Mpho e Hlollang ea Boikhethelo

NA U ananela ho ba le tokoloho ea ho khetha kamoo u tla laola bophelo ba hao, seo u tla se etsa le seo u tla se bua? Kapa na u batla hore motho e mong a u bolelle seo u lokelang ho se bua le ho se etsa, motsotso o mong le o mong letsatsi le letsatsi, ha feela u ntse u phela?

Ha ho motho ea phetseng hantle ea batlang hore motho e mong a laole bophelo ba hae ka ho felletseng. Ho phela ka tsela e joalo e ne e tla ba ho hatellang haholo le ho ferekanyang. Re batla tokoloho.

Empa ke hobaneˈng ha re e-na le takatso e joalo ea tokoloho? Ho utloisisa lebaka leo tokoloho ea rōna ea ho ba le khetho e leng la bohlokoa ke senotlolo sa ho utloisisa kamoo bokhopo le ho utloa bohloko li neng li ka simoloha ka teng. Ho tla boela ho re thusa ho utloisisa hore na ke ho-baneˈng ha Molimo o letile ho fihlela joale pele o nka bohato ho felisa bokhopo le ho utloa bohloko.

Kamoo re Bōpiloeng ka Teng

Ha Molimo o ne o bōpa batho, harˈa limpho tse ngata tse hlollang tseo o ba nehileng tsona ke boikhethelo. Bibele e re bolella hore Molimo o bōpile motho ka ˈsetšoantšo sa oona le ho tšoana le oona,ˈ ˈme e ˈngoe ea litšobotsi tseo Molimo o nang le tsona ke tokoloho ea ho ba le khetho. (Genese 1:26; Deuteronoma 7:6) Kahoo, ha o bōpa batho, o ile oa ba neha tšobotsi eona eo e makatsang—mpho ea boikhethelo.

Ke ka baka leo re khethang tokoloho ho e-na le bokhoba tlasˈa babusi ba hatellang. Ke ka baka leo ho nang le lehloeo le eketsehang khahlanong le puso e mabifi le e thata hoo hangata batho ba tsohelang mebuso matla ho fumana tokoloho.

Takatso ea ho batla tokoloho hase ntho e tlileng ka kotsi. Bibele e fana ka lebaka la motheo. Ea bolela: “Moo ho nang le moea oa Jehova, ho na le tokoloho.” (2 Ba-Korinthe 3:17, NW) Kahoo ho batla tokoloho ke karolo ea tlhaho ea rōna hobane Molimo o re bōpile ka tsela eo. Ke ntho e ˈngoe eo o batlang hore re be le eona hobane oona ka booona ke Molimo oa tokoloho.—2 Ba-Korinthe3:17, AW.

Molimo o boetse o re nehile matla a kelello, joaloka matla a kutloisiso, ho beha mabaka, le kahlolo e sebetsang tumellanong le boikhethelo. Tsena li re nolofalletsa ho nahana, ho lekanyetsa lintho, ho etsa liqeto le ho khetholla ntho e nepa-hetseng ho e fosahetseng. (Ba-Heberu 5:14) Ha rea bōptjoa joaloka liroboto tse sa nahaneng tse hlokang boikhethelo; kapa hona hore re bōpetsoe ho sebetsa ka boikutlo ba tlhaho joaloka liphoofolo.

Batsoali ba rōna ba pele ba ne ba filoe boikhethelo hammoho le ntho e ˈngoe le e ˈngoe eo motho a neng a ka e batla: Ba ne ba behiloe paradeiseng e kang serapa sa boikhathollo; ba ne ba e-na le lijo tse ngata; ba ne ba e-na le menahano le ˈmele e phethahetseng tse neng li ke ke tsa tsofala, kapa tsa kula ebe lia shoa; ba ne ba tla ba le bana bao le bona ba neng ba tla ba le bokamoso bo thabileng; ˈme lenane le eketsehang la batho le ne le tla ba le mosebetsi o khotsofatsang oa ho fetola lefatše lohle paradeise.—Genese 1:26-30; 2:15.

Mabapi le seo Molimo o ˈnileng oa tsoela pele ho se etsa, Bibele e re: “Molimo oa bona tsohle tseo o li entseng hoba li molemo haholo.” (Genese 1:31) Bibele e boetse e re ka ˈMōpi: “Mosebetsi oa hae o phethahetse.” (Deuteronoma 32:4, NW) E, o ile a neha lelapa la motho tšimoloho e phethahetseng. E ne e le molemo.

Tokoloho e Nang le Meeli

Leha ho le joalo, na mpho e makatsang ea boikhethelo e ne e ke ke ea hloka meeli? Na u ne u ka rata ho khanna koloi harˈa sephethe-phethe se sengata haeba ho ne ho se na melao ea sephethe-phethe, moo u neng u lokolohile ho khanna ka lehlakoreng lefe kapa lefe la tsela, u lebile moo u ratang, ka lebelo leha e le lefe? Ha e le hantle, liphello tsa tokoloho e joalo e hlokang meeli harˈa sephethephethe e ne e tla ba tse bolaeang.

Ho joalo le ka likamano tsa batho. Tokoloho e hlokang meeli e ne e ke ke ea bolela tokoloho ho ba bang. Tokoloho e sa lekanyetsoang e ka fella ka ho itsamaisa ha sechaba, e leng ho ntšang tokoloho ea motho e mong le e mong kotsi. Meeli e tlameha ho ba teng. Kahoo, mpho ea Molimo ea tokoloho ha e bolele hore o ne o rerile hore batho ba itšoare ka tsela efe kapa efe ka ntle le ho nahanela boiketlo ba batho ba bang.

Ntlheng ena, Lentsoe la Molimo le re: “Itšoareng joaloka batho ba lokolohileng, ˈme le ka mohla le se sebelise tokoloho ea lōna e le lebaka la ho etsa bokhopo.” (1 Petrose 2:16, The Jerusalem Bi-ble) Kahoo Molimo o batla hore boikhethelo ba rōna bo laoloe molemong oa bohle. O ne o sa rerela batho hore ba be le tokoloho e felletseng, empa tokoloho e lekanyelitsoeng, e pusong ea molao.

Melao ea Mang?

Ke melao ea mang eo re bōpetsoeng ho e mamela? Ke melao ea mang e sebetsang hamolemo bakeng sa rōna? Karolo e ˈngoe ea lengolo la 1 Petrose 2:16 e boletsoeng ka holimo ea bolela: “Ha le bahlanka ba e mong haese ba Molimo.” Sena hase bolele bokhoba bo hatellang, empa ho fapana le hoo, re bōpetsoe ho ikokobelletsa melao ea Molimo. Re ba batho ba thabileng haholoanyane haeba re ikokobelletsa eona.

Melao ea Molimo, ho feta sehlopha leha e le sefe sa melao e ka etsoang ke batho, e fana ka tataiso e molemohali bakeng sa motho e mong le e mong. Ho joalokaha Esaia 48:17 e bolela: “ˈNa Jehova, Molimo oa hao, ke u ruta se u tšoanelang, ke u tsamaisa ka tsela eo u tšoanetseng ho tsamaea ka eona.” Leha ho le joalo, ka nako e tšoanang, melao ea Molimo e lumella tokoloho e pharalletseng harˈa meeli ea eona. Sena se fana ka khetho e ngata ea botho le lintho tse fapaneng, se etsa hore lelapa la motho e be le thahasellisang haholoanyane, ebe le thabisang haholoanyane.

Batho ba boetse ba lokela ho ikokobelletsa melao ea Molimo ea tlhaho. Ka mohlala, haeba re hlokomoloha molao oa matla a khoheli ea lefatše ebe re itihela sebakeng se phahameng, re ne re tla tsoa kotsi kapa re shoe. Haeba re qoela ka metsing ˈme re sa kenya lisebelisoa tse khethehileng bakeng sa ho phefumoloha, re ne re tla shoa ka metsotso e seng mekae. ˈMe haeba re hlokomoloha melao ea rōna ea ka hare ea ˈmele ˈme re khaotsa ho ja lijo kapa ho noa metsi, le teng re ne re tla shoa.

Kahoo, batsoali ba rōna ba pele, le bohle ba tsoileng ho bona, ba bōpiloe ba na le tlhoko ea ho mamela melao ea Molimo ea boitšoaro kapa ea kahisano esita le melao ea oona ea tlhaho. Ho mamela melao ea Molimo ho ne ho ke ke ha ba boima. Ho e-na le hoo, ho ne ho tla sebeletsa boiketlong ba bona le lelapa lohle la batho le neng le tla latela. Hoja batsoali ba rōna ba pele ba se ke ba kheloha meeli ea melao ea Molimo, ba ne ba tla phela hantle.

Ke eng se ileng sa etsahala ho senya qalo eo e molemo? Ho e-na le hoo, ke hobaneˈng ha ho tletse bokhopo le ho utloa bohloko? Ke hobaneˈng ha Molimo o li lumelletse ka nako e telele hakaale?

[Setšoantšo se leqepheng la 7]

Mpho e hlollang ea boikhethelo e re khetho-lla ho liroboto tse sa nahaneng le liphoofolo tseo boholo li sebetsang ka boikutlo ba tlhaho