Jehova o ile a re ho Samuele: ‘E-ea lelapeng la Jese. E mong oa bara ba hae e tla ba morena oa Iseraele.’ Kahoo, Samuele a ea lelapeng la Jese. Ha a bona mora e moholo, a re: ‘Enoa e tlameha ebe ke eena ea khethiloeng ke Jehova.’ Empa Jehova a bolella Samuele hore ha se eena. A re: ‘Ke sheba se ka pelong ea motho, eseng ponahalo ea hae feela.’

Jese o ile a tlisa bara ba hae ba bang ba tšeletseng ho Samuele. Empa Samuele a re ho eena: ‘Ho bana ha ho eo Jehova a mo khethileng. Na u na le bara ba bang?’ Jese a re: ‘Ke na le e mong oa ho fela, lebitso la hae ke Davida. O lisitse linku.’ Ha Davida a fihla, Jehova a re ho Samuele: ‘Ke khethile enoa!’ Samuele a tšela Davida ka oli hloohong, a mo tlotsa hore e be morena ea latelang oa Iseraele.

Ha nako e ntse e ea, Baiseraele ba ile ba ea ntoeng le Bafilista, ’me Bafilista ba ne ba e-na le lesole la senatla le bitsoang Goliathe. Goliathe o ne a rohaka Baiseraele letsatsi le letsatsi. O ile a hoeletsa a re: ‘Romelang monna ea tla loana le ’na. Ha a ka ntlhola, re tla ba bahlanka ba lona. Empa ha nka mo hlola le tla ba bahlanka ba rona.’

Davida o ne a tliselitse bo-abuti ba hae ba neng ba le lebothong la Iseraele lijo. Ha a utloa lipolelo tsa Goliathe a re: ‘Ke tla ea ke il’o mo loantša!’ Morena Saule a re: ‘Empa u sa le moshanyana.’ Davida a mo araba, a re: ‘Jehova o tla nthusa.’

Saule o ile a fa Davida liaparo tsa hae tsa ntoa, empa Davida a re: ‘Liaparo tsena lia nkimela, nke ke ka khona ho loana ke li apere.’ Eaba Davida o nka letjeketjane la hae o ea nokeng. A khetha majoe a mahlano a boreleli, a a kenya ka mokotleng oa hae. A ntan’o mathela ho Goliathe. Senatla seo sa hoeletsa, sa re: ‘Moshanyana tooe, tloo koano. Ke tl’o u fa linonyana tsa leholimo le liphoofolo tse hlaha.’ Empa Davida ha aa ka a tšoha. A mo araba, a re: ‘U tla ho ’na ka sabole le lerumo, empa ’na ke tla ho uena ka lebitso la Jehova. Ha u loantše rona empa u loantša Molimo. Batho bohle ba tla bona hore Jehova o matla ho feta sabole kapa lerumo. O tla re thusa hore re le hlole.’

Davida a kenya lejoe letjeketjaneng la hae eaba o le betsa ka matla ’ohle a hae. Jehova a mo thusa hore a otle Goliathe ka lejoe leo phatleng. Senatla seo sa oela fatše. Eaba Bafilista baa baleha. Na le uena u tšepa Jehova joaloka Davida?

Ka mor’a hore Davida a bolaee Goliathe, Morena Saule o ile a mo beha hore e be molaoli oa sesole sa hae. Davida o ile a hlola lintoa tse ngata ’me a tsebahala haholo. Kamehla ha Davida a tsoa ntoeng, basali ba ne ba mo khahlanyetsa ba ntse ba tantša ’me ba bina ba re: ‘Saule o bolaile ba likete, ha Davida eena a bolaile ba likete tse mashome.’ Saule a ba mona ’me a batla ho mo bolaea.

Davida o ne a letsa harepa hamonate. Ka letsatsi le leng ha Davida a ntse a letsetsa Saule harepa, Saule o ile a mo betsa ka lerumo. Davida o ile a le qoba eaba le otla leboteng. Ka mor’a moo, Saule o ile a leka ka makhetlo a mangata ho bolaea Davida. Qetellong Davida a baleha eaba o ipata ka ntle ho motse.

Saule o ile a tsamaea le masole a 3 000 ho ea tsoma Davida. A kena ka lehaheng leo Davida le banna ba hae ba neng ba ipatile ka ho lona. Banna ba tsamaeang le Davida ba re: ‘Ona ke monyetla oa hore u bolaee Saule.’ Eaba Davida o atamela pel’a Saule, a seha seaparo sa hae. Empa Saule ha aa ka a utloa. Ka mor’a moo, Davida a ikoahlaela hore ebe ha aa hlompha morena eo Jehova a mo khethileng. O ile a hanela banna ba hae ho loantša Saule. A hoeletsa Saule a mo bolella hore a ka be a mo bolaile ha a ne a batla ho mo bolaea. Na Saule o ile a fetola maikutlo a hae ka Davida?

Che. Saule o ile a tsoela pele ho tsoma Davida. Ka bosiu bo bong Davida le Abishai ba ile ba ea tenteng ea Saule. Ba fumana le molebeli oa Saule ea bitsoang Abnere a robetse. Abishai a re: ‘Re fumane monyetla joale. E-re ke mo bolaee.’ Davida a mo araba, a re: ‘Jehova ke eena ea tla ahlola Saule. A re nke lerumo la hae le jeke ea hae ea metsi.’

Davida a hloella thabeng e haufi le moo Saule a neng a robetse teng. Eaba oa hoeletsa o re: ‘Abnere, ke hobane’ng ha u sa sireletsa morena oa hao? Lerumo la morena le jeke ea hae ea metsi li kae?’ Saule a tseba lentsoe la Davida ’me a re: ‘U ka be u mpolaile empa ha oa etsa joalo. Kea tseba hore u tl’o ba morena ea latelang oa Iseraele.’ Ka mor’a moo, Saule a khutlela ntlong ea hae ea borena. Leha ho le joalo, ha se bohle lelapeng la Saule ba neng ba hloile Davida.

Mora e moholo oa Morena Saule ea bitsoang Jonathane, e ne e le lesole le sebete. Davida o ile a re Jonathane o lebelo ho feta ntsu, ebile o matla ho feta tau. Ka letsatsi le leng, Jonathane o ile a bona masole a 20 a Bafilista leralleng. Eaba o re ho motho ea mo nkelang libetsa: ‘Re tla ba hlasela hafeela Jehova a ka re fa letšoao. Ha Bafilista ba ka re re nyolohele ho bona, re tla tseba hore re lokela ho ba loantša.’ Bafilista ba hoeletsa, ba re: ‘Nyolohang re tl’o loana!’ Kahoo, banna bao ba babeli ba nyoloha, ’me ba hlola masole ao a Bafilista.

Kaha Jonathane e ne e le mora e moholo oa Saule, e ne e lokela ho ba eena morena ea latelang. Empa Jonathane o ne a tseba hore Jehova o khethile Davida hore e be morena ea latelang oa Iseraele, ’me sena ha sea ka sa mo koatisa. Jonathane le Davida e ile ea e-ba metsoalle e meholo. Ba tšepisana hore ba tla sireletsana. Jonathane a fa Davida seaparo sa hae, sabole, seqha le lebanta ho bontša hore ke metsoalle.

Ha Davida a ntse a baleha Saule, Jonathane o ile a ea ho eena ’me a re: ‘E-ba sebete ’me u be matla. Jehova o khethile uena hore u be morena. Le Ntate o tseba seo.’ Na u ka rata ho ba le motsoalle ea joaloka Jonathane?

Jonathane o ile a beha bophelo ba hae kotsing ka makhetlo a mangata, e le hore a thuse motsoalle oa hae. Kaha o ne a tseba hore ntate oa hae o batla ho bolaea Davida, o ile a re ho eena: ‘U tla be u etsa sebe ha u ka bolaea Davida, hobane ha a etsa letho le phoso.’ Saule o ile a koatela Jonathane. Lilemo hamorao Saule le Jonathane ba ile ba bolaeloa ntoeng.

Ka mor’a lefu la Jonathane, Davida o ile a batla mora oa Jonathane ea bitsoang Mefiboshethe. Ha a mo fumana, a re ho eena: ‘Kaha ntate oa hao e ne e le motsoalle oa ka, ke tla u hlokomela bophelo bohle ba hao. U tla lula ntlong ea ka ea borena ’me u tla ja le ’na tafoleng.’ Davida ha aa ka a lebala motsoalle oa hae Jonathane.

Davida e ile ea e-ba morena ka mor’a lefu la Saule. O ne a le lilemo li 30. Ho ile ha feta lilemo tse ngata e le morena ’me ka bosiu bo bong ha a le ka holim’a ntlo ea hae ea borena, a bona mosali e mong ea motle. Davida o ile a utloa hore lebitso la hae ke Bathe-sheba ’me monna oa hae ke Uria le hore ke lesole. Davida o ile a bitsetsa Bathe-sheba ntlong ea hae ea borena eaba o robala le eena ’me Bathe-sheba a ima. Davida o ile a leka ho pata seo a se entseng. A bolella molaoli oa sesole hore a behe Uria ka pele ntoeng ebe ba chechella morao. Ka mor’a hore Uria a bolaoe ntoeng, Davida a nyala Bathe-sheba.

Empa Jehova o ile a bona lintho tsohle tse mpe tse etsahetseng. O ile a etsa’ng? O ile a roma moprofeta Nathane ho Davida. Nathane a fihla a re: ‘Monna e mong oa morui o ne a e-na le linku tse ngata ’me oa mofutsana a e-na le e le ’ngoe feela eo a e ratang haholo. Monna oa morui o ile a nka nku ea monna eo oa mofutsana.’ Davida o ile a halefa eaba o re: ‘Monna eo oa morui o lokela ho bolaoa!’ Eaba Nathane o re ho Davida: ‘Monna eo oa morui ke uena!’ Davida o ile a utloa bohloko ’me a re ho Nathane: ‘Ke sitetsoe Jehova.’ Sebe seo se ile sa bakela Davida le ba lelapa la hae mathata a mangata. Jehova o ile a khalemela Davida empa a se ke a mo bolaea hobane o ile a bua ’nete ’me a ikokobetsa.

Davida o ne a batla ho hahela Jehova tempele empa Jehova o ile a khetha mora oa Davida ea bitsoang Solomone hore ebe eena ea e hahang. Davida o ile a bokelletsa lintho tseo Solomone a tla li hloka ’me a re: ‘Tempele ea Jehova e lokela ho ba ntle. Solomone o ntse a le monyenyane, kahoo ke tla mo thusa ho bokella lintho tseo a tla li hloka.’ Kahoo, Davida a fana ka chelete e ngata e le hore ho hahoe tempele. O ile a batla batho ba tsebang ho haha. A bokella khauta le silevera ’me a lata mapolanka Tire le Sidone. Pele Davida a shoa, o ile a fa Solomone moralo oa hore na a hahe tempele joang. A re ho eena: ‘Jehova o itse ke u ngolle lintho tsena. Jehova o tla u thusa. U se ke oa tšoha. E-ba sebete ’me u sebetse.’