Ba Ile ba Etsa Thato ea Jehova

Moshe le Aarone—Baboleli ba Sebete ba Lentsoe la Molimo

NAHANA ka ketsahalo ena: Moshe ea lilemo li 80 le ngoan’abo Aarone, ba eme ka pel’a monna ea matla haholo lefatšeng—Faro oa Egepeta. Ho Baegepeta, monna enoa o phahame le ho feta moemeli oa melimo. Ba lumela hore eena ka boeena ke molimo. O talingoa e le ea nkileng sebōpeho sa Horus, molingoana o nang le hlooho ea phakoe. A e-na le Isis le Osiris, Horus o ne a etsa boraro-bo-bong bo ka sehloohong har’a melimo le melimotsana ea Baegepeta.

Mang le mang ea atamelang Faro o ne a ka bona ka ho hlakileng setšoantšo se nyarosang sa hlooho ea masumu se hlahellang bohareng ba moqhaka oa hae. Ho ne ho lumeloa hore noha ena e ka romela mollo le timetso holim’a lira leha e le life tsa Faro. Joale Moshe le Aarone ba tlile ka pel’a morena enoa oa molimo ka kōpo e e-song ho ka e e-ba teng—ea hore a lokolle Baiseraele ba entsoeng makhoba e le hore ba ka ea etsetsa Molimo oa bona, Jehova, mokete.—Exoda 5:1.

Jehova o ne a se a boletse esale pele hore pelo ea Faro e ne e tla thatafala. Ka lebaka leo, Moshe le Aarone ha baa ka ba makalla karabo ea hae e nyelisang: “Jehova ke mang hore ke utloe lentsoe la hae, ’me ke lokolle Iseraele? Jehova ha ke mo tsebe, le Iseraele nke ke ka mo lokolla.” (Exoda 4:21; 5:2) Kahoo, ho ile ha lokisetsoa khohlano e matla. Ka lekhetlo le hlahlamang ha ba teana, Moshe le Aarone ba ile ba hlahisetsa Faro bopaki bo hlollang haholo ba hore ba emetse Molimo oa ’nete ea matla ’ohle.

Ho Etsahala Mohlolo

Joalokaha Jehova a mo laetse, Aarone o ile a etsa mohlolo o ileng oa paka bophahamo ba Jehova holim’a melimo ea Egepeta. O ile a akhela molamu oa hae fatše ka pel’a Faro, ’me kapele-pele oa fetoha noha e khōlō! A tsietsoe ke mohlolo ona, Faro o ile a bitsa baprista ba hae ba linohe.a Ka thuso ea matla a bademona, banna bana ba ile ba khona ho etsa se tšoanang ka melamu ea bona.

Haeba Faro le baprista ba hae ba ile ba tšeha, e ile ea e-ba ka nakoana feela. Nahana ka lifahleho tsa bona ha noha ea Aarone e koenya linoha tsa bona ka bonngoe! Bohle ba neng ba le teng ba ne ba ka bona hore melingoana ea Egepeta e ne e ke ke ea bapisoa le Molimo oa ’nete, Jehova.—Exoda 7:8-13.

Leha ho le joalo, le ka mor’a tsena, pelo ea Faro e ile ea sala e thatafetse. E bile feela ka mor’a hore Molimo a tlise likotlo tse timetsang tse leshome, kapa tlokotsi holim’a Egepeta, Faro a ileng a qetella a itse ho Moshe le Aarone: “Tlohang, le tsoe sechabeng sa ka, lōna le bana ba Iseraele, le ee, le sebeletse Jehova, joalo ka ha le boletse.”—Exoda 12:31.

Thuto ho Rōna

Ke eng se ileng sa nolofalletsa Moshe le Aarone hore ba atamele Faro ea matla oa Egepeta? Qalong, Moshe o ile a hlalosa ho se itšepe ha hae, a ipolela e le ea “molomo o boima, le ea leleme le boima.” Esita le ka mor’a hore a kholisoe ka tšehetso ea Jehova, o ile a kōpa: “Kea u rapela, roma eo u mo romang.” Ka mantsoe a mang, Moshe ka tieo o ne a kōpa Molimo hore a rome motho e mong osele. (Exoda 4:10, 13) Leha ho le joalo, Jehova o ile a sebelisa Moshe ea bonolo, a mo fa bohlale le matla a hlokahalang a ho phetha kabelo ea hae.—Numere 12:3.

Kajeno, bahlanka ba Jehova Molimo le Jesu Kreste ba phetha taelo ea ho “etsa batho ba lichaba tsohle barutuoa.” (Mattheu 28:19, 20, NW) E le ho etsa karolo ea rōna ho phethahatseng thōmo ena, re lokela ho sebelisa hamolemohali tsebo ea Mangolo le bokhoni leha e le bofe boo e ka ’nang eaba re na le bona. (1 Timothea 4:13-16) Ho e-na le ho lebisa tlhokomelo ea rōna moo re haelloang teng, ka tumelo a re amoheleng kabelo leha e le efe eo Molimo o re fileng eona. A ka re etsa hore re tšoanelehe le ho re matlafatsa e le hore re ka etsa thato ea hae.—2 Ba-Korinthe 3:5, 6; Ba-Filippi 4:13.

Kaha Moshe o ne a tobane le khanyetso ea batho le ea bodemona, ka sebele o ne a hloka thuso e phahametseng matla a motho. Ka lebaka leo, Jehova o ile a mo kholisa: “Bona, ke u beile Molimo ho Faro.” (Exoda 7:1) E, Moshe o bile le tšehetso le matla a ho laela a bomolimo. Ka moea oa Jehova o neng o le ho eena, Moshe o ne a se na lebaka la ho tšaba Faro kapa mahlahana a ’musi eo ea ikhohomosang.

Le rōna re lokela ho itšetleha ka moea o halalelang oa Jehova, kapa matla a hae a sebetsang, e le hore re ka phetha mosebetsi oa rōna. (Johanne 14:26; 15:26, 27) Ka tšehetso ea bomolimo, re ka pheta mantsoe a Davida, ea ileng a bina: ‘Ke itšepetse Molimo, nke ke ka tšaba letho: motho a ka nketsa’ng?’—Pesaleme ea 56:11.

Ka kutloelo-bohloko, Jehova ha aa ka a tlohela Moshe a le mong kabelong ea hae. Ho e-na le hoo, Molimo o ile a re: “Aarone, moholoane oa hao, e tla ba moporofeta oa hao. U tla pheta tsohle tseo ke u laelang tsona, ’me Aarone, moholoane oa hao, o tla bolella Faro.” (Exoda 7:1, 2) E bile lerato le lekaakang ho Jehova hore ebe o ile a neha Moshe moroalo o mo lekaneng!

Molimo o re lokiselitse ho ba hammoho le Bakreste-’moho le rōna ba amohelang phephetso ea ho ba Lipaki tsa Jehova, ea Holimo-limo. (1 Petrose 5:9) Ka hona, ho sa tsotellehe litšitiso tseo re ka ’nang ra thulana le tsona, a re tšoaneng le Moshe le Aarone—baboleli ba sebete ba lentsoe la Molimo.

[Mongolo o botlaaseng ba leqephe]

[Setšoantšo se leqepheng la 25]

Moshe le Aarone ba ile ba emela Jehova ka sebete ka pel’a Faro