• Ho Ile ha “Boleloa Hore o Lokile ka Mesebetsi”
    Molula-Qhooa—2013 | November 1

    • RAHABA OA LETEKATSE

      Rahaba e ne e le letekatse. Pele, seo se ile sa tšosa bahlalosi ba bang ba Bibele hoo ba ileng ba re Rahaba e ne e mpa feela e le mohlokomeli oa ntlo ea baeti. Leha ho le joalo, Bibele eona e bua ka ho hlaka ebile ha e pate seo e leng ’nete. (Joshua 2:1; Baheberu 11:31; Jakobo 2:25) Ho bonahala mosebetsi oa Rahaba o ne o amoheleha ho batho ba Kanana. Le hoja moetlo oa habo Rahaba o ne o lumella botekatse, seo ha se bolele hore letsoalo la hae—e leng ntho eo Jehova a e kentseng ka hare ho rōna, e re thusang ho tseba se nepahetseng le se fosahetseng—le ne le sa mo tšoenye. (Baroma 2:14, 15) E ka ’na eaba Rahaba o ne a hlajoa ke lihlong ka lebaka la tsela eo a neng a phela ka eona. Ho tšoana le batho ba bangata kajeno ba phelang bophelo bo joalo, mohlomong o ne a sa tsebe hore na o tla tsoa joang, a se na boikhethelo haeba a ne a batla ho hlokomela lelapa la hae.

  • Ho Ile ha “Boleloa Hore o Lokile ka Mesebetsi”
    Molula-Qhooa—2013 | November 1

    • O ILE A AMOHELA LIHLOELA

      Ka letsatsi le leng, nakoana pele Baiseraele ba pota Jeriko, ho ile ha fihla batho ba babeli bao Rahaba a sa ba tsebeng. Banna bao ba babeli ba ne ba tšepile hore ba tla feta ho se ea ba lemohang, empa kaha batho motseng oo ba ne ba tšohile, ba bangata ba ne ba le malala-a-laotsoe ho bona haeba ho e-na le batho ba ka bonahalang joaloka lihloela tsa Baiseraele. E ka ’na eaba Rahaba o ile a lemoha kapele hore na ke bo-mang. E ne e le ntho e tloaelehileng hore Rahaba a eteloe ke banna bao a sa ba tsebeng, empa bana bona ba ne ba ipatlela marobalo feela—ba ne ba sa tlela ho kopanela liphate le eena.