Pono ea Bibele

Na ho Ratana ha Batho ba Bong bo Tšoanang ho ka Lokafatsoa?

HO RATANA ha batho ba bong bo tšoanang ho tsoela pele ho amoheleha linaheng tse ngata. Sehlopha sa batho kerekeng e ’ngoe ea United States, se batla hore seo Bibele e se buang ka ho ratana ha batho ba bong bo tšoanang se hlalosoe bocha ka lebaka la seo ba reng ke “leseli la morao-rao le bohlale.” Moruti oa Brazil ea sa tsoa nyalana le motho oa bong bo tšoanang le ba hae le eena o khothalletsa hore “Bibele e hlalosoe bocha,” e le hore e lumellane le pono ea morao-rao e sebelisoang kerekeng ea hae.

Ka lehlakoreng le leng, ba sa lumellaneng le ho ratana ha batho ba bong bo tšoanang hangata ho thoe ba na le lehloeo le khethollo. Ha e le hantle, Bibele e re’ng ka ho ratana ha batho ba bong bo tšoanang?

Ke’ng Seo Bibele e se Bolelang?

Bibele ha e khothalletse hore batho ba khetholloe. Leha ho le joalo, pono ea eona ka liketso tsa ho ratana ha batho ba bong bo tšoanang e hlakile.

“U se ke ua robala le e motona ho tšoana le ha u robala le mosali. Ke ntho e manyala.”—Levitike 18:22.

Thibelo ena e ne e le karolo ea Molao oa Moshe, ’me e le e ’ngoe ea melao e mengata ea boitšoaro e neng e filoe sechaba sa Iseraele ka ho khetheha. Leha ho le joalo, molao oo o hlakisa pono ea Molimo ka liketso tsa batho ba ratanang le batho ba bong bo tšoanang, ebang ke Bajuda kapa hase bona, ha o re: “Ke ntho e manyala.” Lichaba tse neng li pota-potile Iseraele li ne li ratana le batho ba bong bo tšoanang, li kopanela liphate le beng ka tsona ba haufi, li etsa bofebe hammoho le liketso tse ling tse neng li sa lumelloe ke Molao. Kahoo, Molimo o ile a talima lichaba tseo li sa hloeka. (Levitike 18:24, 25) Na pono ea Bibele e ile ea fetoha mehleng ea Bokreste? Hlokomela se boleloang lengolong le latelang:

‘Molimo o ba neheletse litakatso tsa botona kapa tsa botšehali tse tlotlollang, kaha ba batšehali ba bona ba fetotse tšebeliso ea bona ea tlhaho hore e be e khahlanong le tlhaho; ka ho tšoanang le bona ba batona ba tlohetse tšebeliso ea tlhaho ea ba batšehali ’me ba fetohile ba chesitsoeng hampe takatsanong ea bona, ba batona le ba batona, ba etsa se nyonyehang.’—Baroma 1:26, 27.

Ke hobane’ng ha Bibele e re liketso tsa batho ba ratanang le ba bong bo tšoanang ha se tsa tlhaho ebile lia nyonyeha? Hobane li akarelletsa ho kopanela liphate ho sa simolloang ke ’Mōpi oa rōna. Batho ba bong bo tšoanang ha ba khone ho ba le bana. Bibele e bapisa ho ratana ha batho ba bong bo tšoanang le ho kopanela liphate le basali ho ileng ha etsoa pele ho Moroallo oa mehleng ea Noe, ke mangeloi a marabele a ileng a tsejoa ka hore ke bademona. (Genese 6:4; 19:4, 5; Juda 6, 7) Molimo o talima liketso tseo ka bobeli e se tsa tlhaho.

Na ho na le Mabaka a Lokafatsang ho Ratana ha Batho ba Bong bo Tšoanang?

Ba bang ba ka ’na ba ipotsa, ‘Na liphatsa tsa lefutso, tikoloho kapa liphihlelo tse bohloko tse hlahetseng motho bophelong, tse joaloka peto, li ka tšehetsa taba ea hore motho a inehelle takatsong ea ho batla ho ratana le motho oa bong bo tšoanang le ba hae?’ Che, ha li e tšehetse. Nahana ka mohlala ona: Motho e mong a ka ’na a ba le seo litsebi tsa saense li se bitsang hore ke ho lemalla tahi ho futsitsoeng, kapa e ka ’na eaba o hōletse lelapeng leo ho lona joala bo nooang joaloka metsi. Ke ’nete hore batho ba bangata ba ka utloela motho ea boemong bo joalo bohloko. Empa seo, ha se fe motho tokoloho ea hore a tsoele pele ho sebelisa tahi ka tsela e feteletseng, kapa hore a se ke a loantša tšekamelo eo hobane feela a hlahile a e-na le eona kapa a hōletse tikolohong eo joala bo sebelisoang hampe.

Ka ho tšoanang, le hoja Bibele e sa nyatse batho ba loantšang tšekamelo ea ho khahloa ke batho ba bong bo tšoanang, ha e lumellane le ba inehelang takatsong eo, ebang ke ka lebaka la liphatsa tsa lefutso kapa mabaka a mang a ka thōko. (Baroma 7:21-25; 1 Bakorinthe 9:27) Ho e-na le hoo, Bibele e fana ka thuso e sebetsang le khothatso e le ho thusa batho hore ba hlōle ntoa e khahlanong le ho khahloa ke batho ba bong bo tšoanang.

Thato ea Molimo ke Efe ka ba Khahloang ke Batho ba Bong bo Tšoanang?

Bibele ea re tiisetsa hore thato ea Molimo ke hore “batho ba mefuta eohle ba pholohe ’me ba fihle tsebong e nepahetseng ea ’nete.” (1 Timothea 2:4) Le hoja Bibele e nyatsa ho ratana ha batho ba bong bo tšoanang, ha e khothalletse hore batho ba joalo ba hlouoe.

Maikutlo a Molimo ka ho ratana ha batho ba bong bo tšoanang, a ke ke a qheleloa ka thōko. Ho 1 Bakorinthe 6:9, 10, Bibele e hlalosa ka ho hlaka hore “banna ba robalang le banna” ba akarelletsoa har’a batho ba ‘ke keng ba rua ’muso oa Molimo.’ Empa temaneng ea 11 e eketsa ka mantsoe ana a tšelisang: “Leha ho le joalo ke seo ba bang ba lōna ba neng ba le sona. Empa le hlatsoitsoe hore le hloeke, empa le halalelitsoe, empa ho boletsoe hore le lokile ka lebitso la Morena oa rōna Jesu Kreste le ka moea oa Molimo oa rōna.”

Ho hlakile hore batho bao ka sebele ba neng ba e-na le takatso ea ho rapela Molimo ba sebelisa melao ea hae, ba ne ba amoheloa ka mofuthu phuthehong ea Bokreste ea lekholong la pele. Ho etsahala se tšoanang le kajeno ka batho ba nang le lipelo tse tšepahalang le ba batlang ho amoheloa ke Molimo—eseng ka hore ba fetole seo Bibele e se buang—empa ka hore ba lumellanye bophelo ba bona le eona.

NA U KILE UA IPOTSA?

● Pono ea Bibele ke efe ka ho ratana ha batho ba bong bo tšoanang?—Baroma 1:26, 27.

● Na Bibele e khetholla batho ba khahloang ke ba bong bo tšoanang?—1 Timothea 2:4.

● Na ho ka khoneha ho furalla liketso tsa ho ratana le batho ba bong bo tšoanang?—1 Bakorinthe 6:9-11.

[Setšoantšo se leqepheng la 29]

Na pono ea Molimo ka ho ratana ha batho ba bong bo tšoanang e lokela ho hlalosoa bocha?