Lipotso tse Tsoang ho Babali
Ke hobane’ng Noe ha a le arekeng, a ile a roma lekhoaba eaba hamorao o roma leeba?
Bibele ha e fane ka tlhaloso e qaqileng. Leha ho le joalo, ho bonahala mokhoa oo Noe a sebelitseng litaba ka ’ona o utloahala.
Ka matsatsi a 40 le masiu a 40, lefatšeng ho ile ha na pula ea litloebelele, e ileng ea baka moroallo o ileng oa koahela esita le litlhōrō tsa lithaba ka likhoeli tse hlano. Joale “areka ea ema holim’a lithaba tsa Ararate.” (Genese 7:6–8:4) Likhoeli hamorao, ka mor’a hore ‘litlhōrō tsa lithaba li hlahe,’ Noe “a ntša lekhoaba, ’me ho eeng la ea, la boea.”—Genese 8:5, 7.
Ke hobane’ng ha a ile a roma lekhoaba? Nonyana ena e khona ho fofa ka matla, ’me e ka phela ka lijo tse fapa-fapaneng, ho akarelletsa le nama ea lintho tse shoeleng. E ka ’na eaba Noe o ile a roma lekhoaba ho bona hore na le tla khutlela arekeng kapa le tla ela ruri, mohlomong le e-ja mesaletsa ea litopo tse ileng tsa bonahala ha metsi a kokobela ’me ho hlaha naha e ommeng. Leha ho le joalo, lekhoaba ha lea ka la ela ruri. Bibele e bolela hore le ile la khutla, empa ha e bolele hore le ile la khutlela ho Noe. Mohlomong le ile la khutlela arekeng ho phomola ha le ntse le fofa le batla lijo tse phaphametseng moo ho neng ho sa ntsane ho e-na le metsi.
Hamorao, Noe o ile a khetha ho roma leeba. Rea bala: “Leeba ha lea ka la bona tulo moo le ka beang bohato ba leoto la lona teng, eaba le khutlela ho eena arekeng.” (Genese 8:9) Sena se bontša hore ka tsela e itseng, leeba le ne le ka sebeletsa ho bontša hore na metsi a moroallo a fokotsehile. Maeba a tšepa batho haholo. Noe o ne a ka lebella hore leeba le tla khutla, eseng feela ho tla phomola arekeng, empa ho Noe ka boeena.
Ho boleloa hore maeba a phomola mobung o ommeng feela, a tsejoa a fofela tlaase liphuleng, ’me a ja limela. (Ezekiele 7:16) Grzimek’s Animal Life Encyclopedia e-ea hlokomela: “Joalokaha e le ’nete ka linonyana tsohle le maeba tse jang peō le litholoana, ho na le bothata ba ho li fepa ha lehloa [kapa metsi] le khetheha ka nako e fetang letsatsi le le leng, hobane lijo tse ngata tsa tsona li fatše.” Kahoo leeba le ne le ka fa Noe bopaki ba hore le fumane mobu o ommeng kapa limela tse hlometseng. Ha Noe a ne a le roma ka lekhetlo la pele, leeba le ile la mpa la khutlela ho eena ka arekeng. Lekhetlong la bobeli, leeba le ile la khutla le nkile lehlaku la mohloare. Lekhetlong la boraro, ha lea ka la khutla, le fana ka bopaki ba hore ho ka khoneha ’me ho sireletsehile hore Noe a tsoe ka arekeng.—Genese 8:8-12.
Le hoja ba bang ba ka nka hona e le boitsebiso bo itlhahetseng ka kotsi, ’nete ea hore tlaleho ena ke e tobileng hakana, ka ntle le ho khathatsa kelello ka hore ho fanoe ka litlhaloso tse felletseng, e bontša hore Bibele e ka lumeloa. Ho re neha lebaka le eketsehileng la ho nka tlaleho ena e se e inahanetsoeng kapa e iqapetsoeng, empa e le e nepahetseng ka ho tšepahalang. Hore ebe ha ho boitsebiso le litlhaloso tse fetelletseng ho boetse ho bontša hore na ke lintho life tse thahasellisang tseo Bakreste ba tšepahalang ba ka lebellang ho li botsa Noe ha a tsosoa ’me a ka hlalosa ka seqo mabaka a liketso tsa hae.—Ba-Heberu 11:7, 39.