Molimo o Amohela ba Tšepahalang

1, 2. Jafeta le morali oa hae ba ile ba tobana le boemo bofe bo thata?

MOROETSANA o ile a tsoa ho ea khahlanyetsa ntate oa hae. O ne a thabetse ho mo bona a khutla a hlōtse ntoeng. O ne a thabile hoo a ileng a bina a ba a tantša. Mohlomong o ile a makatsoa ke seo ntate oa hae a ileng a se etsa le ho se bua. Ntate o ile a tabola liaparo tsa hae ’me a re: “Oho, morali oa ka! Ka sebele u entse hore ke kokobele.” O ile a bolella morali hore o entse tšepiso ho Jehova ’me e tl’o ama morali oa hae bophelo bohle ba hae. Tšepiso eo e ne e tl’o etsa hore a se ke a nyaloa kapa a ba le bana. Empa hang-hang morali o ile a araba ntate ka tsela e khothatsang, a mo khothalletsa hore a phethahatse tšepiso eo a e entseng ho Jehova. Karabo ea hae e ne e bontša hore o kholisehile hore eng kapa eng eo Jehova a batlang hore a e etse e tla ba molemo. (Baahloli 11:34-37) Ha ntate oa hae a bona hore o na le tumelo, o ile a thaba haholo kaha o ne a tseba hore boikemisetso ba hae bo tla thabisa Jehova.

² Jafeta le morali oa hae ba ne ba tšepa Jehova ka ho feletseng ba bile ba tšepa le tsela eo a etsang lintho ka eona. Ba ile ba mo tšepa esita le maemong a thata. Ba ne ba batla ho amoheloa ke Jehova, ’me ba ikemiselitse ho etsa eng kapa eng ho finyella seo.

 3. Mohlala oa Jafeta le morali oa hae o ka re thusa joang kajeno?

³ Ka linako tse ling ho thata ho tšepa Jehova. Ho hlokahala hore re “loane ntoa e thata bakeng sa tumelo.” (Juda 3) Ho ithuta kamoo Jafeta le morali oa hae ba ileng ba mamella maemo a thata kateng ho tla re thusa ho etsa seo. Ba ile ba thusoa ke eng hore ba lule ba tšepahala ho Jehova?

4, 5. (a) Jehova o ile a fa Baiseraele taelo efe ha ba kena Naheng e Tšepisitsoeng? (b) Ho latela Pesaleme ea 106, Baiseraele ba ile ba tleloa ke liphello life ka lebaka la ho se mamele?

⁴ Jafeta le morali oa hae ba ne ba lemoha hore Baiseraele ha baa ka ba mamela Jehova. Lilemo tse ka bang 300 pele ho moo, Jehova o ne a laetse Baiseraele hore ba bolaee barapeli bohle ba litšoantšo Naheng e Tšepisitsoeng, empa ha baa ka ba mamela. (Deuteronoma 7:1-4) Baiseraele ba bangata ba ile ba qala ho etsisa Bakanana, ba neng ba rapela melimo ea bohata ba bile ba le boitšoaro bo bobe.—Bala Pesaleme ea 106:34-39.

⁵ Kaha Baiseraele ha baa ka ba mamela Jehova, ha aa ka a ba sireletsa lireng tsa bona. (Baahloli 2:1-3, 11-15; Pesaleme ea 106:40-43) E tlameha ebe ho ne ho le thata hore malapa a ratang Jehova a lule a tšepahala ho eena lilemong tseo tse boima. Leha ho le joalo, ho na le batho ba ileng ba lula ba tšepahala ba tlalehiloeng ka Bibeleng, ba kang Jafeta le morali oa hae, Elkana, Anna le Samuele. Ba ne ba ikemiselitse ho khahlisa Jehova.—1 Samuele 1:20-28; 2:26.

 6. Batho ba mehleng ee ba joang, hona re lokela ho etsa’ng?

⁶ Batho ba mehleng ena ba nahana joaloka Bakanana le ho etsa lintho joaloka bona. Ba rata boitšoaro bo bobe, ntoa le chelete. Ke kahoo Jehova a re lemosang ka ho hlaka. O batla ho re sireletsa feela joalokaha a ne a batla ho sireletsa Baiseraele tšusumetsong e mpe ea Bakanana. Na re ka ithuta liphosong tsa bona? (1 Bakorinthe 10:6-11) A re etseng sohle seo re ka se khonang ho qoba tšusumetso e mpe ea batho ba re potolohileng. (Baroma 12:2) Na re tla fela re etse joalo?

 7. (a) Batho ba habo Jafeta ba ile ba mo tšoara joang? (b) Jafeta eena o ile a ba tšoara joang?

⁷ Mehleng ea Jafeta, Baiseraele ba ne ba hateletsoe ke Bafilista le Baammone, kaha ha baa ka ba mamela Jehova. (Baahloli 10:7, 8) Ho phaella lireng tseo tsa naha ea habo, Jafeta o ne a boetse a e-na le mathata le barab’abo le baeta-pele ba Iseraele. Kaha barab’abo ba ne ba le mōna ba bile ba mo hloile, ba ile ba mo qobella ho tloha sebakeng seo ka molao e leng sa hae. (Baahloli 11:1-3) Jafeta ha aa ka a lumella hore bokhopo ba bona bo ame tsela eo a etsang lintho ka eona. Re tseba seo joang? Hobane ha banna ba baholo ba mo kōpa thuso, o ile a ba thusa hang-hang. (Baahloli 11:4-11) Ebe ke eng e ka ’nang eaba e ile ea susumetsa Jafeta ho etsa joalo?

8, 9. (a) Mohlomong Jafeta o ile a thusoa ke melao-motheo efe e Molaong oa Moshe? (b) Ke eng e neng e le ea bohlokoa ka ho fetisisa bophelong ba Jafeta?

⁸ Jafeta e ne e le mohlabani ea matla, ’me o ne a tseba histori ea Iseraele hantle le Molao oa Moshe. O ne a ithutile tseleng eo Jehova a tšoarang Baiseraele ka eona hore na ke lintho life tse nepahetseng le tse fosahetseng mahlong a Molimo. (Baahloli 11:12-27) Jafeta o ile a sebelisa tsebo eo ha a etsa liqeto bophelong ba hae. O ne a tseba hantle hore na Jehova o ikutloa joang ka batho ba bohale le ba iphetetsang le hore o batla hore batho ba hae ba ratane. Ho phaella moo, Molao o ne o mo rutile hore na a tšoare batho ba bang joang, esita le ba mo hloileng.—Bala Exoda 23:5; Levitike 19:17, 18.

⁹ Mohlomong mohlala oa Josefa o ile oa thusa Jafeta. E tlameha ebe o ne a tseba hore Josefa o ile a thusa banab’abo le hoja ba ne ba mo hloile. (Genese 37:4; 45:4, 5) E ka ’na eaba ho nahana ka mohlala ona ho ile ha thusa Jafeta hore a itšoare ka tsela e khahlisang Jehova. Barab’abo Jafeta ba ile ba mo utloisa bohloko. Empa Jafeta o ne a nka hore ho loanela lebitso la Jehova le batho ba hae ke habohlokoa ho feta tsela eo a ikutloang ka eona. (Baahloli 11:9) O ne a ikemiselitse ho tšepahala ho Jehova. Boikutlo bona bo ile ba etsa hore Jehova a mo hlohonolofatse hammoho le Baiseraele.—Baheberu 11:32, 33.

10. Melao-motheo ea Bibele e ka re thusa joang hore re etse lintho ka tsela e bontšang hore re tiile tumelong?

¹⁰ Na ho na le seo re ka ithuta’ng sona mohlaleng oa Jafeta? Re tla etsa’ng ha Bakreste-’moho le rōna ba re utloisa bohloko kapa re nka hore ba re tšoara ka leeme? Ha rea lokela ho lumella seo hore se re thibele ho sebeletsa Jehova. A re se keng ra khaotsa ho ea libokeng kapa ho qeta nako re e-na le balumeli-’moho le rōna. A re etsiseng Jafeta ’me re mamele Jehova. Sena se tla re thusa ho mamella le maemong a thata, e le hore le rōna re ka behela ba bang mohlala o motle.—Baroma 12:20, 21; Bakolose 3:13.

11, 12. Jafeta o ile a etsa kano efe, hona e ne e akarelletsa eng?

¹¹ Jafeta o ne a tseba hore o hloka thuso ea Molimo e le hore a ka lopolla Baiseraele ho Baammone. O ile a tšepisa Jehova hore ha a ka mo thusa ho hlōla, o tla mo fa motho oa pele ea tla tsoa ka tlung ho tla mo khahlanyetsa ha a khutla ntoeng, e le “nyehelo ea secheso.” (Baahloli 11:30, 31) Seo se ne se bolela’ng?

¹² Jehova ha a rate ha batho ba etsoa mahlabelo, kahoo rea tseba hore Jafeta o ne a sa tl’o bolaea motho eo. (Deuteronoma 18:9, 10) Molaong oa Moshe, nyehelo ea secheso e ne e le mpho e ikhethang eo motho a neng a e fa Jehova kaofela. Kahoo, Jafeta o ne a bolela hore motho eo a neng a tla mo fa Jehova o ne a tla sebeletsa tabernakeleng bophelo bohle ba hae. Jehova o ile a mamela Jafeta eaba o mo thusa ho hlōla ntoeng. (Baahloli 11:32, 33) Joale Jafeta o ne a tla fana ka mang ho Jehova?

13, 14. Mantsoe a Jafeta a ho Baahloli 11:35 a bontša joang hore o ne a e-na le tumelo?

¹³ Ak’u nahane ka boemo bo hlalositsoeng qalong ea sehlooho sena. Ha Jafeta a khutla ntoeng, motho oa pele ea ileng a tsoa ho tla mo khahlanyetsa e bile morali oa hae, eo e neng e le ngoana ea mong feela! Na Jafeta o ne a tla phethahatsa tšepiso ea hae? Na o ne a tla nyehela morali oa hae ho Jehova, e le hore a sebeletse tabernakeleng bophelo bohle ba hae?

¹⁴ E tlameha ebe melao-motheo e Molaong oa Molimo e ile ea boela ea thusa Jafeta hore a etse qeto e nepahetseng. Mohlomong o ile a hopola mantsoe a ho Exoda 23:19, a reng batho ba Molimo ba lokela ho ithaopela ho fa Jehova lintho tse ntle ka ho fetisisa. Molao o ne o boetse o re ha motho a entse kano ho Jehova, ha aa lokela ho “koenehela lentsoe la hae. O lokela ho etsa tumellanong le sohle se tsoileng molomong oa hae.” (Numere 30:2) Jafeta o ne a lokela ho phethahatsa tšepiso ea hae, le hoja a ne a tseba hore na e ne e tla mo ama hakae le morali oa hae, ’me o ne a tla be a etsisa Anna eo mohlomong a phetseng mehleng ea hae. Morali oa hae o ne a ke ke a ba le bana kaha o ne a tla be a sebeletsa tabernakeleng. Kahoo, Jafeta o ne a sa tl’o ba le mojalefa. (Baahloli 11:34) Leha ho le joalo, Jafeta o ile a re: “Ke ahlamisitse molomo oa ka ho Jehova, ’me ha ke khone ho koeneha.” (Baahloli 11:35) Jehova o ile a amohela nyehelo eo ea Jafeta, ’me a mo hlohonolofatsa. Na u ka be u ile ua tšepahala joaloka Jafeta?

15. Boholo ba rōna re tšepisitse Jehova eng, hona re ka bontša joang hore re tšepahalla tšepiso eo?

¹⁵ Ha re inehela ho Jehova, re ile ra mo tšepisa hore re tla etsa thato ea hae ka linako tsohle. Re ne re tseba hore hase kamehla ho tla ba bonolo ho phethahatsa tšepiso eo. Empa re itšoara joang ha re kōptjoa hore re etse ntho eo re sa e rateng? Haeba re ikemiselitse re bile re ithaopela ho mamela Molimo, re bontša hore re tšepahalla tšepiso eo re e entseng. Mahlabelo a rōna a ka ’na a re utloisa bohloko, empa kamehla litlhohonolofatso tsa Jehova li ba ngata. (Malakia 3:10) Joale re ithuta’ng mohlaleng oa morali oa Jafeta? O ile a itšoara joang ha a utloa tšepiso eo ntate oa hae a e entseng?

16. Morali oa Jafeta o ile a itšoara joang ha a utloa tšepiso eo ntate oa hae a e entseng? (Sheba setšoantšo se qalong.)

¹⁶ Tšepiso ea Jafeta e ne e fapane le ea Anna. Anna o ne a tšepisitse hore o tla isa mora oa hae Samuele tabernakeleng ho ea sebeletsa e le Monazari. (1 Samuele 1:11) Banazari ba ne ba lumeletsoe ho nyala le ho ba le malapa. Empa morali oa Jafeta o ne a fanoe e le “nyehelo ea secheso,” kahoo o ne a ke ke a nyaloa le ho ba le bana. (Baahloli 11:37-40) Ak’u nahane ka seo a ileng a se tela! Mohlomong a ka be a nyetsoe ke monna ea hlaheletseng kaha ntate oa hae e ne e le moeta-pele oa Iseraele. Empa joale e ne e tl’o ba mosebeletsi tabernakeleng. Ebe o ile a itšoara joang? O ile a bontša hore o nka ho sebeletsa Jehova e le habohlokoa, ha a re ho ntate oa hae: “Nketse ho ea ka se tsoileng molomong oa hao.” (Baahloli 11:36) O ile a tela ho ba le monna le bana e le hore a sebeletse Jehova. Re ka etsisa moea oa hae oa boitelo joang?

17. (a) Re ka etsisa tumelo ea Jafeta le morali oa hae joang? (b) Mantsoe a ho Baheberu 6:10-12 a u khothalletsa ho ba le moea oa boitelo joang?

¹⁷ Bacha ba bangata ba Bakreste ba khetha ho se kene lenyalong ’me banyalani ba bang ba khetha ho se be le bana, mohlomong ho fihlela ka nako e itseng. Hobane’ng? Hobane ba batla ho sebeletsa Jehova haholoanyane. Hape, Bakreste ba bangata ba hōlileng ba tela nako eo ba ka beng ba e qeta le bana ba bona le litloholo. Ho e-na le hoo, ba sebelisa nako le matla a bona tšebeletsong ea Jehova. Ba bang ba bona ba sebetsa libakeng tsa kaho kapa ba ea Sekolong sa Baevangeli ba ’Muso, e be ba ea liphuthehong tse hlokang bahoeletsi ba eketsehileng. Ba bang ba etsa litlhophiso tsa hore ba eketse tšebeletso ea bona ho Jehova likhoeling tsa Sehopotso. Jehova a ke ke a lebala mosebetsi oo bahlanka ba hae ba tšepahalang ba o entseng ka lerato. (Bala Baheberu 6:10-12.) Uena u tla etsa joang? Na u tla itela e le hore u sebeletse Jehova haholoanyane?

18, 19. Re ithutile’ng tlalehong ea Bibele ea Jafeta le morali oa hae, hona re ka ba etsisa joang?

¹⁸ Ke eng e thusitseng Jafeta hore a hlōle mathata a hae a mangata? O ile a lumella Jehova hore a mo tataise ha a etsa liqeto. O ile a khetha hore a se ke a susumetsoa ke batho ba mo potolohileng. ’Me a lula a tšepahala esita le ha batho ba bang ba mo utloisa bohloko. Jehova o ile a hlohonolofatsa Jafeta le morali oa hae ka lebaka la boitelo ba bona, ’me a boela a ba sebelisetsa ho atolosa borapeli ba ’nete. Le ha ba bang ba khaotsa ho etsa se nepahetseng, Jafeta le morali oa hae ba ile ba lula ba tšepahala ho Jehova.

¹⁹ Bibele e re: “Le be baetsisi ba bao ka tumelo le ho se fele pelo ba ruang litšepiso.” (Baheberu 6:12) A re etsiseng Jafeta le morali oa hae, kaha Jehova o tla re hlohonolofatsa ha re lula re tšepahala.