Topollo e Haufi Bakeng sa Batho ba Boinehelo ba Bomolimo!
“Jehova o tseba ho lopolla batho ba boinehelo ba bomolimo tekong, empa ho boloka batho ba sa lokang bakeng sa letsatsi la kahlolo hore ba timetsoe.”—2 PETROSE 2:9, “NW.”
1. (a) Ke maemo afe a bakang mahlomola ao batho ba talimaneng le ’ona mehleng ea rōna? (b) Ka baka la sena, ke lipotso life tseo re tla nahanisisa ka tsona?
MATHATA a bophelo aa eketseha bakeng sa batho bohle. Hona ke ’nete ho sa tsotellehe hore na motho o phela moo lintho tse bonahalang li leng ngata kapa moo li haellang. Ho hloka tšireletseho ho teng hohle. Joalokaha eka maemo a moruo a sa tsitsang ha aa lekana hore re tšoenyehe ka ’ona, mathata a tebileng a tikoloho a hlasela naletsana Lefatše, a sokela bophelo bohle bo teng ho eona. Ho kula ho atile. Mafu a tšoaetsanoang, mafu a pelo, le seoa sa kankere li baka tšenyo e khōlō. Boitšoaro bo bobe bo bakile tšenyo e khōlō maikutlong a batho le bophelong ba lelapa. Ntle le sena sohle, lefatše le tletse pefo. Ka baka la seo mokhatlo oa batho o talimaneng le sona, ntle le ho iphapanyetsa ’nete rea botsa: Na ho na le motheo o utloahalang oa ho lebella topollo kapele? Haeba ho joalo, e tla tla joang, hona e tlela bo-mang?—Bapisa le Habakuke 1:2; 2:1-3.
2, 3. (a) Ke hobane’ng ha rōna kajeno re fumana se boletsoeng ho 2 Petrose 2:9 (NW) se khothatsa? (b) Bibele e supa liketso life tse tobileng tsa topollo e le motheo oa khothatso?
2 Se etsahalang mehleng ea rōna se re hopotsa linako tse ling tse hlahelletseng haholo historing ea batho. Moapostola Petrose o hlokomelisa ka liketso tsa topollo tseo Molimo o ileng oa li etsa liketsahalong tseo ’me joale o fihla qetong ena e khothatsang: “Jehova o tseba ho lopolla batho ba boinehelo ba bomolimo tekong.” (2 Petrose 2:9, NW) Hlokomela boitsebiso bo potolohileng polelo eo, ho 2 Petrose 2:4-10:
3 “Hobane Molimo, ha o sa ka oa hauhela mangeloi a sitiloeng, oa mpa oa a lihela liheleng, a tlamiloe ka mahlaahlela a lefifi, ’me o a neetse ho bolokeloa kahlolo; ’me ha o sa ka oa hauhela lefatše la khale, oa mpa oa boloka Noe, ’moleli oa ho loka, e le eena oa boroba meno e le ’meli, mohla o tlisang moroallo holim’a lefatše la banyefoli [“batho ba se nang bomolimo,” NW]; ’me ha o ahlotse metse ea Sodoma le Gomorrha ka ho e ripitla, le ka ho e fetola molora, hore e be temoso ho ba tlang ho ba banyefoli; ’me ha o pholositse Lota, monna ea lokileng, ea neng a hlora hampe ka baka la ketso tse lihlong tsa batho bao ba manyala—hobane monna eo ea lokileng, moeeng oa hae o lokileng, o na a ntse a hloreha ka tsatsi le leng le le leng, ha a na a ahile le bona, ka baka la mesebetsi e mebe ea bona, eo a neng a e bona le eo a neng a e utloa—ke moo ho bonahalang hobane Morena o tseba ho loela barapeli molekong [“Jehova o tseba ho lopolla batho ba boinehelo ba bomolimo tekong,” “NW”], le ho bolokela bakhopo hlokofatso ea letsatsi la kahlolo; haholo ba lumelang ho huleloa ke nama litakatsong tse litšila, ba nyelisang borena.” Joalokaha litemana tseo li bontša, se etsahetseng mehleng ea Noe le nakong ea Lota se na le ho hongata hoo se ho bolelang bakeng sa rōna.
Moea o Neng o Atile Mehleng ea Noe
4. Mehleng ea Noe, ke hobane’ng ha Molimo o ne o talima lefatše le senyehile? (Pesaleme ea 11:5)
4 Tlaleho ea histori e ho Genese khaolo 6 e re tsebisa hore mehleng ea Noe lefatše le ne le se le senyehile mahlong a Molimo oa ’nete. Hobane’ng? Ka lebaka la pefo. Ena e ne e se taba ea maemo a ikhethang a pefo ea batlōli ba molao. Genese 6:11 e tlaleha hore “lefatše le ne le tletse ho bolaeana.”
5. (a) Ke boikutlo bofe ka lehlakoreng la batho bo ileng ba tlatsetsa pefong ea mehleng ea Noe? (b) Henoke o ne a lemositse ka eng mabapi le ho hloka bomolimo?
5 Hoo ho ne ho hlohlelletsoa ke eng? Temana e qotsitsoeng ho 2 Petrose e bua ka batho ba se nang bomolimo. E, moea oa ho hloka bomolimo o ne o kenelletse litabeng tsa batho. Sena se ne se sa akarelletse feela ho se natse melao ea Molimo ho akaretsang empa se ne se akarelletsa boikutlo ba ho hanyetsa Molimo ka booona.a ’Me ha batho ba se ba hanyetsa Molimo, ke joang ho ka lebelloang hore ba tla sebelisana ka mosa le batho ba bang? Esita le pele Noe a tsoaloa, ho hloka bomolimo hona ho ne ho se ho atile hoo Jehova a ileng a etsa hore Henoke a profete hore na phello e ne e tla ba efe. (Juda 14, 15) Ho hanyetsa Molimo ha bona joang kapa joang ho ne ho tla tlisa phethahatso ea kahlolo ea Molimo.
6, 7. Ke boemo bofe bo mabapi le mangeloi boo e neng e le sesosa se seholo sa maemo a mabe a ileng a hlaha pele ho Moroallo?
6 Ho ne ho boetse ho e-na le tšusumetso e ’ngoe e neng e tlatsetsa pefong ea mehleng eo. Genese 6:1, 2 e hlokomelisa ka eona ha e re: “Eitse hobane batho ba qale ho ata lefatšeng, ha ba tsoetse basetsana, bara ba Molimo ba bona barali ba batho hoba ba batle, ’me ba inkela basali har’a bohle bao ba ikhethetseng bona.” Bara bao ba Molimo oa ’nete e ne e le bo-mang? E ne e se batho feela. Ka makholo-kholo a lilemo batho ba ’nile ba ela hloko basali ba batle ’me ba ba nyala. Bara bana ba Molimo e ne e le mangeloi a nkileng ’mele e kang ea batho. Ho Juda 6, a hlalosoa e le “mangeloi a sa kang a tiisetsa boholong ba ’ona, a mpa a tlohile tulong tseo e neng e le tsa ’ona.”—Bapisa le 1 Petrose 3:19, 20.
7 Ha libopuoa tsena tse phahametseng batho tse nkileng ’mele e kang ea batho li e-ba le likamano le barali ba batho, phello e ile ea e-ba efe? “Ho no ho le lifontoane tsa batho lefatšeng mehleng eo, hobane bara ba Molimo ba tle ho barali ba batho, ’me ba ba tsoalle bana; ke tsona linatla tsa boholo-holo, tse mabitso a tumileng.” E, bana bao ba hlahisitsoeng ke kopano eo e seng ea tlhaho e ne e le lifonthoane, linatla tse neng li sebelisa matla a tsona a phahameng ho hlorisa ba bang.—Genese 6:4.
8. Jehova o ile a arabela joang maemong a mabe a neng a le teng lefatšeng?
8 Boemo bo ile ba mpefala hakae? Bo ile ba fihla ntlheng eo ho eona “Jehova a ileng a bona hore bobe ba motho bo atile lefatšeng ’me tšekamelo e ’ngoe le e ’ngoe ea mehopolo ea pelo ea hae e mpe feela ka nako eohle.” Molimo o ile oa arabela joang ho see? “Jehova o ile a utloa masoabi ka hore o entse batho lefatšeng, ’me a ikutloa a utloile bohloko pelong ea hae.” Sena ha se bolele hore Molimo o ne o ikutloa hore o entse phoso ha o bōpa batho. Ho fapana le hoo, o ile oa ikutloa o soabile ka hore e be ka mor’a ho bōpa batho, boitšoaro ba bona bo ile ba e-ba bobe hoo o neng o tlameha ho ba timetsa.—Genese 6:5-7, NW.
Tsela e Ileng ea Lebisa Topollong
9. (a) Ke hobane’ng ha Molimo o ile oa sebetsana le Noe ka mohau? (b) Ke boitsebiso bofe boo Molimo o ileng oa bo fa Noe esale pele?
9 Ha e le Noe, o ile “a fumana mohau pel’a Jehova. . . . Noe e ne e le motho ea lokileng, ea khabane mehleng ea hae; ’me Noe o na a tsamaea le Molimo.” (Genese 6:8, 9) Kahoo Jehova o ile a lemosa Noe esale pele hore O ne a tla tlisa moroallo oa lefatše lohle a ba a mo laela ho haha areka. Batho bohle, haese Noe le lelapa la hae, ba ne ba tla felisoa holim’a lefatše. Esita le pōpo ea liphoofolo e ne e tla timetsoa, ntle le tse seng kae tse neng li emela mofuta ka mong o moholo tseo Noe a neng a lokela ho li kenya ka arekeng.—Genese 6:13, 14, 17.
10. (a) Ke tokisetso efe e neng e lokela ho etsoa bakeng sa ho pholoha, hona e ne e le mosebetsi o moholo hakae? (b) Ke eng e hlokomelehang ka mokhoa oo Noe a ileng a phetha kabelo ea hae ka oona?
10 Tsebo ena eo a e fuoeng esale pele e ile ea beha boikarabelo bo boima holim’a Noe. Areka e tlameha ho hahoa. E ne e lokela ho etsoa joaloka lebokose le leholo, leo boholo ba lona ka kakaretso e neng e ka ba 40 000 cubic meters. Noe o ne a lokela ho e tlatsa lijo e be joale o bokella liphoofolo le linonyana, “nama eohle,” bakeng sa pholoho. E ne e le morero o neng o tla akarelletsa lilemo tsa ho sebetsa. Noe o ile a arabela joang? O ile a “etsa kahohle kamoo Molimo o mo laetseng kateng, a fela a etsa joalo.”—Genese 6:14-16, 19-22; Ba-Heberu 11:7.
11. Ke boikarabelo bofe bo hlokahalang bo neng bo le holim’a Noe mabapi le lelapa la hae?
11 Ha a ntse a etsa mosebetsi oo, Noe o ne a boetse a lokela ho nehelana ka nako ea ho matlafatsa bomoea ba lelapa la hae. Ba ne ba hloka ho lebeloa khahlanong le ho amohela litsela tse mabifi le boikutlo ba bohanyetsi ba batho ba ba potolohileng. E ne e le habohlokoa hore ba se ke ba tšoareha ho tlōlisa litabeng tsa letsatsi le letsatsi tsa bophelo. Molimo o ne o e-na le mosebetsi oo ba neng ba lokela ho o etsa, ’me ho ne ho hlokahala hore ba thehe bophelo ba bona holim’a oona. Rea tseba hore lelapa la Noe le ne le amohela thupelo ea hae le bile le e-na le tumelo eo a nang le eona hobane ho buuoa ka Noe, mosali oa hae, bara ba bona ba bararo, le basali ba bara bao—batho ba robeli ka kakaretso—ka kananelo ka Mangolong.—Genese 6:18; 1 Petrose 3:20.
12. Joalokaha ho bontšitsoe ho 2 Petrose 2:5, ke boikarabelo bofe boo Noe a ileng a bo phetha ka botšepehi?
12 Noe o ne a boetse a e-na le boikarabelo bo bong—ho lemosa ka Moroallo o tlang le ho tsebahatsa hore na ke hobane’ng ha o e-tla. Ho hlakile hore o ile a phetha boikarabelo boo ka botšepehi, hobane ka Lentsoeng la Molimo o boleloa e le “’moleli oa ho loka.”—2 Petrose 2:5.
13. Ke maemo afe ao Noe a neng a talimane le ’ona ha a ntse a phetha kabelo ea hae eo a e fuoeng ke Molimo?
13 Ak’u nahane feela ka maemo ao Noe a ileng a phetha kabelo eo tlas’a ’ona. Ipehe boemong ba hae. Haeba u ne u le Noe kapa u le setho sa lelapa la hae, u ne u tla be u potiloe ke pefo e neng e hlohlelletsoa ke lifonthoane le batho ba se nang bomolimo. U ne u tla be u talimane ka ho toba le tšusumetso ea mangeloi a marabele. Ha u ntse u sebetsa khahong ea areka, u ne u tla songoa. ’Me selemo le selemo ha u ntse u lemosa ka Moroallo o tlang, u ne u tla fumana hore batho ba tšoarehile haholo litabeng tsa letsatsi le letsatsi tsa bophelo hoo ‘ba sa lemoheng’—ke hore, ‘ho fihlela ho fihla moroallo, ’me ba nkoa bohle ke oona.’—Mattheu 24:39; Luka 17:26, 27.
Phihlelo ea Noe e Bolela Eng ho Uena?
14. Ke hobane’ng ha rōna kajeno re sa fumane ho le thata ho utloisisa boemo boo Noe le lelapa la hae ba neng ba talimane le bona?
14 Ha ho thata hore boholo ba babali ba rōna ba nahane ka boemo bo joalo. Hobane’ng? Hobane maemo a mehla ea rōna a tšoana haholo le a neng a atile mehleng ea Noe. Jesu Kreste o boletse hore sena se ne se lokela ho lebelloa. Boprofeteng ba hae bo boholo bo mabapi le nako ea ho ba teng ha hae nakong ea bofelo ba tsamaiso ea lintho, Jesu o boletse esale pele: “Joale ka ha ho bile mehleng ea Noe, le ho tleng ha Mor’a motho ho tla ba joalo.”—Mattheu 24:37.
15, 16. (a) Ke ’nete joang hore, joaloka mehleng ea Noe, kajeno lefatše le tletse pefo? (b) Ke pefo efe eo ka ho khetheha bahlanka ba Jehova ba ’nileng ba hlaseloa ke eona?
15 Na ho bile ka tsela eo? Na kajeno lefatše le tletse pefo? E! Batho ba fetang limillione tse lekholo ba shoele lintoeng lekholong lena la lilemo. Ba bang ba babali ba rōna ba utloile tšusumetso ea sena ka ho tobileng. Ba bangata le ho feta ba ’nile ba sokeloa ke batlōli ba molao ba neng ba rerile ho nka chelete ea bona kapa lintho tse ling tsa bohlokoa. ’Me bana ba ’nile ba pepesetsoa pefo sekolong.
16 Leha ho le joalo, bahlanka ba Jehova ba latsoa ho fetang ho harasoa ke ntoa le pefo e akaretsang ea batlōli ba molao. Ba boetse ba hlaseloa ke pefo hobane hase karolo ea lefatše empa ba leka ka matla ho ba batho ba boinehelo ba bomolimo. (2 Timothea 3:10-12, NW) Ka linako tse ling pefo eo e tla ka mokhoa oa ho sutumetsoa kapa ho jabeloa feela; ka linako tse ling e akarelletsa ho senngoa ha thepa, ho otloa ho sehlōhō, esita le ho bolaoa.—Mattheu 24:9.
17. Na ho hloka bomolimo ho atile kajeno? Hlalosa.
17 Ha ba ntse ba kenelletse pefong e joalo, ka linako tse ling batho ba se nang bomolimo ka boikhohomoso ba ’nile ba phatlalatsa ho nyelisa ha bona Molimo. Sebakeng se seng Afrika, lepolesa le leng le ile la phatlalatsa: “’Muso ke oa rōna. Lōna e-eang ho Molimo, haeba o teng, ’me le o kōpe hore o tle ’me o le thuse.” Literonkong le likampong tsa mahloriso, Lipaki tsa Jehova li ’nile tsa talimana le banna ba kang Baranowsky, oa Sachsenhausen, Jeremane, ea ileng a nyefola: “Ke loana le Jehova. Re tla bona hore na ea matla ke mang, ’na kapa Jehova.” Nakoana ka mor’a moo, Baranowsky o ile a kula ’me a shoa; empa ba bang ba tsoela pele ho bonahatsa boikutlo bo tšoanang. Liofisiri tse kenelletseng ntoeng ea ho hlorisa Bakreste hase tsona feela tse bontšang ho hanyetsa Molimo. Lefatšeng ka bophara, bahlanka ba Molimo baa utloa ba bile ba bona lintho tse pakang hore ba kenellang ho tsona ha ba na tšabo ea Molimo ka lipelong tsa bona.
18. Ke ka litsela life meea e khopo e tlatsetsang boemong bo moluba-lube ba batho?
18 Mehleng ena e tšoanang haholo le nako ea Noe, re boetse re bona ka mahlo ho kenella ha meea e khopo. (Tšenolo 12:7-9) Bademona bana ke ’ona mangeloi a ileng a nka ’mele e kang ea batho ’me a nyala basali mehleng ea Noe. Ha Moroallo o e-tla, basali le bana ba ’ona ba ile ba timetsoa, empa mangeloi ao a sa utloeng a ile a qobelloa ho khutlela sebakeng sa moea. A ne a se a se na sebaka ka hare ho mokhatlo o hlophisitsoeng o halalelang oa Jehova empa a ile a ahloleloa ho ea Tartarus, boemo ba lefifi le leholo, a khaoloa leseling la bomolimo. (2 Petrose 2:4, 5, NW) A sebetsa tlas’a tataiso ea Satane, a tsoetse pele ho boloka kopano e haufi-ufi le batho ’me, le hoja a se a sa khone ho nka ’mele e kang ea batho, a lekile ka matla ho laola banna, basali, esita le bana. Karolo e ’ngoe ea sena e etsoa ka mekhoa ea bonohe. A boetse a susumelletsa batho ho bolaeana ka litsela tse khahlanong le monahano oa motho. Empa hase hoo feela.
19. (a) Bademona ba lebisitse lehloeo la bona ho bo-mang ka ho khethehileng? (b) Bademona ba leka ho re qobella hore re etse’ng?
19 Bibele e senola hore bademona ba loantša “ba bolokileng litaelo tsa Molimo, ba nang le bopaki ba Jesu.” (Tšenolo 12:12, 17) Meea eo e khopo ke bahlohlelletsi ba sehlooho ba mahloriso a bahlanka ba Jehova. (Ba-Efese 6:10-13) E sebelisa mokhoa o mong le o mong o ka nahanoang ho qobella kapa ho eka batho ba tšepahalang hore ba senye botšepehi ba bona ho Jehova ’me ba khaotse ho bolela ka ’Muso oa Jehova le Jesu e le Morena oa Bomessia.
20. Bademona ba leka ho sitisa batho ho itokolla taolong ea bona joang? (Jakobo 4:7)
20 Bademona ba loanela ho thibela batho ba laba-labelang topollo ho tsoa tšusumetsong ea bona e hatellang. Motho e mong eo pele a neng a sebelisana le meea oa Brazil o tlaleha hore ha Lipaki li kokota ha hae, mantsoe a bademona a ile a mo laela hore a se ke a bula monyako; empa o ile a o bula, ’me a ithuta ’nete. Libakeng tse ngata bademona ba sebelisa baloi ka ho toba ho leka ho thibela mosebetsi oa Lipaki tsa Jehova. Ka mohlala, motseng o mong Suriname, bahanyetsi ba Lipaki tsa Jehova ba ile ba kopana le motho ea sebelisanang le meea ea neng a tsebahala ka hore o khona ho tlisetsa batho lefu la tšohanyetso feela ka ho ba supa ka molamu oa hae oa boloi. A e-na le batho ba tantšang le ba tilinyang meropa bao a tsamaeang le bona, motho eo ea sebelisanang le meea, a kenoe ke modemona, o ile a talimana le Lipaki tsa Jehova. O ile a bua mantsoe a hae a boloi eaba o li supa ka molamu oa hae. Baahi ba motse ba ne ba lebelletse hore Lipaki li oe e be lia shoa, empa ke motho eo ea sebelisanang le meea ea ileng a akheha ’me a tlameha ho tlosoa ka potlako ke batšehetsi ba hae ba hlabiloeng ke lihlong.
21. Joaloka mehleng ea Noe, boholo ba batho ba arabela joang boboleling ba rōna, hona hobane’ng?
21 Esita le libakeng tseo ho tsona boloi le tšebeliso ea matla a meea e khopo li sa etsoeng pepenene joalo, Paki e ’ngoe le e ’ngoe ea Jehova e ’nile ea latsoa hore na ho joang ho leka ho bolella batho ba tšoarehileng haholo ka litaba tsa letsatsi le letsatsi tsa bophelo hoo ba sa batleng ho khathatsoa. Joaloka mehleng ea Noe, boholo ba bona ‘ha ba lemohe.’ (Mattheu 24:37-39) Ba bang ba ka ’na ba khahloa ke bonngoe ba rōna le lintho tseo re li finyellang. Empa mosebetsi oa rōna oa khaho ea moea—o akarelletsang lihora tsa thuto ea botho, ho ba teng libokeng ka mehla, le tšebeletso ea tšimo—kaofela ke bohlanya ho bona. Baa re soma ka baka la kholiseho ea rōna litšepisong tsa Lentsoe la Molimo kahobane bophelo ba bona bo likoloha maruong a lintho tse bonahalang le menateng ea nama eo ba ka e fumanang hona joale.
22, 23. Ke joang liketsahalo tsa mehleng ea Noe li fanang ka kholiseho e tiileng ea hore Jehova o tla lopolla batho ba boinehelo ba bomolimo tekong?
22 Na bahlanka ba tšepahalang ba Jehova ba tla hlaseloa ke tšoaro e mpe joalo e tsoang ho ba sa rateng Molimo ka ho sa feleng? Le hanyenyane! Ho ile ha etsahala joang mehleng ea Noe? Ka tataiso ea Molimo, Noe le lelapa la hae ba ile ba kena ka arekeng e phethiloeng. Joale, ka nako e laetsoeng ka ho toba ke Molimo, “mehloli ea boliba bo boholo ea phunyeha, ’me lithoba tsa leholimo tsa thiboloha.” Moroallo o ile oa tsoela pele ho fihlela le tsona lithaba li koahetsoe. (Genese 7:11, 17-20) Mangeloi a neng a lahlile tulo ea ’ona e loketseng a ile a qobelloa ho lahla ’mele eo a e nkileng e kang ea batho le ho khutlela sebakeng sa moea. Lifonthoane le ba bang kaofela ba lefatše leo la batho ba se nang bomolimo, ho akarelletsa bao ba neng ba iphapantse haholo hore ba ka nka khato ka temoso ea Noe, ba ile ba timetsoa. Ka lehlakoreng le leng, Noe le mosali oa hae le bara ba bona ba bararo le basali ba bara ba bona ba ile ba pholoha. Ka hona, Jehova o ile a lopolla Noe le lelapa la hae tekong eo ba neng ba e mamelletse ka botšepehi ka lilemo tse ngata haholo.
23 Na Jehova o tla etsa ho tšoanang bakeng sa batho ba boinehelo ba bomolimo kajeno? Ho hang ha ho pelaelo ka hona. O ho tšepisitse, ’me a ke ke a thetsa.—Tite 1:2; 2 Petrose 3:5-7.
[Mongolo o botlaaseng ba leqephe]
a “Anomia ke ho se natse, kapa ho hanyetsa, melao ea Molimo; asebeia [mofuta oa lereho oa lentsoe le fetoletsoeng e le ‘batho ba se nang bomolimo’] ke boikutlo bo tšoanang ho Molimo ka Booona.”—Vine’s Expository Dictionary of Old and New Testament Words, Moqolo 4, leqephe 170.
Na u sa Hopola?
◻ Petrose o bontšitse joang hore Jehova o tseba ho lopolla batho ba boinehelo ba bomolimo tekong?
◻ Ke lisosa life tse ileng tsa tlatsetsa pefong ea mehleng ea Noe?
◻ Ka baka la Moroallo oa lefatše lohle o neng o e-tla, Noe o ne a e-na le boikarabelo bofe?
◻ Ke lintho life tse tšoanang le tsa mehleng ea Noe tseo re li bonang nakong ea rōna?
[Setšoantšo se leqepheng la 12]
Ho haha areka ho ile ha akarelletsa lilemo tsa mosebetsi o thata
[Setšoantšo se leqepheng la 13]
Noe o ile a nehelana ka nako ho hōliseng bomoea ba lelapa la hae