tsosolosoa.

Ho feta tsohle, banyalani ba lokela ho lula ba e-na le letsoalo le letle pel’a Jehova le ho Bakreste bahabo bona. Haeba lelapa le nahana ka ho inyopisa e le mokhoa oa ho thibela pelehi, le sa ntsane le lokela ho nahana ka hore na liketso tsa Iona li tla ama ba bang joang. Le hoja batho ba babeli ba nyalaneng ba sa atise ho phatlalatsa qeto ea bona ka ho laola pelehi, haeba ho ka tsebahala haholo hore banyalani ba inyopisitse ka morero, na phutheho e ka tšoenyeha haholo le ho se hlole e ba hlompha? (1 Timothea 3:2, 12, 13) Ana ke mabaka a lokelang ho nahanoa ka botebo, le hona tabeng ena ea lekunutu le ea botho. Bofelong ba taba, polelo ea Pauluse e loketse: “Leha a ka ema, leha a ka oa, ho na le monghali oa hae [Jehova].”—Ba-Roma 14:4, 10-12.