Ehude Monna ea Neng a e-na le Tumelo le Sebete

LILEMO tse ngata li ne li fetile ho tloha ha Baiseraele ba beha leoto Naheng e Tšepisitsoeng ka lekhetlo la pele. Moshe le mohlahlami oa hae, Joshua, e ne e se e le khale ba shoele. Ha banna ba joalo ba tumelo ba le sieo, kananelo bakeng sa borapeli bo hloekileng e ile ea theoha ka tšohanyetso. Baiseraele ba ne ba se ba bile ba qalile ho sebeletsa bo-Baale le liashera.a Ka lebaka leo, Jehova o ile a nehela batho ba hae matsohong a Baasyria ka lilemo tse robeli. Joale Baiseraele ba ile ba hooa ho Molimo bakeng sa thuso. Ka mohau, o ile a mamela. Jehova o ile a hlahisa moahloli, Othniele, ho lopolla batho ba Hae.—Baahloli 3:7-11.

Liketsahalo tsena li ka be li ile tsa ruta Baiseraele ’nete ea motheo—ho mamela Jehova ho tlisa litlhohonolofatso, athe ho se mamele ho fella ka lithohako. (Deuteronoma 11:26-28) Leha ho le joalo, sechaba sa Iseraele se ile sa hlōleha ho ithuta thuto ena. Ka mor’a lilemo tse 40 tsa khotso, se ile sa boela sa furalla borapeli bo hloekileng.—Baahloli 3:12.

Ho Haptjoa ke Bamoabe

Lekhetlong lena Jehova o ile a lumella batho ba hae ho oela matsohong a Morena Eglone oa Moabe. Bibele e mo hlalosa e le “motho ea nonneng haholo.” Ka thuso ea Baammone le Baamaleke, Eglone o ile a hlasela Baiseraele ’me a haha ntlo ea hae ea borena Jeriko, “motse oa Lipalema.” Ke ho neng ho sa lebelloa hakaakang hore ebe joale motseng oa pele oa Kanana o ileng oa haptjoa ke Iseraele, ho ne ho e-na le ntlo-khōlō ea ea neng a rapela molimo oa bohata Kemoshe!b—Baahloli 3:12, 13, 17.

Eglone o ile a hatella Baiseraele ka lilemo tse latelang tse 18, ka ho hlakileng a batla lekhetho le boima ho bona. Ka ho batla sethabathaba sa linako tse behiloeng, Bamoabe ba ile ba ntlafatsa boemo ba bona moruong ha ba ntse ba horula matlotlo a Iseraele. Hoa utloahala hore batho ba Molimo ba ile ba hooa bakeng sa thuso, ’me Jehova o ile a boela a mamela. O ile a ba hlahisetsa ’moloki e mong—lekhetlong lena e le Mobenjamine ea bitsoang Ehude. Ho felisa khatello ea Eglone ho Iseraele, Ehude o ile a lokisetsa ho nka bohato letsatsing le latelang la ho lefa sethabathaba.—Baahloli 3:14, 15.

Ho lokisetsa bohato ba hae bo bontšang sebete, Ehude o ile a etsa sabole e hlabang ka mahlakoreng a mabeli e bolelele ba setsoe. Haeba e ne e le setsoe se sekhutšoanyane, sebetsa sena se ne se le bolelele ba lisentimithara tse 38. Ba bang ba ne ba tla nka hore ke thipa e hlabang ka mahlakoreng a mabeli. Ho totobetse hore e ne e se na thupa e tšekaletseng lipakeng tsa karolo e sehang le thekō. Ka lebaka leo, Ehude o ne a ka pata sabole ea hae e nyenyane lemenong la seaparo sa hae. Ho feta moo, kaha Ehude o ne a le leqele, o ne a ka tlamella sabole ea hae ka lehlakoreng la hae le letona—e leng sebaka se sa tloaelehang bakeng sa sebetsa.—Baahloli 3:15, 16.

Leqheka la Ehude le ne le le kotsi. Ka mohlala, ho thoe’ng haeba balebeli ba morena ba ne ba ka phenya-phenya Ehude ba batla libetsa? Esita le haeba ba ne ba ke ke ba etsa hoo, ka sebele ba ne ba ke ke ba siea morena oa bona a le mong le Moiseraele! Empa haeba ba ne ba ka etsa joalo ’me Eglone a bolaoa, Ehude o ne a ka phonyoha joang? O ne a ka matha ho isa kae pele balebeli ba Eglone ba fumana se etsahetseng?

Ha ho pelaelo hore Ehude o ile a nahanisisa ka makolopetso a joalo, mohlomong a nahana ka liphello tse ’maloa tse bohloko. Leha ho le joalo, o ile a tsoela pele ka morero oa hae, a bontša sebete a ba a sebelisa tumelo ho Jehova.

Ehude o Kopana le Eglone

Letsatsi la ho lefa sethabathaba se latelang la fihla. Ehude le banna ba hae ba kena ka tlung ea borena. Kapele, ba ne ba eme ka pel’a Morena Eglone. Empa nako e ne e e-s’o fihle ea hore Ehude a hlasele. Ka mor’a hore sethabathaba se lefshoe, Ehude o ile a lokolla ba neng ba tšoere sethabathaba hore ba tsamaee.—Baahloli 3:17, 18.

Ke hobane’ng ha Ehude a ile a lieha ho hlaba Eglone? Na o ile a inehela tšabong? Le hanyenyane! Ho phetha morero oa hae, ho ne ho hlokahala hore Ehude a be le puisano ea lekunutung le morena—e leng seo a sa kang a lumelloa ho se etsa ha ba kopana ka lekhetlo lena la pele. Ho feta moo, ho ne ho tla hlokahala hore Ehude a balehe ka potlako. Motho a le mong o ne a ka phonyoha habonolo haholo ho feta balebeli bohle ba neng ba tšoere sethabathaba. Ka lebaka leo, Ehude o ile a letela nako e loketseng. Ho etela Eglone ka nako e khutšoanyane ho ile ha mo nolofalletsa hore a tloaelane le sebōpeho sa ntlo ea borena le ho fumana hantle hore na morena o sireletsehile hakae.

Ha ba fihla “merafong e pel’a Gilgale,” Ehude o ile a siea banna ba hae ’me a khutlela ntlong ea borena ea Eglone. Leeto la lik’hilomithara tse peli ka maoto le ile la fa Ehude nako e seng kae ea ho nahana ka morero oa hae le ho rapella tlhohonolofatso ea Jehova.—Baahloli 3:19.

Ehude oa Khutla

Ho bonahala eka Ehude o ile a amoheloa tlung ea borena. Mohlomong sethabathaba se sengata seo a ileng a fana ka sona pejana se ile sa thabisa Eglone. Ho ka etsahala hore le hoja ketelo ea pele e ne e le khutšoanyane, e ile ea fa Ehude monyetla o lekaneng oa ho theha kamano e ntle le morena. Ho sa tsotellehe hore na boemo ke bofe, Ehude o ne a khutletse ho Eglone.

Ehude o ile a re: “Ke na le taba ea lekunutu le uena, morena!” Taba ea hore ebe o fihlile boemong bona e ne e le pontšo ea hore Jehova o ne a mo tataisa. Empa, ho ne ho e-na le bothata. “Taba ea lekunutu” eo Ehude a neng a e tšoere e ne e ke ke ea buuoa balebeli ba morena ba le teng. Haeba Jehova o ne a tla kenella, Ehude o ne a hloka thuso eo hang-hang. Morena o ile a laela: “Khutsang!” Kaha Eglone o ne a sa batle hore ‘taba ena ea lekunutu’ e utluoe, o ile a leleka balebeli ba hae. U ka inahanela hore na Ehude o ile a imoloha hakaakang!—Baahloli 3:19.

Eglone o ne a lutse phaposing ea hae e ka holimo ha Ehude a e-tla ho eena ’me a re: “Ke u tliselitse taba e tsoang ho Molimo.” Ha a re “Molimo,” na Ehude o ne a bua ka Kemoshe? E ka ’na eaba Eglone o ile a nahana joalo. A tšoasehile, o ile a tloha teroneng ea hae ’me a ema a lebeletse ho hong. Ehude a atamela, mohlomong a tsamaea ka hloko e le hore a se ke a tsosa libata masene. Joale ka potlako, “Ehude a ntša letsoho la leqele, a hula sabole e qholong ka letsohong la hae le letona, a . . . phehlèla [Eglone] ka eona mpeng. Mofeng oa kena le sabole, eaba mafura a koahela sabole, hobane ha aa ka a hula sabole ka mpeng, ea phunyelletsa, ea ea hlaha ka morao.”—Baahloli 3:20-22, NW.

Balebeli ba morena ha ba ntse ba letile haufinyane, ha baa ka ba sisinyeha. Empa Ehude o ne a ntse a le kotsing. Neng le neng bahlanka ba Eglone ba ne ba ka ’na ba kena ka potlako ’me ba fumana setopo sa morena oa bona ea oeleng. Ho ne ho hlokahala hore Ehude a balehe ka potlako! A notletse menyako, o ile a phonyoha ka lesobana la moea la phaposi ena e ka holimo.—Baahloli 3:23, 24a.

Ho Fumanoa le ho Hlōloa

Kapele bahlanka ba Eglone ba ile ba thahasella ho tseba se etsahalang. Empa, ha baa ka ba iteta sefuba ho utloisa morena bohloko ka ho sitisa seboka sa hae sa lekunutung. Eaba ba hlokomela hore mamati a phaposi e ka holimo a notletsoe. Ba nahana: “Ekaba o ikhurumelitse maoto tlung ea hae ea lehlabula.” Leha ho le joalo, ha nako e ntse e feta, ho thahasella feela ho tseba se etsahalang ho ile ha nkeloa sebaka ke ho tšoenyeha ho eketsehang. Balebeli ba Eglone ba ne ba sitoa ho leta ho ea pele. “Eaba ba nka senotlolo, [’me ba bula menyako ea kamore e ka holimo] ba bona mong a bona a rapaletse fatše, a shoele.”—Baahloli 3:25

Ka nako eo Ehude o ne a phonyohile. O ile a feta merafong e Gilgale ’me qetellong a fihla Seira, naheng ea Efraime e lithaba. Ehude o ile a bokella banna ba Iseraele ’me a ba etella pele ba kopane hore ba hlasele Bamoabe. Tlaleho ena e bolela hore ba ile ‘ba bolaea ba-Moabe ba batlileng ho ba likete tse leshome, e leng bohle bahale le linatla, ha se ke ha phonyoha le ea mong.’ Ha Bamoabe ba se ba hlōtsoe, ha hoa ka ha hlola ho e-ba le likhathatso naheng ea Iseraele ka lilemo tse 80.—Baahloli 3:26-30.

Ho Ithuta Mohlaleng oa Ehude

Tumelo ho Molimo e ile ea susumetsa Ehude. Baheberu khaolo ea 11 ha e mo bolele ka ho toba e le e mong oa “bao ka tumelo ba ileng ba hlōla mebuso likhohlanong, . . . ba fetoha ba sebete ntoeng, ba qhalakanya mabotho a ntoa a basele.” (Baheberu 11:33, 34) Leha ho le joalo, Jehova o ile a tšehetsa Ehude ha a ntse a nka bohato ka tumelo ’me a pholosa Baiseraele pusong ea khatello ea Morena Eglone.

Sebete e ne e le e ’ngoe ea litšoaneleho tsa Ehude. O ne a tlameha ho ba sebete e le hore a ka sebelisa sabole ea sebele ka katleho. Re le bahlanka ba Molimo ba kajeno, ha re nke sabole e joalo. (Esaia 2:4; Matheu 26:52) Empa, re sebelisa “sabole ea moea,” Lentsoe la Molimo. (Baefese 6:17) Ehude o ne a tseba ho sebelisa sebetsa sa hae. Le rōna ho hlokahala hore re be le tsebo ha re sebelisa Lentsoe la Molimo ha re bolela litaba tse molemo tsa ’Muso. (Matheu 24:14) Thuto ea botho ea Bibele, ho ba teng kamehla libokeng tsa Bokreste, ho kopanela tšebeletsong ka cheseho le ho itšetleha ka Ntate oa rōna oa leholimo ka tieo ho tla re thusa ho etsisa litšoaneleho tse bontšitsoeng ke Ehude, eo ka sebele e neng e le monna ea nang le tumelo le sebete.

[Mongolo o botlaaseng ba leqephe]

[Setšoantšo se leqepheng la 31]

Ehude le banna ba hae ba ile ba fa Morena Eglone sethabathaba

[Tlhaloso ea Moo Setšoantšo se Nkiloeng Teng]

Reproduced from Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s