“Se Sikareng Joko e le ’Ngoe”
LIPOHO tse peli tse tšoantšelitsoeng mona li na le matla a maholohali, a li nolofaletsang ho hula mejaro e boima habobebe. Empa nka hore poho e ’ngoe e ne e ka nkeloa sebaka ke tonki. Kaha tonki e nyenyane ebile e fokola ho feta poho, mohlomong e ne e tla hana ka ho raha teu ka tsela ena e etsa hore joko e sekame. Joale, ka lebaka le utloahalang, molao oa Molimo ho Iseraele o ile oa bolela hore: “U se ke ua lema ka pholo u e panne le tonki.”—Deuteronoma 22:10, BPN.
Moapostola Pauluse o ile a ngola ho hong ho tšoanang mabapi le batho. O ile a re: “Se sikareng joko e le ’ngoe le ba sa lumelang.” (2 Ba-Korinthe 6:14) Hona ho lokela ho hopoloa ka ho khetheha ha ho khethoa molekane oa lenyalo. Lenyalo ke tlamahano e sa feleng, hobane Jesu Kreste o ile a re: “Seo Molimo o se kopantseng hammoho, se se ke sa aroloa ke motho.” (Mattheu 19:6) Masisa-pelo a mangata a ba teng ha banyalani ba babeli ba sa kopanele litumelo, melao-metheo le lipakane. Ka baka leo, ke ho utloahalang ka sebele ho latela keletso ea Bibele ea ho nyala feela “Moreneng.” (1 Ba-Korinthe 7:39) Ho kena lenyalong le motho e mong ea sa kopaneleng tumelo ea bolumeli ba hao ho ka hlahisa bothata bo fetang le ba ho pana poho le tonki.
Phapang ea tumelo ea bolumeli ke le leng la mabaka a ka ’nang a etsa hore banyalani ba kene jokong e sekameng. Balekane ba lebeletsaneng—esita leha ba le tumelong e le ’ngoe—ba etsa hantle ha ba ipotsa, ‘Na re na le lipakane tse tšoanang? Re tla lula hokae? Ke mang ea tla sebetsana le moralo oa tšebeliso ea chelete? Na bobeli ba rōna re tla sebetsa? Na re tla ba le bana? Na kamano ea lenyalo e tla laoloa ke mosa le ho nahanelana?’
Ho isa bohōleng bo itseng, mokhoa oo lintlha tse joalo li buisanoang ka oona o ka bontša hore na joko e tla ba e otlolohileng kapa e be e sekameng. Ke ’nete hore ha ho batho ba babeli ba tšoanelanang ka ho feletseng. Leha ho le joalo, haeba ka kakaretso, nakong ea lefereho bana ba babeli ba ka tobana le ho rarolla mathata hammoho ’me haeba ba ka boloka mecha ea puisano e bulehile, mohlomong ba ke ke ba kena jokong e sekameng.