Pono ea Bibele

Na Lenyalo e Lokela ho ba Kamano ea Bophelo Bohle?

NA LE eona potso eo ea hlokahala? Ha re qotsa likano tsa lenyalo tsa linaheng tsa Bophirimela, na lenyalo hase la “thabong le bohlokong,” le “ho fihlela ha re arohanngoa ke lefu”? E, ka tloaelo likano tsa lenyalo li bolela hore monyali le monyaluoa ba kena tlamong ea bophelo bohle ba bona. Empa ba bangata ha ba sa inka ba tlangoa ke litšepiso tseo tse tebileng. Banyalani ba arohana ka bongata bo tšosang—ba bang e le ka mor’a likhoeli tse ’maloa ’me ba bang e le ka mor’a mashome a lilemo. Ke hobane’ng ha ho hlompha lenyalo ho ntse ho qepha? Bibele e fana ka karabo.

Ka kōpo hlahloba 2 Timothea 3:1-3 ’me u e bapise le seo u se bonang kajeno lefatšeng. Karolo ea litemana tseo e baleha tjena: “Matsatsing a ho qetela ho tla ba le linako tse mahlonoko tseo ho leng thata ho sebetsana le tsona. Etsoe batho e tla ba baithati, ba ratang chelete, . . . ba se nang teboho, ba sa tšepahaleng, ba se nang lerato la tlhaho, ba sa bulehelang tumellano leha e le efe, . . . ba hlokang boitšoaro.” Ho nepahala ha boprofeta boo hoa hlolla. Litšobotsi tseo li sentse le hona ho fokolisa likamano tsa lenyalo lefatšeng ka bophara, e leng se pakoang ke palo e phahameng ea ba hlalanang.

Ka ho hlakileng, batho ba bangata ha ba sa hlompha lenyalo. Ka lebaka la sena, re ka ’na ra botsa: Na lenyalo le lokela ho nkoa ka botebo hakaalo? Na ho na le ntho eo ho thoeng ke ho halalela ha lenyalo? Bakreste ba lokela ho talima lenyalo joang? Ke thuso efe eo Bibele e fanang ka eona ho banyalani kajeno?

Na Pono ea Molimo e Fetohile?

Tšimolohong, Molimo ha aa ka a bua ka kamano ea lenyalo e le ea nakoana. Ho kopanya ha hae monna le mosali ba pele ho tlalehiloe ho Genese 2:21-24, ’me ha ho moo ho buuoang ka khetho ea ho hlala kapa ho arohana. Ho e-na le hoo, temana ea 24 e re: “Monna [o] tla siea ntat’ae le ’m’ae a khomarele mosali oa hae ’me e tla ba nama e le ’ngoe.” Lengolo leo le bolela’ng?

Nahana ka ’mele oa motho, hore na linama tse fapa-fapaneng li lohelletsoe hammoho hakaakang ka tsela e sa bonahaleng le hore na masapo a kopana joang manonyellong a matla, a sa hohlane. Ke bonngoe bo bokaakang! Ke mamello e kaakang! Empa ho ba le bohloko bo tebileng hakaakang ha litho tsee tseo ho seng letho le ka bapisoang le tsona li lemala! Ka hona, ho Genese 2:24, poleloana “nama e le ’ngoe” e hatisa ho ba haufi-ufi le ho khomarelana ha kamano ea lenyalo. E boetse e fana ka temoso e hlakileng ea bohloko bo boholo bo bang teng ha tlamo eo e khaoha.

Le hoja ho fetoha ha mehla ea lilemo tsa likete tse fetileng ho ’nile ha bōpa le ho fetola maikutlo a batho, Molimo eena o ntse a talima lenyalo e le tlamo ea bophelo bohle. Lilemong tse ka bang 2 400 tse fetileng, banna ba bang ba Bajuda ba ne ba nkile mokhoa oa ho lahla basali ba bona ba pele le ho nyala ba bachanyana. Molimo o ile a nyatsa mokhoa ona, a bolela tjena ka moprofeta oa hae Malakia: “‘Le itebele mabapi le meea ea lōna, ’me ho se ke ha e-ba le ea mong ea sebetsanang ka bolotsana le mosali oa bocha ba lōna. Etsoe o hloile tlhalo,’ ho boletse Jehova Molimo oa Iseraele.”—Malakia 2:15, 16.

Lilemo tse fetang makholo a mane hamorao, Jesu o ile a boela a tiisa pono ea Molimo ea tšimolohong ka lenyalo ha a qotsa Genese 2:24 ’me a fana ka tataiso: “Seo Molimo a se kopantseng hammoho jokong ho se ke ha e-ba le motho ea se arolang.” (Matheu 19:5, 6) Lilemo hamorao, moapostola Pauluse o ile a laela hore “mosali ha aa lokela ho tloha ho monna oa hae” le hore “monna ha aa lokela ho tlohela mosali oa hae.” (1 Bakorinthe 7:10, 11) Mangolo ana a bontša ka nepo maikutlo a Molimo ka lenyalo.

Na ho na le mohla Bibele e lumellang ho khaola lenyalo? E, lenyalo le fela haeba e mong oa balekane a e-shoa. (1 Bakorinthe 7:39) Bofebe le bona bo ka boela ba qhala lenyalo haeba molekane ea se nang phoso a etsa qeto e joalo. (Matheu 19:9) Ntle ho moo, Bibele e khothalletsa banyalani hore ba lule hammoho.

Kamoo U ka Etsang Hore Lenyalo e be le Tšoarellang

Molimo o batla hore lenyalo le tšoarelle, le se ke la e-ba joaloka ntoa feela ea ho batla ho pholoha, empa le be joaloka leeto le thabisang. O rata hore monna le mosali ba rarolle mathata a bona ’me ba thabele botsoalle ba e mong ka ho tebileng. Lentsoe la hae le fana ka tataiso bakeng sa lenyalo le thabileng, le tšoarellang. Ka kōpo hlokomela litemana tse latelang.

Baefese 4:26: “Letsatsi le se ke la le likella le halefile.”a Monna e mong ea thabileng lenyalong o lumela hore lengolo lena le thusa eena le mosali oa hae hore ba rarolle ho se utloane ha bona ka potlako. O re: “Haeba u sitoa ho robala ka mor’a hore le be le ntho eo le sa utloaneng ka eona, ho na le ho phoso. U ke ke ua lumella bothata hore bo tsoele pele.” Ka linako tse ling eena le mosali oa hae ba ’nile ba tšohla mathata a bona ho fihlela bosiu bo boholo. Empa hoa sebetsa. Oa phaella: “Ho sebelisa melao-motheo ea Bibele ho hlahisa litholoana tse babatsehang.” Ka ho etsa joalo, monna enoa le mosali oa hae ba ’nile ba e-ba le lenyalo le thabileng ka lilemo tse 42.

Bakolose 3:13: “Tsoelang pele le mamellana le ho tšoarelana ka bolokolohi.” Monna e mong o hlalosa kamoo eena le mosali oa hae ba sebelisitseng sena kateng: “Balekane ba lenyalo ba ka khopisana ho se letho le lekaalo leo ba le entseng le phoso, kaha e mong le e mong o na le mefokolo ea hae le mekhoa e tšoenyang ba bang. Re khona ho mamellana ka hore re se lumelle lintho tsena hore li kene lipakeng tsa rōna.” Ntle ho pelaelo, boikutlo boo bo thusitse banyalani bana lilemong tse 54 tseo ba nyalaneng ka tsona!

Ho sebelisa melao-motheo e joalo ea Mangolo ho tiisa lefito le tlamahanyang banna le basali. Ka hona, manyalo a bona e ka ba a thabileng, a khotsofatsang le a bophelo bohle.

Haeba u rata ho fumana boitsebiso bo eketsehileng kapa ho ba le motho ea u etelang ho u khannela thuto ea lehae ea Bibele e sa lefelloeng, ka kōpo ngolla ho Watch Tower, Private Bag X2067, Krugersdorp, 1740, South Africa, kapa atereseng e loketseng ho tse thathamisitsoeng leqepheng la 5.

[Mongolo o botlaaseng ba leqephe]