Bakreste—E-bang Motlotlo ka Seo le Leng Sona!

“Ea ithorisang, a ke a ithorise ka Jehova.”—1 BAKORINTHE 1:31.

 1. Batho ba atisa ho bonahatsa boikutlo bofe ka bolumeli?

“HO SE thahaselle bolumeli.” Morao tjena mohlalosi e mong oa litaba tsa bolumeli o ile a sebelisa mantsoe ana ha a ne a hlalosa boikutlo ba batho ba bangata ka bolumeli ba bona. O ile a bo hlalosa tjena: “Phetoho e khōlō bolumeling ba kajeno ke hore ho se ke ha e-ba le bolumeli ka ho feletseng—boikutlo bona bo hlalosoa hantle ke ‘ho se thahaselle bolumeli.’” Ha a hlalosa taba ena, o ile a re ho se thahaselle bolumeli ke “ha motho a sa tsotelle bolumeli ba hae hakaalo.” O ile a re batho ba bangata “ba lumela ho Molimo . . . ; ke feela hore ha ba mo tsotelle hakaalo.”

 2. (a) Ke hobane’ng ha ho sa makatse hore ebe batho ha ba sa thahasella lintho tsa moea? (b) Ho se tsotelle ho ka ba kotsi joang ho Bakreste ba ’nete?

² Boikutlo bona bo tloaelehileng ba ho se thahaselle bolumeli ha bo makatse liithuti tsa Bibele. (Luka 18:8) ’Me mabapi le bolumeli ka kakaretso, ho ne ho ntse ho ka lebelloa hore batho ba se ke ba bo thahasella joalo. Bolumeli ba bohata bo ’nile ba khelosa le ho soetsa batho ka nako e telele. (Tšenolo 17:15, 16) Leha ho le joalo, ho Bakreste ba ’nete, boikutlo bona bo atileng ba ho ba monyebe le ba ho se be le cheseho bo kotsi. Re ne re tla hlaheloa ke ntho e bohloko haeba re ne re ke ke ra thahasella tumelo ea rōna eaba re felloa ke cheseho bakeng sa ho sebeletsa Molimo le bakeng sa ’nete ea Bibele. Jesu o ile a lemosa ka ho ba foofo ka tsela eo ha a ne a hlokomelisa Bakreste ba lekholong la pele la lilemo ba neng ba lula Laodisia: “Ha u bate ha u chese. Ke lakatsa eka u ka be u bata kapa ho seng joalo u chesa. . . . U foofo.”—Tšenolo 3:15-18.

Ho Utloisisa Seo re Leng Sona

 3. Bakreste ba ka ba motlotlo ka litšobotsi life tsa boitsebahatso ba bona?

³ Hore ba loantše ho se thahaselle lintho tsa moea, ho hlokahala hore Bakreste ba be le pono e chatsi ka seo ba leng sona, hape ba lokela ho ba motlotlo ka tsela e loketseng ka boitsebahatso ba bona bo hlakileng. Joaloka bahlanka ba Jehova le barutuoa ba Kreste, re ka fumana litlhaloso tsa seo re leng sona ka Bibeleng. Re “lipaki” tsa Jehova, “basebetsi-’moho le Molimo,” ha ka cheseho re bolella ba bang ‘litaba tse molemo.’ (Esaia 43:10; 1 Bakorinthe 3:9; Matheu 24:14) Re batho ba ‘ratanang.’ (Johanne 13:34) Bakreste ba ’nete ke batho “bao matla a bona a ho lemoha a koetliselitsoeng ho khetholla se nepahetseng le se fosahetseng.” (Baheberu 5:14) Re “maseli lefatšeng.” (Bafilipi 2:15) Re loanela ho ‘boloka boitšoaro ba rōna bo le botle har’a lichaba.’—1 Petrose 2:12; 2 Petrose 3:11, 14.

 4. Morapeli oa Jehova a ka tseba joang seo a seng sona?

⁴ Barapeli ba ’nete ba Jehova ba boetse ba tseba seo ba seng sona. “Hase karolo ea lefatše,” feela joalokaha Moeta-pele oa bona, Jesu Kreste, e ne e se karolo ea lefatše. (Johanne 17:16) Ba lula ba arohile ho “lichaba” tse “lefifing likelellong, ’me li arohile bophelong ba Molimo.” (Baefese 4:17, 18) Ka lebaka leo, balateli ba Jesu ba “hana ho hloka bomolimo le litakatso tsa lefatše [’me ba] phela ka ho hlaphoheloa kelellong le ho loka le boinehelo ba bomolimo har’a tsamaiso ena ea hona joale ea lintho.”—Tite 2:12.

 5. Keletso e reng “ithorise ka Jehova” e bolela’ng?

⁵ Pono e hlakileng ka boitsebahatso ba rōna le ka kamano ea rōna le Morena ’Musi oa bokahohleng, e re susumelletsa ho ‘ithorisa ka Jehova.’ (1 Bakorinthe 1:31) Ke ho ithorisa ha mofuta ofe hoo? Re le Bakreste ba ’nete, re motlotlo hore ebe Jehova ke Molimo oa rōna. Re latela keletso ena: “Ea ithorisang a ke a ithorise ka lebaka la sena, ho ba le temohisiso le ho ntseba, hore ke ’na Jehova, Ea bontšang mosa o lerato, toka le ho loka lefatšeng.” (Jeremia 9:24) Re ‘ithorisa’ ka tlotla ea ho tseba Molimo le ea hore o re sebelisetsa ho thusa ba bang.

Bothata

 6. Ke hobane’ng ha ho le thata ho ba bang ho lula ba e-na le pono e chatsi ka boitsebahatso ba bona ba Bokreste?

⁶ Bonneteng, hase ka linako tsohle ho leng bonolo ho lula re e-na le pono e chatsi ka boitsebahatso ba rōna bo hlakileng ba Bokreste. Mohlankana e mong ea ileng a hōlisoa e le Mokreste oa hopola hore ka nako e itseng o ile a fokola moeeng: “Ka linako tse ling, ke ne ke ikutloa ke sa tsebe hore na ke hobane’ng ha ke ne ke le e mong oa Lipaki Tsa Jehova. Ke ne ke ile ka rutoa ’nete ho tloha boseeng. Ka linako tse ling ke ne ke nahana hore e mpa e le bolumeli bo bong bo boholo, bo amohelehang.” Mohlomong ba bang ba ’nile ba lumella hore boitsebahatso ba bona bo susumetsoe ke boithabiso ba lefatše, mecha ea litaba le pono ea bophelo ea batho ba kajeno ba se nang bomolimo. (Baefese 2:2, 3) Mohlomong ka linako tse ling Bakreste ba bang ba ba le linako tsa ho ikhalala le tsa ho hlahloba litekanyetso le lipakane tsa bona bocha.

 7. (a) Ke ho itlhahloba ha mofuta ofe ho loketseng bakeng sa bahlanka ba Molimo? (b) Ke eng e ka bang kotsi?

⁷ Na ho phoso ka ho feletseng hore motho a itlhahlobe khafetsa? Che. Mohlomong u tla hopola hore moapostola Pauluse o ile a khothalletsa Bakreste hore ba lule ba itlhahloba: “Le ’ne le inonye hore na le tumelong, le ’ne le leke seo le leng sona.” (2 Bakorinthe 13:5) Mona moapostola o ne a khothalletsa hore motho a itekole ka tsela e molemo hore a bone mefokolo leha e le efe ea moea eo e ka ’nang eaba e hlahile, ka sepheo sa ho nka mehato e hlokahalang ea ho e lokisa. E le hore a ka inonya hore na o tumelong, Mokreste o lokela ho hlahloba hore na mantsoe le liketso tsa hae li lumellana le boipolelo ba hae ba hore o tumelong. Leha ho le joalo, ho itlhahloba ho re susumetsang ‘hore re ipatle’ kapa hore re batle likarabo tse sa re thuseng ho ba le kamano le Jehova kapa le phutheho ea Bokreste e tla ba ho se nang thuso le ho ka re bolaeang moeeng, haeba ho sa etsoe ka tsela e nepahetseng.a Ho hang ha re batle ho “senyeheloa ke tumelo [ea rōna] joaloka sekepe se soahlamaneng”!—1 Timothea 1:19.

Mathata ha a re Pote ka Thōko

 8, 9. (a) Moshe o ile a ntša maikutlo a hae a ho ikhalala joang? (b) Jehova o ile a re’ng ha Moshe a ne a itšoha? (c) Litsela tseo Jehova a re kholisang ka tsona li u ama joang?

⁸ Na Bakreste bao ka linako tse ling ba ikhalalang ba lokela ho ikutloa ba hlōlehile? Le hanyenyane! Ha e le hantle, ba ka fumana matšeliso ka ho tseba hore maikutlo a joalo ha a macha. Lipaki tse tšepahalang tsa Molimo tsa mehleng e fetileng li bile le ’ona. Ka mohlala, nahana ka Moshe, ea ileng a bonahatsa tumelo, botšepehi le boinehelo ka tsela e ikhethang. Ha a ne a abeloa mosebetsi o neng o bonahala o le thata, ka ho ikhalala Moshe o ile a botsa: “’Na ke mang?” (Exoda 3:11) Kamoo ho bonahalang kateng, karabo eo a neng a nahanne ka eona ke e reng, ‘Ha ke letho!’ kapa ‘Ha ke na bokhoni!’ Likarolo tse itseng tsa semelo sa Moshe li ne li ka ’na tsa mo bakela hore a ikutloe e se letho: Sechaba sa habo e ne e le makhoba. O ne a lahliloe ke Baiseraele. E ne e se motho ea buang ka mokhoa o phollatsi. (Exoda 1:13, 14; 2:11-14; 4:10) E ne e le molisa, e leng mosebetsi oo Baegepeta ba neng ba o nyonya. (Genese 46:34) Ha ho makatse hore ebe o ile a ikutloa a sa tšoanelehe ho ba molokolli oa batho ba Molimo ba neng ba entsoe makhoba!

⁹ Jehova o ile a kholisa Moshe ka ho mo etsetsa litšepiso tse peli tse matla: “Ke tla ba le uena, ’me ena ke pontšo ho uena ea hore ke ’na ea u romileng: Ka mor’a hore u ntše sechaba seo Egepeta, le tla sebeletsa Molimo oa ’nete thabeng ena.” (Exoda 3:12) Molimo o ne a bolella mohlanka oa hae ea leqe hore O ne a tla ba le eena kamehla. Ho feta moo, Jehova o ne a bontša hore joang kapa joang o ne a tla lokolla batho ba hae. Ho theosa le makholo a lilemo, Molimo o ’nile a tšepisa ho thusa ka litsela tse joalo. Ka mohlala, ka Moshe o ile a re ho sechaba sa Iseraele ha se ne se le makhatheng a ho kena Naheng e Tšepisitsoeng: “Le be sebete ’me le be matla. . . . Jehova Molimo oa lōna ke eena ea tsamaeang le lōna. A ke ke a le lahla kapa a le tlohela ka ho feletseng.” (Deuteronoma 31:6) Jehova o ile a boela a tiisetsa Joshua a re: “Ha ho ea tla ema a tiile ka pel’a hao matsatsing ’ohle a bophelo ba hao. Ke tla ba le uena. . . . Nke ke ka u lahla kapa ka u tlohela ka ho feletseng.” (Joshua 1:5) Hape ha a tšepisa Bakreste o re: “Ho hang nke ke ka u tlohela kapa ka u furalla.” (Baheberu 13:5) Hore ebe re na le tšehetso e matla joalo ho lokela ho re etsa hore re ikutloe re le motlotlo ka ho ba Bakreste!

10, 11. Molevi ea bitsoang Asafe o ile a thusoa joang hore a lule a e-na le boikutlo bo nepahetseng ka bohlokoa ba tšebeletso ea hae ho Jehova?

¹⁰ Hoo e ka bang lilemo tse makholo a mahlano ka mor’a Moshe, ka botšepehi Molevi ea tšepahalang ea bitsoang Asafe o ile a ngola ka lipelaelo tsa hae mabapi le bohlokoa ba ho hahamalla tsela e lokileng. Ha a ne a ntse a loanela ho sebeletsa Molimo ho sa tsotellehe liteko le meleko, Asafe o ile a bona ba bang ba neng ba soma Molimo ba e-ba matla ba bile ba atleha haholo. See se ile sa ama Asafe joang? O ile a re: “Ha e le ’na, maoto a ka a ne a batlile a kheloha, mehato ea ka e ne e batlile e thellisoa. Etsoe ke ile ka honohela baithorisi, ha ke ne ke bona khotso ea batho ba khopo.” O ile a qala ho belaella bohlokoa ba ho ba morapeli oa Jehova. Asafe o ile a nahana: “Ka sebele ke ha lefeela hore ebe ke hloekisitse pelo ea ka le hore ebe ke hlatsoa matsoho a ka ka ho hloka molato. Ke ile ka otloa letsatsi lohle.”—Pesaleme ea 73:2, 3, 13, 14.

¹¹ Asafe o ile a sebetsana joang le maikutlo aa a tsietsang? Na o ile a latola hore o na le ’ona? Che. O ile a a bolella Molimo ka thapelo, joalokaha re bona ho Pesaleme ea 73. Asafe o ile a fetola boikutlo ba hae haholo ha a ne a etetse sehalalelong sa tempele. Ha a le moo, o ile a hlokomela hore ho inehela ho Molimo e sa ntse e le eona tsela e molemo ka ho fetisisa. Ha a se a nchafalitse kananelo ea hae ea lintho tsa moea, o ile a utloisisa hore Jehova o hloile bobe le hore ka nako e tšoanetseng ba khopo ba tla ahloloa. (Pesaleme ea 73:17-19) Ha a se a e-na le boikutlo boo bo nepahetseng, Asafe o ile a matlafatsa kutloisiso ea hae ka boitsebahatso ba hae e le mohlanka ea tlotlehang oa Jehova. O ile a re ho Molimo: “Ke na le uena kamehla; u tšoere letsoho la ka le letona. U tla ntsamaisa ka keletso ea hao, ka mor’a moo u tla nkisa khanyeng.” (Pesaleme ea 73:23, 24) Asafe o ile a boela a ba motlotlo ka Molimo oa hae.—Pesaleme ea 34:2.

Ba ne ba E-na le Kutloisiso e Nepahetseng ka Boitsebahatso ba Bona

12, 13. Fana ka mehlala ea batho bao ho buuoang ka bona ka Bibeleng ba ileng ba e-ba motlotlo ka kamano ea bona le Molimo.

¹² Tsela e ’ngoe ea ho matlafatsa kutloisiso ea rōna ka boitsebahatso ba rōna ba Bokreste ke ka ho hlahloba le ho etsisa tumelo ea barapeli ba tšepahalang, ba ileng ba hla ba e-ba motlotlo ka kamano ea bona le Molimo, ho sa tsotellehe mahlomola. Ak’u nahane ka Josefa, mor’a Jakobo. O ne a sa le monyenyane ha a rekisoa ka bolotsana bokhobeng ’me a isoa Egepeta, e lik’hilomithara tse makholo hōle le ntat’ae ea tšabang Molimo, e hōle haholo le lelapa labo le neng le mo sireletsa le ho mo tšehetsa. Ha a le Egepeta, ho ne ho se na motho eo Josefa a neng a ka ea ho eena e le hore a fumane keletso ea bomolimo, ’me o ne a lokela ho tobana le maemo a neng a leka boitšoaro ba hae le ho tšepa ha hae Molimo. Leha ho le joalo, ho hlakile hore ka ho hlaphoheloa kelellong o ile a etsa boiteko ba ho lula a e-na le kutloisiso e nepahetseng ka boitsebahatso ba hae e le mohlanka oa Molimo, ’me o ile a lula a tšepahalla seo a neng a tseba hore se nepahetse. O ne a le motlotlo ka ho ba morapeli oa Jehova esita le sebakeng se mabifi, ’me ha aa ka a tsilatsila ho bolela kamoo a neng a ikutloa kateng.—Genese 39:7-10.

¹³ Lilemo tse ka bang makholo a robeli hamorao, ngoanana ea hapiloeng oa Moiseraele eo e bileng lekhoba la molaoli oa lebotho la sesole sa Syria, Naamane, ha aa ka a lebala boitsebahatso ba hae ba hore e ne e le morapeli oa Jehova. Eitse ha ho hlaha monyetla, ka sebete o ile a fana ka bopaki bo botle ka Jehova ha a ne a bolela hore Elisha ke moprofeta oa Molimo oa ’nete. (2 Marena 5:1-19) Lilemo ka mor’a moo, ho sa tsotellehe hore o ne a le sebakeng se mekhoa e bolileng, Morena Josiase e monyenyane o ile a etsa liphetoho tsa nako e telele tsa bolumeli, a lokisa tempele ea Molimo a ba a khutlisetsa sechaba ho Jehova. O ne a le motlotlo ka tumelo le borapeli ba hae. (2 Likronike, khaolo ea 34 le ea 35) Ha Daniele le metsoalle ea hae e meraro ea Baheberu ba ne ba le Babylona, ha baa ka ba lebala boitsebahatso ba bona joaloka bahlanka ba Jehova, ’me esita leha ba ne ba le tlas’a khatello le teko, ba ile ba lula ba tšepahala. Ho hlakile hore ba ne ba le motlotlo ka ho ba bahlanka ba Jehova.—Daniele 1:8-20.

Le be Motlotlo ka Hore na le Bo-mang

14, 15. Ho ba motlotlo ka boitsebahatso ba rōna ba Bokreste ho akarelletsa’ng?

¹⁴ Bahlanka bana ba Molimo ba ile ba atleha hobane ba ile ba hlaolela ho ba motlotlo ka ho loketseng ka tsela eo Molimo a neng a ba talima ka eona. Ho thoe’ng ka rōna kajeno? Ho ba motlotlo ka boitsebahatso ba rōna ba Bokreste ho akarelletsa’ng?

¹⁵ Ntho ea pele, sena se akarelletsa ho ba le kananelo e tebileng ka ho ba e mong oa batho ba lebitso la Jehova, bao a ba hlohonolofatsang le bao a ba amohelang. Molimo ha a na lipelaelo tsa hore na ba hae ke bo-mang. Moapostola Pauluse, ea phetseng nakong ea pherekano e khōlō litabeng tsa bolumeli o ile a ngola tjena: “Jehova o tseba ba hae.” (2 Timothea 2:19; Numere 16:5) Jehova o motlotlo ka ‘bao e leng ba hae.’ O re: “Ea le amang o ama leihlo la ka.” (Zakaria 2:8) Ho hlakile hore Jehova oa re rata. Ka ho tšoanang, kamano ea rōna le eena e lokela e be e thehiloe leratong le tebileng ho eena. Pauluse o ile a re: “Haeba leha e le mang a rata Molimo, enoa o tsejoa ke eena.”—1 Bakorinthe 8:3.

16, 17. Ke hobane’ng ha Bakreste, ba baholo le ba banyenyane, ba ka ba motlotlo ka lefa la bona la moea?

¹⁶ Bacha ba ’nileng ba hōlisoa e le Lipaki Tsa Jehova ba lokela ho hlahloba hore na boitsebahatso ba bona ba Bokreste bo ntse bo tiea ka lebaka la kamano ea bona le Molimo kapa che. Ba ke ke ba itšetleha feela ka tumelo ea batsoali ba bona. Mabapi le mohlanka ka mong oa Molimo, Pauluse o ile a ngola tjena: “Ho mong’a hae oa ema kapa oa oa.” Kahoo, Pauluse o tsoela pele ka ho re: “E mong le e mong oa rōna o tla ikarabella ho Molimo.” (Baroma 14:4, 12) Ho hlakile hore motho a ke ke a sireletsa kamano e haufi-ufi le ea nako e telele le Jehova haeba feela ka monyebe a tsoela pele ho latela bolumeli ba lelapa labo.

¹⁷ Ho pholletsa le histori, ho ’nile ha e-ba le letoto la lipaki tsa Jehova. Le tloha ho monna ea tšepahalang Abele—oa hoo e ka bang lilemong tse 6 000 tse fetileng—le ea ho “bongata bo boholo” ba Lipaki tsa kajeno le matšoele-tšoele a barapeli ba Jehova ba tla thabela bokamoso bo sa feleng. (Tšenolo 7:9; Baheberu 11:4) Re ba morao-rao letotong lena le lelelele la barapeli ba tšepahalang. Khele! Re na le lefa la moea le hlollang hakaakang!

18. Melao-motheo ea rōna le litekanyetso li re khetholla joang lefatšeng lee?

¹⁸ Boitsebahatso ba rōna ba Bokreste bo boetse bo akarelletsa melao-motheo, litšoaneleho, litekanyetso le litšobotsi tse itseng tse re tsebahatsang joaloka Bakreste. Ke eona “Tsela Eo,” e leng tsela feela ea ho atleha bophelong le ea ho thabisa Molimo. (Liketso 9:2; Baefese 4:22-24) Bakreste ba ‘nepisisa lintho tsohle’ ba bile ba ‘tšoarella ka tieo ho se setle’! (1 Bathesalonika 5:21) Re na le kutloisiso e hlakileng ka phapang e khōlō e pakeng tsa Bokreste le lefatše le ikarotseng ho Molimo. Jehova o tiisitse hore phapang pakeng tsa borapeli ba ’nete le ba bohata e lula pepeneneng. Ka moprofeta oa hae Malakia, o ile a re: “Ka sebele le tla boela le bone phapang pakeng tsa ea lokileng le ea khopo, pakeng tsa ea sebeletsang Molimo le ea sa kang a mo sebeletsa.”—Malakia 3:18.

19. Ke eng eo le ka mohla e ke keng ea hlahela Bakreste ba ’nete?

¹⁹ Kaha ho ithorisa ka Jehova ke habohlokoa haholo lefatšeng lena le ferekaneng le le tsielehileng, ke eng e ka re thusang hore re lule re le motlotlo ka tsela e loketseng ka Molimo oa rōna re bile re e-na le kutloisiso e nepahetseng ka boitsebahatso ba rōna ba Bokreste? Litlhahiso tse molemo li fumaneha sehloohong se latelang. Ha u ntse u li hlahloba, u ka kholiseha ka sena: Ha ho mohla Bakreste ba ’nete ba tla ke ba tšoasoe ke leraba la “ho se thahaselle bolumeli.”

[Mongolo o botlaaseng ba leqephe]

Na U sa Hopola?

• Bakreste ba ka ‘ithorisa ka Jehova’ joang?

• U ithutile eng mohlaleng oa Moshe le oa Asafe?

• Ke batho bafe ka Bibeleng ba ileng ba e-ba motlotlo ka tšebeletso ea bona ho Molimo?

• Ho ba motlotlo ka boitsebahatso ba rōna ba Bokreste ho akarelletsa’ng?

[Setšoantšo se leqepheng la 14]

Ka nakoana, Moshe o ile a ikutloa a ikhalala

[Litšoantšo tse leqepheng la 15]

Bahlanka ba bangata ba Jehova ba boholo-holo ba bile motlotlo ka boitsebahatso ba bona bo hlakileng