Na U Kholisehile Hore Tsela eo Jehova a Etsang Lintho ka Eona e Nepahetse?

1, 2. (a) Ke hobane’ng ha ho le thata hore batho ba bangata mehleng ee ba tšepe ba boholong? (b) Re tl’o bua ka’ng sehloohong see?

MEHLENG ena batho ba bangata ba thatafalloa ho tšepa batho ba boholong. Ba hlokometse hore hangata mebuso le melao e sireletsa batho ba ruileng le ba nang le matla empa ha e thuse batho ba futsanehileng. Bibele e nepile ha e re: ‘Motho o busitse motho ho mo ntša kotsi.’ (Moek. 8:9) Hape baeta-pele ba bang ba bolumeli ba etsa lintho tse mpe ’me taba ena e entse hore batho ba bang ba se ke ba tšepa Molimo. Kahoo ha re ithuta Bibele le motho, re lokela ho mo thusa hore a ithute ho tšepa Jehova le batho bao a ba khethileng hore ba re etelle pele.

² Ke ’nete hore batho bao re ithutang Bibele le bona ha se bona feela ba hlokang ho ithuta ho tšepa Jehova le mokhatlo oa hae. Esita le haeba re sebelelitse Jehova ka lilemo tse ngata, le ka mohla ha rea lokela ho lebala hore kamehla tsela eo Jehova a etsang lintho ka eona e nepahetse. Ka linako tse ling ho ba le maemo a hlahang a ka etsang hore ho be thata ho tšepa Jehova. Sehloohong sena re tl’o hlahloba maemo a mararo a ka lekang tumelo ea rona: (1) Ha re bala litlaleho tse itseng tsa Bibele, (2) ha re fumana tataiso e tsoang mokhatlong oa Jehova le (3) ha re tobana le mathata nakong e tlang.

 3. Litlaleho tse ling tsa Bibele li ka etsa hore re se ke ra tšepa Jehova joang?

³ Ha re bala Lentsoe la Molimo, re ka ’na ra ipotsa hore na ke hobane’ng ha Jehova a ile a sebetsana le batho ba bang ka tsela e itseng le hore na ke hobane’ng ha a ile a etsa liqeto tse itseng. Ka mohlala, bukeng ea Numere re bala ka hore Jehova o ile a ahlolela monna e mong oa Moiseraele lefu ka lebaka la ho roalla ka Sabatha. Ho Samuele oa bobeli, re ithuta hore lilemo tse makholo hamorao Jehova o ile a tšoarela Morena Davida ha a ne a entse bofebe a bile a bolaile motho. (Num. 15:32, 35; 2 Sam. 12:9, 13) Re ka ’na ra ipotsa ra re: ‘Ke hobane’ng ha Jehova a ile a tšoarela Davida ea neng a febile ebile a bolaile empa a ile a ahlolela monna eo e mong lefu ka phoso eo ho bonahalang eka e ne se kholo hakaalo?’ E le ho araba potso ena, nahana ka lintlha tse tharo tseo re lokelang ho li hopola ha re bala Bibele.

 4. Genese 18:20, 21 le Deuteronoma 10:17 li re kholisa joang hore liqeto tsa Jehova li nepahetse?

⁴ Ha se kamehla Bibele e fanang ka lintlha tsohle. Mohlala, rea tseba hore Davida o ile a bakela liphoso tsa hae e le kannete. (Pes. 51:2-4) Empa monna ea ileng a tlola molao oa Sabatha e ne e le motho oa mofuta ofe? Na o ne a soabetse ntho eo a neng a e entse? Na o ne a kile a tlola melao ea Jehova nakong e fetileng? Na o ne a kile a iphapanya kapa a hana ha a lemosoa nakong e fetileng? Bibele ha e hlalose. Leha ho le joalo, ntho eo re kholisehileng ka eona ke hore le ka mohla Jehova a ke ke a “hloka toka.” (Deut. 32:4) Ha Jehova a etsa liqeto ha a susumetsoe ke leeme kapa hore na batho ba bang ba reng empa o li etsa a shebile lintlha kaofela. (Bala Genese 18:20, 21; Deuteronoma 10:17.) Ha re ithuta haholo ka Jehova le melao ea hae re tla tšepa liqeto tsa hae le ho feta. Le hoja ha re bala Bibele hona joale re ke ke ra khona ho arabela lipotso tseo re nang le tsona kaofela empa re tseba lintlha tse lekaneng ka Molimo oa rona tse re kholisang hore “o lokile litseleng tsohle tsa hae.”​—Pes. 145:17.

 5. Ho se phethahale ha rona ho ka ama tsela eo re ahlolang lintho ka eona joang? (Sheba lebokose le reng “Kaha ha Rea Phethahala, ha se Kamehla re ka Utloisisang Litaba ka Tsela e Nepahetseng.”)

⁵ Ha se kamehla re ka ahlolang ka toka hobane ha rea phethahala. Molimo o re bopile re e-na le bokhoni ba ho bontša makhabane a tšoanang le a hae. Ke kahoo re batlang ho bona batho ba tšoaroa ka toka. (Gen. 1:26) Empa kaha ha rea phethahala, re ka ’na ra se ke ra ahlola litaba hantle le hoja re ka nahana hore re na le lintlha kaofela. Ka mohlala, hopola hore Jonase ha aa ka a thabisoa ke qeto eo Jehova a ileng a e etsa ea ho hauhela batho ba Ninive. (Jon. 3:10–4:1) Empa nahana ka se ileng sa etsahala ka lebaka la hore Jehova o ile a ba bontša mohau. Batho ba ka holimo ho 120 000 ba ile ba bolokeha. Qetellong Jonase ke eena ea sa kang a ahlola litaba ka toka eseng Jehova.

 6. Ke hobane’ng ha Jehova a sa tlameha ho re bolella mabaka ao a etsang liqeto ka ’ona?

⁶ Ha ho letho le tlamang Jehova hore a bolelle batho mabaka ao a etsang liqeto ka ’ona. Ke ’nete hore nakong e fetileng Jehova o ile a lumella batho ba hae ho ntša maikutlo ka liqeto tseo a li entseng kapa tseo a neng a tla li etsa. (Gen. 18:25; Jon. 4:2, 3) Hape ka linako tse ling o ile a hlalosa hore na ke hobane’ng ha a etsa liqeto tse itseng. (Jon. 4:10, 11) Leha ho le joalo Jehova haa tlameha ho re bolella mabaka ha a etsa liqeto. Kaha ke ’Mopi oa rona, ha a hloke tumello ea rona pele kapa ka mor’a hore a etse ntho e itseng.​—Esa. 40:13, 14; 55:9.

 7. Re ka ’na ra thatafalloa ke ho etsa’ng, hona hobane’ng?

⁷ Re lumela ka ho feletseng hore kamehla Jehova o etsa se nepahetseng. Leha ho le joalo, bothata boo re ka kopanang le bona ke ho tšepa batho bao a ba khethileng. Re ka ’na ra ipotsa hore na ba etellang pele ka mokhatlong oa Jehova ehlile ba mamela tataiso ea hae kapa ba iketsetsa liqeto tsa bona. E ka ’na eaba batho ba bang mehleng ea ha ho ne ho ngoloa Bibele ba ne ba nahana ka tsela eo. Nahana ka mohlala o hlahang serapeng sa boraro. E ka ’na eaba motho ea amanang le monna ea ileng a tlola molao oa Sabatha o ile a ipotsa hore na Moshe o botsitse Jehova pele a ka ahlolela monna eo lefu. E ka ’na eaba motsoalle oa Uria Mohethe eo Davida a ileng a etsa bofebe le mosali oa hae, o ile a nahana hore Davida o sebelisitse matla a hae joaloka morena ho qoba hore a se ke a bolaoa. Jehova o tšepa batho bao a ba khethileng hore ba etelle pele ka mokhatlong le ka phuthehong. Kahoo, haeba re sa ba tšepe re ke ke ra re re tšepa Jehova.

 8. Tlaleho e ho Liketso 16:4, 5 e tšoana joang le tsela eo phutheho e sebetsang ka eona mehleng ee?

⁸ Mehleng ena Jehova o etella pele mokhatlo oa hae o lefatšeng a sebelisa “lekhoba le tšepahalang le le masene.” (Mat. 24:45) Joaloka sehlopha se busang sa mehleng ea baapostola, lekhoba lena le etella pele batho ba Molimo lefatšeng lohle le ho fa baholo ba liphutheho tataiso. (Bala Liketso 16:4, 5.) Baholo bona ba etsa bonnete ba hore ba latela tataiso eo liphuthehong. Re ka bontša hore re tšepa tsela eo Jehova a etsang lintho ka eona ka hore re mamele tataiso eo re e fuoang ke mokhatlo le baholo.

 9. Ke neng ho ka bang thata ho tšehetsa liqeto tseo baholo ba li etsang, hona hobane’ng?

⁹ Ka linako tse ling re ka thatafalloa ke ho tšepa liqeto tseo baholo ba li etsang. Ka mohlala, lilemong tsa morao tjena liphutheho tse ngata le lipotoloho li ile tsa hlophisoa bocha. Maemong a mang baholo ba kopile bahoeletsi ho ea liphuthehong tse ling e le hore Liholo Tsa ’Muso li ka ba le batho ba lekaneng. Haeba re kopuoa ho ea liphuthehong tse ncha ho ka ba thata ho siea metsoalle le ba lelapa. Na baholo ba fumana tataiso e tobileng ho tsoa ho Jehova ea hore na ba abele mohoeletsi e mong le e mong phutheho efe? Ha ho joalo, ’me taba eo e ka etsa hore ho be thata ho mamela tataiso eo re e fuoang. Empa Jehova o tšepela baholo ho etsa liqeto tse joalo ’me le rona re lokela ho ba tšepa.b

10. Ho ea ka Baheberu 13:17, ke hobane’ng ha re lokela ho sebelisana hantle le baholo?

¹⁰ Ke hobane’ng ha re lokela ho tšehetsa liqeto tsa baholo esita le haeba re sa lumellane le tsona? Hobane ka ho etsa joalo re thusa hore ho be le bonngoe ka phuthehong. (Baef. 4:2, 3) Liphutheho lia atleha ha bohle ka boikokobetso ba tšehetsa liqeto tsa baholo. (Bala Baheberu 13:17.) Habohlokoa le ho feta, re bontša Jehova hore rea mo tšepa ka hore re sebelisane hantle le bao a ba tšepetseng ho re hlokomela.​—Lik. 20:28.

11. Ke’ng e ka re thusang ho matlafatsa tšepo ea rona tataisong eo re e fuoang ke baholo?

¹¹ Re ka matlafatsa tšepo eo re nang le eona tataisong eo baholo ba fanang ka eona haeba re hopola hore ba rapella moea o halalelang ha ba sebetsana le litaba tse amang phutheho hape ba hlahloba ka hloko melao-motheo ea Bibele le tataiso e tsoang mokhatlong oa Jehova. Tabatabelo ea bona ke ho thabisa Jehova le ho hlokomela batho ba hae kahohle kamoo ho ka khonehang. Banna bana ba tšepahalang baa tseba hore ba tla ikarabella ho Jehova ka tsela eo ba hlokomelang batho ba hae ka eona. (1 Pet. 5:2, 3) Nahana ka taba ena: Lefatšeng lena le arohaneng ka lebaka la morabe, bolumeli le lipolotiki, batho ba Jehova ba rapela Molimo a le mong feela oa ’nete ba momahane. Ntho ena e etsahala feela hobane Jehova a tšehetsa mokhatlo oa hae.

12. Ke lintho life tseo baholo ba lokelang ho nahana ka tsona ha ba hlahloba hore na motho o bakile kapa che?

¹² Jehova o file baholo boikarabelo bo boima ba ho boloka phutheho e hloekile. Haeba Mokreste a etsa sebe se tebileng, Jehova o lebelletse hore baholo ba hlahlobe hore na motho eo o lokela ho tlosoa ka phuthehong kapa che. Ntho e ’ngoe eo ba lokelang ho e etsa ke ho fumana hore na motho eo o fela a baketse phoso eo a e entseng. A ka ’na a re o bakile empa na o hloile ntho eo a e entseng e le kannete? Na o ikemiselitse hore a se ke a pheta sebe seo? Haeba lebaka le leng le entseng hore a etse sebe ke hobane a e-na le metsoalle e fosahetseng, na o ikemiselitse ho khaotsa setsoalle le batho bao? Baholo baa rapela ebe ba sheba lintlha kaofela ba ipapisitse le seo Bibele e se buang le hore na mofosi o ikutloa joang ka seo a se entseng. Ka mor’a moo, ba etsa qeto ea hore na mofosi o tla lula e ntse e le karolo ea phutheho kapa che. Maemong a mang a ka tlameha ho khaoloa.​—1 Bakor. 5:11-13.

13. Re ka ’na ra tšoenyeha ka eng haeba motsoalle kapa setho sa lelapa se khaoloa?

¹³ Ke maemong afe re ka thatafalloang ke ho tšepa baholo? Haeba motho ea khaotsoeng e se motsoalle ea haufi kapa setho sa lelapa, ho ka ’na ha e-ba bonolo feela hore re amohele qeto ea baholo. Empa a re re motho ea khaotsoeng ke motsoalle ea haufi. Re ka ’na ra tšoenyeha ka hore baholo ha baa sheba lintlha ka mahlakoreng ’ohle, kapa ra ipotsa hore na ba entse qeto eo Jehova a neng a tla e etsa. Ke’ng e ka re thusang ho ba le maikutlo a nepahetseng ka qeto ea baholo?

14. Re ka thusoa ke’ng haeba baholo ba etsa qeto ea hore motsoalle kapa setho sa lelapa se lokela ho khaoloa?

¹⁴ Re lokela ho hopola hore ho khaola ke tokisetso ea Jehova ’me ho tsoela phutheho molemo hape ho ka tsoela le mofosi molemo. Haeba mofosi ea sa bakeng a lula e le karolo ea phutheho, a ka susumetsa ba bang ka phuthehong ho etsa liphoso tse tebileng. (Bagal. 5:9) Ho feta moo, a ka ’na a se ke a hlokomela botebo ba sebe seo a se entseng hape a ka ’na a se ke a bona ho hlokahala hore a fetole tsela eo a nahanang ka eona le lintho tseo a li etsang e le hore Jehova a mo amohele. (Moek. 8:11) Re ka kholiseha hore baholo ba nka boikarabello ba bona ka ho teba ha ba etsa qeto ea hore na motho o lokela ho khaoloa kapa che. Joaloka baahloli ba mehleng ea Baiseraele, baholo baa hlokomela hore “ha ba ahlolele motho empa ba ahlolela Jehova.”​—2 Likron. 19:6, 7.

15. Ke hobane’ng ha re lokela ho tšepa tataiso ea Jehova hona joale ho feta leha e le neng pele?

¹⁵ Ha bofelo bo ntse bo atamela, re lokela ho tšepa tsela eo Jehova a etsang lintho ka eona ho feta leha e le neng pele. Ke hobane’ng ha re cho joalo? Nakong ea matšoenyeho a maholo, re ka ’na ra fuoa litaelo tseo re ka utloang ho le thata ho li utloisisa kapa ho li mamela. Rea tseba hore Jehova a ke ke a buisana le rona ka ho toba. A ka ’na a re fa litaelo a sebelisa batho bao a ba khethileng hore ba re etelle pele. Eo e tla be e se nako ea ho belaella tataiso eo re e fuoang kapa ho ipotsa hore na ehlile ke tataiso e tsoang ho Jehova kapa ke qeto eo bara ba bo rona ba etellang pele ba iketselitseng eona. Na u tla tšepa Jehova le mokhatlo oa hae nakong eo ea bohlokoa? Tsela eo ka eona u nkang tataiso ea ba etellang pele hona joale, e tla u thusa ho arabela potso eo. Haeba u tšepa tataiso eo u e fuoang hona joale ebile u potlakela ho e mamela, u tla nolofalloa ho etsa joalo le nakong ea matšoenyeho a maholo.​—Luka 16:10.

16. Tsela eo re tšepang likahlolo tsa Jehova ka eona e tla lekoa joang nakong e tlang?

¹⁶ Re boetse re lokela ho nahana ka ho teba ka hore na re tla etsa’ng ha re bona tsela eo Jehova a tla ahlola batho ka eona ha a felisa lefatše lena le khopo. Re tšepa hore ba bangata ba sa sebeletseng Jehova hona joale, ho akarelletsa beng ka rona bao eseng Lipaki, ba tla mo sebeletsa pele bofelo bo fihla. Ka Armagedone, Jehova a sebelisa Jesu, o tla etsa qeto ea moshoelella ka bokamoso ba bona. (Mat. 25:31-33; 2 Bathes. 1:7-9) Ha se rona ba tla etsa qeto ea hore na ke bo-mang bao Jehova a tla ba bontša mohau le bao a ke keng a ba bontša oona. (Mat. 25:34, 41, 46) Na re tla tšepa likahlolo tsa Jehova kapa re tla khaotsa ho mo sebeletsa hobane re sa lumellane le liqeto tseo a li entseng? Ho hlakile hore re lokela ho matlafatsa tsela eo re tšepang Jehova ka eona hona joale e le hore re tle re mo tšepe ka ho feletseng nakong e tlang.

17. Re tla rua molemo joang litšepisong tsa Jehova ka mor’a hore lefatše lee le felisoe?

¹⁷ Nahana hore na re tla ikutloa joang lefatšeng le lecha ha re bona lintho tse etsahetseng ka lebaka la liqeto tsa Jehova. Bolumeli ba bohata bo tla be bo se bo le sieo, ho tla be ho se na bo-rakhoebo ba meharo kapa mebuso e ileng ea hatella batho le ho ba sotla ka lilemo tse ngata. Re ke ke ra hlola re kula, re tsofala le ho hlokahalloa ke batho bao re ba ratang. Satane le bademona ba hae ba tla tlangoa ka lilemo tse sekete. Lintho tsohle tse mpe tse etsahetseng ka lebaka la bofetoheli ba bona li ke ke tsa hlola li e-ba teng. (Tšen. 20:2, 3) Re tla thaba haholo hore ebe re ile ra tšepa tsela eo Jehova a ileng a etsa lintho ka eona.

18. Re ithuta’ng mohlaleng oa Baiseraele o tlalehiloeng ho Numere 11:4-6 le 21:5?

¹⁸ Na bophelo lefatšeng le lecha bo tla ba le lintho tse tla etsa hore ho be thata ho tšepa tsela eo Jehova a etsang lintho ka eona? Ka mohlala, nahana ka se ileng sa etsahala nakoana ka mor’a hore Baiseraele ba lokolloe bokhobeng Egepeta. Ba bang ba ile ba qala ho tletleba ka hore ba lakatsa lijo tseo ba neng ba li ja Egepeta ’me ba ile ba nyatsa lijo tseo Jehova a neng a ba file tsona e leng manna. (Bala Numere 11:4-6; 21:5.) Na ho ka etsahala hore re ikutloe ka tsela e tšoanang ka mor’a matšoenyeho a maholo? Ha re tsebe hore na re tla ba le mosebetsi o mokae oa ho hloekisa lefatše e le hore qetellong e be paradeise. Ho ka etsahala hore ebe ho tla ba le mosebetsi o mongata ’me bophelo bo ke ke ba e-ba bonolo qalong. Na re tla khotsofalla lintho tseo Jehova a tla re fa tsona ka nako eo? Ntho eo re kholisehileng ka eona ke ena: Haeba re ananela lintho tseo Jehova a re fang tsona hona joale, re tla ananela le ho feta lintho tseo a tla re fa tsona ka nako eo.

19. U ka akaretsa lintlha-kholo tsa sehlooho see joang?

¹⁹ Tsela eo Jehova a etsang lintho ka eona kamehla e nepahetse. Re lokela ho kholiseha ka taba eo. Hape re lokela ho tšepa batho bao Jehova a ba tšepetseng ho re etella pele. Le ka mohla u se ke oa lebala mantsoe ao Jehova a ileng a a bua a sebelisa moprofeta oa hae Esaia ha a ne a re: “Matla a lona e tla ba ho lula le sa khathatseha ’me le e-na le tšepo.”​—Esa. 30:15.